Tag: Afghanistan

ဒီဇင်ဘာ ၈၊ ၂၀၁၉
M-Media

-အမေရိကန်နဲ့ တာလီဘန်တို့ဟာ မနေ့က ကာတာနိုင်ငံ မြို့တော်ဒိုဟာမှာ တွေ့ဆုံဆွေးနွေးခဲ့ကြပြီး ၃ လကြာ ရပ်တန့်နေတဲ့ ဆွေးနွေးမှုကို ပြန်လည်စတင်နိုင်ခဲ့တာ ဖြစ်ပါတယ်။

သမ္မတ ဒေါ်နယ်ထရမ့်ဟာ တာလီဘန်နဲ့ ဆွေးနွေးမှုကို စက်တက်ဘာမှာ ရပ်တန့်ခဲ့တာ ဖြစ်ပါတယ်။

အမေရိကန် ငြိမ်းချမ်းရေးကိုစားလှယ် ဇာလ်မေ ခါလီလ်ဇဒ်နဲ့ တာလီဘန်တာဝန်ရှိသူတို့ရဲ့ မနေ့က ဆွေးနွေးမှုဟာ အာဖဂန်အစိုးရနဲ့ တာလီဘန်တို့အကြား ဆွေးနွေးမှုတွေ လုပ်ဆောင်ကာ ၁၈ နှစ်တာကြာမြင့်နေပြီဖြစ်တဲ့ အာဖဂန်စစ်ပွဲ အဆုံးသတ်ရေး လမ်းပွင့်သွားမယ်လို့ မျှော်လင့်နေကြပါတယ်။

အမေရိကန်အစိုးရရဲ့ ပြောရေးဆိုခွင့်ရှိသူတစ်ဦးက ဆွေးနွေးမှုမှာ အကြမ်းဖက်မှုလျော့ကျရေးကို အဓိကထားပြီး အာဖဂန်ကနိုင်ငံရေးအဖွဲ့တွေအကြား ဆွေးနွေးနိုင်ရေး၊ အပစ်ရပ်ရေးတွေအထိ ဦးတည်သွားနိုင်တယ်လို့ ပြောကြားခဲ့ပါတယ်။

အာဖဂန်အစိုးရဟာ အမေရိကန်ရဲ့ ရုပ်သေးရုပ်ဖြစ်တယ်ဆိုကာ တာလီဘန်က တိုက်ရိုက်ဆွေးနွေးဖို့ ငြင်းဆိုထားတာပါ။ အမေရိကန်ကိုယ်စားလှယ် ခါလီဇဒ်ဟာ တာလီဘန်နဲ့ မနေ့က ဆွေးနွေးမှုမလုပ်ခင် အာဖဂန်သမ္မတ အက်ရှ်ရက်ဖ် ဂါနီနဲ့ ပြီးခဲ့ရက်ပိုင်းမှာ ဆွေးနွေးခဲ့ပါတယ်။

ဆွေးနွေးမှုတွေ ပြုလုပ်နေပမယ့် တာလီဘန်ဟာ အဖဂန်နိုင်ငံတစ်ဝှမ်းမှာ နေ့စဉ်ဆိုသလို တိုက်ခိုက်မှုတွေ ပြုလုပ်နေပါတယ်။

Ref: Aljazeera

အောက်တိုဘာ ၂၃၊ ၂၀၁၉
M-Media

-ဘေဂျင်းမှာ ၂ ရက်တာပြုလုပ်မယ့် အာဖဂန်အရေး ဆွေးနွေးညှိနှိုင်းပွဲကို တက်ရောက်ဖို့အတွက် တရုတ်အစိုးရက တာလီဘန်အဖွဲ့ကို ဖိတ်ကြားလိုက်ပါတယ်။

အောက်တိုဘာ ၂၉၊ ၃၀ မှာ ပြုလုပ်မယ့် အဲဒီဆွေးနွေးပွဲကို အာဖဂန်စစ်ပွဲနဲ့ နိုင်ငံရေးမတည်ငြိမ်မှုတွေမှာ ပါဝင်နေတဲ့ အဖွဲ့အစည်းတွေ တက်ရောက်ကြမှာ ဖြစ်ပါတယ်။

