အောက်တိုဘာ ၁၉၊ ၂၀၁၉
M-Media
-အစ္စလာမ်ဘာသာဝင်တွေကို မတော်မတရား ပြုမူတာတွေ၊ အစ္စလာမ်ဘာသာကို အကြမ်းဖက်ဝါဒနဲ့ ချိတ်ဆက်ပြောဆိုတာတွေ မလုပ်ကြဖို့အတွက် ပြင်သစ်သမ္မတ အီမန်နျူယဲလ် မာခရွန်က သတိပေး ပြောကြားလိုက်ပါတယ်။
လူမြင်ကွင်းမှာ ပုဝါဆောင်းတဲ့အတွက် စော်ကားပြောဆိုမှုတွေပြုလုပ်ခဲ့တဲ့ လူဖြူအစွန်းရောက်တစ်ယောက်ကို ပြင်သစ်မွတ်စလင်အမျိုးသမီးတစ်ဦးက တရားစွဲဆိုခဲ့ပြီးတဲ့နောက် မာခရွန်ရဲ့ ဒီမှတ်ချက် ပေါ်ထွက်လာတာ ဖြစ်ပါတယ်။
“ကျွန်တော်တို့ဟာ နိုင်ငံသားအားလုံးနဲ့အတူ ရပ်တည်သွားရပါမယ်” လို့ အခုတစ်ပတ်အတွင်း ဂျာမနီဝန်ကြီးချုပ် အိန်ဂျလာမာကဲလ်နဲ့တွေ့ဆုံစဉ် သတင်းစာရှင်းလင်းပွဲမှာ မာခရွန်က ပြောကြားခဲ့ပါတယ်။
ပြင်သစ်နိုင်ငံမှာ အစ္စလာမ်ဘာသာဝင်ဦးရေ ၅ သန်းလောက်ရှိပြီး အနောက်ဥရောပမှာ အစ္စလာမ်ဘာသာဝင်အများဆုံး တည်ရှိရာနိုင်ငံလည်း ဖြစ်ပါတယ်။ ဟီဂျဘ်လို့ခေါ်တဲ့ မွတ်စလင်အမျိုးသမီးတွေ ပုဝါဆောင်းတာကို ပြင်သစ်က ကျောင်းတွေ၊ အစိုးရုံးတွေ၊ အများပြည်သူနဲ့ သက်ဆိုင်တဲ့ အဆောက်အဦးအချို့မှာ ပိတ်ပင်ထားပါတယ်။
ပြင်သစ်မှာ ပုဝါဆောင်းတဲ့ မွတ်စလင်အမျိုးသမီးကို စော်ကားပြောဆိုမှုဟာ ပြီးခဲ့တဲ့ ရက်ပိုင်းအတွင်း ခပ်စိပ်စိပ် ဖြစ်ပွားခဲ့ပါတယ်။ ပြီးခဲ့တဲ့တစ်ပတ်မှာ နိုင်ငံအရှေ့ပိုင်းက ပြည်နယ်လွှတ်တော်တစ်ခုကို သားဖြစ်သူနဲ့အတူ ကျောင်းလေ့လာရေးခရီးစဉ်သွားခဲ့တဲ့ မိခင်တစ်ယောက်ကို ပုဝါဆောင်းထားတဲ့အတွက် လွှတ်တော်အမတ်တစ်ဦး စော်ကားပြောဆိုခဲ့ပါတယ်။
အဲဒီကိစ္စ ဖြစ်ပွားပြီးတဲ့နောက် မွတ်စလင်အမျိုးသမီးတွေ ပုဝါဆောင်းမှုနဲ့ပတ်သက်ပြီး ပြင်သစ်မှာ ဆွေးနွေးငြင်းခုန်မှုတွေ တစ်ကျော့ပြန် ဖြစ်ပွားလာခဲ့ပါတယ်။ ကျောင်းလေ့လာရေးခရီးစဉ်မှာ လိုက်ပါတဲ့မိခင်တွေ ပုဝါမဆောင်းရဆိုတဲ့ ဥပဒေမျိုး ပြင်သစ်မှာ မရှိသေးပါဘူး။
မာခရွန်ကတော့ အစ္စလာမ်ဘာသာကို ပိုမိုနားလည်အောင် လေ့လာဖို့ ပြင်သစ်ပြည်သူတွေကို တိုက်တွန်းခဲ့ပြီး အစ္စလာမ်ဘာသာနဲ့ အကြမ်းဖက်ဝါဒကို ဆက်စပ်ပြောဆိုတာတွေကိုလည်း ရှုတ်ချခဲ့ပါတယ်။
“နိုင်ငံရေးသမားတွေကြားထဲမှာ တာဝန်ယူ၊ တာဝန်ခံမှုမရှိဘဲ ပြောဆိုမှုတွေ အမြောက်များ ရှိနေပါတယ်။ ဗဟုယဉ်ကျေးမှုဆိုတာ အကြမ်းဖက်ဝါဒ မဟုတ်ပါဘူး”
ဘာသာရေးမစွက်တဲ့ secular နိုင်ငံဖြစ်တဲ့ ပြင်သစ်ဟာ အစိုးရကျောင်းတွေမှာ ပုဝါဆောင်းတာနဲ့ အခြား သံသယဖြစ်ဖွယ် ဘာသာရေးအမှတ်သညာတွေ ဝင်ဆင်မှုကို ၂၀၀၄ ခုနှစ်မှာ တားမြစ်ခဲ့ပါတယ်။ မွတ်စလင်အမျိုးသမီးတွေ ဝတ်လေ့ဝတ်ထရှိတဲ့ မျက်နှာအုပ်ဝတ်ရုံကို အများပြည်သူနဲ့ သက်ဆိုင်တဲ့နေရာတွေမှာ မဝတ်ဆင်ဖို့ ၂၀၁၁ ခုနှစ်က တားမြစ်ခဲ့ပါတယ်။
အဲဒီတားမြစ်ချက်ကြောင့် ပြင်သစ်မှာ နိုင်ငံသား၊ နိုင်ငံခြားသား မည်သည့်အမျိုးသမီးမဆို အိမ်အပြင်ကို မျက်နှာအုပ်ပြီး ထွက်ခွင့်မရှိဘဲ မလိုက်နာရင် ဒဏ်ငွေပေးဆောင်ရမှာ ဖြစ်ပါတယ်။
Ref: BBC
