Category: ဘာသာပြန်

ဘာသာရေး တင်းမာမှုထံ တွန်းပို့မောင်းနှင်သူ နှင့် သဟဇာတ၏ အဟန့်အတားဖြစ်စေသူများ

ဒီဇင်ဘာ ၁၀၊ ၂၀၁၃
M-Media
ဆောင်းပါးရှင် Eliane Coates
ဘာသာပြန်-မြင့်မိုရ်မောင်မောင်

အရိပ်အမြွက်မြင်ကွင်း
——————–
အစ္စလာမ့်နည်းကျ ပူးပေါင်းဆောင်ရွက်မှုအဖွဲ့အစည်း Organisation of Islamic Cooperation (OIC)၏ ကိုယ်စားလှယ်များ ခရီးစဉ်ကို ကန့်ကွက် ဆန္ဒပြရေး အတွက် နိုဝင်ဘာ ၁၂ ရက်တွင် ရန်ကုန်လမ်းမများ၌ ဗုဒ္ဓဘာသာသံဃာ ၂၀၀ မျှ နေရာယူထားခဲ့ကြ၏။ သံဃာများစွာတို့သည် မွတ်စ်လင်မ်ဆန့်ကျင်ရေး အငြိုးတရား နှင့် ဗုဒ္ဓမြန်မာ အမျိုးသားရေးဝါဒကို ထပ်မံ မီးမွှေးလျက်ရှိပြန်သည်။ မြန်မာနိုင်ငံ၏ အာဆီယံဥက္ကဌဖြစ်ခြင်း နှင့် အခြေခံ အဆောက်အဦး ပြောင်းလဲရေးသည် တိုင်းပြည်အတွက် ဒဏ်ရာဟောင်းကို ကုသပေးနိုင်ပါမည်လော ?

ကန့်လန့်ကာအဖွင့်

Organisation of Islamic Cooperation (OIC)၏ ကိုယ်စားလှယ်များ ခရီးစဉ်ကို ကန့်ကွက်ဆန္ဒပြရေးအတွက် နိုဝင်ဘာ ၁၂ ရက်တွင် ရန်ကုန်လမ်းမများ၌ ဗုဒ္ဓဘာသာ သံဃာ ၂၀၀ မျှ နေရာယူထားခဲ့ကြ၏။ ယင်းကိုယ်စားလှယ်အဖွဲ့၌ အိုအိုင်စီ အတွင်းရေးမှူးချုပ်နှင့် အတူ အင်ဒိုနီးရှား၊ မလေးရှား၊ ဘင်္ဂလားဒေ့ရှ်၊ ဆော်ဒီအာရေဗျ၊ တူရကီ၊ ဂျီဘူတီ၊ အီဂျစ် စသည့် အဖွဲ့ဝင်နိုင်ငံ ၇ နိုင်ငံမှ အဆင့်မြင့် ၀န်ကြီးများ ပါဝင်နေ၏။ သူတို့သည် ကမ္ဘာ့အကြီးမားဆုံး အစ္စလာမ့်အုပ်စုအား ဆန့်ကျင်ဆန္ဒပြမှုကို ဆုံတွေ့ခဲ့ရသည်။ ၂၀၁၂ ဖြစ်စဉ်များကိုမှီ၍ မြန်မာ့ပြည်တွင်းရေးကို အိုအိုင်စီမှ ၀င်ရောက် မစွက်ဖက်ရန် တောင်းဆိုလျက် ဗုဒ္ဓဘာသာ သံဃာများက ဆန္ဒပြမှုတို့ကို ဦးဆောင်ခဲ့ခြင်းဖြစ်သည်။

ရခိုင်ပြည်နယ် အနောက်ပိုင်း ရိုဟင်ဂျာ မွတ်စ်လင်မ်နှင့် ဗုဒ္ဓဘာသာဝင်များအကြား ၂၀၁၂ ခုနှစ်၊ ဇွန်လ အကြမ်းဖက်မှုဖြစ်ပွားပြီးနောက် ၁၈ လနီးပါး အကြာတွင် မြန်မာနိုင်ငံရှိ မွတ်စ်လင်မ်တို့၏ အနေအထားကို သုံးသပ်လေ့လာနိုင်ရန် အလို့ငှာ ကိုယ်စားလှယ်အဖွဲ့ ရောက်လာခဲ့သည်။ ယင်းအကြမ်းဖက်မှုသည် မြန်မာနိုင်ငံအနှံ့ ပျံ့နှံ့သွားကာ လူအသေအပျောက် ၂၄၀ ဦး ရှိခဲ့ပြီး နှစ်သိန်းလေးသောင်း အိုးအိမ်မဲ့ဘ၀သို့ ရောက်ခဲ့သည်။ အကြမ်းဖက်သားကောင် အများစုမှာ ရိုဟင်ဂျာ မွတ်စ်လင်မ်များ ဖြစ်သည်။

ဗုဒ္ဓမြန်မာအမျိုးသားရေးဝါဒ၏ ရာဇ၀င်

ဗုဒ္ဓဘာသာမြန်မာများအကြားရှိ မွတ်စ်လင်မ်ဆန့်ကျင်ရေးအငြိုးအာဃာတသည် လွန်ခဲ့သော နှစ်ပေါင်း ၈၀ ကိုလိုနီ သမိုင်းအပေါ် မကျေနပ်ချက်များမှ အမြစ်တွယ်ရှည်ကြာလာခဲ့သည်။ အိန္ဒိယတိုက်ငယ်နှင့် မြန်မာနိုင်ငံရှိ ဗြိတိသျှ ကိုလိုနီအုပ်ချုပ်ရေး၊ ၁၉ ရာစုအတွင်း နယ်စပ် သမိုင်းကြောင်း အပြောင်းအလဲကြီးမားမှုတို့က အထိန်းအကွပ်မဲ့ အပြောင်းအရွှေ့ အ၀င်အထွက် မူဝါဒတစ်ခုကို ဖြစ်ထွန်းစေခဲ့သည်။ ၄င်းအားဖြင့် မြန်မာနိုင်ငံအတွင်း ဘင်္ဂါလီ မွတ်စ်လင်မ် လုပ်သားများကို အလုံးအရင်းဖြင့် ၀င်ရောက်စေခဲ့ကြသည်။

ရိုဟင်ဂျာတို့မှာ ပြောင်းရွှေ့ဝင်ရောက်လာသော ဘင်္ဂါလီလူစု၏ မျိုးဆက်များဖြစ်ကြောင်း၊ ၁၉၈၂ ခုနှစ် မြန်မာနိုင်ငံသား ဥပဒေက ရိုဟင်ဂျာတို့ကို မြန်မာတိုင်းရင်းသားအဖြစ် အသိအမှတ်ပြုရန် ငြင်းပယ်ထားကြောင်း၊ ထို့ကြောင့် ရိုဟင်ဂျာတို့အား ခွဲခြားချိုးနှိမ်ဆက်ဆံရန်လိုအပ်ကြောင်း ဗုဒ္ဓဘာသာသံဃာများက ကြွေးကြော်ပြောဆိုကြ၏။

၁၉၃၀ ခုနှစ်များက အကြီးစားဖိနှိပ်မှုအတွင်း ဗုဒ္ဓဘာသာ သံဃာတော်များ၏အုံကြွမှုကြောင့် ဒို့ဗမာ အစည်းအရုံး ဖြစ်ပေါ်လာခဲ့သည်မှာလည်း အမှန်ပင်။ ၄င်းမှတဆင့် ဗုဒ္ဓဘာသာ ဗမာအမျိုးသားရေးဝါဒ နှင့် အိန္ဒိယလူမျိုး ဆန့်ကျင်ရေးအတွေးအမြင်များ တစ်စစ မြင့်တက်လာကြောင်း တွေ့ရသည်။ နောင်သောအခါ မွတ်စ်လင်မ် ဆန့်ကျင်ရေးဖက်သို့ သဘောထားပြောင်းလဲနစ်ဝင်သွားခဲ့သည်။

ယနေ့တွင် အရှင်ဝီရသူဦးဆောင်သော ဗုဒ္ဓဘာသာမြန်မာ သံဃာအုပ်စုတစ်စုမှာ အမုန်းတရားဟောပြောမှု၊ အကြောက်တရား မျိုးစေ့ချမှုတို့ဖြင့် ၄င်းအတွေးအမြင်တို့ကို ပြန်လည်မီးမွှေးလျက်ရှိရာ လူမှုဝန်းကျင်အတွင်း ဘာသာရေး ခွဲခြားမှုများ ဖြစ်ပေါ်နေပေသည်။ မန္တလေးမြို့မှ ကျောင်းထိုင်ဘုန်းကြီး ဦးဝီရသူသည် စီးပွားရေးနှင့်လူမျိုးရေးဆိုင်ရာ ၉၆၉ ကမ်ပိန်းကို စတင်သူဖြစ်ပြီး ဗုဒ္ဓဘာသာဝင်များ အနေနှင့် ဗုဒ္ဓဘာသာဝင်တို့၏ ဈေးဆိုင်များကိုသာ အားပေးဝယ်ယူကြရန် နှိုးဆော်နေကြ၏။

အကြောင်းရင်းနှစ်ရပ်

ရိုဟင်ဂျာဆန့်ကျင်ရေးလှိုင်းတံပိုးအောက်ဝယ် အဓိကအကြောင်းရင်း နှစ်ရပ် ရှိနေ၏။

ပထမအကြောင်းမှာ ဗုဒ္ဓဘာသာဗမာလူ့အသိုင်းအ၀ိုင်းတွင် အစ္စလာမ်သည် တစ်စစဖြင့် လွှမ်းမိုးလာခြင်း ဟု အတွေးအမြင် စိမ့်ဝင်နေမှုဖြစ်သည်။ ၄င်းမှာ မွတ်စ်လင်မ် လူဦးရေကြီးမားမြင့်တက်လာမှုက မြန်မာနိုင်ငံ၏ ဗုဒ္ဓဘာသာကို ဖယ်ထုတ်တော့မည်လော ဟူသည့် စိုးကြောက်ခြင်းပင်။ ယင်းပူပန်မှု၏ပင်စည်ကား ရိုဟင်ဂျာ အများအပြားတို့သည် မြန်မာ့ ဓလေ့ထုံးတမ်း၊ ဘ၀နေဟန်များနှင့် သဟဇာတဖြစ်အောင် မနေထိုင်သောအချက်ဟု ဆိုရပေမည်။ လူ့အခွင့်အရေး တိုက်ပွဲဝင်သူ အတိုက်အခံခေါင်းဆောင် ဒေါ်အောင်ဆန်းစုကြည်မှလည်းကောင်း၊ နိုင်ငံတကာ အသိုင်းအ၀ိုင်းမှလည်းကောင်း စိုးရိမ်မကင်းကြောင်း ဆိုနေသည့်တိုင် ယခုနှစ် မေလ၌ လူဦးရေလျော့ကျသွားရေးအတွက် ရိုဟင်ဂျာတို့အပေါ် ချိုးနှိမ်သည့်အားဖြင့် ကလေးနှစ်ယောက်သာယူရေး မူဝါဒကို တစ်ဖက်သတ်သွတ်သွင်းပြဋ္ဌာန်းရန် မြို့များစွာမှ စတင်ဆော်သြလာကြသည်။

ရခိုင်ပြည်နယ်အစိုးရ၏ပြောခွင့်ရပုဂ္ဂိုလ်၏အဆိုအရ ရိုဟင်ဂျာတို့သည် မိမိတို့၏မွေးဖွားနှုန်းမြန်ခြင်းဖြင့် ဗုဒ္ဓဘာသာဝင်များအား အစ္စလာမ်သို့ သွတ်သွင်းရန် ကြိုးစားနေကြောင်း ရိုဟင်ဂျာလူဦးရေမှာ ဒေသခံဗုဒ္ဓဘာသာဝင်များ၏ ဆယ်ဆအထိတိုးမြင့်သည့်အချက်ကို ထောက်ပြထား၏။ သို့တစေ Harvard’s Ash Centre for Democratic Governance and Innovation မှ စီးပွားရေးပညာရှင်များက ရိုဟင်ဂျာတို့၏မွေးဖွားနှုန်းတိုးတက်မြင့်မားနေသော မည်သည့် အထောက်အထားကိုမျှ မတွေ့ရပါဟု အချေအတင် ဆိုထားသည့်အပြင် ထိုအချက်နှင့်ဆန့်ကျင်စွာ ရိုဟင်ဂျာအများစုသည် ဘင်္ဂလားဒေ့ရ်ှဖက်သို့ ၁၉၅၀ ခုနှစ် ကတည်းက တအုံတကျင်း ထွက်ခွာသည့်ကွင်းဆက်အား ၄င်းတို့မှ တွေ့ခဲ့ရကြောင်း ဆိုကြသည်။

ဒုတိယအကြောင်းရင်းမှာ လူနည်းစုမွတ်စ်လင်မ်တို့သည် မြန်မာဗုဒ္ဓဘာသာဝင်တို့၏မြေများကို လက်ဝါးကြီးအုပ်လာမှုက ရိုဟင်ဂျာတို့မှစတင်ခဲ့သည်ဟူသည့် အချက်ဖြစ်၏။ ၁၉၄၈ ခုနှစ် မြန်မာနိုင်ငံလွတ်လပ်ရေးရပြီးနောက် ရိုဟင်ဂျာတို့သည် မုဂျာဟစ်ဒင် မည်သော လက်နက်ကိုင်တော်လှန်ရေး တပ်ဖွဲ့တည်ထောင်ကာ သီးခြားမွတ်စ်လင်မ်ပြည်နယ် ခွဲထွက်ပြီး အရှေ့ပါကစ္စတန်(ယခု ဘင်္ဂလားဒေ့ရှ်)နှင့်ပူးပေါင်းရန် ကြိုးစားခဲ့ကြသည်။

ဤကိစ္စအရေးနိမ့်လေသောအခါ ထိုတော်လှန်ရေးသည် ဗုဒ္ဓဘာသာဝင်တို့အကြား မြန်မာ့အချုပ်အခြာ အာဏာသစ်အတွက် အန္တရာယ်နှင့် သစ္စာဖောက်မှုအဖြစ် အမြင်ဖြစ်တည်သွားခဲ့၏။ ၂၀၁၂ ခုနှစ် မေလတွင် ဗုဒ္ဓဘာသာဝင် အမျိုးသမီးတစ်ဦးကို ရိုဟင်ဂျာတို့မှ မုဒိန်းကျင့်သည်ဟူသော စွဲချက်တင်လျက် များမကြာမီ ဒေသခံဗုဒ္ဓဘာသာဝင်တို့၏ လက်စားချေမှု ဖြစ်ပွားခဲ့သည်။ ၄င်းနောက် လတ်တစ်လောဖြစ်ပျက်လာသည့် လူမျိုးရေးအဓိကရုဏ်းများမှာ ရိုဟင်ဂျာတို့ထံမှ အစပျိုးခြင်း ဟုလည်း ယိုးစွပ်ပြစ်တင်ကြလေသည်။

သို့သော်လည်း အလွန်ထူးခြားနေသည်မှာ ဤအကြောင်းတရားများကို ဗုဒ္ဓဘာသာသံဃာများမှ ၀ါဒဖြန့် အားထုတ်ချက်များတွင် မြန်မာနိုင်ငံ၏ပြုပြင်ပြောင်းလဲရေး အုပ်စုများက အထောက်အကူပြုဖြည့်ဆည်းပေးနေခြင်း ဖြစ်သည်။ စစ်စစ်၌ စစ်အုပ်ချုပ်ရေးကာလအတွင်း တင်းကြပ်သော အုပ်ချုပ်ရေးဖြင့်စီရင်ခြင်း၊ လူမျိုးရေးခွဲခြားမှုနှင့်တင်းမာမှုများ သွတ်သွင်းခြင်း ရှိနှင့်ပြီးဖြစ်နေ၏။ ယခု လွတ်လပ်စွာ ဖော်ထုတ်ပြောဆိုနိုင်ခွင့်ကလည်း ဦးဝီရသူလို ဗုဒ္ဓဘာသာသံဃာများ အဖို့ ဘာသာရေးပဋိပက္ခဖြစ်စေရေး၊ အစ္စလာမ်အပေါ်အမုန်းပွားအုပ်စုဖွဲ့ရေးအတွက် ခွင့်ပြုချက်ပေးထားလေသည်။