တာလီဘန်အဖွဲ့ရဲ့ နိုင်ငံရေးဆိုင်ရာ ပြောရေးဆိုခွင့်ရှိသူ ဆူဟေးလ် ရှာဟင်က တာလီဘန်ကို ပူးပေါင်းတည်ထောင်သူ မူလာ အဘ်ဒူလ် ဂါနီ ဘာရာဒါဟာ ဒိုဟာမှာ တရုတ်သံတမန်တွေနဲ့ တွေ့ဆုံခဲ့တယ်လို့ ပြောကြားခဲ့ပါတယ်။ တာလီဘန်ဟာ ဒိုဟာမှာ ရုံးခန်းဖွင့်ထားတာပါ။

၁၈ နှစ်ကြာဖြစ်ပွားနေတဲ့ အာဖဂန်စစ်ပွဲ အဆုံးသတ်ရေးအတွက် အမေရိကန်နဲ့ တာလီဘန်တို့ရဲ့ ဆွေးနွေးမှုဟာ ပြီးခဲ့တဲ့လမှာ ပြိုလဲသွားခဲ့ပြီးတဲ့နောက် အာဖဂန်အရေးမှာ တရုတ်က ကြားဝင်ဆွေးနွေးသူအဖြစ် ဆောင်ရွက်လာတာ ဖြစ်ပါတယ်။

အမေရိကန်ရဲ့ ရုပ်သေးရုပ်ဖြစ်တယ်လို့ဆိုတာ အာဖဂန်အစိုးရနဲ့ ဆွေးနွေးမှုလုပ်ဖို့ တာလီဘန်က ငြင်းဆိုထားပြီး ဆွေးနွေးမှုမှာ အာဖဂန်အစိုးရတာဝန်ရှိသူတွေက အရပ်သားအဖြစ်သာ တက်ရောက်ခွင့်ရပါတယ်။

အခု ဘေဂျင်းဆွေးနွေးပွဲမှာလည်း ဒီအချက်ကိုအခြေခံသွားမယ်လို့ ရှာဟင်က ထည့်သွင်းပြောဆိုခဲ့ပါတယ်။ သမ္မတ အက်ရှ်ရက်ဖ်ဂါနီ ဦးဆောင်တဲ့ အာဖဂန်အစိုးရက ဒီဆွေးနွေးပွဲနဲ့ပတ်သက်လို့ ထုတ်ပြန်ထားတာမျိုးမရှိသေးပါဘူး။

အာဖဂန်ပြည်တွင်းအုပ်စုတွေ ဆွေးနွေးမှုကို ဖေဖော်ဝါရီလက ရုရှားနိုင်ငံမှာ ပြုလုပ်ခဲ့ပြီး၊ ဇူလိုင်လက ကာတာမှာပြုလုပ်တဲ့ ဆွေးနွေးပွဲမှာတော့ အစိုးရနဲ့ အရပ်ဖက်အဖွဲ့အစည်းတွေက ကိုယ်စားလှယ်အဖွဲ့ စုစုပေါင်း ၆၀ လောက် တက်ရောက်ခဲ့ပါတယ်။

Ref: Aljazeera

အောက်တိုဘာ ၁၉၊ ၂၀၁၉
M-Media

-အာဖဂန်နစ္စတန်နိုင်ငံအရှေ့ပိုင်းက ဗလီဝတ်ကျောင်းတော်တစ်လုံး မနေ့က ဗုံးခွဲတိုက်ခိုက်ခံရမှုအတွင်း အနည်းဆုံး ဝတ်ပြုသူ ၆၂ ဦးသေဆုံးခဲ့ပါတယ်။

