News @ M-Media

Category: M-Media Knowledge

  • လူမျိုးဘာသာမေးပြီး လူသတ်တာအမုန်းဆောင်ရာဇဝတ်မှု (Hate Crime) ဖြစ်လား?

    လူမျိုးဘာသာမေးပြီး လူသတ်တာအမုန်းဆောင်ရာဇဝတ်မှု (Hate Crime) ဖြစ်လား?

    ဇွန် ၂၃၊ ၂၀၂၀
    M-Media

    အမုန်းဆောင်ရာဇဝတ်မှု ဆိုတာဘာလဲ

    မသန်းစွမ်းဖြစ်လို့၊ အမျိုးသားဖြစ်လို့၊ အမျိုးသမီးဖြစ်လို့၊ ဘာလူမျိုးဖြစ်လို့၊ ဘာ ဘာသာဝင်ဖြစ်လို့ စသဖြင့် လူတစ်ဦးရဲ့ ဖြစ်တည်မှုကို ဦးတည်ပြီး တိုက်ခိုက်တာကို အမုန်းဆောင်ရာဇဝတ်မှုလို့ ခေါ်တာပါ။

    အမုန်းဆောင်ရာဇဝတ်မှုဆိုတာ ကိုယ်ထိလက်ရောက်တိုက်ခိုက်တာတစ်ခုတည်း မဟုတ်ပါဘူး။ လူတစ်ယောက်ရဲ့ ဖြစ်တည်မှုအပေါ် အခြေခံပြီး နှုတ်နဲ့ စော်ကားပြောဆိုတာ၊ အရှက်ရအောင်လုပ်တာတွေလည်း အမုန်းဆောင်ရာဇဝတ်မှုထဲမှာ ပါဝင်ပါတယ်။ ဆိုရှယ်မီဒီယာတွေကို ကျယ်ကျယ်ပြန့်ပြန့် သုံးလာတဲ့ အခုခေတ်မှာ အွန်လိုင်းက အမုန်းစကားတွေကလည်း အမုန်းရာဇဝတ်မှုထဲမှာ ပါဝင်ပါတယ်။

    အမုန်းဆောင်ရာဇဝတ်မှုနှင့် အမုန်းဆောင်လုပ်ရပ်

    သာမန်ရာဇဝတ်မှုတွေဟာ ဒေါသ၊ မောဟတွေကြောင့် ကျူးလွန်ကြတာဖြစ်ပေမယ့်၊ အမုန်းဆောင်ရာဇဝတ်မှုမှာတော့ ကျူးလွန်သူတွေဟာ ‘ဘယ်သူဘယ်ဝါ’ နဲ့ ‘ဘယ်လိုပုံစံ’ ဆိုတဲ့ ဖြစ်တည်မှုကို အခြေခံပြီး ကျူးလွန်ကြတာ ဖြစ်ပါတယ်။

    အမုန်းဆောင်ရာဇဝတ်မှုကို အောက်ပါအတိုင်း အဓိပ္ပါယ်ဖွင့်ဆိုထားပါတယ်။

    “လူမျိုးမတူမှု၊ လူမျိုးမတူဟု ယူဆခံရမှု၊ ဘာသာမတူမှု၊ ဘာသာမတူဟု ယူဆခံရမှု၊ လိင်စိတ်ကွဲပြားမှု၊ လိင်စိတ်ကွဲပြားသည်ဟု ယူဆခံရမှု၊ မသန်းစွမ်းမှု၊ မသန်စွမ်းဖြစ်နေသည်ဟု ယူဆခံရမှု၊ လိင်ပြောင်းထားမှု၊ လိင်ပြောင်းထားသည်ဟု ယူဆခံရမှု စသည်တို့အပေါ်မူတည်၍ ရန်လို၊ မုန်းထားကာ ကျူးလွန်ခံရသည်ဟု ကျူးလွန်ခံရသူနှင့် အခြားသူများက သတ်မှတ်သော မည်သည့် ဥပဒေချိုးဖောက်မှု၊ မည်သည့် ရာဇဝတ်မှုမျိုးကိုမဆို ​အမုန်းဆောင်ရာဇဝတ်မှုဟု ခေါ်ဆိုသည်”