အာဆီယံဥက္ကဌနေရာနှင့် အတူ မတူခြားနားမှုကို လက်ခံရန်လိုအပ်

အတိတ်ခေတ် ဗမာအမျိုးသားရေးအမြင်သည် ဗုဒ္ဓ၀ါဒနှင့် ကနဦးကပင် ဆက်နွှယ်မှု ရှိလာခဲ့ပြီး ဖြစ်သည်။ မြန်မာတို့သည် လည်းကောင်း သြဇာကြီး ဘုန်းတော်ကြီးများသည်လည်းကောင်း ထိုအမြင်ကို ပိုမိုမှန်ကန်ရန် အားထုတ်ဖို့၊ လူမျိုးဘာသာယဉ်ကျေးမှုစုံ စံနစ်ကို လက်ခံဖို့၊ အမုန်းတရား သွတ်သွင်းနေမှုကို ဆန့်ကျင်ရှုတ်ချဖို့၊ မတူခြားနားသည့် လူမျုိုးများအကြား အားအင်သစ် တစ်ရပ်ရှာဖွေဖို့ အချိန်ကျနေပါပြီ။ မြန်မာပြည်သည် ၂၀၁၁ ခုနှစ်မှစ၍ စီးပွားရေးနှင့်နိုင်ငံရေး၌ လျှပ်တစ်ပြက် အသွင်ပြောင်းမှုကို ကြုံရသည်။ လက်တွေ့အားဖြင့် ရွေးကောက်ပွဲများ ကျင်းပခဲ့သည်။ ဆင်ဆာဥပဒေကိုလည်း ရုပ်သိမ်းခဲ့သည်။ ၄င်းအပြင် နိုင်ငံရေးအကျဉ်းသား မြောက်များစွာကိုလည်း လွှတ်ပေးခဲ့ပြီး ဖြစ်သည်။

သို့ပင်သို့ငြား ပြန်လည်ပြုပြင်မွမ်းမံခြင်းသည် တိုးတက်ဖွံ့ဖြိုးရေး၏ အကြမ်းထည်များအပေါ်၌သာ မူတည်သည်မဟုတ်၊ အမျိုးသားရေးနှင့်ကိုယ်ကျင့်တရား အဆောက်အဦးများအပါအ၀င် အနုသဘောတို့အပေါ်၌လည်း ကိုင်တွယ် စီမံအပ်သည်။ မြန်မာနိုင်ငံသည် တိုင်းရင်းသားတို့၏ ပြည်တွင်းစစ်များကိုလည်းကောင်း၊ မွတ်စ်လင်မ် ဆန့်ကျင်ရေးအငြိုးတရားများကို လည်းကောင်း ဆယ်စုနှစ်များစွာ ဖြတ်သန်းလာပြီးနောက်၊ လူမျိုးရေး အသွင်မတူခြင်းအား ဆက်လက်ငြင်းပယ်နေဦးမည်ဆိုလျှင် တိုင်းပြည်နှင့်လူမျိုးအတွက် အနာဂတ်မကောင်းနိုင်တော့ကြောင်း ရှင်းလင်းစွာ သိနိုင်ပါသည်။

“ မြန်မာနိုင်ငံထဲ ခွဲခြားရေးဝါဒ ကြောက်ခမန်းလိလိ ဖြစ်နေပါတယ်။ တကယ်လို့များ အလျဉ်မီမီ တိကျခိုင်မြဲစွာ မကိုင်တွယ်ဘူးဆိုယင်တော့ ပုန်းလျှိုးကွယ်လျှိုးရှိနေတဲ့ တင်းမာမှုများက ဆိုးရွားတဲ့အကျိုးဆက်ကို ပွင့်လှစ်သွားစေနိုင်တယ်၊ ပြန်လည်ပြုပြင်တည်ဆောက်မှုလုပ်ငန်းစဉ်ကိုလည်း ဖြိုလှဲပစ်နိုင်ပြီး ဒေသတွင်းမှာ ဂယက်ဆိုး ရိုက်ခတ်သွားစေလိမ့်မယ် ” ဟု ကုလသမဂ္ဂအထွေအထွေ အတွင်းရေးမှူးချုပ်က ယခုနှစ် ဇူလိုင်လတွင် ပြောဆိုခဲ့သည်။

၁၉၈၂ မြန်မာနိုင်ငံသားဥပဒေအပါအ၀င် ဖွဲ့စည်းအုပ်ချုပ်ပုံအခြေခံစည်းမျဉ်းများကို ပြန်လည်ပြုပြင်မွမ်းမံဆောင်ရွက်မှသာ အပြောင်းအလဲ၏ခြေလှမ်း အစစ်အမှန်စတင်မည်ဖြစ်၏။

မြန်မာနိုင်ငံသည် ၂၀၁၄ ခုနှစ်၌ အာဆီယံဥက္ကဌအဖြစ်တာဝန်ယူရပြီဖြစ်ရာ လက်ရှိတွင် ဤအနေအထားအား ရွေးချယ်ရန် အရေးတကြီး လိုအပ်နေ၏။ ယင်းကာလမတိုင်မီ လူနည်းစုကဏ္ဍများအတွက် သက်ဆိုင်ရာရပ်ဝန်းအတွင်း တည်ငြိမ်လုံခြုံမှုကို ခင်းကျင်းပြသနိုင်ဖို့ အရေးကြီးနေလေပြီ။ အာဆီယံ နှင့် မြန်မာ နှစ်ဖက်စလုံးအတွက် ကျော်လွှားရမည့် အခက်အခဲ များစွာရှိနေသည်။ မြန်မာနိုင်ငံသည် နိုင်ငံတကာစံနှုန်းနှင့်တစ်သားတည်းကျရန်၊ နေပြည်တော်အစိုးရသည် နိုင်ငံရေးဆိုင်ရာအဓိက လိုအပ်ချက်များအပေါ် တိုးတက်ဆောင်ရွက်လာရန် အများမှ လိုလားနေကြပါ၏။

ရှေ့ဆက်ဆိုရပါသော် မြန်မာနိုင်ငံသည် မိမိ၏ပြန်လည်မွမ်းမံခြင်းအား ဂုဏ်ယူဝံ့ကြွားလိုပါက နိုင်ငံတကာအဆင့်မှီ အပြုသဘောဆောင်သောပုံရိပ်ကောင်းအား ခြယ်မှုန်းပြသရပါမည်။ သို့သော် ယင်းပုံရိပ်သည် နိုင်ငံတွင်းရှိ လူနည်းစုများ အပါအ၀င် ပြည်တွင်းလူ့အဖွဲ့အစည်းအား မည်သို့မည်ပုံဆက်ဆံပါမည်နည်းဟူသော လူထုယုံကြည်မှုအပေါ် မူတည်လျက် ရှိနေပါသတည်း။

ဆောင်းပါးရှင် Eliane Coates သည် Nanyang Technological University ၊ S. Rajaratnam School of International Studies လက်အောက်ရှိ Center of Excellence for National Security (CENS) ဌာနမှ အဆင့်မြင့် သုတေသီတစ်ဦး ဖြစ်ပါသည်။ သူ၏ရေးသားချက်ဖြစ်သော Buddhist Monks in Myanmar: Driving Religious Intolerance and Hindering Reform ကို မြင့်မိုရ်မောင်မောင် မှ ဆီလျော်အောင် မြန်မာပြန်ဆိုပါသည်။

December 10, 2013
မြန်မာပြည်မှာ အပြန်အလှန် အကြမ်းဖက်မှု ဆိုတာ မရှိခဲ့ (ဘာသာပြန် ဆောင်းပါး)

နိုဝင်ဘာ- ၂၈ ၂၀၁၃
M-Media
ဆောင်းပါးရှင်- Rachel Wagley
ဘာသာပြန်- မြင့်မိုရ်မောင်မောင်

ဓာတ်ပုံအညွှန်း – အဓမ္မနေရာရွှေ့ပြောင်းခြင်း နှင့် ခွဲခြားချိုးနှိမ်ဆက်ဆံခြင်း ခံစားနေရဆဲ ရိုဟင်ဂျာများ
(Evangelos Petratos EU/ECHO January 2013)

၂၀၁၃ ခုနှစ် နိုဝင်ဘာလ ၁၂ ရက်နေ့တွင် ကမ္ဘာ့ကုလသမဂ္ဂအထွေထွေညီလာခံမှ မြန်မာနိုင်ငံအရေးနှင့် ပတ်သက်သော ထုတ်ပြန်စာတစ်စောင် ထွက်လာခဲ့သည်။ မြန်မာပြည်ရှိ မွတ်စ်လင်မ်များကို တိုက်ခိုက်ရာ၌ “အပြန်အလှန် အကြမ်းဖက်မှု”၊ “လူမျိုးရေးအကြမ်းဖက်မှု”၊ “လူ့အဖွဲ့အစည်းဆိုင်ရာပဋိပက္ခ” ဟူသောအသုံးအနှုန်းဖြင့် မြန်မာအစိုးရမှ အဖန်တလဲလဲ သုံးနှုန်းဖော်ပြနေကြသည်။ ၂၀၁၂ ခုနှစ် ဇွန်လ နှင့် အောက်တိုဘာလအတွင်း ရခိုင်ပြည်နယ်၌ဖြစ်ပွားသော တိုက်ခိုက်မှုဖြစ်ရပ်များအပေါ် အထူးရည်ညွှန်းသုံးစွဲခဲ့ကြသည်။ ယင်းအသုံးအနှုန်းများမှာ အတိုင်းအတာတစ်ရပ်အထိတော့ လက်ခံနိုင်သေး၏။ သို့ရာတွင် မြန်မာပြည်အနှံ့ ဆက်လက်ဖြစ်ပွားလာသော မွတ်စ်လင်မ် ဆန့်ကျင်ရေးတိုက်ခိုက်မှုများကို ဤအသုံးအနှုန်းများဖြင့် လွှမ်းခြုံဖော်ပြနေသည်မှာ တိကျမှန်ကန်မှုမရှိသည်သာမက လူမိုက်အားပေး အဆင့်သို့ပင် ရောက်သွားစေပါသည်။ မွတ်စ်လင်မ်တို့သည် ၂၀၁၃ ခုနှစ်အတွင်း အကြမ်းဖက်သားကောင်များ နှင့် အကြမ်းဖက် ကျူးလွန်သူများ နှစ်မျိုးလုံး တစ်ပြိုင်တည်းဖြစ်နေသည့် လူ့အသိုင်းအ၀ိုင်း တစ်ရပ်ကဲ့သို့ အထင်ရောက်အောင် အထင်လွဲအမြင်မှား သွားစေပါသည်။ မြန်မာနိုင်ငံ၏မွတ်စ်လင်မ် ဆန့်ကျင်ရေး အနေအထား၌ ဤသို့အထင်မှားမှုသည် မွတ်စ်လင်မ်ဆန့်ကျင်ရေးလှုပ်ရှားမှုများကို လက်ခံအောင်ပြုရာရောက်နေ၏။ ထို့အပြင် ဤလှုပ်ရှားမှုများအတွင်း အာဏာပိုင်များ၏ ပါဝင်ပတ်သက် ကျူးလွန်နေမှုများကိုလည်း အာရုံလွှဲလိုက်ခြင်းပင်ဖြစ်သည်။

ရခိုင်ပြည်နယ်၌ဖြစ်စေ မြန်မာနိုင်ငံ အတွင်းပိုင်း၌ဖြစ်စေ လူမျိုးရေး ဘာသာရေးဆိုင်ရာ ဆက်ဆံမှုများမှာ နှစ်ပေါင်းများစွာ အာဏာပိုင်တို့၏ ကောက်ကျစ်မှု၊ ဘက်လိုက်မှု၊ စွက်ဖက်စော်ကားပြောဆိုမှု၊ အစီအစဉ်ချ မှိုင်းတိုက်မှုများအပေါ် အခြေခံ၍ မယုံနိုင်စရာကောင်းလောက်အောင် ရှုပ်ထွေးသွားရသည်။ သို့ဖြစ်ရာ ဤနှစ်ပိုင်းအတွင်း တိုက်ခိုက်မှုများသည် အပြန်အလှန်/ပဋိပက္ခ ဟူ၍ မဟုတ်လေပြီ။ အပြန်အလှန်အကြမ်းဖက်မှု (တစ်နည်း) ပဋိပက္ခ Communal Violence ဟူသည် ဥပမာအားဖြင့် လူမျိုး သို့မဟုတ် ဘာသာရေးအုပ်စုနှစ်စု အတွင်း အပြန်အလှန်အကြမ်းဖက်/တိုက်ခိုက်မှုကို ဖော်ပြသုံးနှုန်းသည့် ဝေါဟာရ တစ်ခုဖြစ်၏။ အုပ်စု ၂စု သို့မဟုတ် ၄င်းတို့ထက် ပိုမိုပါဝင်နေသည့် အုပ်စုများမှာ အကြမ်းဖက် ကျူးလွန်သူများနှင့် အကြမ်းဖက်ခံ သားကောင်များအဖြစ် ခေါ်ဆိုနိုင်ပါသည်။ သို့သော် လွန်ခဲ့သောနှစ်မှ စ၍ မြန်မာနိုင်ငံရှိ မွတ်စ်လင်မ်တို့မှာ စတင် အကြမ်းဖက် ကျူးလွန်မှုမျိုး မပြုထားကြ။ ဗုဒ္ဓဘာသာဝင်များ ဦးဆောင်သည့် ၀ါဒဖြန့်လှုံ့ဆော်မှုများ၊ မီဒီယာများ၊ ခွင့်ပြုချက်များ၊ ခွဲခြားခြင်းအခြေတည်နိုင်ငံရေးနှင့် ဘာသာရေး လှုပ်ရှားမှုများ၊ မဲပေးခွင့် မရစေမှုများ၊ ဘက်လိုက်တရားစီရင်မှုများ၏ ဓားစားခံ သားကောင်တို့မှာ မွတ်စ်လင်မ်များသာလျှင် ဖြစ်နေကြောင်း ရှင်းလင်း ထင်ရှားလျက်ရှိနေပေသည်။

အပြန်အလှန်၊ ပဋိပက္ခ နှင့်အလားတူ သုံးနှုန်းဖော်ပြမှုများက ဆိုးကျိုးနှစ်ရပ်ကို ပေါ်ပေါက်စေသည်။
၁။ မွတ်စ်လင်မ်ဆန့်ကျင်ရေး အကြမ်းဖက်မှုများ၏ ဇာစ်မြစ်နှင့် သဘော သဘာဝကို နားလည်မှုလွဲမှားကြီးထွားလာစေသည်။
၂။ အကြမ်းဖက်မှုကို အားပေးနေသည့် ခွဲခြား ဆက်ဆံမှုဆိုင်ရာ ဥပဒေနှင့်နိုင်ငံရေး ဆက်စပ်မှုများကို မမြင်တော့ဘဲ မွတ်စ်လင်မ်နှင့်ဗုဒ္ဓဘာသာဝင်တို့၏ အော်သံများ အပေါ် ပြည်သူတို့မှ စိတ်ဝင်သွားစေရန် ဦးတည်လိုက်ခြင်းဖြင့် အကြမ်းဖက်မှုအတွင်း အစိုးရ၏ပါဝင်မှုအခန်းကဏ္ဍအား ပြည်ဖုံးကားချလိုက်ရာ၌ အထောက်အကူဖြစ်စေသည်။

ဤဆိုးကျိုးနှစ်ရပ်က ပြဿနာဖြေရှင်းရေး၏လမ်းကြောင်း အစစ်အမှန်ကို အစဖျောက်လိုက်ပါတော့သည်။