နန်ဂါဟာပြည်နယ် ဟက်စ်ကာမိုင်နာ ခရိုင်က ဗလီတစ်လုံးမှာ သောကြာနေ့ ဝတ်ပြုဆုတောင်းနေစဉ်အတွင်း ဗုံးပေါက်ကွဲခဲ့တာဖြစ်ပြီး ဗလီတစ်ခုလုံး ပြိုကျပျက်ဆီးခဲ့ပါတယ်။ အသေခံဗုံးခွဲမှုလား၊ အခြားနည်းလမ်းတစ်ခုနဲ့ ဖောက်ခွဲမှုလားဆိုတာ ရှင်းရှင်းလင်းလင်း မသိရသေးပါဘူး။

ပြည်နယ်အစိုးရ ပြောရေးဆိုခွင့်ရှိသူ ခိုယာနီက စစ်သွေးကြွတွေရဲ့ တိုက်ခိုက်မှုဖြစ်ပြီး သေဆုံးသူတွေထဲမှာ ကလေးငယ်တွေလည်း ပါဝင်တယ်လို့ ပြောကြားခဲ့ပါတယ်။ တိုက်ခိုက်မှုကြောင့် ဒဏ်ရာရရှိသူကတော့ အနည်းဆုံး ၃၆ ဦး ရှိပါတယ်။

အာဖဂန်အစိုးရက ဒီတိုက်ခိုက်မှုကို ရှုတ်ချခဲ့ပြီး တာလီဘန်နဲ့ သူတို့ရဲ့ အပေါင်းအပါတွေဟာ ဝတ်ပြုဆုတောင်းနေစဉ်အတွင်းမှာတောင် အရပ်သားတွေကို ပစ်မှတ်ထားတိုက်ခိုက်မှုတွေကို ဆက်လက်လုပ်ဆောင်နေကာ ဒါတွေဟာ စက်ဆုပ်စရာကောင်းတဲ့ လုပ်ရပ်တွေဖြစ်တယ်လို့ ပြောကြားခဲ့ပါတယ်။

တိုက်ခိုက်မှုကို ဘယ်အဖွဲ့ကလုပ်လဲဆိုတာ တိတိကျကျ မသိရသေးပါဘူး။ အာဖဂန်နစ္စတန် အရှေ့ပိုင်းဟာ တာလီဘန်နဲ့ IS အကြမ်းဖက်အဖွဲ့တို့ အဓိကလှုပ်ရှားရာဒေသ ဖြစ်ပါတယ်။

တာလီဘန်အဖွဲ့ ပြောရေးဆိုခွင့်ရှိသူ ဇဗီဟွလ္လာ မူဂျာဟစ်က ဒီတိုက်ခိုက်မှုကို ရှုတ်ချကြောင်း ထုတ်ပြန်ခဲ့ပါတယ်။

အရပ်သားသေဆုံးမှု စံချိန်တင်

၂၀၀၁ ခုနှစ်မှာ အမေရိကန်က ကျူးကျော်တိုက်ခိုက်ခဲ့ပြီးတဲ့နောက် စတင်ခဲ့တဲ့ ၁၈ နှစ်ကြာ အာဖဂန်စစ်ပွဲမှာ အရပ်သားသေဆုံးမှုဟာ အခုနှစ်မှာ စံချိန်တင်ပမာဏအထိ ရောက်ရှိလာတယ်လို့ ကုလက ‌ပြီးခဲ့တဲ့ရက်ပိုင်းမှာ ထုတ်ပြန်ခဲ့ပါတယ်။

ကုလအထွေထွေအတွင်းရေးမှူးချုပ်ရဲ့ အာဖဂန်ဆိုင်ရာ ကိုယ်စားလှယ် တာဒါမီချီ ယာမာမိုတိုက အရပ်သားသေဆုံးမှု စံချိန်တင်မြင့်တက်လာတာကိုကြည့်ရင်၊ ပဋိပက္ခမှာ ပါဝင်သူတွေအနေနဲ့ အရပ်သားတွေကို ကာကွယ်ပေးရေး ပိုပြီး အာရုံထား ဂရုစိုက်ဖို့ လိုအပ်တယ်ဆိုတာကို ပြသနေတယ်လို့ ‌ပြောကြားခဲ့ပါတယ်။

Ref: The Guardian