    အမုန်းဆောင်လုပ်ရပ်ဆိုတာကတော့ လူမျိုး၊ ဘာသာ၊ လိင်စိတ်တိမ်းညွှတ်မှု၊ မသန်စွမ်းမှု၊ လိင်ပြောင်းလဲထားမှုတွေအပေါ် မလိုမုန်းထားပြီး လုပ်ဆောင်တယ်လို့ ကျူးလွန်ခံရသူ ဒါမှမဟုတ် အခြားသူတွေ သတ်မှတ်တဲ့ လုပ်ရပ်မျိုးတွေကို ခေါ်ဆိုတာပါ။

    အမုန်းဆောင်လုပ်ရပ်တွေ အားလုံးက ရာဇဝတ်မှုမြောက်တာမျိုး မဟုတ်ပါဘူး။ အတွေရများတဲ့ အမုန်းဆောင်လုပ်ရပ်တွေကတော့ အောက်ပါအတိုင်းဖြစ်ပါတယ်။

    နှိမ့်ချတဲ့အမည်နာမနဲ့ ခေါ်ဆိုတာ၊ စော်ကားလှောင်ပြောင်တာ၊ အရှက်ရအောင်လုပ်တာ၊ ခြိမ်းခြောက်အကြပ်ကိုင်တာ၊ ကိုယ်ထိလက်ရောက်စော်ကားတာ၊ အသက်အန္တရာယ် ခြိမ်းခြောက်တာ၊ ဖုန်း၊ မက်ဆေ့ချ်၊ အီးမေးလ်၊ ဆိုရှယ်မီဒီယာတွေကနေ စော်ကားပြောဆိုတာ၊ ခွဲခြားဆက်ဆံဖို့၊ မုန်းတီးဖို့ လှုံဆော်တဲ့ စာရွက်စာတမ်းတွေ ဖြန့်ဝေတာ၊ တစ်ဦးတစ်ယောက်ရဲ့ ပိုင်ဆိုင်မှုတွေကို ဖျက်ဆီးတာ၊ မီးရှို့တာ၊ မနှစ်မြို့ကြောင်း တိုင်တန်းတာ စတာတွေ ပါဝင်ပါတယ်။

    အမုန်းဆောင်ရာဇဝတ်မှု အမျိုးအစား

    အမုန်းဆောင်ရာဇဝတ်မှုမှာ ၃ မျိုး ၃ စားရှိပြီး ကိုယ်ထိလက်ရောက် တိုက်ခိုက်မှု၊ နှုတ်နဲ့ တိုက်ခိုက်ပြောဆိုမှု၊ မုန်းတီးလာအောင် လှုံဆော်မှုတို့ ဖြစ်ပါတယ်။

    ကိုယ်ထိလက်ရောက်တိုက်ခိုက်မှု

    လူတစ်ယောက်ရဲ့ ဖြစ်တည်မှုအပေါ် မလိုမုန်းထားရာကနေ ရာဇဝတ်မှုမြောက်တဲ့ တိုက်ခိုက်သတ်ဖြတ်မှုမျိုးကို ခေါ်ဆိုပါတယ်။ တိုက်ခိုက်တာ၊ သတ်ဖြတ်တာ၊ အိုးအိမ်ဖျက်ဆီးတာ၊ လိင်ပိုင်းဆိုင်ရာ စော်ကားတာ၊ ဖောက်ထွင်းခိုးယူတာ စတာတွေ ပါဝင်ပါတယ်။

    နှုတ်နဲ့ တိုက်ခိုက်ပြောဆိုမှု

    လူနည်းစုတွေ မနှစ်မြို့တဲ့ အမည်နာမ အသုံးပြုပြီး ခေါ်ဝေါ်တာ၊ ​ဆဲရေးတိုင်းထွားတာ၊ ခြိမ်းခြောက်တာတွေဟာ နှုတ်နဲ့ တိုက်ခိုက်ပြောဆိုတာတွေဖြစ်ပါတယ်။

    နှုတ်နဲ့ကျူးလွန်တဲ့ အမုန်းဆောင်လုပ်ရပ်တွေအတွက် တိုင်လို့မရဘူး၊ အရေးယူလို့မရဘူးလို့ လူတွေက ထင်ကြပေမယ့် ကမ္ဘာ့နိုင်ငံတော်တော်များများမှာတော့ ဒီလိုအဖြစ်အပျက်တွေကို အရေးယူနိုင်မယ့် ဥပဒေတွေ ပြဌာန်းပေးထားပါတယ်။

