ဒီဇင်ဘာ ၁၅၊ ၂၀၁၇
M-Media
– ခရစ်ယာန် ကက်သလစ်ဘာသာအပါအ၀င် ဘာသာရေးခေါင်းဆောင်တွေက ကလေးငယ်တွေအပေါ် လိင်ပိုင်းဆိုင်ရာ ကျူးလွန်မှုတွေ ရှိလာရင် သက်ဆိုင်ရာ သာသနာပိုင်တွေအနေနဲ့ ရဲတပ်ဖွဲ့ကို မဖြစ်မနေ တိုင်ကြားရမယ်ဆိုတဲ့ ဥပဒေတစ်ခု ပြဌာန်းဖို့ သြစတေးလျ အထူးစုံစမ်းရေးအဖွဲ့က အစိုးရကို တိုက်တွန်း ပြောကြားလိုက်ပါတယ်။
ကက်သလစ်ဘုန်းကြီးအသိုင်းအ၀ိုင်းမှာ ကလေးငယ်တွေကို လိင်ပိုင်းဆိုင်ရာကျူးလွန်မှုဟာ ပူးပေါင်းကြံစည်တဲ့ ပုံစံမျိုး ဖြစ်နေတယ်ဆိုတာ ထိတ်လန့်ဖွယ် တွေ့ရှိခဲ့ရကြောင်း တော်ဝင်ကော်မရှင်ရဲ့ ဒီကနေ့ထုတ်ပြန်တဲ့ အစီရင်ခံစာမှာ ဒီလို တိုက်တွန်းခဲ့တာပါ။
သြစတေးလျအစိုးရရဲ့ ညွှန်ကြားချက်နဲ့ ၂၀၁၂ ခုနှစ်မှာ ဖွဲ့စည်းခဲ့တဲ့ တော်ဝင်ကော်မရှင်ဟာ ၅ နှစ်တာ အသေးစိတ် စုံစမ်းစစ်ဆေးမှု ပြုလုပ်ခဲ့တာဖြစ်ပြီး ကလေးငယ်တွေအပေါ် လိင်ပိုင်းဆိုင်ရာ ကျူးလွန်မှုနဲ့ပတ်သက်လို့ ကမ္ဘာ့အကြီးဆုံး စုံစမ်းစစ်ဆေးမှုကြီးလည်း ဖြစ်ပါတယ်။
ကော်မရှင်ဟာ ဘာသာရေးအဖွဲ့အစည်းတွေတင်မကဘဲ အစိုးရအဖွဲ့အစည်း၊ ပညာရေးနဲ့ အသက်မွေးဝမ်းကြောင်းဆိုင်ရာ အဖွဲ့အစည်းတွေမှာပါ ဒီကိစ္စအတွက် စုံစမ်းစစ်ဆေးခဲ့တာဖြစ်ပြီး သြစတေးလျ ကက်သလစ်အသင်းတော်ရဲ့ ဘုန်းကြီးအသိုင်းအ၀ိုင်းမှာ ဒီကျူးလွန်မှုကို အများဆုံး တွေ့ခဲ့ရတာဖြစ်ပါတယ်။ ကျောင်းထိုင်တွေ၊ ဂိုဏ်းအုပ်တွေဟာ လက်အောက်က ဘုန်းကြီးတွေ ဒီလိုကျူးလွန်နေတာကို သိရှိပေမယ့် ဖုံးကွယ်ထားကြပြီး ကျူးလွန်တဲ့သူတွေကို သာသနာပိုင် နယ်မြေတွေ ပြောင်းရွှေ့ပေးကာ လူမသိအောင် လုပ်ခဲ့ကြတယ်လို့လည်း စုံစမ်းမှုမှာ တွေ့ခဲ့ရပါတယ်။
အတွဲပေါင်း ၁၇ တွဲပါဝင်တဲ့ တော်ဝင်ကော်မရှင်ရဲ့ အစီရင်ခံစာမှာ လိင်စော်ကားခံရတဲ့ သောင်းနဲ့ချီတဲ့ ကလေးငယ်တွေအကြောင်းကို အသေးစိတ်ဖော်ပြထားပြီး ဒါဟာ ‘ငါးခုံးမတစ်ကောင်ကြောင့် တစ်လှေလုံးပုပ်တဲ့ အနေအထားမျိုးမဟုတ်ဘဲ၊ တစ်လှေလုံး ငါးခုံးမတွေ ဖြစ်နေတယ်’ လို့ အစီရင်ခံစာမှာ ဖော်ပြထားပါတယ်။
“စော်ကားခံရတဲ့ ကလေးငယ်အရေအတွက် အတိအကျကို ကျွန်တော်တို့ ဘယ်တော့မှ သိနိုင်မှာ မဟုတ်ပါဘူး” လို့ ကော်မရှင်က ဆိုပါတယ်။
ဘာသာရေးအဖွဲ့အစည်းတွေမှာ လိင်စော်ကားခံရတယ်လို့ ထွက်ဆိုသူ ၆၀ ရာခိုင်နှုန်းကျော်ဟာ ကက်သလစ်ဘုန်းကြီးအသိုင်းအ၀ိုင်းမှာ ကျူးလွန်ခံရတယ်လို့ ဆိုပြီး အထူးသဖြင့် ၁၉၉၀ ပြည့်နှစ် မတိုင်ခင်ကာလတွေမှာ ဖြစ်ပါတယ်။