ယင်းသို့သုံးနှုန်းလိုက်ခြင်းကြောင့် မီဒီယာနှင့် ကမ္ဘာ့ဇာတ်စင်ပေါ်ရှိသူများသည် ပြဿနာ၏ အကြောင်းရင်းမှန်မှ လမ်းချော်ကာ၊ လူထု အတွေးအမြင်နှင့်မူဝါဒများကို အမှားမှား အယွင်းယွင်းဖြစ်စေသော ဆွေးနွေးငြင်းခုံမှုများထဲ နစ်ဝင်သွားကြသည်။ အကယ်၍များ အပြန်အလှန်အကြမ်းဖက်မှု (၀ါ) ပဋိပက္ခဖြစ်စဉ်မှန်ပါက ယင်းပြဿနာများအပေါ် အုပ်စုအားလုံးမှ တူညီစွာ ပြစ်တင်ဝေဖန်ရှုတ်ချမှုများ ရှိရပေမည်။ ယခုသော် တကယ့်သားကောင်များမှာ တရားစီရင်ရေးနှင့်ဥပဒေစိုးမိုးရေး၌ ကျူးလွန်သူများထက် တစ်ဖက်စောင်းနင်းဆက်ဆံခံနေရ၏။ အကြောင်းသော် သူတို့သည်သာ ကျူးလွန်သူတရားခံများအဖြစ် တမင်ကောက်ကျစ်စွာ အသိသွင်းခံရသောကြောင့် ဖြစ်ပေသည်။ သူတို့၏ လူမျိုးစု၊ ဘာသာရေးအသင်းအဖွဲ့များပင်လျှင် ထိုအစွန်းအထင်း မကင်းစင်ခဲ့။

ဤအရေးအရာများကို အပြန်အလှန်/ပဋိပက္ခအဖြစ် ဖော်ပြနေခြင်းသည် – ဗမာလူမျိုးနှင့်ဗုဒ္ဓဘာသာမဟုတ်သူများမှာ နိုင်ငံသားဖြစ်ခြင်းနှင့်တင်းပြည့်ကျပ်ပြည့်မထိုက်တန် ဟူသည့် အတွေးအမြင်အား အခြေပြုထားသော ဗမာအစိုးရ၏ လူမျိုးဘာသာခွဲခြားခြင်းမူဝါဒအပေါ်လည်း အမြင်လျှမ်းသွားစေခြင်းဖြစ်သည်။ အစိုးရသည် နှစ်ပေါင်း များစွာကတည်းက ၄င်း၏လူမျိုးဘာသာခွဲခြားရေးအစီအမံအား – ခွဲခြားချိုးနှိမ်ဆက်ဆံသောဥပဒေနှင့်လည်းကောင်း၊ လူနည်းစုမွတ်စ်လင်မ်တို့အပေါ် ထင်သာမြင်သာ အကြမ်းဖက်မှုနှင့်လည်းကောင်း အလျဉ်မပြတ်အောင် ဖန်တီးထားခဲ့၏။

၁၉၇၈ ခုနှစ် နဂါးမင်းစီမံချက်/စစ်ဆင်ရေးက မြန်မာအစိုးရ၏ခွဲခြားချိုးနှိမ်ဆက်ဆံမှုအစီအမံအား နားလည်သဘောပေါက်စေသည့် မီးမောင်းထိုးပြချက်တစ်ခုဖြစ်သည်။ ၄င်းစစ်ဆင်ရေးကာလအတွင်း ရိုဟင်ဂျာ နှင့် လူနည်းစုဝင်အခြားအုပ်စုများ၏ တရားဝင်တည်ရှိမှုကို ပယ်ဖျက်သောအားဖြင့် အာဏာပိုင်နှင့်ဒေသခံတို့မှ သတ်ဖြတ်ခြင်း၊ လိင်ပိုင်းဆိုင်ရာစော်ကားချက်၊ ဖျက်ဆီးမှုတို့ကို သုံး၍ မျိုးသုဉ်းပျောက်ကွယ်အောင် ကြံဆောင်ခဲ့ကြသည်။ ထိုစဉ်က ရခိုင်ပြည်ရှိ ရိုဟင်ဂျာပေါင်း နှစ်သိန်းမှာ မြန်မာပြည်ပြင်ပသို့ မောင်းထုတ်ခံကြရသည်။ ၂၀၀၀ ခုနှစ်များ တစ်လျှောက်တွင်လည်း ရိုဟင်ဂျာနှင့် အခြားမွတ်စ်လင်မ်တို့ကို တမင်ကြံစည် တိုက်ခိုက်မှုများ ပြုလုပ်ခဲ့ကြသည်။

မွတ်စ်လင်မ်တို့အပေါ် သမိုင်းနှင့်ချီ၍ ခွဲခြားချိုးနှိမ်ဆက်ဆံမှုများက ၂၀၁၂-၂၀၁၃ တိုက်ခိုက်မှုအားလုံးနီးပါး၌ အစိုးရလုံခြုံရေးတပ်ဖွဲ့များကို ငုတ်တုတ်ရပ်ကြည့်စေခဲ့သည် သာမက၊ ၄င်းတို့သည် မွတ်စ်လင်မ်တို့အား အကြမ်းဖက်သည့် ဖြစ်ရပ် အများအပြားတွင်လည်း ပါဝင်စေခဲ့သည်အထိ ခွင့်ပြုခံရသည်။

၂၀၁၂ ခုနှစ် ဇွန်လမှစတင်လာသော မွတ်စ်လင်မ်ဆန့်ကျင်ရေးတိုက်ခိုက်မှုများသည် ဘုန်းတော်ကြီးတို့၏ အစ္စလာမ်ဆန့်ကျင်ရေးလက်ကမ်းစာစောင်များ၊ ၀ါဒဖြန့် လှုံ့ဆော်မှုများအားဖြင့် အစိုးရက ကန့်လန့်ကာနောက်ကွယ်မှ စံနစ်တကျ ကြိုတင်ကြံစည်ထားခြင်း ဖြစ်သည်။ မွတ်စ်လင်မ်ဆန့်ကျင်ရေး၌ အမည်ပျက်ဖြင့်ကျော်ကြားလှသော ဦးဝီရသူအား ကျားကျားမီးယပ် အကာအကွယ်ပေးနေသည့် သမ္မတဦးသိန်းစိန်ကိုယ်တိုင်က “ ရိုဟင်ဂျာပြဿနာ၏ တစ်ခုတည်းသော အဖြေမှာ ၄င်းတို့အားလုံးကို နိုင်ငံမှ ထွက်ခွာသွားစေခြင်း သို့မဟုတ် ဒုက္ခသည် စခန်းသို့ ပို့ဆောင်လိုက်ခြင်းပင်ဖြစ်သည် ” ဟု လူသိရှင်ကြား ဆိုဖူးသည်။ သူ့ရည်မှန်းချက်မှာ ရခိုင်ပြည်နယ်တွင် အတိုင်းအတာ တစ်ရပ်အထိ ပြည့်ဝခဲ့သည်။ ၂၀၁၂ ခုနှစ်မှစ၍ ရိုဟင်ဂျာပေါင်း တစ်သိန်းလေးသောင်းခန့်မှာ ဒုက္ခသည် စခန်းများအတွင်း အကျယ်ချုပ် အကျဉ်းသားဘ၀သို့ ဆိုက်ရောက်ခဲ့ပြီး ထောင်ပေါင်းများစွာမှာ နိုင်ငံစွန့်ထွက်ပြေးခဲ့ကြရသည်။ တိုက်ခိုက်မှုများဖြစ်ပွားသည်ကို အစိုးရဖက်မှ ၀န်ခံနေသော်လည်း ကြားဝင်တားမြစ်ခြင်း မရှိသည့်အပြင် ဦးစားပေး စုံစမ်းစစ်ဆေးမှုလည်း မပြုခဲ့ချေ။ ဤသို့ဖြစ်နေခြင်းမှာ ယင်းတိုက်ခိုက်မှုများသည် အစိုးရ၏ လူမျိုးဘာသာ ခွဲခြားရေးမူဝါဒမှ ကျွံထွက်လာသည့်ခြေလှမ်းထဲမှ ဖြစ်နေခြင်းကြောင့်ပင်။ ထို့အတူ ထိုတိုက်ခိုက်မှုများကြောင့် အစိုးရ၏ အင်အားနှင့်သြဇာကို ပို၍ ကြီးမားလာစေသည်ဟု ကျွမ်းကျင်သူအချို့မှဆိုကြသည်။

တစ်ဖက်သတ် တိုက်ခိုက်မှုများကို ပဋိပက္ခဟု သုံးနှုန်းခြင်းက မုသာဝါဒ လမ်းကြောင်းမှား တစ်ရပ် ဖြစ်သည့်အပြင် လူ့ အဖွဲ့အစည်းနှစ်ရပ်၏ အတွင်းအပြင်၌ လိမ်ညာသွတ်သွင်းထားမှု တည်တံ့အောင် အားဖြည့်ပေးရာရောက်နေ၏။ ကုလသမဂ္ဂနှင့် အခြား နိုင်ငံတကာ အဖွဲ့အစည်းတို့သည်လည်း အပြန်အလှန်ပဋိပက္ခအရေးဟု ရှုမြင်သွားပြီး လူမျိုးရေးဘာသာရေး တင်းမှုများအပေါ် ပြေငြိမ်းလျော့ပါးစေရန် မြန်မာအစိုးရ အတွက် အင်တိုက်အားတိုက် ကိုယ်စားလှယ်များ ဖြစ်လာကြကုန်သည်။ သို့စေကာမူ မြန်မာ အစိုးရမှာကား လူမျိုးရေးဘာသာရေး တင်းမာမှုများကို ဖြေလျော့ပေးသူဖြစ်လာရန်ဝေးစွ၊ ၄င်းကိုယ်တိုင်ကပင် မွတ်စ်လင်မ်များအပေါ် ခွဲခြားဆန့်ကျင်မှု၏ အဓိကသော့ချက်၊ လူမျိုးရေးဘာသာရေး အဓိကရုဏ်းဖြစ်လာအောင် မီးမွှေးရာ၌ ကျွမ်းကျင်သူ၊ ဆယ်စုနှစ်များစွာ ဤကဏ္ဍ၌ ပေါက်မြောက်စေခဲ့သူ ဖြစ်နေလေ၏။

မုသာဝါဒလမ်းကြောင်းမှားက နိုင်ငံတကာအရေးလှုပ်ရှားသူများအတွက် နက်ရှိုင်းခက်ခဲသည့် ပြဿနာများကို အခြေခံကျကျ ဖော်ထုတ်တင်ပြမှုမှ ရှောင်လွှဲနိုင်သည့် ဆင်ခြေတစ်ခုဖြစ်လျက်ရှိသည်။ အကြမ်းဖက်မီးမွှေးရာ၌ လည်းကောင်း၊ အကြမ်းဖက်မှုရှေ့ဆက်နေမှု၌လည်းကောင်း အလွန်သြဇာညောင်းလှသော ထိုအခြေခံပြဿနာများဟူသည် ပြစ်ဒဏ်မှ ကင်းလွတ်အောင် စံနစ်တကျ ဖန်တီးထားခြင်း၊ ဥပဒေကြောင်းအရ ခွဲခြားချိုးနှိမ်ဆက်ဆံခြင်း၊ အစိုးရ၏မူဝါဒနှင့်ပါဝင် ပတ်သက်နေမှုများ ဖြစ်ပါသည်။ အကယ်၍ လူမှုရေးတင်းမာမှုများကို မဆိုင်းမတွ ဖြေချလျော့ပါးနိုင်စေသည့် တိုင်အောင် မြန်မာ့ အရေးအား ဖြေရှင်း၌ မရနိုင်သေးချေ။ နိုင်ငံတွင်းရှိ ဗုဒ္ဓဘာသာဝင်နှင့် မွတ်စ်လင်မ်တို့အကြား အခိုင်အမာစိုက်ထူထားသည့် အကြမ်းဖက်မှု၏ အရင်းအမြစ်များအတွင်းမှသာလျှင် အဖြေထုတ်နိုင်ပါမည်။

အာဏာပိုင်အစိုးရ၏ အခန်းကဏ္ဍပါဝင်ကြောင်း လက်ခံထုတ်ဖော်မှု မရှိဘဲ မြန်မာနိုင်ငံရှိ မွတ်စ်လင်မ် ဆန့်ကျင်ရေး အကြမ်းဖက်မှုအား အဖြေရှာရန် ချဉ်းကပ် စူးစမ်းခြင်းက ရူးသွပ်မှုသာ ဖြစ်ချိမ့်မည်။ မည်သည့်အကြောင်းရင်းကြောင့် မွတ်စ်လင်မ်ရေးရာပြဿနာဖြစ်ရသည်ကို တိကျပီပြင်စွာ သတ်မှတ်ဖော်ပြနိုင်ရပါမည်။ အဖိနှိပ်ခံလူနည်းစု တစ်ရပ်အပေါ် ဆန့်ကျင်တိုက်ခိုက်မှုများ စံနစ်တကျ ကျယ်ပြန့်လာအောင် အာဏာပိုင်များမှ ဖော်ဆောင်အားပေးနေခြင်းတည်းဟူသော အချက်သည်သာလျှင် အမြန်ဆုံး အဖြေမှန်ရရှိရေးအတွက် ပထမဦးဆုံး နှင့် ပဓာနအကျဆုံး ဦးတည်ရှေ့ရှုရမည့်ခြေလှမ်းပင် ဖြစ်ပေ၏။

xxxxxxxxxxxxxxxxxxxxxx

Rachel Wagley ၏ In Burma, There is No ‘Communal Violence’ သုံးသပ်ချက်ဆောင်းပါးကို မြင့်မိုရ်မောင်မောင်မှ ဆီလျော်အောင် ပြန်ဆိုရေးသားပါသည်။

November 30, 2013
ဒါကို ဗုဒ္ဓအကြမ်းဖက်ဝါဒီဟု ခေါ်(ဝေါ်)သင့်သလား? (By ဒေါက်တာ မောင်ဇာနည်)

နိုဝင်ဘာ-၂၈ ၂၀၁၃
M-Media
ဆောင်းပါးရှင်- (ဒေါက်တာ)မောင်ဇာနည်
ဘာသာပြန်-မြင့်မိုရ်မောင်မောင်

များမကြာသေးမီက လူပေါင်းရာကျော်သေဆုံးစေပြီး တစ်သောင်းနှစ်ထောင်ကို အိုးမဲ့အိမ်မဲ့ဖြစ်သွားစေသည့် မွတ်စ်လင်မ် လူနည်းစုအပေါ် အကျည်းတန်စွာပြုလုပ်ခဲ့သော ရက်စက်ကြမ်းကြုတ်မှုများ၏ ဗဟိုချက်၌ မြန်မာနိုင်ငံ၏ ၉၆၉ အစွန်းရောက်လှုပ်ရှားမှု ရှိနေ၏။ သို့သော် သမ္မတဦးသိန်းစိန်အစိုးရ နှင့် ပြည်တွင်းရှိလူမျိုးကြီးဝါဒီတို့အကြား အပြန်အလှန် ပူးပေါင်းမှုတစ်ဖက်မှ ဗုဒ္ဓဘာသာဝင်ဘုန်းကြီးများ ဦးဆောင်ထားသည့်အုပ်စုကို နားမလည်နိုင်အောင် ဖြစ်ရသည်။

အောက်ပါ ဆက်နွှယ်ကဏ္ဍများကို စစ်ဆေးသုံးသပ်မှု မပြုဘဲ ရှင်းပြ၍ရနိုင်ဦးမည်မဟုတ်။

(က) နိုင်ငံတော်မှ ပြည်တွင်းနာဇီလက်သစ်ဗုဒ္ဓဘာသာဝင်များကို အပြစ်လွတ်အောင် ဆောင်ကြဉ်းပေးနေမှု
(ခ) လူနည်းစုမွတ်စ်လင်မ်များအား မျိုးသုဉ်းရှင်းလင်းရေးလက္ခဏာများ ထင်ရှားလာနေသည့်ကြားမှ ဦးသိန်းစိန်၏ တုန့်ပြန်အရေးယူမှု မရှိခြင်း
(ဂ) အကျဉ်းအကြပ်ကာလတစ်လျှောက်လုံး ဒေါ်အောင်ဆန်းစုကြည်ဦးဆောင်သော အတိုက်အခံအုပ်စုတို့၏ အကျင့်ပျက်ယိုယွင်းချက်များ

အကြမ်းဖက်မှု၏ ပရမ်းပတာမြင်ကွင်းက တိုင်းပြည်၏လားရာ၊ ပြန်လည်ပြုပြင်မွမ်းမံရေးနှင့်စပ်လျဉ်း၍ အဓိက မေးခွန်းများစွာ ထွက်ပေါ်လာစေသည်။

၉၆၉ ဂိုဏ်း၏လှုပ်ရှားမှုသည် အဘယ်ကဲ့သို့ ရေပန်းစားကျယ်ပြန့်လာသနည်း၊ တိုင်းပြည်တစ်ခွင် အဘယ်ကဲ့သို့ ပျံ့နှံ့ရပါသနည်း ?

