Tag: Afghanistan

ဒီဇင်ဘာ ၉၊ ၂၀၂၀
M-Media

-အာဖဂန်နစ္စတန်မှာ အမေရိကန်နဲ့ သူတို့ရဲ့မဟာမိတ်တွေ လေကြောင်းတိုက်ခိုက်မှုကြောင့် အရပ်သားသေဆုံးမှု အရေအတွက်ဟာ ၂၀၁၇ နောက်ပိုင်းမှာ အဆ ၃၃၀ အထိ မြင့်တက်လာတယ်လို့ ယူကေ ဘရောင်းတက္ကသိုလ်ရဲ့ Costs of War Project က ထုတ်ပြန်တဲ့ အစီရင်ခံစာမှာ ဖော်ပြထားပါတယ်။

၂၀၁၉ ခုနှစ်အတွင်း အာဖဂန်မှာ အမေရိကန်နဲ့ မဟာမိတ်တွေရဲ့ လေကြောင်းတိုက်ခိုက်မှုကြောင့် သေဆုံးသူ အရပ်သားအရေအတွက် ၇၀၀ ရှိခဲ့​ပြီး ၂၀၀၁ ခုနှစ် အမေရိကန်ရဲ့ ကျူးကျော်မှုနောက်ပိုင်း တစ်နှစ်အတွင်း အရပ်သား အများဆုံးသေဆုံးမှု ဖြစ်ပါတယ်။

အခုနှစ် ဖေဖော်ဝါရီလမှာ တာလီဘန်နဲ့ သဘောတူညီချက် ရပြီးနောက် အမေရိကန်က လေကြောင်းတိုက်ခိုက်မှုတွေ မလုပ်တော့ပေမယ့် အာဖဂန်လေတပ်က တိုက်ခိုက်မှုတွေကို အရှိန်မြှင့် ဆောင်ရွက်နေပါတယ်။ ၂၀၂၀ ပထမ ၆ လအတွင်း အာဖဂန်လေတပ်ရဲ့ တိုက်ခိုက်မှုကြောင့် အရပ်သား ၈၆ ဦး သေဆုံးပြီး ၁၀၃ ဦး ဒဏ်ရာရခဲ့ပါတယ်။

Costs of War Project ရဲ့အစီရင်ခံစာမှာ အာဖဂန်လေတပ်ဟာ နိုင်ငံသမိုင်းတစ်လျှောက် အရပ်သားတွေအပေါ် အဆိုးရွားဆုံး ထိခိုက်မှုတွေ ဖြစ်စေတယ်လို့ ဖော်ပြထားပါတယ်။

အမေရိကန်ဟာ အာဖဂန်က တပ်ဖွဲ့တွေ ဆုတ်ခွာရေး လျင်လျင်မြန်မြန် ဆောင်ရွက်လာတာကြောင့် တာလီဘန်အဖွဲ့ဟာ အဖာဂန်အစိုးရကို ဖိအားပေးဖို့ ကြိုးစားလာနိုင်ပြီး၊ အာဖဂန်လေတပ်ကလည်း တိုက်ခိုက်မှုတွေ ပိုမို တိုးမြှင့်လုပ်ဆောင်လာနိုင်တယ်ဆိုတဲ့ စိုးရိမ်မှုတွေ ရှိလာပါတယ်။

၂၀၀၁ ခုနှစ် အမေရိကန်က ကျူးကျော်တိုက်ခိုက်ခဲ့ပြီးတဲ့နောက် အာဖဂန်နစ္စတန်မှာ ပြီးခဲ့တဲ့ ၁၀ နှစ်အတွင်း အရပ်သား အနည်းဆုံး ၃၂၀၀၀ လောက်သေဆုံးခဲ့ပြီး၊ ဒဏ်ရာရရှိသူကတော့ ၆ သောင်းလောက်ရှိတယ်လို့ ကုလရဲ့ ထုတ်ပြန်ချက်မှာ ဖော်ပြထားပါတယ်။