ခရစ်ယာန်ကက်သလစ်ဘာသာရဲ့ အပြစ်ကို ဘုရားကျောင်းမှာ လာရောက်ဝန်ခံ အာပတ်ဖြေတဲ့ ထုံးစံအရ ကလေးငယ်တွေအပေါ် လိင်ကျူးလွန်တဲ့ ဘုန်းကြီးတွေ အာပတ်လာဖြေရင် ကျောင်းထိုင်တွေက ဒီကိစ္စကို ရဲတပ်ဖွဲ့ထံ မဖြစ်မနေ တိုင်ကြားရမယ်ဆိုတဲ့ ဥပေဒမျိုးထုတ်ဖို့ ကော်မရှင်က အစိုးရကို တိုက်တွန်းခဲ့သလို၊ ဘုန်း
ကြီးတွေ အိမ်ထောင်မပြုရဆိုတဲ့ ပညတ်ကို ကိုယ့်ရဲ့ဆန္ဒပါမှ လိုက်နာရမယ်ဆိုတဲ့ အမိန့်ထုတ်ဖို့လည်း ကက်သလစ်အသင်းတော်ကို တိုက်တွန်းခဲ့ပါတယ်။
ဘုန်းကြီးတွေ အိမ်ထောင်မပြုရဆိုတဲ့ကိစ္စဟာ ကလေးငယ်တွေအပေါ် လိင်စော်ကားဖို့ တွန်းအားဖြစ်စေတယ်လို့ ကော်မရှင်က ဆိုပါတယ်။
၂၀၀၉ ခုနှစ် အိုင်ယာလန်မှာလုပ်တဲ့ ကလေးငယ်တွေအပေါ် လိင်ပိုင်းဆိုင်ရာ စော်ကားမှုကိစ္စ စုံစမ်းစစ်ဆေးမှုမှာလည်း ဒီလိုအကြံပြုချက်မျိုးတွေ ထွက်ခဲ့ပြီး ကလေးငယ်တွေအပေါ် လိင်ကျူးလွန်တယ်လို့ ဘုန်းကြီးတွေ အာပတ်ဖြေတာမျိုး ရှိလာရင် ကျောင်းထိုင်တွေအနေနဲ့ ရဲတပ်ဖွဲ့ကို တိုင်ကြားရမယ်ဆိုတဲ့ ဥပဒေတစ်ခုကို အိုင်ယာလန်က ၂၀၁၅ ခုနှစ်မှာ ပြဌာန်းခဲ့ပါတယ်။
အမေရိကန်က အချို့ပြည်နယ်တွေမှာလည်း ဒီလို ဥပဒေပြဌာန်းထားတာတွေ ရှိပါတယ်။
သြစတေးလျ တော်ဝင်ကော်မရှင်က ကလေးငယ်တွေကို ကာကွယ်ပေးမယ့် နိုင်ငံလုံးဆိုင်ရာ ရုံးတစ်ခု တည်ထောင်ဖို့၊ ကာကွယ်ရေးစံနှုန်းတွေ သတ်မှတ်ဖို့၊ ကလေးငယ်တွေနဲ့ပတ်သက်ပြီး အလုပ်လုပ်နေတဲ့ အဖွဲ့အစည်းအားလုံးကို စောင့်ကြည့်မှန်တမ်းတင်ဖို့လည်း အစိုးရကို တိုက်တွန်းခဲ့ပါတယ်။
သြစတေးလျဝန်ကြီးချုပ် မာလ်ကွန်မ် တန်ဘူးလ်က ဒီရလဒ်ဟာ ‘နိုင်ငံလုံးဆိုင်ရာ ဖြစ်ရပ်ဆိုးကြီး’ ဖြစ်တယ်လို့ ပြောကြားခဲ့ပြီး အစိုးရအနေနဲ့ အကြံပြုချက်တွေကို သုံးသပ်ကာ နောက်နှစ်အတွင်း အကြောင်းပြန်မယ်လို့ ပြောကြားခဲ့ပါတယ်။
ဆစ်ဒနီ ကက်သလစ် သာသနာပိုင် အန်သိုနီ ဖစ်ရှာက ‘အချို့ဘုန်းကြီးတွေ၊ ဘာသာရေး ဆရာတွေ၊ ဘုရားကျောင်းက လူဝတ်ကြောင်ဝန်ထမ်းတွေရဲ့ အပြစ်ရှိတဲ့၊ ရာဇ၀တ်မှုဖြစ်တဲ့ လုပ်ရပ်တွေအတွက် တုန်လှုပ်မိကြောင်း၊ အသင်းတော်က အချို့ခေါင်းဆောင်တွေက မှန်မှန်ကန်ကန် မဆောင်ရွက်ခဲ့တဲ့အပေါ် ရှက်မိကြောင်း’ ကြေငြာချက် ထုတ်ပြန်ပြောကြားခဲ့ပါတယ်။
၁၉၈၀ ပြည့်နှစ်ကတည်းက သြစတေးလျ ကက်သလစ်အသင်းတော်ဟာ ကျူးလွန်ခံရသူတွေကို ကန်ဒေါ်လာ ၂၁၂ သန်းလောက် နစ်နာကြေးပေးကမ်းပြီး နှုတ်ပိတ်ခဲ့တယ်လို့လည်း ကော်မရှင်က တွေ့ရှိခဲ့ရပါတယ်။
Ref: Reuters
