Author: Ko Lay

သြဂုတ် ၂၄၊ ၂၀၂၃

M-Media 

-ယူကရိန်းစစ်ပွဲမှာ ရုရှားဖက်က ၀င်တိုက်ပေးခဲ့တဲ့ ကြေးစားလက်နက်ကိုင်တပ်ဖွဲ့ ခေါင်းဆောင် ယက်ဗ်ဂျနီ ပရီဂိုဇင်ဟာ မနေ့က လေယာဥ်ပျက်ကျ သေဆုံးသွားတယ်လို့ သတင်းတွေ ထွက်လာပါတယ်။ 

ပရီဂိုဇင်နဲ့ အခြား လူ ၁၀ ဦး လိုက်ပါသွားတဲ့ ပုဂ္ဂလိက လေယာဥ်ငယ်တစ်စင်းဟာ ရုရှားနိုင်ငံ အနောက်မြောက်ပိုင်း တဗာရ်ဆိုတဲ့ဒေသမှာ ပျက်ကျသွားခဲ့တာပါ။ မော်စကိုကနေ စိန့်ပီတာစဘတ်ကို သွားတဲ့ခရီးမှာ ဒီလိုဖြစ်သွားခဲ့တာ ဖြစ်ပါတယ်။ 

ပရီဂိုဇင်ဦးဆောင်တဲ့ ‘၀ဂ်နာ’ ကြေးစားတပ်ဖွဲ့၀င်တွေက လေယာဥ်ကို ရုရှားဒုံးခွင်းစနစ်က ပစ်ချလိုက်တာလို့ ဆိုရှယ်မီဒီယာတွေမှာ ရေးသားနေကြပါတယ်။ ရုရှားသစ္စာဖောက်တွေကြောင့် သူတို့ခေါင်းဆောင် လုပ်ကြံခံလိုက်ရတယ်လို့လည်း ဆိုပါတယ်။ 

သူပုန်ထမှု 

————

၂၀၁၄ ခုနှစ်မှာ တည်ထောင်ခဲ့တဲ့ ၀ဂ်နာ ကြေစားတပ်ဖွဲ့ဟာ ယူရိန်းကို ကျူးကျော်တဲ့ စစ်ပွဲမှာ ရုရှားဖက်နေ အဓိက ၀င်တိုက်ပေးနေတဲ့အဖွဲ့ ဖြစ်ပြီး ပရီဂိုဇင်ကလည်း ပူတင်ရဲ့ အားကိုးရတဲ့ တပည့်တစ်ဦးပါ။  

ဒါပေမယ့် ပရီဂိုဇင်နဲ့ ရုရှားစစ်တပ် ထိပ်ပိုင်းခေါင်းဆောင်တွေအကြား မကျေလည်မှုတွေဖြစ်ခဲ့ပြီးတဲ့နောက် ဇွန်လမှာ ၀ဂ်နာတပ်တွေဟာ ယူကရိန်းကနေ ရုရှားထဲ ပြန်၀င်လာပြီး နယ်စပ်က ရုရှားစစ်စခန်းတစ်ချို့ကို သိမ်းပိုက်ကာ မော်စကိုအထိ အဆီးအတားမရှိ ချီတက်သွားခဲ့ပါတယ်။ ဒီဖြစ်စဥ်မှာ ရုရှားတပ်ဖွဲ့၀င်တစ်ချို့ သေဆုံးခဲ့ပါတယ်။  

နောက်ပိုင်းမှာ ဘယ်လာရုစ်နိုင်ငံရဲ့ ကြား၀င်စေ့စပ်ပေးမှုကြောင့် ဒီကိစ္စ ပြေလည်သွားပေမယ့် ၂၄ နာရီကြာမြင့်တဲ့ သူပုန်ထမှုဟာ ပူတင်နဲ့ ရုရှားစစ်တပ်ကို အကြီးအကျယ် အရှက်ရစေခဲ့ပါတယ်။ 

ပူတင်က ဒီလုပ်ရပ်ဟာ နောက်ကျောကို ဓားနဲ့ထိုးတဲ့လုပ်ရပ်၊ နိုင်ငံတော် ပုန်ကန်တဲ့လုပ်ရပ်ဖြစ်ပြီး ကျူးလွန်သူတွေကို ပြင်းပြင်းထန်ထန် အပြစ်ပေးမယ်လို့ ပြောကြားထားပါတယ်။ 

မနေ့က လေယာဥ်ကိစ္စကို ပျက်ကျမှုလို့သာ ရုရှားလေကြောင်းဌာနက ထုတ်ပြန်ထားပါတယ်။ ဖြစ်စဥ်အသေးစိတ်ကို အတိအကျ မသိရသေးပါဘူး။ 