    မုန်းတီးအောင် လှုံ့ဆော်မှု

    လူမျိုးတစ်မျိုး၊ ဒါမှမဟုတ် လူမှုအဖွဲ့အစည်းတစ်ခုကို မုန်းတီးလာအောင် လှုံ့ဆော်တာ၊ ​​ခြိမ်းခြောက်ပြောဆိုတာမျိုး ဖြစ်ပါတယ်။ ဒီလိုလှုပ်ဆောင်မှုတွေကို စကားလုံးနဲ့ဖြစ်စေ၊ ရုပ်ပုံတွေ၊ ဗီဒီယိုတွေ၊ သီချင်းတွေ၊ ဆိုရှယ်မီဒီယာနဲ့ ဝဘ်ဆိုက်တွေမှာ ရေးသားတာတွေနဲ့ လုပ်ဆောင်လေ့ရှိပါတယ်။

    ကိုးကား – met.police.uk, www.citizensadvice.org.uk

  • သီးနှံဖျက်ကျိုင်းကောင်များကို ပါကစ္စတန်က အကျိုးရှိအောင် အသုံးချနေ

    သီးနှံဖျက်ကျိုင်းကောင်များကို ပါကစ္စတန်က အကျိုးရှိအောင် အသုံးချနေ

    ဇွန် ၁၁၊ ၂၀၂၀
    M-Media

    -ကောက်ပဲသီးနှံတွေကို ကိုက်ဖျက်စားသောက်တတ်တဲ့ ကျိုင်းကောင်တွေကို ဖမ်းဆီးကာ ကြက်အစာအဖြစ် ဖန်တီးအသုံးပြုတဲ့နည်းလမ်းကို ပါကစ္စတန်အစိုးရ အကောင်အထည်ဖော်နေပါတယ်။

    အခုနှစ် ပါကစ္စတန်နိုင်ငံ တစ်ချို့ဒေသတွေမှာ ကျိုင်းကောင်အုပ်တွေ ဝင်ရောက်ပြီး ကောက်ပဲသီးနှံတွေကို ဖျက်ဆီးမှုဟာ ၂၅ နှစ်အတွင်း အဆိုးဝါးဆုံး ဖြစ်နေကာ လယ်သမားတွေလည်း ရုန်းကန်နေရပါတယ်။

    ပါကစ္စတန်အစိုးရက ကျိုင်းကောင်တွေကို ဖမ်းဆီးကာ ကြက်အစာအဖြစ်အသုံးပြုတဲ့အစီအစဉ်ကို ဂျုံအဓိကထွက်တဲ့ ပန်ဂျပ်ပြည်နယ်မှာ ဖော်ဖော်ဝါရီလက စတင်ခဲ့ပြီး လယ်သမားတွေအနေနဲ့ ကျိုင်းကောင်တွေကို ဖမ်းဆီးဖို့လည်း တိုက်တွန်းအားပေးနေပါတယ်။

    အစိုးရဟာ ကျိုင်းကောင်အသေတစ်ကီလိုကို ရူပီး ၂၀ (ဒေါ်လာ ၁၂ ပြား) ပေးဝယ်နေပြီး ကြက်အစာကုမ္ပဏီ Hi-Tech Feeds ကို ပြန်သွင်းပါတယ်။ ဖေဖော်ဝါရီလ တစ်လအတွင်းမှာပဲ လယ်သမားတွေဟာ ကျိုင်းကောင် တန် ၂၀ လောက်ကို ဖမ်းဆီးကာ အစိုးရထံသွင်းနိုင်ခဲ့ပါတယ်။

    လက်ရှိမှာတော့ ပါကစ္စတန်အစိုးရဟာ ဒီအစီအစဉ်ကို နိုင်ငံက အခြားပြည်နယ်တွေမှာ တိုးချဲ့ဆောင်ရွက်သွားဖို့ စီစဉ်နေပါတယ်။