လူမျိုး နှင့် ဘာသာ သန့်စင်ရေး အတွက် ဦးထိပ်ထားသည်ဟု အသံထုတ်ချက်နှင့်အတူ ထွက်ပေါ်လာသော ခေတ်သစ် အမျိုးသားရေး လှုပ်ရှားမှုသည် ဗုဒ္ဓအနှစ်တရား၊ အမျိုးသားယဉ်ကျေးမှုနှင့် စီးပွားရေးအပေါ် တလွဲ အသုံးချထားသည်ဖြစ်၍ ၁၉၃၀ ခုနှစ်များအတွင်းက ဂျာမဏီနိုင်ငံ၏ နာဇီဝါဒနှင့် ကွဲလွဲခြားနားခြင်း မရှိကြောင်း၊တွေ့ရသည်။ ၄င်း ၉၆၉ လှုပ်ရှားမှုရေပန်းစားလာသည့် အဓိက အချက်သုံးရပ် ရှိကြောင်းကို တွေ့ရသည်။

ပထမအချက်မှာ ၉၆၉ ခေါင်းဆောင် ဦးဝီရသူကဲ့သို့ ဗုဒ္ဓဓမ္မသင်ကြားရေးဌာနများမှ စစ်သွေးကြွ ဗုဒ္ဓဘာသာဝင်ဟောပြောသူ အချို့က အထွေထွေစီးပွားရေး အကြပ်အတည်းများ နှင့် လူ့အဖွဲ့အစည်းအတွင်း ယဉ်ကျေးမှုပျက်စီးနေမှုအတွက် ပြည်တွင်း မွတ်စ်လင်မ်တို့ကို ဓားစာခံအဖြစ် အမိအရ ပြုလုပ်ခဲ့ကြသည်။ ဗမာလူမျိုးတို့ကို မွတ်စ်လင်မ်တို့၏ စီးပွားရေးလက်ဝါးကြီးအုပ်မှုနှင့် ဂုတ်သွေးစုပ်မှုကို စုပေါင်းခံစားရသည့် သားကောင်များအလား ပုံဖော်ကြသည်။

ဒုတိယအချက်မှာ ၉၆၉ အုပ်စုသည် အစဉ်အလာရှိခဲ့သော မွတ်စ်လင်မ်ဆန့်ကျင်ရေးဝါဒကို လူများစု ဗုဒ္ဓဘာသာဝင်များအကြား မနေမနား ပေါက်ပေါက်ဖောက်ကြသည်။

တတိယအချက်မှာ ရဲဌာန၊ ထောက်လှမ်းရေး၊ စစ်တပ်၊ ဌာနဆိုင်ရာ နှင့် မီးသတ်တပ်ဖွဲ့ပင်မကျန် ဦးသိန်းစိန်၏ စီမံမှုအောက်၌ ရှိနေကြကုန်သော နိုင်ငံ့ဝန်ထမ်း အားလုံးနီးပါးက မြင်သာထင်သာစွာ နာဇီလက်သစ် ဗုဒ္ဓဘာသာဝင်များ အုပ်စုကို ပြစ်ဒဏ်မှ ဘေးမဲ့ပေးထားသည့် အပြင် အားပေးအားမြှောက်ပြုလုပ်နေကြပေသည်။

နေပြည်တော်အစိုးရသည် အစွန်းရောက်လှုပ်ရှားမှုများအပေါ် မည်သည့်ဖြိုခွင်းမှု ပြုလုပ်ပါသနည်း ?

ယမန်နှစ် မြန်မာနိုင်ငံအနောက်ပိုင်း ရခိုင်ပြည်နယ်၌ ရိုဟင်ဂျာမွတ်စ်လင်မ်ဆန့်ကျင်ရေး အကြမ်းဖက်မှုနှင့်ပတ်သက်၍ လွှတ်တော် အစည်းအဝေးတွင် ဦးသိန်းစိန်မှ လူမျိုးရေး မုန်းတီးမှုဖြန့်ချိနေသည့် နိုင်ငံရေးပါတီများ၊ ဗုဒ္ဓဘာသာဘုန်းတော်ကြီးများ ကို တရားဝင်ပြစ်တင် စကားဆိုခဲ့သည်။ သို့သော်လည်း သူ၏ အစိုးရအဖွဲ့သည် မွတ်စ်လင်မ် ဆန့်ကျင်ရေးအမုန်းတရား သို့မဟုတ် ရိုဟင်ဂျာမုန်းတီးရေးတို့ကို ပြောင်ပြောင်တင်းတင်း သွတ်သွင်းလှုံ့ဆော်နေသူ မည်သူတစ်ဦးကိုမျှပင် မည်သည့်အရေးယူမှုများ မပြုလုပ်ခဲ့ကြ။ လူ့အဖွဲ့အစည်းအတွင်း မွတ်စ်လင်မ်ဆန့်ကျင်ရေး

အမုန်းတရားများကို ဖြန့်ဝေ သွတ်သွင်းခြင်း၊ မွတ်စ်လင်မ်တို့အား တစ်ဆင့်ချင်း လက်စတုံးပစ်ရန် လှုံ့ဆော်ခြင်း၊ လူ့အဖွဲ့အစည်း အပေါ် သြဇာသုံးခြင်း စသည်တို့ကို လုပ်ဆောင်နေကြသူ ဗုဒ္ဓဘာသာဝင်တစ်ဦး တစ်လေကိုမျှပင် သူ၏အာဏာပိုင်တို့မှ ထိန်းသိမ်းခြင်း သို့မဟုတ် ဟန့်တားခြင်းလည်း မရှိခဲ့ချေ။

“ နိုင်ငံရေးပါတီများ၊ အချို့ဘုန်းတော်ကြီးများနှင့် တစ်သီးပုဂ္ဂလများထံ၌ လူမျိုးရေး မုန်းတီးမှု ကြီးထွားမြင့်တက်လာနေသည်။ ၄င်းတို့သည် ပြည်တွင်းနှင့်ပြည်ပရှိ (ရခိုင်)လူ့အဖွဲ့အစည်းများနှင့်ပင် ပတ်သက် အားပေးမှုရှိနေသည် ” ဟု ပါလီမန်သို့ သြဂုတ်လကတင်သွင်းသော သမ္မတအစီရင်ခံစာ၌ ဖော်ပြထား၏။ ထို့ကြောင့် အနောက်တိုင်းထိပ်တန်း မီဒီယာများမှ ခေါင်းကြီး သတင်းအဖြစ် တခမ်းတနား ဖော်ပြထားသော ဦးသိန်းစိန်၏ သဟဇာတအတူ ယှဉ်တွဲနေထိုင်ရေးအဆို နှင့် သူ့အစိုးရ၏တုန့်ပြန်ဆောင်ရွက်မှုမရှိခြင်းအကြားဝယ် တံတားထိုးမရနိုင်သည့် ကွက်လပ်ဖြစ်နေပေသည်။

အကြမ်းဖက်လူအုပ်ကြီးက မျက်မှောက်၌သောင်းကျန်းနေပါလျက် ဒေသခံရဲတပ်ဖွဲ့များသည် မတုန်မလှုပ် ရပ်ကြည့်နေခဲ့ကြောင်း ဟူသည့် သူ့အစိုးရ၏ တုန့်ပြန်ဆောင်ရွက်မှု မရှိပုံကို အထက်ပါ မီဒီယာများကပင် လေ့လာသုံးသပ် တင်ပြမှု မပြုခဲ့ကြ။

မည်သူမဆို မြန်မာနိုင်ငံတစ်ဝှန်းတွင် များမြောင်လှစွာသော မွတ်စ်လင်မ်ဆန့်ကျင်ရေးလှုံ့ဆော်ချက်များ၊ စီဒီနှင့်ဒီဗီဒီများ၊ ပုံနှိပ်ထုတ်ဝေမှုများကို အလွယ်တကူ တွေ့မြင်နိုင်ပါသည်။ ပိုမိုပွင့်လင်းမြင်သာလာသော နိုင်ငံ့လူမှုဝန်းကျင်၌ မွတ်စ်လင်မ်ဆန့်ကျင်ရေး သတင်းလိမ်များ၊ မုန်းတီးရေးအမြင်များဖြန့်ဝေရန် တရားဝင် ခွင့်ပြုသည့်နှယ် ဖြစ်နေခဲ့သည်။ သို့တစေ Voice Weekly သတင်းစာမှ သတ္ထုတွင်းဝန်ကြီးဌာန၏အလွဲသုံးစားမှုဆိုင်ရာ ဆောင်းပါးတစ်ပုဒ်မျှ ပုံနှိပ်ဖော်ပြရာတွင်မူ အာဏာပိုင်များက တရားစွဲခဲ့ပေသည်။

အစ္စလာမ်အပေါ်အမြင်မှားကြောက်ရွံ့ပြီးအကြမ်းဖက်လာအောင်စီစဉ်သူများ၊ အမုန်းတရားပွဲများကို ဦးသိန်းစိန်အစိုးရမှ နည်းလမ်းတကျ မနှိမ်နင်းပါလျှင်၊ မွတ်စ်လင်မ်နှင့်အခြား တိုင်းရင်းသား လူနည်းစုများအပေါ် ကျူးလွန်စော်ကားနေသူများအား ပြစ်ဒဏ် မပေး ကာကွယ်ထားသော သက်ဆိုးရှည်နေသည့် မူဝါဒကို အဆုံးမသတ်ပါလျှင် – ၉၆၉ ၏ အန္တရာယ်များက မျိုးဖြုတ်သုတ်သင်ခြင်း လှုပ်ရှားမှုအသွင်သို့ စုပြုံပြောင်းလဲသွားပေတော့မည်။ ဦးသိန်းစိန်၏ စစ်တပ် တစ်ပိုင်းအစိုးရသည် အတိုက်အခံများကို ချိုးနှိမ်ရာ၌ နှစ်ပေါင်း ၅၀ မက အတွေ့အကြုံရှိနေပါ၏။ လူ့အဖွဲ့အစည်းအတွင်း မရောက်ရှိစေလိုသော သတင်းနှင့် အချက်အလက်များကိုလည်း ဆယ်စုနှစ်များစွာ ထိထိရောက်ဖြတ်တောက် ပိတ်ပင်နိုင်ခဲ့ပါ၏။

ဦးသိန်းစိန်၏ထိပ်တန်းအကြံပေး နှင့် အစိုးရ၏ Myanmar Peace Center (MPC) အား ဦးဆောင်ညွှန်ကြားနေသူ – City University of Hong Kong မှ ဗမာ လူမျိုးပညာရှင် ဦးကျော်ရင်လှိုင်က ( Fletcher Forum of World Affairs in 2008 တွင် ထုတ်ဝေသည့် ) သူ၏ “Challenging the authoritarian state: Buddhist monks and peaceful protests in Burma, issues and policy” ဆောင်းပါးဝယ် တစ်ချိန်က မွတ်စ်လင်မ်ဆန့်ကျင်ရေးအဓိကရုဏ်းများ၌ စစ်တပ်သည် အဓိက အခန်းကဏ္ဍတွင် ပါဝင်ကြောင်း ရေးသားဖော်ပြဖူးသည်။

၁၉၉၇ ခုနှစ်တွင် မန္တလေးရှိ နာမည်ကြီး ဗုဒ္ဓရုပ်ပွားတော်တစ်ဆူအား စစ်ဗိုလ်ချူပ် တယောက်မှ မရိုးဖြောင့်သော အကြံဖြင့် ပြန်လည်ပြင်ဆင် မွမ်းမံခြင်းအပေါ် သံဃာတော်များ၏ ကန့်ကွက်ဆန္ဒပြမည့် အစီအစဉ်ကို စစ်အာဏာရှင်များက ရိပ်စားမိခဲ့သည်။ သံဃာတော်များမှ မစတင်နိုင်မှီ မွတ်စ်လင်မ် လုပ်ငန်းရှင်တစ်ဦးမှ ဗုဒ္ဓဘာသာဝင် အမျိုးသမီးတစ်ဦးအား မုဒိန်းကျင့်ပါသည်ဟူသော ကောလဟလ သတင်းထွက်ပေါ်လာခဲ့သည်။ အာဏာပိုင်များသည် စစ်ဗိုလ်ချူပ် အပေါ်ရှိနေသည့် အာရုံကို မွတ်စ်လင်မ်လုပ်ငန်းရှင်ဖက်လှည့်ကာ မွတ်စ်လင်မ်ဆန့်ကျင်ရေး အဓိကရုဏ်းအား ဖြစ်ပေါ်စေခဲ့သည်။ အစိုးရ ဆန့်ကျင်ရေးလှုပ်ရှားမှုများ၌ အမျက်ထွက်နေသော သံဃာတော်များ မပါဝင်စေရေးအလို့ငှာ ထောက်လှမ်းရေးသမားတို့သည် မွတ်စ်လင်မ် ဆန့်ကျင်ရေး အဓိကရုဏ်းများဖြစ်လာအောင် မကြာခဏ လှုံ့ဆော်ဖန်တီးတတ်ကြောင်း ဆန်းစစ်လေ့လာသူအချို့က ထောက်ပြထား၏ (စာမျက်နှာ ၁၃၇-၁၃၈)။ များမကြာသေးမီကပင် မတ်လ ၂၉ ရက်ထုတ် New York Times တွင်ဖော်ပြလိုက်သော “Kristallnacht in Myanmar:” ခေါင်းစဉ်တပ်ကာ အယ်ဒီတာ့အာဘော်အား The Disorder in Order: the Army-State in Burma since 1962 စာအုပ်ရေးသားသူ ပရော်ဖက်ဆာ Donald Seekin က မတ်လ ၃၀ ရက်တွင် အောက်ပါကဲ့သို့ ချေပရေးသားခဲ့သည်။

“ မြန်မာလူ့အသိုင်းအ၀ိုင်း၌ မွတ်စ်လင်မ်မုန်းတီးရေးသည် နက်နက်ရှိုင်းရှိုင်း အမြစ်တွယ်နေပါသည်။ ၄င်းမှာ ၁၉၆၂ မှ ၂၀၁၀ ခုနှစ်ကာလအတွင်း ဦးနေ၀င်းနှင့်တစ်ကွ အာဏာရှင်အစဉ်အဆက်တို့က အားပေးခဲ့ခြင်းကြောင့်ဖြစ်သည်။ ၄င်းတို့၏ သည်းခြေကြိုက် နည်းဗျူဟာများ အနက်တစ်ခုမှာ မွတ်စ်လင်မ်များသည် မြန်မာ ဗုဒ္ဓဘာသာဝင် အမျိုးသမီးများကို မုဒိန်းကျင့်ခြင်း (နှင့်) ဗုဒ္ဓဘာသာဝင်တို့ကို အစ္စလာမ်သို့ပြောင်းလဲ သွတ်သွင်းရန်ကြံစည်ခြင်း ဟူ၍ ကောလဟလ ထုတ်လွှင့်ခြင်းသာတည်း။ အာဏာပိုင်တို့၏ ခွဲခြားအုပ်ချုပ်ခြင်း နည်းဗျူဟာသည် ဗြိတိသျှ ကိုလိုနီအစိုးရ၏ တွဲရေးခွဲရေး အုပ်ချုပ်မှု ၀ါဒမှ မြစ်ဖျားခံလာဖွယ် ရှိ၏။ ဦးသိန်းစိန်သည် လူ့အဖွဲ့အစည်းအတွင်း ဘာသာတရားအားလုံး သဟဇာတ အတူ ယှဉ်တွဲနေထိုင်ရေးကို တဖွဖွဆိုနေသော်လည်း လက်တွေ့တွင်မူ နာဇီလက်သစ် ၉၆၉ ဗုဒ္ဓဘာသာ လှုပ်ရှားမှုနှင့်ပတ်သက်၍ စကားအဟ မခံခဲ့ချေ။ စစ်တပ်သည် အကန့်အသတ်မရှိ လွတ်လပ်စွာ ဖော်ထုတ်ပြောဆိုခွင့်ကို ဆယ်စုနှစ်များစွာ ကြမ်းတမ်းကြပ်မတ်နိုင်ခဲ့သော်လည်း ဒုစရိုက်သားများကို အကာအကွယ်ပေးထားခြင်းနှင့်အရေး မယူခြင်းတို့သည် အကြောက်တရားနှင့်ေ၀၀ါးမှုအား ဖန်တီးရန် နေပြည်တော်၏ မဟာဗျူဟာမြောက် အတွက်အချက်နှင့် ချိတ်ဆက်ထားဟန် ရှိပေသည်။ နိုင်ငံနှင့် စီးပွားရေးကို ပြိုင်ဖက်မဲ့ လွှမ်းမိုးထိန်းချုပ်နိုင်ရန (the divide-and-rule tactics it has always used to exert unrivaled control and influence over the state and economy) တစိုက်မတ်မတ် အသုံးချလေ့ရှိသည့် ခွဲခြားအုပ်ချုပ်မှုနည်းဗျူဟာများဟု ဆိုရပေမည်။

မိမိအားအဓိကထောက်ခံအားပေးကြသည့် ဗုဒ္ဓဘာသာဝင် လူထုအကြား အကြမ်းဖက်ဝါဒ လှိုင်းလုံးကြီး ရပ်တန့်စေအောင် အကြမ်းမဖက်ရေး၌ ထင်ရှားသည့် ကမ္ဘာကျော် ပုဂ္ဂိုလ် ဒေါ်အောင်ဆန်းစုကြည်မှာ ဘာများဆောင်ရွက်နေပါသနည်း ?

