အောက်တိုဘာ ၂၈၊ ၂၀၁၉
M-Media
-ဆီးရီးယားနိုင်ငံ အနောက်မြောက်ပိုင်း အီဒလစ်မြို့မှာ အမေရိကန်အထူးတပ်ဖွဲ့ဝင်တွေ ပြုလုပ်တဲ့ စစ်ဆင်ရေးအတွင်း IS အကြမ်းဖက်အဖွဲ့ခေါင်းဆောင် အဘူ ဘာကာ အလ်-ဘဂ္ဂဒါဒီ သေဆုံးခဲ့တယ်လို့ အမေရိကန်သမ္မတ ဒေါ်နယ်ထရမ့်က မနေ့မှာ ထုတ်ပြန်ပြောကြားလိုက်ပါတယ်။
ဘဂ္ဂဒါဒီတစ်ယောက် ဘာရီရှာရွာအနီး ပိတ်ဆို့ခံထားရချိန်မှာ မြေအောက်လှိုင်ခေါင်းထဲကို ပြေးဝင်သွားပြီးတဲ့နောက် ခန္ဓာကိုယ်မှာ ဝတ်ဆင်ထားတဲ့ အသေခံဗုံးခွဲဝတ်စုံကို ဖောက်ခွဲကာ အဆုံးစီရင်ခဲ့တာ ဖြစ်ပါတယ်။ ပေါက်ကွဲမှုအတွင်း သူ့ရဲ့ ကလေး ၃ ဦးလည်း သေဆုံးသွားတယ်လို့ ထရမ့်က ဆိုပါတယ်။
မနေ့က အိမ်ဖြူတော်ကနေတစ်ဆင့် တိုင်းပြည်ကိုပြောကြားတဲ့မိန့်ခွန်းမှာ ထရမ့်က ဘဂ္ဂဒါဒီကို သုတ်သင်ဖို့ ဆောင်ရွက်မှု အသေးစိတ်၊ ဘဂ္ဂဒါဒီရဲ့ နောက်ဆုံးအခြေအနေတွေကို ထည့်သွင်းပြောဆိုခဲ့ပါတယ်။ စစ်ဆင်ရေးအတွင်း ဘဂ္ဂဒါဒီရဲ့ အဖွဲ့ဝင်တွေ တော်တော်များများလည်း သေဆုံးခဲ့ပါတယ်။
ဘဂ္ဂဒါဒီရဲ့ ကျန်ရစ်ခဲ့တဲ့ ကလေး ၁၁ ဦးကို ကြားနေအဖွဲ့တစ်ခုက ထိမ်းသိန်းစောင့်ရှောက်ထားတယ်လို့ ထရမ့်က ပြောကြားခဲ့ပြီး ဘယ်သူဘယ်ဝါလည်းဆိုတာကိုတော့ မပြောခဲ့ပါဘူး။
နောက်ဆုံးအချိန်မှာ ဘဂ္ဂဒါဒီဟာ သွေးရူးသွေးတန်းနဲ့ အော်ဟစ် ငိုယို ပြေးလွှားနေခဲ့ပြီး သူရဲဘောကြောင်စွာ သေဆုံးသွားခဲ့တာဖြစ်တယ်လို့လည်း ထရမ့်က ဆိုပါတယ်။ သမ္မတထရမ့်ဟာ စစ်ဆင်ရေးတစ်ခုလုံးကို အိမ်ဖြူတော်ကနေ တိုက်ရိုက်ကြည့်ရှုခဲ့တာပါ။
DNA စစ်ဆေးပြီး
စစ်ဆင်ရေးပြီးဆုံးပြီးတဲ့နောက် အပိုင်းအပိုင်းဖြစ်နေတဲ့ ဘဂ္ဂဒါဒီရဲ့ ခန္ဓာကိုယ်အပိုင်းအစတွေကို DNA စစ်ဆေးခဲ့ပြီး ဘဂ္ဂဒါဒီဖြစ်ကြောင်း အတိအကျ အတည်ပြုနိုင်ခဲ့တယ်လို့ ထရမ့်က ထည့်သွင်း ပြောဆိုခဲ့ပါတယ်။
အရေးကြီးတဲ့ သတင်းအချက်အလက်တွေကို စစ်ဆင်ရေးကနေ ရရှိခဲ့သလို အမေရိကန်တပ်ဖွဲ့တွေ တစ်ဦးမှ ထိခိုက်ဒဏ်ရာရရှိမှု မရှိဘူးလို့လည်း ထရမ့်က ဆိုပါတယ်။
ဘဂ္ဂဒါဒီကို ဆက်ခံမယ့်သူတွေအနေနဲ့ အမေရိကန်ရဲ့လက်ကနေ ပြေးမလွတ်ဘူးလို့လည်း ထရမ့်က ထည့်သွင်းသတိပေးခဲ့ပါတယ်။
နိုင်ငံခြားရေး အောင်မြင်မှု