    ဒီအစီအစဉ်ကြောင့် Hi-Tech Feeds ကုမ္ပဏီ ကြက်စာထုတ်လုပ်မှု ကုန်ကြမ်းရဲ့ ၁၀ ရာခိုင်နှုန်းကို ကျိုင်းကောင်တွေနဲ့ အစားထိုးနိုင်နေပြီ ဖြစ်ပါတယ်။

    “ကြက်အစာနဲ့ပတ်သက်ပြီး ပြဿနာမရှိပါဘူး။ အသားစားကြက်မွေးမြူရေးမှာ ကျိုင်းကောင်တွေကို အစာအဖြစ်အသုံးပြုဖို့ အလားအလာကောင်းတွေ ရှိနေပါတယ်” လို့ ကုမ္ပဏီမန်နေဂျာ မိုဟာမက် အက်သာရ်က ပြော​က​ြားခဲ့ပါတယ်။

    Ref: Aljazeera

  • အီဂျစ်တွင် ကိုရိုနာ စွန်ပလွံသီး စျေးကွက်ဝင်

    အီဂျစ်တွင် ကိုရိုနာ စွန်ပလွံသီး စျေးကွက်ဝင်

    ဧပြီ ၁၈၊ ၂၀၂၀
    M-Media

    -ကမ္ဘာတစ်ဝှမ်း Covid-19 ပြန့်နှံ့နေတဲ့အချိန် အီဂျစ်နိုင်ငံမှာတော့ ကိုရိုနာအမည်နဲ့ စွန်ပလွံသီး စျေးကွက်ဝင်လာပါတယ်။

    အီဂျစ်က လယ်သမားတွေဟာ နှစ်စဉ် စွန်ပလွံသီးတွေကို နာမည်ဆန်းဆန်းပေးကာ စျေးကွက်မှာ ရောင်းလေ့ရှိပြီး ပြီးခဲ့တဲ့ ၂ နှစ်တုန်းကဆိုရင် လီဗာပူးလ်တိုက်စစ်မှူး မိုဟာမက် ဆာလာဟ်အမည်နဲ့ စွန်ပလွံသီးက စျေးကွက်မှာ ရောင်းအားကောင်းခဲ့ပါတယ်။

    ဒီနှစ်မှာတော့ စွန်ပလွံသီးတစ်မျိုးကို ကိုရိုနာလို့ အမည်ပေးကာ တစ်ကီလိုကို အီဂျစ်ပေါင် ၂၅ ပေါင် (ကန်ဒေါ်လာ ၁.၅၈) နဲ့ ရောင်းချနေပါတယ်။

    “နှစ်တိုင်း စွန်ပလွံသီးတွေကို နာမည်အမျိုးမျိုး ပေးကြပါတယ်။ အီဂျစ်ရဲ့ နာမည်ကျော် ဘောလုံးသမားဟောင်း အဘူတ်ရီကာရဲ့အမည်ကို တစ်နှစ်ပေးဖူးပြီး ရောင်းအားကောင်းကာ စျေးအကြီးဆုံး ဖြစ်ခဲ့ပါတယ်။ ရုပ်ရှင်မင်းသား မိုဟာမက် ရမ်မဒန်ရဲ့ စွန်ပလွံသီးလည်း ရောင်းအားသွက်ခဲ့တယ်။ အကမယ် ဆိုဖီနာနဲ့ အဆိုတော် ရှာကီးရားတို့ရဲ့ အမည်တွေလည်း ပေးခဲ့ဖူးပါတယ်” လို့ လက်ကားလုပ်ငန်းရှင် အဟ်မဒ် အေမင်က ပြောကြားခဲ့ပါတယ်။

    ကိုရိုနာဗိုင်းရပ်စ်ကြောင့် ကိုရိုနာအမည်ဟာ အီဂျစ်မှာတင်မကဘဲ ကမ္ဘာတစ်ဝှမ်းမှာ လူကြိုက်များနေကြောင်း၊ ဝယ်သူတွေဟာ စွန်ပလွံသီးအမည်ကို ကြားတဲ့အတွက် ပြုံးကြကြောင်း အေမင်က ထည့်သွင်းပြောဆိုခဲ့ပါတယ်။

    Ref: Arab News

  • သဘာ၀နည်းလမ်းနဲ့ ကိုယ်ခံစွမ်းအားကောင်းအောင် ဘယ်လိုလုပ်မလဲ

    သဘာ၀နည်းလမ်းနဲ့ ကိုယ်ခံစွမ်းအားကောင်းအောင် ဘယ်လိုလုပ်မလဲ

    ဧပြီ ၇၊ ၂၀၂၀
    M-Media

    -ကိုယ်ခံစွမ်းအားဆိုတာ ဘာလဲ???