ဒေါ်စုကြည်ကိုယ်တိုင်က အစ္စလာမ့်အမုန်းတရားနှင့် အကြောက်တရား ကျယ်ပြန့်လာမှု၌ ပါဝင်လုံးထွေးလိုက်ခြင်းမှာ နားမလည်နိုင်အောင်ဖြစ်သွားစေသည်။ မွတ်စ်လင်မ်များအပေါ် အကြမ်းဖက်မှု ဖန်တီးခြင်း၌လည်းကောင်း၊ မွတ်စ်လင်မ်နှင့် ဗုဒ္ဓဘာသာဝင် အသိုင်းအ၀ိုင်းနှစ်ရပ်လုံးထံဖြစ်ပွားသော သေကြေပျက်စီးမှုများအပေါ် စာနာကြောင်းပြသရန်၌ လည်းကောင်း အကြွင်းမဲ့ ရေငုံနှုတ်ပိတ် နေခဲ့ပါသည်။ မည်သည့် အကြောင်းကြောင့်ဖြစ်စေကာမူ သူမ လျစ်လျူရှုခဲ့သည့် အကျည်းတန်မှုများ အနက် ထင်ရှားသည့် အကြောင်းသုံးရပ်မှာ –

၁။ မျက်နှာစိမ်းများနှင့်ဒေသခံများ နှစ်မျိုးလုံးဖြင့် စုစည်းထားသည့် ဗုဒ္ဓဘာသာဝင် လူရမ်းကားအုပ်စုမှ မွတ်စ်လင်မ်တို့ကိုသာ တစ်ဖက်သတ် ဦးတည်ပစ်မှတ်ထားနေသည့် အမုန်းတရားဖြန့်ချိမှုနှင့် အကြမ်းဖက်မှုများ

၂။ မွတ်စ်လင်မ်များ နှင့် ကချင်ကဲ့သို့ အခြားလူနည်းစုဝင်တို့အပေါ် အလွန်အကျွံအကြမ်းဖက်မှု၊ သတ်ဖြတ်မှု နှင့် ဖျက်ဆီးသောင်းကျန်းမှုများ

၃။ စစ်တပ်နှင့်လုံခြုံရေးတပ်ဖွဲ့ဝင်တို့သည် အဓိကရုဏ်းဖြိုခွင်းရာ၌ နှစ်ပေါင်း ၅၀ အတွေ့အကြုံရှိနေခြင်း။

ဒေါ်စုကြည်သည် မွတ်စ်လင်မ်ဆန့်ကျင်ရေး အကြမ်းဖက်မှုများအပေါ် လုံးလုံးလျားလျား ဆိတ်ဆိတ်နေခဲ့ခြင်းတော့ မဟုတ်။ မိတ္ထီလာအကြမ်းဖက်မှုကြီးအပြီး သုံးရက်မြောက်တွင် သူမက ဒေသခံလုံခြုံရေးတပ်ဖွဲ့ဝင်များ၏ အခြေအနေထိန်းသိမ်းမှု ညံ့ဖျင်းပုံကို ဖွင့်ပြောဝေဖန်ခဲ့သည်။ လူရမ်းကားများ စိတ်တိုင်းကျခုတ်ဖြတ် မီးရှို့နေချိန် လုံခြုံရေးတပ်ဖွဲ့ဝင်တို့မှ လက်ပိုက်ရပ်ကြည့်နေသည့် အချက်ကိုမူ မဝေဖန်ခဲ့ချေ။ သုံးရက်စလုံး ဗလီဝတ်ကျောင်း၊ မွတ်စလင်မ်ဈေးဆိုင်နှင့်နေအိမ်များ အပါအ၀င် အဆောက်အဦးပေါင်း တစ်ထောင်နီးပါးကို လက်နက်ကိုင်ဗုဒ္ဓဘာသာဝင် လူရမ်းကားအုပ်စုများမှ မီးလောင် တိုက်သွင်းနေခြင်းအား လုံခြုံရေး တပ်ဖွဲ့ဝင်တို့က လက်လွှတ်ထားခဲ့ကြ၏။ ၄င်းတို့၏ တမင်သက်သက် အရေးမယူဘဲနေခြင်းအပေါ် မြန်မာဘာသာဖြင့်ပြုလုပ်သော သတင်းစာရှင်းလင်းပွဲမေးမြန်းခန်း၌ ဒီမိုကရေစီအကူး အပြောင်းကာလသစ်တွင် ဒေသခံလုံခြုံရေးတပ်ဖွဲ့ဝင်တို့မှာ အဓိကရုဏ်းကိုင်တွယ်မှု အတွေ့အကြုံနည်းပါးနေသည်ဟူသော ဆင်ခြေဖြင့် သူမက ဖုံးဖိကာကွယ်ပေးခဲ့သည်။

မြန်မာစစ်တပ်နှင့်တရုတ်၏ အကျိုးတူပူးပေါင်းဆောင်ရွက်မှု သတ္ထုတွင်းစီမံကိန်းအား ဆန္ဒပြခြင်းကို အကြမ်းဖက်နှိမ်နှင်း ခဲ့သည့်ပြဿနာအပေါ် စုံစမ်းစစ်ဆေးရေးကော်မရှင် ဥက္ကဌအဖြစ် တာဝန်ယူခဲ့သော ဒေါ်စုကြည်၏ မှတ်ချက်က ……. မိမိတို့၏မြေယာ ဆုံးရှုံး၍ ဆန္ဒပြကြသူများ နှင့် ထောက်ခံ ပံ့ပိုးပါဝင်ကြသူ သံဃာတော်များအား လုံခြုံရေးတပ်ဖွဲ့ဝင်တို့မှ မီးစုန်းဓာတ်ပါ မီးလောင်ဗုံးများအသုံးပြုကာ နိုင်နိုင်နင်းနင်းဖြိုခွင်းခဲ့ခြင်း အဖြစ်ကို ကျော်ခွပစ်ခဲ့သည်။ မိတ္ထီလာရှိ အကြမ်းဖက်ခံ သားကောင်များထံ သွားရောက်ကြည့်ရှုအားပေးရမည့်အစား မတ်လ ၂၇ ရက်တွင်ကျင်းပမြဲဖြစ်သော တပ်မတော်နေ့ အခမ်းအနားသို့ တက်ရောက်ကာ အလန်းစား ဗိုလ်ချုပ်များနှင့် အလွန်နွေးထွေးသည့် ရင်းနှီးမှုကို ပြသခဲ့ပေသည်။

လက်ရှိကောလဟလများနှင့်အကြမ်းဖက်မှုတို့သည် မွတ်စ်လင်မ်ဆန့်ကျင်ရေး လုပ်ရပ်များအတွင်း လူအများထပ်မံ ပါဝင်လာအောင် တွန်းပို့မည်လော ? မြန်မာနိုင်ငံ၌ အစ္စလာမ်အပေါ်ဆင်ယင်ထားသည့် ကောလဟလများသည် မည်သည့်နေရာမှ စတင် မြစ်ဖျားခံလာသနည်း ?

သမ္မတဦးသိန်းစိန်၏ပြောဆိုခွင့်ရ ပုဂ္ဂိုလ်တစ်ဦးဖြစ်သည့် ဗိုလ်မှူးဟောင်း ဇော်ဌေး သို့မဟုတ် မှူးဇော် သည် ၂၀၁၂ ခုနှစ် ဇွန်လ ရိုဟင်ဂျာ ဆန့်ကျင်ရေးအကြမ်းဖက်မှု ပထမလှိုင်းမှာကတည်းက မွတ်စ်လင်မ်ဆန့်ကျင်ရေး ကောလဟလများ နှင့် သွားပုပ်လေလွင့် စကားများကို အဓိက တင်ပြနေသူဖြစ်ကြောင်း သိရသောအခါ လူဦးရေသန်း ၆၀ အနက် ၄ ရာခိုင်နှုန်းမျှသာရှိသည့် ပြည်တွင်း မွတ်စ်လင်မ်များအဖို့ တုန်လှုပ်စရာ ဖြစ်ခဲ့သည်။ သူ၏ဖေ့စ်ဘွခ် စာမျက်နှာပေါ်တွင် မွတ်စ်လင်မ်ဆန့်ကျင်ရေး အမုန်းတရားနှင့် စိုးကြောက်မှုများတွင် ကျယ်စေမည့် အခိုင်အမာ သတင်းယောင်ယောင် ပို့စ်များစွာ ရေးတင်ခဲ့သည်။ ၄င်းတို့အနက်သာဓကတစ်ရပ်မှာ “ လက်နက်ကိုင်မွတ်စ်လင်မ် အကြမ်းဖက်သမား တစ်စုသည် မြန်မာ-ဘင်္ဂလားဒေ့ရ်ှနယ်စပ်ကို ဖြတ်ကျော် ၀င်ရောက်လာပြီဖြစ်ကြောင်း ကျွန်ုပ်တို့မှ သတင်းရရှိထားပြီ။ သတိရှိကြကုန် ” ဟူ၏။

တစ်ချိန်တည်းမှာပင် နိုင်ငံပိုင် မီဒီယာများ၏ ဆောင်းပါးများစွာတွင်လည်း “ကုလား” ဟူ၍ မွတ်စ်လင်မ် ဆန့်ကျင်ရေး အသုံးအနှုန်းအား ဇောင်းပေးဖော်ပြခဲ့သည်။ ကုလား ဆိုသည့် မြန်မာ စကားမှာ ကြမ်းထော်မည်းညစ်သူ ဟု အဓိပ္ပာယ်ရပြီး မွတ်စ်လင်မ်များနှင့် အိန္ဒိယနွယ်ဖွားတို့ကို ရည်ညွှန်းကာ နှိမ့်ချခေါ်ဆိုချက်ဖြစ်သည်။ တိုင်းပြည်၏လုံခြုံရေးနှင့် စီမံရေးဌာနများနှင့် တစ်ကွ ယဉ်ကျေးမှုနှင့် အတွေးအခေါ်ပိုင်း၌ သြဇာကြီးမားကြသူတို့က မွတ်စ်လင်မ်ဆန့်ကျင်ရေး အမုန်းတရား အကြောက်တရား သွတ်သွင်းခြင်းကို ပေါင်းလုပ်ကြသော အခါ ပြည်သူများသည်လည်း ယင်းကဲ့သို့ပင် အမြင်ဖြစ်ပေါ်လာတတ်ကြ၏။ ထုံးဓလေ့အားဖြင့် ဗုဒ္ဓဘာသာဝင် ဘုန်းတော်ကြီးတို့သည် မြန်မာလူ့ အဖွဲ့အစည်းတွင် မိဘဘိုးဘွားနှင့် ဗိုလ်ချုပ်များထက် အလွန်သြဇာညောင်းကြသည်။ အစိုးရ၏ မွတ်စ်လင်မ်ဆန့်ကျင်ရေး လုပ်ရပ်နှင့် အကြမ်းဖက် ဝါဒီ သြဇာရှိ ဘုန်းတော်ကြီးတို့၏ ၀ါဒဖြန့်မှုများအကြား စည်းခြားဖော်ပြရန်မှာ မလွယ်ကူ လွန်းလှပါလေ။ ဖေ့စ်ဘွခ်ပေါ်၌ မိတ္ထီလာ၏သေကြေ ပျက်စီးမှု ပုံရိပ်များအပါဝင် မွတ်စ်လင်မ် ဆန့်ကျင်ရေးပို့စ်များမှာ “liked” များကို ထောင်ချီတွေ့ရပြီး လူထုမြင်ကွင်းမှာပင် ၄င်းတို့၏ နာဇီ လက်သစ်အမြင် သဘောထားများကို မအောင့်အည်းနိုင်အောင် ဖော်ထုတ် ဖွင့်ချနေသည်ကို တွေ့နေရသည်။

လတ်တစ်လောအင်တာဗျူးများ၌ ၉၆၉ အဖွဲ့ခေါင်းဆောင်တစ်ဦးဖြစ်သူ ဦးဝီရသူ က အကြမ်းဖက်မှုကို ရှုံ့ချပြစ်တင် သယောင် ပြုလာသည်။ မိမိသည် မွတ်စ်လင်မ် ဆန့်ကျင်ရေး အကြမ်းဖက်သူများ၊ ဆူပူမှုများကို ရပ်တန့် တားဆီးခဲ့သည်ဟုပင် ဆိုလာသည်။ ဤသည်မှာ သူ၏မှိုင်းတိုက် လှုပ်ရှားမှုအား အသံတိုးလိုက်ခြင်းပေလော သို့တည်းမဟုတ် မြန်မာနိုင်ငံ၌ မွတ်စ်လင်မ်တို့၏ လွှမ်းမိုးမှုအား ၉၆၉ လှုပ်ရှားမှုဖြင့် ဆက်လက်ချေမှုန်းရန် နှိုးဆွခြင်းပေလော မပြောတတ်ပြီ။ ဦးဝီရသူ၏ဖေ့စ်ဘွခ် စာမျက်နှာပေါ်တွင် ပြန်လည် သင့်မြတ်ရေးကို လက်မခံသည့် အကြောင်းများစွာ ရေးတင်ထား၏။ တစ်နေ့နံနက်ပိုင်းက ဘာသာရေးဆိုင်ရာ ခန္တီစ နှင့် မေတ္တာတရား အကြောင်းကို ရေးတင်၏။ ထိုနေ့ နေ့လည်ပိုင်းမှာပင် မွတ်စ်လင်မ်ဆန့်ကျင်ရေးစာသားများကို အားပါးတရ ရေးတင်ပြန်သည်။

မွတ်စ်လင်မ်နှင့်ထိမ်းမြားသော မြန်မာအမျိုးသမီးများမှာ အဓမ္မ ဘာသာပြောင်းစေခြင်း၊ မြန်မာအမည်မှ မွတ်စ်လင်မ်နှင့် အိန္ဒိယအမည်များ အဖြစ် အလိုမတူ ပြောင်းလဲစေခြင်း စသည့်အကြောင်းများအပါအ၀င်ဖြစ်သည်။ ဦးဝီရသူသည် လူသိရှင်ကြား စော်ကားပြောဆိုချက်များ ပြုလုပ်ခဲ့ပြီး ၂၀၀၃ ခုနှစ်တွင် ကျောက်ဆည်မြို့တွင် မွတ်စ်လင်မ် မိသားစု တစ်ခုလုံးအား မီးရှို့သတ်ဖြတ်မှု ဖြစ်ပွားခဲ့ရာ ထောင် နန်းစံခဲ့ရသည်။ ယင်းသို့သော ဘုန်းတော်ကြီးအဖို့ မိမိ၏မီးမွှေးမှိုင်းတိုက်မှုများအပေါ် ချက်ခြင်း လက်ငင်း ယူကျုံးမရ ခံစားချက်များဖြစ်ပေါ်မည်မဟုတ်။ လက်ရှိ မွတ်စ်လင်မ်ဆန့်ကျင်ရေး အကြမ်းဖက်မှုများ၌ ပါဝင်သော သူ၏အခန်းကဏ္ဍနှင့် စပ်လျဉ်း၍လည်း နောင်တ၏လက္ခဏာကို စိုးစဉ်းမျှ မပြသသေးချေ။