Ref: Aljazeera

အောက်တိုဘာ ၉၊ ၂၀၂၀
M-Media

-အာဖဂန်နစ္စတန်မှာ ကျန်ရှိနေတဲ့ နောက်ဆုံး အမေရိကန်တပ်ဖွဲ့တွေကို လာမယ့် ခရစ္စမတ်မတိုင်မီ ပြန်ခေါ်ယူသွားမယ်ဆိုတဲ့ သမ္မတထရမ့်ရဲ့ ရေးသားမှုကို ကြိုဆိုတယ်လို့ တာလီဘန်အဖွဲ့က ပြောကြားလိုက်ပါတယ်။

ထရမ့်ဟာ ဗုဒ္ဓဟူးနေ့က Twitter စာမျက်နှာမှာ ဒီလိုရေးသားခဲ့တာဖြစ်ပြီး ၁၉ နှစ်ဆိုတဲ့အချိန်ဟာ လုံလောက်ခဲ့ပြီလို့လည်း ဆိုပါတယ်။

တာလီဘန်အဖွဲ့ရဲ့ ပြောရေးဆိုခွင့်ရှိသူ ဇဘီဟွလ္လာ မူဂျာဟစ်က ထရမ့်ရဲ့ ဒီပြောကြားမှုကို ကြိုဆိုပြီး အခုနှစ်အစောပိုင်း အမေရိကန်နဲ့ တာလီဘန်တို့အကြား လက်မှတ်ရေးထိုးခဲ့တဲ့ ငြိမ်းချမ်းရေးသဘောတူညီချက်ကို အကောင်အထည်ဖော်ဖို့အတွက် အပြုသဘောဆောင်တဲ့ ခြေလှမ်းတစ်ခုဖြစ်တယ်လို့ ပြောကြားခဲ့ပါတယ်။

သဘောတူညီချက်မှာ ပါဝင်တဲ့အကြောင်းအရာတွေကို တာလီဘန်က အလေးထားပြီး အနာဂတ်မှာ အမေရိကန်အပါအဝင် နိုင်ငံအားလုံးနဲ့ အပြုသဘောဆောင်တဲ့ ဆက်ဆံရေးထူထောင်ဖို့ မျှော်လင့်တယ်လို့လည်း မူဂျာဟစ်က ထည့်သွင်းပြောဆိုခဲ့ပါတယ်။

အာဖဂန်အစိုးရရဲ့ အမျိုးသားရင်ကြားစေ့ရေးကောင်စီ အကြီးအကဲ အဘ်ဒူလာ အဘ်ဒူလာက အမေရိကန်တပ်ဖွဲ့တွေ အချိန်မတန်ခင် ရုပ်သိမ်းမှုဟာ တိုင်းပြည်မှာ အနှုတ်လက္ခဏာဆောင်တဲ့ အကျိုးဆက်တွေ ဖြစ်လာလိမ့်မယ်လို့ ပြောကြားခဲ့ပါတယ်။ အာဖဂန်သမ္မတရုံးကတော့ ထရမ့်ရဲ့မှတ်ချက်နဲ့ပတ်သက်ပြီး ဘာမှ မထုတ်ပြန်သေးပါဘူး။

တာလီဘန်နဲ့ အာဖဂန်နစ္စတန်တို့ဟာ စက်တင်ဘာလ​အလယ်ပိုင်းလောက်ကတည်းက ကာတာနိုင်ငံဒိုဟာမြို့မှာ ငြိမ်းချမ်းရေးကိစ္စ ဆွေးနွေးခဲ့ပေမယ့် သိသာတဲ့ သဘောတူညီချက်မျိုး မရရှိသေးပါဘူး။

ဖေဖော်ဝါရီ ၂၉ ရက်နေ့ တာလီဘန်နဲ့ သဘောတူညီချက်ရခဲ့တဲ့အချိန်က အာဖဂန်နစ္စတန်မှာ အမေရိကန်တပ်ဖွဲ့ဝင် ၁၃၀၀၀ လောက်ရှိခဲ့ပြီး အခုအချိန်မှာတော့ ၅၀၀၀ အောက်သာ ရှိပါတော့တယ်။

Ref: Aljazeera