    ခန္ဓာကိုယ်တွင်းက အင်မတန် ထူးခြားပြောင်မြောက်တဲ့ စွမ်းအားတစ်ခုပါ။ ကိုယ်ထဲဝင်ရောက်လာတဲ့ ဘက်တီးရီးယား၊ ဗိုင်းရပ်စ်ပိုးတွေကို တိုက်ဖျက်ပေးပြီး ကိုယ်ခန္ဓာကိုယ်ကြီး ဟန်ချက်ညီအောင် ထိန်းကျောင်းပေးတဲ့ အတွင်းအား တစ်ခုလည်းဖြစ်ပါတယ်။

    ကိုယ်ခံစွမ်းအားကနေ ထုတ်ပေးပြီး အန်တီဘာဒီ (Antibody) လို့ခေါ်တဲ့ ပရိုတိန်းဆဲလ်တွေဟာ အဖျား၊ တုပ်ကွေးတွေကို ဖြစ်စေတဲ့ ဗိုင်းရပ်စ်ပိုးတွေကို တိုက်ထုတ်ပေးပါတယ်။ ကမ္ဘာတစ်ဝှမ်း လူသန်းချီ ကူးစက်နေပြီး လူသောင်းချီ သေဆုံးတဲ့ ကိုရိုနာဗိုင်းရပ်စ်ပိုးကို ရင်ဆိုင်ဖို့အတွက်လည်း ကိုယ်ခံစွမ်းအား ကောင်းမွန်နေဖို့ လိုအပ်ပါတယ်။

    ကိုရိုနာဗိုင်းရပ်စ်ကြောင့် သေဆုံးအများစုဟာ အသက်အရွယ်ကြီးသူတွေ၊ ရောဂါအခံရှိသူတွေဖြစ်ပြီး၊ လူငယ်တွေ၊ လူလတ်ပိုင်းတွေကတော့ ပြန်လည်သက်သာ ကောင်းမွန်လာကြပါတယ်။ ဒါကိုကြည့်ခြင်းအားဖြင့် ကိုယ်ခံစွမ်းအား အားနည်းသူတွေမှာ အသက်အန္တရာယ် ပိုရှိတယ်ဆိုတာကို တွေ့ရပါတယ်။ ကိုရိုနာကြောင့် သေဆုံးမှုဟာ ပျမ်းမျှအားဖြင့် ၂ ရာခိုင်နှုန်းကနေ ၃ ရာခိုင်နှုန်းလောက်သာ ရှိတယ်လို့ ကျွမ်းကျင်သူတွေက ပြောကြားထားပါတယ်။

    ကိုရိုနာဗိုင်းရပ်စ် မကူးစက်ရေး အကောင်းဆုံး ကာကွယ်နည်းကတော့ တတ်နိုင်သမျှ အိမ်ပြင်မထွက်ပါနဲ့။ ရေများများသောက်ပါ။ တစ်နေ့ကို အနည်းဆုံး ရေ ၂ လီတာလောက် သောက်ပေးပါ။ လက်ကိုမကြာခဏဆေးပါ။

    အိမ်မှာ လွယ်လွယ်ကူကူနဲ့ လုပ်နိုင်ပြီး ကိုယ်ခံစွမ်းအားအတွက် အလွန်အကျိုးဖြစ်ထွန်းမယ့် ဆေးစွမ်းတစ်လက်ကတော့ ကြက်သွန်ဖြူ၊ လေးညှင်းပွင့်၊ ဂျင်း၊ သံပုရာနဲ့ ပျားရည်တို့ကို အနေတော် ရောစပ်ပြီး နေ့စဉ် သောက်သုံးပေးတာပါပဲ။