လွန်ခဲ့သည့် ၁၀ နှစ်တုန်းက ဦးဝီရသူမှာ မွတ်စ်လင်မ်ဆန့်ကျင်ရေးအမြင်ထားရှိသည့် အစွန်းရောက်သူတစ်ဦးသာ ဖြစ်၏။ ယခုသော် နိုင်ငံတော်ကျောထောက်နောက်ခံပြု လက်သစ် နာဇီဝါဒ မြင့်တက်လာခြင်းနှင့်အတူ သူသည် အမုန်းတရားဖန်တီး ပျိုးထောင်ရှင်တစ်ဦး၊ နိုင်ငံတကာမီဒီယာတို့မှာ မတွေ့မဖြစ် ဆုံတွေ့ရမည့်သူတစ်ဦး ဖြစ်လာပေပြီ။ ဤသို့သော နာဇီလက်သစ်ဗုဒ္ဓ ဘာသာဝင်ဟောပြောသူ၏ကျော်ကြားမှုမှာ အနာဂတ် ဒီမိုကရေစီနိုင်ငံအတွက်လည်းကောင်း၊ အထူးသဖြင့် ပြည်တွင်းရှိ မွတ်စလင်မ်များနှင့် ရိုဟင်ဂျာတို့ အတွက် လည်းကောင်း ပုံရိပ်ကောင်းတစ်ခု မဟုတ်တော့ပါလေ။

xxxxxxxxxxxxxxxxxxxxxx

(ဒေါက်တာ)မောင်ဇာနည်၏ Should we call it Buddhist terrorism ? ဆောင်းပါးကို မြင့်မိုရ်မောင်မောင်မှ ဆီလျော်အောင် ပြန်ဆိုရေးသားသည်။

ဆောင်းပါးရှင် မောင်ဇာနည်သည် Free Burma Coalition (1995-2004) ၏ တည်ထောင်သူဖြစ်ပြီး၊ London School of Economics မှ Civil Society and Human Security Unit ၏ ဧည့်သည်တော်အဖွဲ့ဝင် တစ်ဦးဖြစ်ပြီး၊ မိမိဇာတိမြန်မာပြည်မှ လူမျိုးရေး အကြမ်းဖက်မှု နှင့် နာဇီ လက်သစ်ဗုဒ္ဓ အမျိုးသားရေး ၀ါဒတို့အပေါ် ဝေဖန်သုံးသပ် တင်ပြနေသူလည်း ဖြစ်သည်။

November 28, 2013
နိုင်ငံတကာ ဆေးလိပ် ကုမ္ပဏီကြီးများ မြန်မာပြည်ဈေးကွက်ကို မျက်စကျလာကြ

နိုဝင်ဘာ- ၂၇ ၂၀၁၃
ဘာသာပြန်-မြင့်မိုရ်မောင်မောင်

မြန်မာနိုင်ငံမှ နိုင်ငံတကာအဆက်အသွယ်များအားဖွင့်လှစ်ပြီးနောက် ဆေးလိပ်လုပ်ငန်းရှင်များအတွက် ဈေးကွက်နေရာသစ်တစ်ခုကိုလည်း ပူးတွဲဖွင့်လှစ်ပေးလိုက်သလို ဖြစ်နေလေသည်။ ရန်ကုန်မြို့ရှိ မည်သည့်လက်ဖက်ရည်ဆိုင်ဖြစ်စေ ၀င်လိုက်သည်နှင့် မီးခိုးငွေ့များက ကြိုဆိုနေပါသည်။ အဘယ်ကြောင့်ဆိုသော် ဆိုင်ထဲတွင် လက်ဖက်ရည်သောက်ရန်လာရောက်သော စားသုံးသူများသည် ဆေးပေါ့လိပ် ဟုခေါ်သည့် လက်လိပ်ပြည်တွင်းဖြစ် ဆေးလိပ်များအား သောက်ဖွာနေကြ၍ပင်ဖြစ်သည်။ ထို့အတူ မြန်မာနိုင်ငံ၏ မြို့ပြနေရာတိုင်းရှိ မီးပွိုင့်များတွင် တရုတ်ပြည်မှ တရားမ၀င်တင်သွင်းလာသော ဈေးပေါသည့် စီးကရက်များကို ကားသမားများအား ရောင်းချလျက် ရှိနေသည်။ ဆေးရွက်ကြီးထည့်ထားသော ကွမ်းယာများအား လူအများမှ စားသုံးပြီး ကွမ်းတံတွေးထွေး ထားသဖြင့် ပလက်ဖောင်းများသည် နီကျင် ညစ်ပတ်လျက်ရှိသည်။

အရှေ့တောင်အာရှရှိ ဖွံ့ဖြိုးဆဲနိုင်ငံများတွင် ဆေးလိပ်သောက်သုံးမှု ကန့်သတ်ချက်ဥပဒေများ အားနည်းနေ သဖြင့် ဆေးလိပ်ကြောင့် ပြဿနာပေါင်း များစွာကို ရင်ဆိုင်နေရလျက် ရှိသည်။ သို့သော် ရာစုနှစ်ဝက် စစ်အုပ်ချုပ်ရေး ကျော်လွန်ပြီးနောက် တံခါးဖွင့် ၀ါဒကို ကျင့်သုံးလိုက်သောအ ခါ နိုင်ငံတကာမှ စီးကရက်ကုမ္ပဏီကြီးများ အတွက် ဈေးကွက်သစ်ကို ရှာဖွေတွေ့ရှိ သွားသည်၌ အန္တရာယ် အသွင်ဆောင်လာသည်။
နှစ်များစွာ အဖယ်ကြဉ် ခံရသောနိုင်ငံသည် နိုင်ငံတကာဖြင့် ပိုမိုနီးစပ်မှုဖြစ်လာသော အခါ လူငယ်အများစုသည် အနောက်တိုင်း ယဉ်ကျေးမှုကို အားကျ၍ အနောက်တိုင်း လူငယ်များအတိုင်း ကျင့်သုံးချင်လာကြသည်။

“ ရုပ်ရှင်ထဲမြင်ရတဲ့လူတွေလို ကျွန်တော် လိုက်လုပ်ချင်တယ် ” ဟု အသက် ၄၂ နှစ်ရှိ ကျော်ဇင်လင်းကဆိုသည်။ သူသည် အသက် ၁၂ နှစ်ကပင် စီးကရက်စတင်သောက်သုံးခဲ့ပြီး သူ၏ ပထမဆုံးစီးကရက်ဘူးအား သူ့မိဘများ၏ကုန်စုံဆိုင်မှ ခိုးယူရရှိခဲ့ခြင်းဖြစ်သည်။ “ အဲအချိန်ကတော့ အရမ်းကိုစတိုင်လ်ကျနေတာပဲ ” ဟု သူက ဆိုသည်။

ဆေးလိပ်ဆန့်ကျင်ရေး လုပ်ဆောင်သူများ အဆိုအရ ဆေးလိပ်ကုမ္ပဏီများကြောင့် ပြည်သူများ၏ ကျန်းမာရေး ဒုက္ခရောက်ရသည် သာမက ဆင်းရဲနွမ်းပါးသော မြန်မာလူမျိုးများ၏အခွင့်အရေးများပါ ထိခိုက်ကြောင်း သိရသည်။

အဓိကပြဿနာကတော့ အစိုးရဌာနများအတွင်း သဘောထားကွဲလွဲနေခြင်းပင်ဖြစ်သည်။ ကျန်းမာရေး ၀န်ကြီးဌာနက ဆေးလိပ်သောက် သုံးမှု လျော့နည်းအောင် ဟန့်တားနေသော်လည်း ကုန်သွယ်ရေး ၀န်ကြီးဌာနကမူ ဒေါ်လာ မီလီယံပေါင်း များစွာရရေး အတွက် နိုင်ငံတကာ ကုမ္ပဏီများအား ပြည်တွင်း ရင်းနှီးမြှပ်နှံမှု လာလုပ်ရန် ခေါ်ဆိုနေသည် ဟု အရှေ့တောင်အာရှ ဆေးလိပ်နှင့် ဆေးရွက်ကြီး ထိန်းချုပ်ရေး ပူးပေါင်းဆောင်ရွက်မှု အဖွဲ့ (Sountheast Asian Tobacco Control Alliance) မှ ဒါရိုက်တာ ဘန်ဂွန် ရစ်ဖက်ခ်ဒီ(BungonRithiphakdee) က ဆိုသည်။

တားမြစ်ရေးလုပ်ဆောင်သူများကဆိုသည်မှာ မြန်မာပြည်သူ သုံးပုံတစ်ပုံ သို့မဟုတ် လူသန်း ၆၀ ထဲမှ တစ်ဝက်ခန့်မျှသည် ဆေးရွက်ကြီးအား တစ်နည်းမဟုတ် တစ်နည်းဖြင့် အသုံးပြုလျက်ရှိသည်။ အများစုမှာ ကွမ်းယာများတွင် ထည့်စားကြသူများ နှင့် ဆေးပေါ့လိပ်သောက်သုံးကြ သူများဖြစ်သည်။ အစီခံပါသည့်စီးကရက်များသည် မြို့ပြများပေါ်တွင်သာ အဓိကသောက်သုံးရောင်း ချကြောင်းတွေ့ရသည်။ မြန်မာနိုင်ငံ၏လူဦးရေ ၄၅ ရာခိုင်နှုန်းသည် ၂၄ နှစ်အောက် လူငယ်များဖြစ်သဖြင့် စီးကရက် ကုမ္ပဏီများအတွက် ပစ်မှတ်ထားရာ အဓိကလူအုပ်စုပင်ဖြစ်သည်။

တံခါးခေါက်လာသော အခွင့်အလမ်း

မြန်မာနိုင်ငံ၏ကျန်းမာရေးဝန်ကြီးဌာန၏ ပြောကြားချက်အရ ဆေးလိပ်သောက်သုံးသူများ အနက် ၉.၂ ရာခိုင်နှုန်းလောက်သာ အနောက်တိုင်းပုံဟန် အစီခံစီးကရက်များကို သောက်သုံးကြသည်။ နိုင်ငံခြားမှ စီးကရက် ထုတ်လုပ်သူများအဖို့ ထိုအချက်သည် ဖွံ့ဖြိုးစနိုင်ငံများ အတွင်းရှိ ဈေးကွက်များ၌ စံနှုန်းနိမ့် ပစ္စည်းများအား တင်သွင်းရောင်းထုတ်ရန် အခွင့်ရေးတစ်ခုရသကဲ့သို့ ဖြစ်နေသည်။

ရန်ကုန်မြို့ပြည်သူ့ဆေးရုံကြီးရှိ ကင်ဆာရောဂါကုသရေးလူနာဆောင်သည် အမြဲပြည့်ကြပ်လျက်ရှိသည်။ ကမ္ဘာ့ကျန်းမာရေးအဖွဲ့ချုပ် World Health Organisation က မြန်မာနိုင်ငံ၌ လူငါးဦးလျှင် တစ်ဦးသည် ဆေးလိပ် သောက်သုံးမှုကြောင့် သေဆုံးနေရသည်ဟု ခန့်မှန်းပြောဆိုခဲ့သည်။

Euromonitor မှ ဆေးလိပ်ဈေးကွက်လေ့လာသူ ရှိန်း မဂ်ဂွေးလ်(Shane MacGuill) က လာမည့်လေးနှစ်အတွင်း စီးကရက်ရောင်းချမှုသည် တစ်နှစ်လျှင် ပျမ်းမျှ ၂ – ၃ ရာခိုင်နှုန်း တိုးမြင့်လာမည်ဖြစ်ကြောင်း တွက်ဆထားသည်။
တရုတ်နိုင်ငံ၏ အကြီးမားဆုံးစီးကရက်ထုတ်လုပ်သူ နှင့် ကမ္ဘာ့နံပါတ် ၅ အဆင့်ဝင် ဟုံရွင်ဟုံဟယ် အုပ်စု(HongyunHonghe Tobacco Group) နှင့် ၄င်း၏အကျိုးတူပူးပေါင်းသူများထံတွင် တစ်နှစ်အတွင်း စီးကရက်သုံးသန်းမျှအထိ ထုတ်လုပ်ပေးနိုင်သော စက်ရုံရှိပြီး၊ အထူး ကျွမ်းကျင်သည့် ဈေးကွက်မန်နေဂျာများ နှင့် အရောင်းသမားများစွာကို ခန့်အပ်ထားသည့်အပြင် ဈေးကွက်မြှင့်တင်ရေး လုပ်ဆောင်ချက်များ နှင့် ဖြန့်ချိရေး ယာဉ်များကိုလည်း ပြည့်စုံ လုံလောက်အောင် စီစဉ်ထားသည် ဟု၎င်း၏ ၀က်ဘ်ဆိုဒ်မှတစ်ဆင့် သိရသည်။

ကမ္ဘာပေါ်တွင် ဒုတိယအကြီးဆုံးဖြစ်သော ဗြိတိန်-အမေရိကန် ဆေးလိပ်ဆေးရွက်ကြီးကုမ္ပဏီ (British American Tobacco) သည် နောက်လာမည့် ငါးနှစ်အတွက် ရေရှည်စီမံကိန်းများတွင် ၀န်ထမ်း ၄၀၀ ခန့်နှင့်တစ်ကွ ဒေါ်လာသန်း ၅၀ ရင်းနှီးမြှုပ်နှံထားသည်။

နိုင်ငံတကာအဆင့်သုံး စာရင်းဝင် ဂျပန်နိုင်ငံတကာဆေးရွက်ကြီးလုပ်ငန်း (Japan Tobacco International) သည် မြန်မာနိုင်ငံ အတွင်း ရင်းနှီးမြှပ်နှံမည့် အစီစဉ်များ လုပ်နေကြောင်းကို ပြောကြားခဲ့သော်လည်း နောက်ထပ် မှတ်ချက်များကိုမူ မပေးခဲ့ချေ။

“ ပြည်တွင်းစီးကရက် ကုမ္ပဏီတွေက ယှဉ်လို့မရပါဘူး။ နိုင်ငံခြားစီးကရက်ကုမ္ပဏီတွေက နိုင်ငံအတွင်း အသံတိတ်ဝင်လာပြီး အာဏာပိုင်တွေကို – ငါတို့က စက်ရုံ တည်ဆောက်မှုတွေ၊ အလုပ်အကိုင်အခွင့်အလမ်းတွေနဲ့ကူညီပေးမယ် လို့ ဆိုကြပါလိမ့်မယ်။ နိုင်ငံတော်တော် များများမှာ ကုန်သွယ်ရေးဆိုင်ရာရှေ့နေများ၊ ဒီလို နိုင်ငံတကာကို ယှဉ်ပြိုင်နိုင်မယ့် ကြေးရတတ်များ မရှိကြဘူး။ ၁၀ နှစ်လောက်နေရင်တော့ မြန်မာနိုင်ငံအတွင်း အလားတူ ဥပဒေပြဋ္ဌာန်းမှု ပြုလာနိုင်ပါလိမ့်မယ်။ ဒါပေမယ့် အခုတော့ အသုံးပြုတဲ့ ဓလေ့က အရမ်းကို ခေတ်စားနေဆဲပါ ” ဟု တီဘီကဲ့သို့ရောဂါများအား ပပျောက်အောင် ဆောင်ရွက်နေသော World Lung Foundation မှ အကြံပေး ဂျူးဒစ် မက်ကေး (Judith Mackay) က ဆိုသည်။