သူပုန်ထမှုကြောင့် ပရီဂိုဇင်နဲ့ သူ့နောက်လိုက်တစ်ချို့အပေါ် စွဲထားတဲ့အမှုတွေကို ရုရှားဖက်က နောက်ပိုင်းမှာ ရုပ်သိမ်းပေးခဲ့ပြီး၊ ၀ဂ်နာတပ်ဖွဲ့ကိုလည်း ဘယ်လာရုစ်မှာ အခြေစိုက်ဖို့ ဒါမှမဟုတ် ရုရှားစစ်တပ်ထဲ၀င်ဖို့ ရွေးချယ်မှု ပေးခဲ့ပါတယ်။ 

ပရီဂိုဇင်သေဆုံးမှုကြောင့် ပူတင်ရဲ့ အာဏာဟာ ပြည်တွင်းမှာ ပိုအားကောင်းလာနိုင်သလို၊ တစ်ဖက်မှာလည်း ၀ဂ်နာတပ်ဖွဲ့တွေရဲ့ ပုန်ကန်မှုအသစ်နဲ့ ကြုံတွေ့လာနိုင်တယ်လို့ ကျွမ်းကျင်သူတွေက သုံးသပ်ထားပါတယ်။ 

Ref: BBC

သြဂုတ် ၂၃၊ ၂၀၂၃

M-Media 

-ဂျော်ဂျီယာနိုင်ငံက ခွဲထွက်ဖို့ ကြိုးပမ်းနေတဲ့ ဒေသနှစ်ခုကို မိမိတို့ပိုင်နက်အတွင်း သွတ်သွင်းဖို့ ရှိတယ်လို့ ရုရှား လုံခြုံရေးကောင်စီ ဒုတိယအကြီးအကဲ ဒီမီထရီ မက်ဗီဒက်က ပြောပါတယ်။ 

ဆိုဗီယက်ပြည်ထောင်စု ပြိုကွဲပြီးနောက်ပိုင်း ဂျော်ဂျီယာနိုင်ငံက ဒေသနှစ်ခုဖြစ်တဲ့ ဆောက်အိုဆက်တီယာနဲ့ အဘ်ခါဇီယာတို့မှာ ခွဲထွက်ရေးလှုပ်ရှားမှုဖြစ်ခဲ့တာပါ။ 

ဆောက်အိုဆက်တီယာကို ဂျော်ဂျီယာက အင်အားနဲ့ ပြန်သိမ်းဖို့ ကြိုးစားတဲ့အခါ ရုရှားက သူ့ရဲ့တပ်တွေလွှတ်ပြီး ဂျော်ဂျီယာကို ပြန်တိုက်ခဲ့ပါတယ်။ 

၂၀၀၈ ခုနှစ်မှာ ဒီဒေသနှစ်ခုစလုံးကို သီးခြားနိုင်ငံအဖြစ် အသိအမှတ်ပြုကြောင်း ရုရှားက ကြေငြာခဲ့ပါတယ်။ 

မနေ့က ပြည်တွင်းသတင်းစာတစ်ခုက မက်ဗီဒက်ရဲ့ ဆောင်းပါးမှာ ဆောက်အိုဆက်တီယာနဲ့ အဘ်ခါဇီယာတို့က ပြည်သူတွေဟာ ရုရှားနဲ့ ပြန်ပေါင်းချင်နေကြီး၊ အကြောင်းအရင်း ခိုင်ခိုင်လုံလုံရှိလာရင် ဒီဒေသတွေကို ရုရှားပိုင်နက်ထဲ ထည့်သွင်းမယ်လို့ ရေးသားခဲ့ပါတယ်။ 

ပြီးခဲ့တဲ့ ၁၀ စုနှစ်တွေအတွင်း ရုရှားနဲ့ ဂျော်ဂျီယာတို့အကြား ဆက်ဆံရေး ကောင်းလာပေမယ့် ခွဲထွက်ဒေသနှစ်ခုနဲ့ပတ်သက်ရင် အနောက်နိုင်ငံတွေက မီးမွှေးနေတယ်လို့ မက်ဗီဒက်က စွပ်စွဲခဲ့ပါတယ်။ 

ဂျော်ဂျီယာအာဏာပိုင်တွေဟာ နယ်မြေလုံခြုံရေးအတွက် အမေရိကန်ဦးဆောင်တဲ့ နေတိုးမဟာမိတ်အဖွဲ့ကို ၀င်ရောက်ချင်တယ်လို့ မကြာခဏ ပြောကြားဖူးပြီး ရုရှားက ဒီကိစ္စကို စိုးရိမ်နေတာလည်း ဖြစ်ပါတယ်။ 

ယူကရိန်းကို ကျူးကျော်တိုက်ခိုက်နေတဲ့ ရုရှားဟာ ပြီးခဲ့တဲ့နှစ် စက်တင်ဘာလတုန်းက ယူကရိန်းဒေသ ၄ ခုကို ရုရှားပိုင်နက်ထဲ သွတ်သွင်းကြောင်း ကြေငြာခဲ့ဖူးပါတယ်။ 

နိုင်ငံတကာအသိုင်းအ၀ိုင်းကတော့ ဒီလုပ်ရပ်ကို အသိအမှတ်မပြုပါဘူး။ 

Ref: Reuters