Author: Ko Lay

အောကတိုဘာ ၂၄၊ ၂၀၁၉
M-Media

-ကုလရဲ့ 2030 Agenda for Sustainable Development ရည်မှန်းချက်ပါ သတ်မှတ်ချက်တွေကို ပြည့်မီအောင်ဆောင်ရွက်နိုင်မှုဆုကို မလေးရှားနိုင်ငံက အမျိုးသမီး စွမ်းဆောင်ရည်မြှင့်တင်ရေးအဖွဲ့ Sisters in Islam ကို ပူးတွဲတည်ထောင်သူ ဇိုင်နာ အန်ဝါရ်က ရရှိသွားခဲ့ပါတယ်။

အဲဒီဆုကို လူပုဂ္ဂိုလ်တွေ၊ အဖွဲ့အစည်းတွေကို ကုလက နှစ်စဉ် ပေးအပ်ချီးမြှင့်တာပါ။ ဇိုင်နာရဲ့ ကျား၊ မ တန်းတူညီရေး၊ အမျိုးသမီးတွေကို စွမ်းဆောင်ရည်မြှင့်တင်ပေးရေး အရေးပါတဲ့ ဆောင်ရွက်ချက်တွေကို အသိအမှတ်ပြုတဲ့အနေနဲ့ ဒီလို ရွေးချယ်ချီးမြှင့်တာလို့ ကုလက ပြောကြားခဲ့ပါတယ်။

ဇိုင်နာဟာ SIS နဲ့ Musawah ဆိုတဲ့ အဖွဲ့နှစ်ခုကိုလည်း တည်ထောင်ထားပြီး အစ္စလာမ်ဘာသာဝင် အမျိုးသမီးတွေ၊ အစ္စလာမ့်အသိုင်းအဝိုင်းမှာ နေထိုင်ကြတဲ့ အမျိုးသမီးတွေရဲ့ အခြေအနေကို မြှင့်တင်ပေးနေသူလည်း ဖြစ်ပါတယ်။

Musawah ဟာ အစ္စလာမ်ဘာသာဝင် မိသားစုတွေမှာ တရားမျှတရေးနဲ့ တန်းတူညီမျှရေး ရရှိအောင် အသိပညာပေးနေတဲ့ ကမ္ဘာလုံးဆိုင်ရာ အဖွဲ့အစည်းတစ်ခုလည်း ဖြစ်ပါတယ်။

ဇိုင်နာကို ပြည်တွင်းမှာ ဝေဖန်ရှုတ်ချမှုတစ်ချို့ ရှိနေပြီးဆီလန်ဂေါပြည်နယ် ဖသ်ဝါဓမ္မသတ်ကော်မတီက သူမရဲ့ SIS အဖွဲ့အစည်းဟာ လမ်းမှားတဲ့အဖွဲ့ ဖြစ်တယ်လို့ ထုတ်ပြန်ထားပါတယ်။ ဒီကိစ္စကို ဖြေရှင်းဖို့ SIS က တရားရုံးချုပ်ကို လျှောက်ထားခဲ့ပေမယ့် ပယ်ချခံခဲ့ရပါတယ်။

မလေးရှားနိုင်ငံသားတွေဖြစ်ကြတဲ့ အလီရှာ စီထရီဒါနဲ့ ပက်ထရစ်ရှာ ရှီးတို့လည်း ကုလရဲ့ ဂုဏ်ပြုဆုကို ရရှိခဲ့ပြီး ဖယ်ကျဉ်ခံထားရတဲ့ ကလေးငယ်တွေကို ပညာသင်ကြားခွင့်ရရှိအောင် ကြိုးပမ်းဆောင်ရွက်မှုတွေအတွက် အသိအမှတ်ပြု ခံရတာ ဖြစ်ပါတယ်။

အခြား မလေးရှားနိုင်ငံသားတစ်ဦးဖြစ်တဲ့ ဇက်ကရီ အဘ်ဒူလ် ဟာမစ်ဟာ သဘာ၀ပတ်ဝန်းကျင်ဆိုင်ရာ ထိန်းသိမ်းစောင့်ရှောက်မှု၊ ဂေဟစနစ်ညီညွတ်ရေး ဆောင်ရွက်မှုတွေအတွက် ကုလရဲ့ ဂုဏ်ပြုဆုကို ရရှိခဲ့ပါတယ်။ ဇက်ကရီဟာ သဘာ၀ပတ်ဝန်းကျင်ဆိုင်ရာ တက်ကြွလှုပ်ရှားသူတစ်ဦးလည်း ဖြစ်ပါတယ်။

Ref: Malaysia Kini