ညံ့ဖျင်းသော ပြဋ္ဌာန်းမှု

မြန်မာနိုင်ငံသည် ၂၀၀၄ ခုနှစ်က World Health Organisation မှလုပ်ဆောင်သော ဆေးလိပ်နှင့်ဆေးရွက်ကြီး တားဆီးထိန်းချုပ်မှု (Framework Convention against Tobacco Control) အား လက်မှတ်ရေးထိုးခဲ့သော်လည်း၊ တရားဝင်အောင်ဆောင်ရွက်ခြင်း၌ အလွန်အားနည်းနေပြီး၊ WHO ၏ လမ်းညွှန်ချက်အချို့ကို ပြဋ္ဌာန်းရန် ပျက်ကွက်နေလေသည်။ ထိုအရာများထဲတွင် စီးကရက်ဘူးများပေါ် ကျန်းမာရေးသတိပေးချက်များအဖြစ် ဓာတ်ပုံများထည့်သွင်းခြင်း နှင့် တစ်ဘူးကို ၆၅ ရာခိုင်နှုန်းအခွန်တင်းကြပ်ခြင်းများလည်း အပါအ၀င်ဖြစ်သည်။ ၂၀၀၆ ခုနှစ်ကစတင်ကာ အများပိုင်နေရာများတွင် ဆေးလိပ်သောက်သုံးခြင်းကိုပိတ်ပင်ခဲ့သော်လည်း ဆန့်ကျင်မှုများအတွက် ဒဏ်တပ်အရေးယူခြင်းမျုိုး မရှိပေ။

မြန်မာနိုင်ငံရှိ စီးကရက် ကုမ္ပဏီများသည် ပညာရေး အလှူငွေပေးအပ်ခြင်း သို့မဟုတ် မိဘမဲ့များအားကူညီစောင့်ရှောက်ခြင်း စသည်ကဲ့သို့သော လူမှုရေးလုပ်ငန်းများဖြင့် တားမြစ်ထားသော တိုက်ရိုက်ကြော်ငြာခွင့်များအား တစ်ဖက်လှည့် အသုံးပြုနေကြသည် ဟု တက်ကြွလှုပ်ရှားသူများကဆိုသည်။ လူငယ်များအပေါ် အဓိကဈေးကွက်အဖြစ်မထားရေး ကတိက၀တ် ရှိနေလင့်ကစား စီးကရက်ကုမ္ပဏီများသည် နှစ်စဉ် သင်္ကြန်ပွဲများ၊ စင်တင်တေးဂီတပွဲများကဲ့သို့ ဖျော်ဖြေရေး ပွဲများတွင် လာရောက်သူ လူငယ်များအား စီးကရက်ဘူးများ အခမဲ့ဝေငှပေးခြင်းဖြင့် တစ်ဖက်လှည့် မြူဆွယ်လျက်ရှိသည်။

ဗြိတိန်-အမေရိကန် စီးကရက်ကုမ္ပဏီ မြန်မာရုံးခွဲမှ ဒါရိုက်တာ ရီဟန် ဘိုင်က်(RehanBaig) သည် ကုမ္ပဏီအနေနှင့် အရွယ်ရောက်ပြီးဆေးလိပ်သောက်သုံးသူများကိုသာ အဓိက ထားရောင်းချကြောင်း ကုမ္ပဏီ၏ဈေးကွက်လှုပ်ရှားပုံများအား အီးမေးလ်များဖြင့် မေးမြန်းမှုအပေါ် အောက်ပါအတိုင်း ဖြောကြားထားခဲ့သည်။

“ ကျွန်တော်တို့ဟာ တရားဝင်ကုန်ပစ္စည်းများကိုသာရောင်းချနေတဲ့ တရားဝင်ကုမ္ပဏီပါ။ ကျွန်တော်တို့ ကုမ္ပဏီခွဲရှိတဲ့ နိုင်ငံတိုင်းက ဥပဒေကိုလိုက်နာပြီး တာဝန်ခံလုပ်ဆောင်နေပါတယ်။ တစ်ချို့အချိန်များမှာ ကျွန်တော်တို့ရဲ့ ကိုယ်ပိုင်နိုင်ငံတကာဈေးကွက် စည်းမျဉ်းများထက် ကျော်လွန်တင်းကြပ်တဲ့ ဥပဒေအတိုင်းလည်း လုပ်ဆောင် လည်ပတ်နေပါတယ်။ အဲ့ဒီအထဲမှာ လူငယ်များ အပေါ်ကျွန်တော်တို့ ပစ္စည်းကို သုံးစွဲမှုတားမြစ်ခြင်းများ အပါအ၀င် ဖြစ်ပါတယ် ” ။

သို့သော်လည်း ဆေးလိပ် ကုမ္ပဏီကြီးများသာဖော်ဆောင်နိုင်သော ဈေးကွက်မြှင့်တင်မှုလုပ်ဆောင်ချက်များသည် လူငယ်များအပေါ်တွင် အလွယ်တကူလွှမ်းမိုးနေသည်။

“ မြန်မာနိုင်ငံမှာရှိနေတဲ့ နိုင်ငံတကာအခြေစိုက်ကုမ္ပဏီများဟာ လိမ္မာပါးနပ်သော ဈေးကွက် ရှာဖွေရေး၊ ထောက်ပံ့မှုတွေနဲ့ အတူ သူတို့ထုတ်ကုန်များကို သယ်ဆောင်လာကြတယ်။ သူတို့ဟာ သိုးရည်ခြုံထားတဲ့ ၀ံပုလွေတွေပါပဲ ” ဟု World Lung Foundation မှ မက်ကေးက ဆိုသည်။

မြန်မာနိုင်ငံ၌ Camel နှင့် Benson & Hedges ကဲ့သို့ နိုင်ငံခြားသွင်းကုန်စီးကရက်တံဆိပ်များက အရိုးပေါ် အရွက်ဖုံးနေသော်လည်း ၄င်းတို့မှာ ပြည်တွင်းဖြစ် စီးကရက်များထက် သုံးဆခန့် ပိုရောင်းရကြောင်း သိရသည်။

“ မြန်မာနိုင်ငံမှာ စက်ရုံလာ ဖွင့်မယ်ဆိုယင် ဈေးချိုချိုနဲ့ရောင်းချနိုင်မယ် ” ဟု ဈေးသက်သာ၍ အမည်ရှိသော နိုင်ငံခြားဖြစ် တံဆိပ်များသည် အစွဲကြီးသူများမှ ပိုမိုလက်ခံကြပုံကို နိုင်ငံတကာ တီဘီနှင့်အဆုတ်ရောဂါ ကာကွယ်တားဆီးမှု အဖွဲ့ (International Union against Tuberculosis and Lung Disease) မှ ရာဇာညွန့်က ပြောကြားခဲ့သည်။
“ အကျင့်ပျြက်ခြစားမှုဟာ အဓိကပြသနာပဲ။ အစိုးရကလည်း ပြည်သူလူထုတွေရဲ့ကျန်းမာရေးကို ဂရုမစိုက်ဘူး။ မြန်မာပြည်မှ ပထမဆုံးလမ်းဖွင့်ပေးတာက အရက်ကုမ္ပဏီများဖြစ်တယ်။ အခုနောက် တစ်ဆင့်မှာတော့ ဆေးလိပ် ကုမ္ပဏီတွေအတွက် ထပ်မံလမ်းဖွင့်ပေးပြန်တယ် ” ဟု သူက ဆက်လက်ပြောကြားခဲ့သည်။

နိုင်ငံရေးအရ ပတ်သက်မှုများ

ပြည်သူများအတွက် မသင့်တော်သော အရာများအဖြစ် စစ်အစိုးရဟောင်းမှ ဆယ်စုနှစ်များစွာ တင်းတင်းကြပ်ကြပ် တားမြစ် ပိတ်ပင်ထားသော အရက်နှင့်မူးယစ် ယမကာများကို မြန်မာနိုင်ငံ ရင်းနှီးမြုပ်နှံမှုကော်မရှင်အဖွဲ့ (Myanmar Investment Comission) သည် ၂၀၁၂ ခုနှစ် အလယ်ပိုင်းလောက်က လာရောက် ထုတ်လုပ်မည့် နိုင်ငံခြားကုမ္ပဏီများအား ဖိတ်ခေါ်ခဲ့သည်။

ယင်းဖက်စပ်လုပ်ငန်းများစွာတွင် တစ်နည်းမဟုတ်တစ်နည်း နိုင်ငံရေးနှင့်ပတ်သက်နေသော ဦးဆောင်စီးပွားရေး လုပ်ငန်းရှင်များ ချိတ်ဆက် ပါဝင်နေသည်။ ၄င်းနှင့်စပ်လျဉ်း၍ အင်တာဗျူး လုပ်ဆောင်ရန်တောင်းဆိုချက်ကို မြန်မာနိုင်ငံ စီးပွားရေးနှင့်ကူးသန်းရောင်းဝယ်ရေး ၀န်ကြီးဌာနမှ ယခုတိုင် အကြောင်းမပြန်သေးကြောင်း သိရသည်။

တစ်ချိန်တည်းမှာပင် မြန်မာနိုင်ငံ ကျန်းမာရေး ၀န်ကြီးဌာနသည်လည်း ဆေးလိပ်သောက်သုံးမှု ထိန်းချုပ်ရေးအတွက် တင်းကြပ်သောစည်းမျဉ်းများ ထုတ်နိုင်ရန် လုပ်ဆောင်နေကြောင်း၊ ပြည်တွင်းဆေးလိပ်ဆန့်ကျင်ရေးအဖွဲ့များနှင့်အတူ ကျန်းမာရေးအသိပညာပေး လုပ်ဆောင်မှုများ နှင့် ဥပဒေပျော့ကွက်များအား ဖာထေးရန် ကြိုးပမ်းနေကြောင်း သိရသည်။ ထိုလုပ်ဆောင်ချက်များကို အများက မသိကျိုး ကျွံပြုထားဆဲပင်ဖြစ်သည်ဟု လုပ်ရှားဆောင်ရွက်သူများကဆိုကြသည်။
အသက် ၄၃ နှစ်အရွယ်ရှိ ကိုကျော်ဦးသည် နေ့စဉ် ဆေးပေါ့လိပ်များ နှင့် Red Ruby ကဲ့သို့ ပြည်တွင်းထုတ်စီးကရက်အား သူ၏ဘ၀တစ်ဝက်လောက်သောက်သုံးလာခဲ့သော်လည်း အသက်ရှု လမ်းကြောင်းပိတ်ဆို့မှုဖြစ်လာ၍ ယခုအခါ သူသည် ဆေးလိပ်ဖြတ်ဖို့ရည်ရွယ်နေကြောင်း “ ဆေးလိပ်သောက်ခြင်းရဲ့ဆိုးကျိုးကို ကျောင်းဆရာတွေဆီက အချိန်နှောင်းမှ ကျွန်တော် သိခဲ့ရတယ် ” ဟု သူက ပြောဆိုသည်။

မြန်မာနိုင်ငံအတွင်း ဈေးကွက်ချဲ့ထွင်လာသော နိုင်ငံခြားကုမ္ပဏီများသည် ပြည်တွင်းဈေးကွက်တစ်ခုတည်းကိုသာ အဓိကထားသည် မဟုတ်ဘဲ၊ အချို့ကုမ္ပဏီများမှာ အခြားအာရှနိုင်ငံများသို့တင်ပို့်ရန် မြန်မာနိုင်ငံ၌ ဆေးရွက်ကြီး စိုက်ပျိုးရန်ကိုပင် စီစဉ်လျက်ရှိသည်။ အစဉ်အဆက် စိုက်ပျိုးရေးဖြစ်ထွန်းသော လယ်မြေများသည် စီးကရက်ထုတ်လုပ်သူများကို မျက်စေ့ကျစေနိုင်သည်ဟု လှုပ်ရှားတက်ကြွသူတို့မှ ဆိုသည်။

British American Tobacco အား မြန်မာနိုင်ငံအတွင်းမှတိုက်ထုတ်ရန် စစ်အစိုးရလက်ထက်ကတည်းက လုပ်ဆောင်နေခဲ့သော Burma Campaign မှ ဒါရိုက်တာ မာ့ခ်ဖာမန်နာ(Mark Farmener) က – ယခင်တစ်ချိန်၌ လယ်သမားများသည် သူတို့၏မြေယာများကို နိုင်ငံခြားရင်းနှီးမြှုပ်နှံမှုများ အတွက် ထိုးအပ်ခဲ့ရသလို ဤအရေးအရာမှာလည်း နောင် အနာဂတ်တွင် ပြဿနာဖြစ် မလာပါဟု ဆိုမရနိုင်ကြောင်း ပြောကြားခဲ့သည်။

ဖာမန်နာကဆိုသည်မှာ လယ်ယာမြေများသိမ်းဆည်းခြင်း နှင့် အလုပ်သမားများအပေါ်အနိုင်ကျင့်ခြင်းများကဲ့သို့ လူမှုရေးနှင့် လူ့အခွင့်အရေး ချိုးဖောက်မှုပြဿနာများမှာ နိုင်ငံတကာစီးကရက် ထုတ်လုပ်မှုလုပ်ငန်းများနှင့်အတူ ၀င်ရောက် လာလိမ့်မည်ဟု ပြောဆိုကာ ဤသို့ သတိပေးထားပါသည်။

“ မြန်မာပြည်ကလူများဟာ အလုပ်အကိုင် လိုအပ်ပေမယ့် ကင်ဆာရောဂါဖြစ်ပွားဖို့ကိုတော့ မလိုချင်ကြပါဘူး။ သူတို့ကို သေဘေး ပို့မယ့် ရင်းနှီးမြှပ်နှံမှုမျိုး မဟုတ်ဘဲ သူတို့အတွက်ကောင်းကျိုးဖြစ်ထွန်းစေမယ့် ရင်းနှီးမြှုပ်နှံမှုများ ရောက်လာမှာကို ပိုပြီးမြင်တွေ့လိုပါတယ် ”။

Al Jazeera တွင် ဖော်ပြခဲ့သော ‘Big tobacco eyes Myanmar market’ ဆောင်းပါးကို မြင့်မိုရ်မောင်မောင် ဆီလျော်အောင် မြန်မာပြန်ဆိုပါသည်။

November 27, 2013
အရှိန်မြင့်တက်လာတဲ့ မြန်မာ့ လူ့အခွင့်အရေး ချိုးဖောက်မှုများ

နိုဝင်ဘာ- ၂၂ ၂၀၁၃
M-Media
ဆောင်းပါးရှင်-Nang Lao Liang Won
ဘာသာပြန်- မြင့်မိုရ်မောင်မောင်

ဓါတ်ပုံအညွှန်း-နှစ်ပေါင်းများစွာ အတူယှဉ်တွဲနေထိုင်လာတဲ့ လားရှိုးမြို့တွင် အမုန်းတရားမျိုးစေ့များကြောင့် ၂၀၁၃ ခုနှစ် မေလ ၂၈ နေ့က ဖြစ်ပွားခဲ့သော မွတ်စလင်မ်များကို အကြမ်းဖက်တိုက်ခိုက်မှုမြင်ကွင်းတခု

မြန်မာပြည်က ရှမ်းတိုင်းရင်းသူ တစ်ဦးဖြစ်တဲ့ ကျွန်မဟာ အမိမြေအတွင်း လူ့အခွင့်အရေးနဲ့ဒီမိုကရေစီ အတွက် နှစ်ပေါင်းများစွာ လုပ်ကိုင်ဆောင်ရွက်နေသူဖြစ်ပါတယ်။ ဒီနှစ်ထဲမှာ မြန်မာနိုင်ငံဒီမိုကရေစီ အကူးအပြောင်းကာလ အတွင်း အမျိုးသမီးများကဏ္ဍ သုတေသနဖက်ကနေ National Endowment for Democracy အစီအစဉ်မှာ ဧည့်သည်တော်အဖြစ် တက်ရောက်ဖို့ အခွင့်အလမ်းရခဲ့ပါတယ်။ ၀ါရှင်တန်မှာ ရှိစဉ် ကာလအတွင်း မြန်မာပြည်က လုပ်ဖော်ကိုင်ဖက်တွေ၊ နယ်စပ်ဒေသ တစ်လျှောက် ဖြစ်ပေါ်နေတဲ့ အပြောင်းအလဲ လမ်းကြောင်းတွေနဲ့ ထိတွေ့မှု မပြတ်ခဲ့ပါဘူး။ သို့ပင်သို့ငြား ဒီမိုကရေစီ လွတ်လပ်ပွင့်လင်းမှုနဲ့ ပတ်သက်ပြီး စိတ်လှုပ်ရှား စဖွယ်ကြားသိရတဲ့အခါ ကျွန်မရဲ့စိုးရိမ်မှု ပိုမိုကြီးထွားလာပါတော့တယ်။

