မတ် ၂၁၊ ၂၀၁၉
M-Media
– ကမ္ဘာတစ်ဝှမ်း မြင့်တက်လာတဲ့ အစ္စလာမ်ကြောက်ရောဂါအခြေပြု အကြမ်းဖက်တိုကခိုက်မှုတွေကို ကာကွယ်တားဆီးရေး အရေးပေါ်အစည်းအဝေးခေါ်ကာ ဆွေးနွေးဖို့အတွက် အစ္စလာမ့်ပူးပေါင်းဆောင်ရွက်ရေးအဖွဲ့ OIC ကို တူရကီနိုင်ငံက တိုက်တွန်းလိုက်ပါတယ်။
ဒီကနေ့ တူရကီနိုင်ငံခြားရေးဝန်ကြီးဌာနက ထုတ်ပြန်တဲ့ ကြေငြာချက်မှာ အစည်းအဝေးကို မနက်ဖြန် အစ္စတန်ဘူလ်မြို့မှာ ကျင်းပပြုလုပ်မှာဖြစ်ပြီး နိုင်ငံခြားရေးဝန်ကြီး Mevlut Cavusoglu က ဥက္ကဌအဖြစ် တာဝန်ယူမယ်လို့ ဖော်ပြထားပါတယ်။
“အစ္စလာမ်ကြောက်ရောဂါ၊ လူမျိုးရေးခွဲခြားမှု၊ နိုင်ငံခြားသားကြောက် ရောဂါတွေကို အခြေခံတဲ့ အကြမ်းဖက်မှုတွေ မြင့်တက်လာတာ အထူးသဖြင့် ၂၀၁၉ ခုနှစ် မတ်လ ၁၅ ရက်နေ့က နယူးဇီလန်က ဗလီတွေမှာ အကြမ်းဖက်တိုက်ခိုက်မှု ဖြစ်ပွားခဲ့တာနဲ့ ပတ်သက်ပြီး အရေးပေါ်အစည်းအဝေးခေါ် ဆွေးနွေးဖို့အတွက် OIC ဥက္ကဌဖြစ်တဲ့ တူရကီက ဆော်သြလိုက်ပါတယ်” လို့ ကြေငြာချက်က ဆိုပါတယ်။
အရေးပေါ်အစည်းအဝေးမှာ OIC အဖွဲ့ဝင်နိုင်ငံတွေအပြင် ကုလသမဂ္ဂ၊ ဥရောပသမဂ္ဂ၊ ဥရောပ လုံခြုံရေးအဖွဲ့ OSCE က ကိုယ်စားလှယ်တွေ တက်ရောက်ဖို့လည်း ဖိတ်ကြားထားပါတယ်။
ယူကေ လေဘာပါတီဟာ အစ္စလာမ်ကြောက်ရောဂါနဲ့ပတ်သက်လို့ အဓိပ္ပါယ်ဖွင့်ဆိုချက်တစ်ခုကို မနေ့မှာ ထုတ်ပြန်ခဲ့ပြီး ဒါဟာ အစ္စလာမ်ကြောက်ရောဂါရဲ့ အကြောင်း၊ အကျိုးတွေကို နားလည်စေဖို့၊ မွတ်စလင်လူ့အဖွဲ့အစည်းတွေနဲ့ တစ်သားတည်းရှိကြောင်း ပြသဖို့ ဖြစ်တယ်လို့ ဆိုပါတယ်။
အစ္စလာမ်ကြောက်ရောဂါကို လေဘာပါတီရဲ့ အဓိပ္ပါယ်ဖွင့်ဆိုချက်ဟာ အောက်ပါအတိုင်းဖြစ်ပါတယ်။
“အစ္စလာမ်ကြောက်ရောဂါ၏ ဇစ်မြစ်သည် လူမျိုးရေးခွဲခြားမှုဝါဒ၌တည်ပြီး အစ္စလာမ်ဘာသာဝင်ဖြစ်သူ သို့မဟုတ် အစ္စလာမ်ဘာသာဝင်ဟု ယူဆရသူများအပေါ် ပစ်မှတ်ထားသည့် လူမျိုးရေးခွဲခြားမှုတစ်မျိုးဖြစ်သည်”
ပြီးခဲ့တဲ့သောကြာနေ့ နယူးဇီလန်နိုင်ငံ ခရိုက်ချက်မြို့က ဗလီဝတ်ကျောင်းတော် ၂ လုံးမှာ လူဖြူအစွန်းရောက် သေနတ်သမားတစ်ဦးက သေနတ်နဲ့ ၀င်ရောက်ပစ်ခတ်ခဲ့တဲ့အတွက် အနည်းဆုံး လူ ၅၀ သေဆုံးပြီး ၃၀ ကျော် ဒဏ်ရာရရှိခဲ့ပါတယ်။ ဒဏ်ရာရရှိသူတွေထဲမှာ တူရကီနိုင်ငံသား ၃ ဦး ပါဝင်ပါတယ်။
Ref: Aljazeera