ဒီစစ်ဆင်ရေးလုပ်ဆောင်ဖို့အတွက် ရုရှား၊ တူရကီ၊ ဆီးရီးယား၊ အီရတ်နဲ့ ဆီးရီးယားက ကာ့ဒ်တပ်ဖွဲ့တွေဟာ ထောက်လှမ်းရေးသတင်းအချက်အလက်တွေ ပေးတာအပါအဝင် ကူညီဆောင်ရွက်မှုတွေ ရှိခဲ့ပြီး ဒီအတွက် ကျေးဇူးတင်တယ်လို့လည်း ထရမ့်က Twitter စာမျက်နှာမှာ ရေးသားခဲ့ပါတယ်။
ဘဂ္ဂဒါဒီ ဘယ်မှာရှိလဲဆိုတာကို ရင်းမြစ်တစ်ခုကနေ ထောက်လှမ်းရေးသတင်း ရရှိခဲ့ပြီးတဲ့နောက် စစ်ဆင်ရေးကို လွန်ခဲ့တဲ့ ၂ ပတ်လောက်ကတည်းက စီစဉ်ခဲ့တာပါ။ ဘဂ္ဂဒါဒီ ပုန်းအောင်းနေတဲ့နေရာဟာ ရုရှားနဲ့ ဆီးရီးယားတပ်ဖွဲ့တွေ ထိန်းချုပ်ထားတဲ့နေရာ ဖြစ်ပါတယ်။
အမေရိကန်ကာကွယ်ရေးဝန်ကြီး မာ့ခ် အက်စ်ပါက စစ်ဆင်ရေးဟာ ဘဂ္ဂဒါဒီကို ဖမ်းဆီး သတ်ဖြတ်ဖို့ဖြစ်ပြီး တပ်ဖွဲ့ဝင်နှစ်ဦး အသေးစားဒဏ်ရာတွေ ရခဲ့ပေမယ့် ပြန်လည်တာဝန်ထမ်းဆောင်နေပြီလို့ ပြောကြားခဲ့ပါတယ်။
ထရမ့်ရဲ့ နိုင်ငံတော်လုံခြုံရေးအကြံပေး ရောဘတ် အို ဘရိုင်ယန်က ဘဂ္ဂဒါဒီရဲ့ ရုပ်အလောင်းကို အစ္စလာမ်ထုံးစံအတိုင်း သင်္ဂြိုဟ်သွားမှာဖြစ်ပြီး၊ ဘင်လာဒင်လိုပဲ ပင်လယ်ရေအောက်မှာ မြှုပ်နှံသွားမယ်လို့ ထုတ်ပြန်ခဲ့ပါတယ်။
ဘဂ္ဂဒါဒီ ဘယ်သူလဲ
ဘဂ္ဂဒါဒီဦးဆောင်တဲ့ IS အကြမ်းဖက်အဖွဲ့ဟာ ၂၀၁၄ ခုနှစ်မှာ အီရတ်နဲ့ ဆီးရီးယားက နယ်မြေတော်တော်များများကို သိမ်းပိုက်နိုင်ခဲ့ပြီး ဘဂ္ဂဒါဒီက သူတို့သိမ်းပိုက်ထားတဲ့ နယ်မြေတွေကို စုပေါင်းကာ ခါလီဖိတ်နိုင်ငံတစ်ခု ထူထောင်ကြောင်း ကြေငြာခဲ့ပါတယ်။
ဆီးရီးယားနဲ့ အီရတ်တို့က ဘာသာရေးလူနည်းစုတွေအပေါ် ကျူးလွန်မှု၊ နိုင်ငံတော်တော်များများမှာ IS အဖွဲ့က ပြုလုပ်တဲ့ အကြမ်းဖက်တိုက်ခိုက်မှုတွေအတွက် ဘဂ္ဂဒါဒီကို တာဝန်ရှိသူအဖြစ် သတ်မှတ်ထားပြီး အမေရိကန်က သူ့ရဲ့ခေါင်းကို ကန်ဒေါ်လာ ၂၅ သန်း ဆုကြေးငွေ ထုတ်ခဲ့ပါတယ်။
IS အဖွဲ့ နယ်မြေတွေ ပြန်လည်ဆုံးရှုံးခဲ့ပြီးတဲ့နောက် ဘဂ္ဂဒါဒီဟာ ပုန်းအောင်းနေထိုင်ခဲ့ပြီး အသံဖိုင်တွေ ထုတပြန်ကာ သူ့ရဲ့နောက်လိုက်တွေကို သတင်းစကားပေးခဲ့ပါတယ်။ သူ့ရဲ့ နောက်ဆုံးအသံဖိုင်ဟာ ပြီးခဲ့တဲ့လမှာ ပေါ်ထွက်ခဲ့တာပါ။
အီရတ်ဟာ IS အကြမ်းဖက်အဖွဲ့ကို ၂၀၁၇ ခုနှစ် နှစ်ကုန်ပိုင်းမှာ အပြီးသတ် ချေမှုန်းနိုင်ခဲ့ပြီး ဆီးရီးယားမှာတော့ အခုနှစ်မတ်လမှာ IS အဖွဲ့ကို ချေမှုန်းနိုင်ခဲ့ပါတယ်။
Ref: CNN, Aljazeera
