အောက်တိုဘာ ၁၆၊ ၂၀၁၉
M-Media
-ကမ္ဘာ့ပထမဆုံး ဉာဏ်ရည်တုပညာတက္ကသိုလ်တစ်ခုကို လာမယ့်နှစ်မှာ ဖွင့်လှစ်သင်ကြားသွားမယ်လို့ အာရပ်စော်ဘွားများပြည်ထောင်စု (ယူအေအီးနိုင်ငံ) က ဒီကနေ့မှာ ကြေငြာလိုက်ပါတယ်။
‘မိုဟာမက် ဘင် ဇာယဒ် ဉာဏ်ရည်တုတက္ကသိုလ်’ ( MBZUAI) လို့ အမည်ပေးထားတဲ့ အဲဒီတက္ကသိုလ်ဟာ ဉာဏ်ရည်တု (AI) နည်းပညာနဲ့ပတ်သက်လို့ ပညာရပ်ပိုင်းဆိုင်ရာ နယ်ပယ်တစ်ခုနဲ့ သုတေသန နယ်ပယ်တစ်ခုတို့ကို ဖန်တီးဖော်ဆောင်ပေးမှာ ဖြစ်ပါတယ်။
ဒီတက္ကသိုလ်ကို ရောက်ရှိလာတဲ့ ကျောင်းသားတွေဟာ ကမ္ဘာ့နောက်ဆုံးပေါ် AI နည်းပညာတွေကို ထိတွေ့ခွင့်ရမှာပါ။
MBZUAI တက္ကသိုလ် ဖွင့်လှစ်တောမယ့်အကြောင်းကို မတ်စ်ဒါမြို့က တက္ကသိုလ်တည်ရှိရာအဆောက်အဦးမှာ ဘုတ်အဖွဲ့က သတင်းစာရှင်းပွဲတစ်ခုကျင်းပကာ အသိပေးခဲ့တာ ဖြစ်ပါတယ်။
ယူအေအီးအစိုးရဝန်ကြီးတစ်ဦးဖြစ်ပြီး MBZUAI တက္ကသိုလ် ဘုတ်အဖွဲ့ဥက္ကဌလည်းဖြစ်တဲ့ ဒေါက်တာ ဆူလ်တန် အဟ်မဒ် အလ် ဂျာဘာရ်က ရည်ရှည်ဖွံ့ဖြိုးတိုးတက်ရေး၊ နောက်ဆုံးပေါ် နည်းပညာတွေကကို တီထွင်ကြံဆ အသုံးပြုရေးဆိုတဲ့ ယူအေအီးခေါင်းဆောင်ပိုင်းရဲ့ မူဝါဒနဲ့အညီ တက္ကသိုလ်ကို ထူထောင်ခဲ့တာလို့ ပြောကြားခဲ့ပါတယ်။
“ကမ္ဘာကြီးက ပြောင်းလဲသွားပါပြီ။ လူသားတွေရဲ့ စိတ်ကူးစိတ်သန်းတွေကို အသုံးပြုကာ အမြဲမပြတ် ရှာဖွေဖော်ထုတ်နေမယ်ဆိုရင် ဒီထက်ပိုပြီး အောင်မြင်နိုင်ပါတယ်။ ဒီတက္ကသိုလ်ဟာ AI အသုံးပြုတဲ့ ခေတ်သစ်မှာ ကျွန်တော်တို့ကို ဦးဆောင်မယ့် စွန့်ဦးတီထွင် ဖန်တီးသူတွေကို ပြုစုပျိုးထောင်ရာမှာ ရှေ့တန်းကနေ ပါဝင်လာပါလိမ့်မယ်”
တက္ကသိုလ်ရဲ့ ဘုတ်အဖွဲ့ဝင်တွေထဲမှာ ကမ္ဘာတစ်ဝှမ်းက ပညာရှင်တွေ ပါဝင်ပါတယ်။ ကမ္ဘာတစ်ဝှမ်းက AI ကျွမ်းကျင်သူတွေကို ဖိတ်ခေါ်ကာ ညီလာခံတွေ၊ ဆွေးနွေးပွဲတွေ လုပ်ဆောင်ဖို့လည်း ရှိနေပါတယ်။
တက္ကသိုလ်ဟာ AI ရဲ့ အဓိက နယ်ပယ်တွေဖြစ်တဲ့ Machine Learning၊ Computer Vision နဲ့ Natural Language Processing စတဲ့ ပညာသာရပ်တွေမှာ မဟာဘွဲ့တွေ၊ ဒေါက်တာဘွဲ့တွေ ပေးအပ်သွားမှာ ဖြစ်ပါတယ်။
ဘွဲ့ရကျောင်းသားတွေအနေနဲ့ ၂၀၂၀ ခုနှစ် ဩဂုတ်လကနေစလို့ MBZUAI ဝဘ်ဆိုက်မှာ စတင် စာရင်းပေးသွားနိုင်ပြီး ၂၀၂၀ ခုနှစ် စက်တင်ဘာလမှာ စတင် တက်ရောက်နိုင်မှာ ဖြစ်ပါတယ်။
Ref: Khaleej Times