    ဒီ ပါဝင်ပစ္စည်းတွေမှာ ဘက်တီးရီးယားသေနိုင်စွမ်း၊ ဗိုင်းရပ်စ်ပိုး သေနိုင်စွမ်းတွေ ရှိပါတယ်။ တစ်နေ့ကို လက်ဖက်ရည်ဇွန် တစ်ဇွန်း ၄ ကြိမ်ကနေ ၆ ကြိမ်အထိ သောက်ပေးခြင်းအားဖြင့် ကိုယ်ခံစွမ်းအားကို ပိုမိုကောင်းမွန်စေပြီး ရောဂါတိုက်ခိုက်နိုင်စွမ်းလည်း မြင့်မားလာမှာဖြစ်ပါတယ်။

    စမုန်ဖြူ၊ သစ်ကြမ်းပိုးခေါက်၊ ဇီရာ၊ ပူစီနံတို့လို အရွက်တွေ၊ အစေ့အဆံတွေဟာ ဗိုင်းရပ်စ်ပိုးမွှားတွေကို သေစေနိုင်စွမ်းရှိသလို၊ သတ္ထုဓာတ်၊ သံဓာတ်၊ ဖောလစ်အက်စက်၊ ဆီလီနီယံဓာတ်တွေ၊ ဗိုက်တာမင် အေ၊ စီ၊ အီး၊ ဘီဆစ်နဲ့ ဘီတွဲတွေ ပါဝင်တယ်လို့ သုတေသနပညာရှင်တွေက ပြောကြားထားပါတယ်။ ဒီဓာတ်တွေဟာ ကိုယ်ခံအား ကောင်းမွန်ဖို့အတွက် လိုအပ်တဲ့ ဗိုက်တာမင်တွေ၊ ဓာတ်သတ္ထုတွေ ဖြစ်ပါတယ်။

    ကိုယ်ခံစွမ်းအား ကောင်းစေရေး နောက်ထပ် အရေးကြီးတဲ့ အချက်တစ်ခုက အန်တီအောက်ဆီဒန့် (antioxidant) လုံလုံလောက်လောက် ရရှိရေး ဖြစ်ပါတယ်။ အန်တီအောက်ဆီဒန့်ဟာ နှလုံးရောဂါ၊ ကင်ဆာနဲ့ အခြားရောတွေကို ဖြစ်စေတဲ့ free radical တွေရဲ့ ရန်ကနေ ဆဲလ်တွေကို ကာကွယ်ပေးသလို၊ ကူးစက်ရောဂါတွေမဖြစ်အောင်လည်း တားဆီးပေးပါတယ်။

    အန်တီအောက်ဆီးဒန့်ဟာ ခန္ဓာကိုယ်က ထုတ်ပေးတာမျိုးမဟုတ်ဘဲ အစားအစာကနေ ရရှိတာဖြစ်ပါတယ်။ အရည်ရွှမ်းတဲ့အသီးတွေ၊ အစိမ်းရောင်အရွက်တွေ၊ ငရုပ်ပွလို အသီးမျိုးတွေက အန်တီအောက်ဆီဒန့် အလွန်ကြွယ်၀တဲ့ အစားအသောက်တွေ ဖြစ်ပါတယ်။

    နိဂုံးချုပ်ရရင်တော့ ရေများများသောက်ပါ၊ အသီးအနှံနဲ့ ဟင်းသီးဟင်းရွက် များများစားပေးပါ၊ အိမ်ရေး၀၀အိပ်ပါ။ ကိုယ်ခံစွမ်းအား ကောင်းနေမှသာ ကူးစက်ရောဂါတွေကို ကာကွယ်နိုင်မှာ ဖြစ်ပါတယ်။

    Ref: Allure Vanguard

  • ရာသီဥတုပြောင်းလဲမှုတိုက်ဖျက်ရေး Amazon သူဌေးက ဒေါ်လာ ၁၀ ဘီလီယံ လှူဒါန်း

    ရာသီဥတုပြောင်းလဲမှုတိုက်ဖျက်ရေး Amazon သူဌေးက ဒေါ်လာ ၁၀ ဘီလီယံ လှူဒါန်း

    ဖေဖော်ဝါရီ ၁၉၊ ၂၀၂၀
    M-Media

    Amazon ပိုရှင် ဂျက်ဖ် ဘီဇို့စ်

    -ရာသီဥတု ပြောင်းလဲပြီး ကမ္ဘာကြီးပူနွေးလာမှုကို တိုက်ဖျက်ဖို့အတွက် ကန်ဒေါ်လာ ၁၀ ဘီလီယံ ထည့်ဝင် သုံးစွဲသွားမယ်လို့ Amazon ကုမ္ပဏီကို တည်ထောင်သူ သန်းကြွယ်သူဌေး ဂျက်ဖ် ဘီဇို့စ်က တနင်္လာနေ့မှာ ထုတ်ပြန်ကြေငြာလိုက်ပါတယ်။