လွန်ခဲ့တဲ့နှစ်နှစ်ကျော်ကထက်စာယင် မြန်မာပြည်မှာ အပြောင်းအလဲတော်တော် များများ ဖြစ်ထွန်းလာခြင်းနဲ့အတူ ကျွန်မကြားသိလာရတဲ့ အလွန်အကျူး ချီးမွှမ်းမှု တစ်ခုဟာ တကယ့်လက်တွေ့အဖြစ်မှန်နဲ့ တခြားစီဖြစ်နေပါတယ်။ ကျွန်မ လာခဲ့တဲ့ ရှမ်းပြည်နယ်နဲ့အခြား တိုင်းရင်းသားဒေသများဟာ နိုင်ငံရေးဆိုင်ရာ လက်နက်ကိုင် ပဋိပက္ခတွေ ဆိုးဆိုးဝါးဝါးကို ရှေ့ဆက်ကြုံတွေ့နေဆဲပါ။ တိုင်းပြည်အနှံ့ လူ့အခွင့်အရေး ချိုးဖောက်မှုတွေက အရှိန်အဟုန်မြင့်တက်နေပြီး ကျူးလွန် ချိုးဖောက်သူများကတော့ လွတ်မြောက်ဆဲဖြစ်နေပါတယ်။ သတ္ထုတွင်း၊ သဘာဝဓာတ်ငွေ့သွယ်တန်းပိုက်လိုင်း နဲ့ ရေကာတာ/ဆည် စတဲ့ အကြီးစားစီမံကိန်းရဲ့ဆိုးကျိုးတွေအပေါ် အကြမ်းမဖက် ကန့်ကွက်ဆန္ဒပြမှုတွေ ဖြစ်ပေါ်ခဲ့တယ်။ အဲ့ဒီလှုပ်ရှားမှုများထဲ ပါဝင်ခဲ့ကြတဲ့ လှုပ်ရှားတက်ကြွသူတွေတင်မက သာမန် လယ်သမားနဲ့ကျေးလက်ပြည်သူတွေဟာ ဖမ်းဆီးထိန်းသိမ်းခြင်း၊ ရိုက်နှက်ညှင်းဆဲခြင်း၊ ထောင်းသွင်းအကျဉ်းချခြင်းကို ခံစားနေကြရတယ်။ ငြိမ်းချမ်းစွာဆန္ဒ ထုတ်ဖော်သူတွေကို အလွန်အကျွံ အင်အားသုံး ဖြိုခွဲနှိမ်နှင်းနေတာက ရဲတပ်ဖွဲ့အတွက် လုပ်ရိုးလုပ်စဉ်လို ဖြစ်နေပါပြီ။

ဒါပေမယ့် ဒီအာဏာပိုင်တွေကပဲ မြန်မာ့အနာဂတ်ကို အမှန်တကယ်ခြိမ်းခြောက်လျက်ရှိတဲ့ အကြမ်းဖက်မှုကို အဆုံးသတ်လိုက်ဖို့ကျတော့ လိုလားမှုရှိမနေတာ တွေ့ရပြန်တယ်။ မြောက်ပိုင်းရှမ်းပြည်ရဲ့လှပမြို့တော် လားရှိုးအပါအ၀င် နိုင်ငံတစ်ဝှန်းက မွတ်စ်လင်မ်လူနည်းစုတွေကို အကြမ်းဖက်တိုက်ခိုက်မှုတွေအပေါ် ၀င်ရောက်မတားမြစ်ခဲ့တာကတော့ အထူးကိုတုန်လှုပ်သွားစေခဲ့ပါတယ်။ ဇာတိမြေမှာ ဆိုးဝါးလှတဲ့အကြမ်းဖက် လုပ်ရပ်တွေကို မြင်ဖူးထားခဲ့ပေမယ့်လည်း မေလအတွင်း မွတ်စ်လင်မ်ဆန့်ကျင်ရေး အကြမ်းဖက်တိုက်ခိုက်မှုမျိုး အထိ တွေ့ရလိမ့်မယ်လို့ ကျွန်မ ဘယ်တုန်းကမှ မထင်မှတ်ထားခဲ့ပါဘူး။ မိတ်ဆွေ သူငယ်ချင်းတွေ၊ ဆွေမျိုးသားချင်းတွေ၊ လုပ်ဖော်ကိုင်ဖက်တွေဆိုယင် စိုးရိမ်ကြီးစွာနဲ့ ပြောမဆုံးနိုင်အောင်ဖြစ်နေကြရတယ်။ လူရမ်းကားအုပ်စုအကြားမှာ မျက်နှာစိမ်းတွေ၊ ဒေသခံ မဟုတ်သူတွေကို မြင်တွေ့ခဲ့ရကြောင်း၊ အကြမ်းဖက်မှုပြီးဆုံးတာနဲ့ ကြက်ပျောက်ငှက်ပျောက် ပျောက်ကုန်ကြောင်း သူတို့မြင်ခဲ့ရတယ်လို့ ပြောပြကြတယ်။ အဲ့လိုပရမ်းပတာ မင်းမဲ့စရိုက် ဆန်ဆန်ပြုမူချက်များက အချိန်မရွေး နေရာမရွေး ဖြစ်ပေါ်နိုင်ချေရှိတတ်တဲ့ အပေါ်မှာ သူတို့ စိုးတထိတ်ထိတ်ဖြစ်နေကြရပြီး၊ဘာနဲ့မျှ မတူအောင် အစွန်းရောက်လွန်းတဲ့ အဲ့ဒီခြေအနေမျိုးကို တစ်ကြိမ်တစ်ခါမှ မိမိတို့ မကြုံဖူးဘူးလို့လည်း ဆိုကြပါတယ်။

ကျွန်မဟာ ဗုဒ္ဓဘာသာဝင်တစ်ဦးပါ။ အမုန်းတရား အာဃာတဆိုတာ ပျက်စီးစေတဲ့ မကောင်းတဲ့စိတ် ဖြစ်ပါတယ်၊ အဲ့ဒီ စိတ်မိုက်စိတ်ရိုင်းကို မေတ္တာတရားဖြန့်ကျက်မှု၊ တစ်ပါးသူအပေါ် မုဒိတာပွားမှုနဲ့ ရှင်းလင်းချေမှုန်းအားထုတ်ရမယ့်အကြောင်း လူမှန်းသိတတ်စ ကလေးငယ်ဘ၀ကတည်းက ကျွန်မ သင်ယူသိမှတ်ခဲ့ရပါတယ်။ ဒါ့ကြောင့်လည်း ခွဲခြားရေးနဲ့ မုန်းတီးရေးကို တွန်းတိုက်အားပေး လုပ်ဆောင်နေကြတဲ့ ၉၆၉ လှုပ်ရှားမှုအဖွဲ့က ဘယ်လိုလုပ်ပြီး ဗုဒ္ဓ၀ါဒခေါင်းစဉ်အောက်ကနေ ထွက်ပေါ်လာသလဲ – သူတို့ကို ဘယ်လို ကာကွယ်နိုင်မလဲဆိုတာ ကျွန်မ နားမလည်နိုင်ပါဘူး။ အငြိုးကြီးလှတဲ့ ၉၆၉ အဖွဲ့ခေါင်းဆောင် ဦးဝီရသူလို ရဟန်းသံဃာတွေရဲ့အမြင်များကို ပယ်လှန်ကြမယ့်အစား မြန်မာအစိုးရနဲ့ နိုင်ငံရေး အထင်ကရပုဂ္ဂိုလ်တွေက သူ့ကို ထောက်ခံအားပေးလျက် ရှိနေကြတယ်။

လတ်တစ်လောဖြစ်ပွားတဲ့ နိုင်ငံအနှံ့ အကြမ်းဖက်မှုတွေထဲ ကျွန်မ စေ့စေ့စပ်စပ်လေ့လာကြည့်တဲ့အခါ ပုံဟန် တစ်ရပ်ကို သတိထားမိလာခဲ့ပါတယ်။ ပထမဆုံး အမျိုးသမီးတစ်ဦး သို့မဟုတ် မိန်းကလေး တစ်ဦးကို ဘာသာခြားတစ်ဦးတစ်ယောက်က တိုက်ခိုက်တယ် သို့မဟုတ် မုဒိန်းကျင့်ကြံတယ်။ ဒီလိုဖြစ်ရပ်ကို အရင်းတည်ပြီး စံနစ်တကျဖွဲ့စည်းထားတဲ့ ဗုဒ္ဓဘာသာဝင် လူရမ်းကားအုပ်စုတွေက အကြမ်းဖက်မှု ကျယ်ကျယ်ပြန့်ပြန့်လုပ်ဆောင်ကြတယ်။ သူတို့ရဲ့ နေအိမ်၊ လုပ်ငန်း/ဆိုင်ခန်း၊ ကျောင်း၊ သာသနိက အဆောက်အဦးတွေကို မီးရှို့တယ်။ ရိုက်နှက်ကြတယ်။ အရှင်လတ်လတ်မီးရှို့ခြင်း အပါအ၀င် သတ်ဖြတ်ကြတယ်။ ဒီလိုနဲ့ လူ့အဖွဲ့အစည်းများ အကြားက လူမှုနှောင်ကြိုးကို ဖျက်ဆီးပစ်ကြတယ်။ အကြမ်းဖက်ဖြစ်စဉ်များမှာ လုံခြုံရေး တပ်ဖွဲ့ဝင်တွေက ရပ်ကြည့်နေခဲ့ကြတယ်။ ပြဿနာရဲ့ အရင်းအမြစ်ကို စုံစမ်းဖြေရှင်းဖို့ ကြိုးပမ်းတဲ့အခါ အကြမ်းဖက်လူစုတွေ မီးမွှေးပေးသူတွေ ပိုမို များပြားကြီးထွားလာပြီး လူသတ်မှုတွေကျူးလွန်အောင် တွန်းပို့လိုက်ကြတယ်။

အန္တရာယ်ရှိတာကိုသိနေပါလျက်နဲ့ တက်ကြွလှုပ်ရှားသူ ဗမာအမျိုးသမီးအချို့က အကြမ်းဖက်သမားတွေရဲ့ရှေ့မှောက်မှာ မားမားမတ်မတ် ရပ်တည်ရင်ဆိုင်နေကြတယ်။ အကြီးမားဆုံးသာဓကကတော့ အခြား ဘာသာဝင်များနဲ့ လက်ထပ်ထိမ်းမြားမှု မပြုရေးအဆို တင်သွင်းချက်ကို တုန့်ပြန် ဆန့်ကျင်တဲ့ ကိစ္စပါပဲ။ ဒီလို ခွဲခြားချိုးနှိမ်တဲ့၊ အန္တရာယ်ကြီးမားလှတဲ့ လှုံ့ဆော်မှုကို နိုင်ငံရေးခေါင်းဆောင်များက ပြင်းပြင်းထန်ထန် ကန့်ကွက်ရှုံ့ချဖို့ ပျက်ကွက်နေချိန်မှာ အမျိုးသမီးတွေကတော့ အဲ့ဒါကို ဦးဆောင် တားဆီးနိုင်ဖို့ ကြိုးပမ်းနေခဲ့ကြပါတယ်။

ကုလသမဂ္ဂ ဆုံးဖြတ်ချက်တွေအပေါ် မျက်နှာလွှဲခဲ ပစ်လေ့ရှိတဲ့ မြန်မာခေါင်းဆောင်များက နိုင်ငံ့ပုံရိပ်ကို ပြန်လည် အရောင်တင်ဖို့ ပြင်ပကမ္ဘာနဲ့ ဆက်ဆံရေးကို မီဒီယာ၊ သံတမန်၊ ငြိမ်းချမ်းရေးဖော်ဆောင်မှု ကဏ္ဍများက တဆင့် အသည်းအသန် တိုးမြှင့်လာကြတယ်။ မြင်ရတာတော့ ဟုတ်သလိုလိုပါပဲ။ စစ်အရာရှိဟောင်းတွေက အနောက်တိုင်း ရင်းနှီးမြှုပ်နှံမှုတွေကို ကြိုဆိုခဲ့ပြီး၊ သူတို့ရဲ့သွေးစွန်းနေတဲ့လက်တွေနဲ့ ဂုဏ်ကြီးရှင် ဧည့်သည်များကို ဧည့်ခံလိုက်ကြတယ်။ မြန်မာ့လူ့အခွင့်အရေးဆိုင်ရာ ကုလသမဂ္ဂအထူး ကိုယ်စားလှယ် Tomás Ojea Quintana ကို တာဝန်ဆက်လက် မထမ်းဆောင်နိုင်အောင် သြဂုတ်လ ၁၉ ရက်မှာ ဒေါသထွက်နေတဲ့ လူအုပ်ကြီးနဲ့လွှတ်ပေးပြီး ကြိုဆိုလိုက်ပုံဟာဖြင့် မြန်မာအာဏာပိုင်တွေရင်ဆိုင်နေရတဲ့ စိန်ခေါ်ချက်တွေအပေါ် စာနာနေ နှုတ်ဆိတ်နေခဲ့တဲ့ နိုင်ငံတကာ အသိုင်းအ၀ိုင်းအတွက် ပြစ်တင် ရှုတ်ချစရာကိစ္စ ဖြစ်သွားပါတော့တယ်။

မြန်မာနိုင်ငံက လူ့အခွင့်အရေးချိုးဖောက် ကျူးလွန်သူများဟာ ပြစ်မှုတွေရင်ဝယ်ပိုက်ပြီး လွတ်မြောက်နေခဲ့တာ ဆယ်စုနှစ်များစွာ ကြာညောင်းခဲ့ပါပြီ။ မြန်မာလူထုအနေနဲ့ တရားမျှတမှုကို မျှော်လင့်စောင့်စားခဲ့ကြသလို သူတို့ရဲ့ စော်ကားချက်တွေ အပေါ် နိုင်ငံတကာ အသိုင်းအ၀ိုင်းက တရားဝင်ရှုံ့ချခဲ့ပြီးသားပါ။ နှစ်စဉ်ကျင်းပတဲ့ ကုလသမဂ္ဂအထွေထွေညီလာခံကြီးမှာ ကျွန်မနိုင်ငံထဲက အရှိတရားတွေအပေါ် ထိရောက်တဲ့ သတိပေးချက်တွေကို ပြင်းပြင်းထန်ထန် ထုတ်ပြန်မှရတော့မှာပါ။ အကယ်၍များ လူ့အခွင့်အရေးနဲ့ ဒီမိုကရေစီဆိုင်ရာ ကျွန်မတို့ရဲ့ ကျားကုတ်ကျားခဲ ကြိုးပမ်းချက်တွေပေါ် ရေရှည်ထောက်ခံခဲ့ကြသောနိုင်ငံများက “ ဒီလောက်ဆို လုံလောက်ပါပြီ ” ဆိုပြီး မတင်မကျ ဆုံးဖြတ်လို့၊ မရပ်မနား လူ့အခွင့်အရေး ချိုးဖောက် သောင်းကျန်းနေတာကို မျက်ကွယ်ပြုမယ်ဆိုခဲ့ရင် မြန်မာ့အနာဂတ်ထဲမှာ တရားမျှတမှုဆိုသော ကျွန်မတို့ရဲ့အိပ်မက်က ပါဝင်လာနိုင်စရာ အကြောင်းမရှိတော့ပါဘူးလေ။

မူရင်းဆောင်းပါးရှင် Nang Lao Liang Won သည် National Endowment for Democracy ၏ အပြည်ပြည်ဆိုင်ရာ ဒီမိုကရေစီအရေးဖိုရမ်မှ 2013 Reagan Fascell democracy fellow တစ်ဦးဖြစ်ခဲ့သည်။ လက်ရှိတွင် ရှမ်းပြည်အမျိုးသမီးရေးရာ ကွန်ယက်၏အကြံပေးအဖွဲ့ဝင်တစ်ဦးအဖြစ် ဆောင်ရွက်လျက်ရှိသည်။ ၀ါရှင်တန်ပို့စ်၊ အတွေးအမြင်ကဏ္ဍမှ သူမ၏ Human rights abuses are rampant in Burma ဆောင်းပါးကို မြင့်မိုရ်မောင်မောင်မှ ဆီလျော်အောင်ပြန်ဆိုပါသည်။

November 22, 2013