    ဘီဇို့စ်ဟာ Bezos Earth Fund ‌အမည်နဲ့ ရန်ပုံငွေထူထောင်မှာဖြစ်ပြီး ရာသီဥတုပြောင်းလဲမှု ဆိုးကျိုးကို လျော့ချဖို့ ကြိုးစားနေတဲ့ သိပ္ပံပညာရှင်တွေ၊ တက်ကြွလှုပ်ရှားသူတွေကို ထောက်ပံ့ပေးသွားမယ်လို့ Instagram စာမျက်နှာမှာ ရေးသားခဲ့ပါတယ်။

    အခုထည့်ဝင်တဲ့ ကန်ဒေါ်လာ ၁၀ ဘီလီယံဟာ ဘီဇို့စ်ရဲ့ အသားတင်ကြွယ်၀မှု ဒေါ်လာ ၁၃၀ ဘီလီယံရဲ့ ၈ ရာခိုင်နှုန်းလောက်သာ ရှိပါတယ်။ ဒါပေမယ့် သမိုင်းတစ်လျှောက် ရာသီဥတုပြောင်းလဲမှု တိုက်ဖျက်ရေးအတွက် လှူဒါန်းမှုတွေထဲက တစ်ခုလည်း ဖြစ်ပါတယ်။

    ရာသီဥတုပြောင်းလဲမှု တိုက်ဖျက်ရေးအတွက် ဘီလီယံနာ စီးပွားရေးလုပ်ငန်းရှင် ဝါရန် ဘက်ဖက်က ၂၀၀၆ ခုနှစ်မှာ ဒေါ်လာ ၃၆ ဘီလီယံ လှူဒါန်းခဲ့ပြီး Walmart ကို တည်ထောင်သူ ဆမ်ဝေါလ်တန်ရဲ့ ကျန်ရစ်သူဇနီး ဟဲလင် ဝေါလ်တန်က ၂၀၀၇ ခုနှစ်မှာ‌ ဒေါ်လာ ၁၆.၄ ဘီလီယံ လှူဒါန်းခဲ့ပါတယ်။

    “ရာသီဥတုပြောင်းလဲမှုဟာ ကျွန်တော်တို့ကမ္ဘာဂြိုဟ်အတွက် အကြီးမားဆုံး ခြိမ်းခြောက်မှုပါပဲ။ ဒီကိစ္စရဲ့ ကြောက်မက်ဖွယ် ဆိုးကျိုးကို တိုက်ဖျက်ရာမှာ ရှိပြီးသား နည်းလမ်းတွေကို တိုးချဲ့ဆောင်ရွက်ဖို့၊ နည်းသစ်လမ်းသစ်တွေ ရှာဖွေဖို့ စတာတွေမှာ ကျွန်တော်ဟာ အခြားသူတွေနဲ့ ပူးပေါင်းဆောင်ရွက်ချင်ပါတယ်” လို့ ဘီဇို့စ်က Instagram စာမျက်နှာမှာ ရေးသားခဲ့ပါတယ်။

    ရာသီဥတုပြောင်းလဲမှု တိုက်ဖျက်ရေးမှာ ထဲထဲဝင်ဝင် ပါဝင်ဆောင်ရွက်ဖို့အတွက် ဝန်ထမ်းတွေရဲ့ ဖိအားပေးမှုကို Amazon ဟာ ပြီးခဲ့တဲ့နှစ် မေလလောက်ကတည်းက စတင်ခံစားခဲ့ရတာပါ။ အဲဒီနောက်ပိုင်း ၂၀၄၀ ရောက်ရင် ကာဘွန်ကင်းစင်တဲ့ လုပ်ငန်းတစ်ခု ဖြစ်အောင် ဆောင်ရွက်မယ်လို့ Amazon က စက်တင်ဘာလမှာ ကြေငြာခဲ့ပါတယ်။

    Ref: CNN