Tag: China

အောက်တိုဘာ ၂၃၊ ၂၀၂၁
M-Meida

-ကျောင်းသားတွေ အိမ်စာအလွန်အကျွံလုပ်ရတဲ့ အခြေအနေကို တားဆီးဟန့်တားမယ့် ဥပဒေတစ်ခုကို တရုတ်နိုင်ငံက ပြဌာန်းလိုက်ပါတယ်။

အခုနှစ်အတွင်း တရုတ်အစိုးရဟာ လူငယ်တွေကို ပိုမိုထိန်းချုပ်ဖို့ ကြိုးစားလာတာပါ။ ၁၈ နှစ်အောက်ကလေးတွေ ဂိမ်းကစားချိန်ကို ကန့်သတ်တဲ့ ဥပဒေတစ်ခုကို အတည်ပြုခဲ့သလို၊ လူငယ်တွေ အတုယူမှားစေတယ်ဆိုတဲ့ စွဲချက်နဲ့ အွန်လိုင်း၊ ရုပ်မြင်သံကြားက ထင်ပေါ်ကျော်ကြားတစ်ချို့ရဲ့ လှုပ်ရှားမှုတွေကိုလည်း ကန့်သတ်ခဲ့ပါတယ်။

အခု အိမ်စာဥပဒေကတော့ အဓိကဘာသာရပ်တွေမှာ ကျောင်းကပေးတဲ့ အိမ်စာနဲ့ အပြင်ကျူရှင်တွေ၊ ဂိုက်တွေကပေးတဲ့ အိမ်စာတွေ ထပ်တာကို တားဆီးဖို့ဖြစ်ပါတယ်။

အဲဒီလို အိမ်စာတွေ မထပ်အောင်၊ ကလေးတွေ နားချိန်နဲ့ ကိုယ်ကာယလေ့ကျင့်ခန်းအချိန်ရအောင်၊ ဖိအားတွေမရှိအောင်၊ အင်တာနက်သုံးစွဲချိန် လျော့သွားအောင် မိဘတွေက စီမံပေးရမှာဖြစ်ပြီး ဒါကို ပြည်နယ်အစိုးရက ကြီးကြပ်ရမှာ ဖြစ်ပါတယ်။ ဥပဒေအသေးစိတ်ကို ထုတ်ပြန်ခြင်း မရှိသေးပါဘူး။

တရုတ်အစိုးရ ပညာရေးဝန်ကြီးဌာနဟာ စနေ၊ တနင်္ဂနွေနဲ့ အခြားကျောင်းပိတ်ရပ်တွေမှာ ကလေးတွေ ကျူရှင်ထားတာကို တားမြစ်တဲ့ ဥပဒေတစ်ခုကိုလည်း အရင်က ပြဌာန်းထားပါတယ်။

တရုတ်လွှတ်တော်က ကလေးတွေ အကျင့်ဆိုးတာ၊ ရာဇဝတ်မှုကျူးလွန်တာတွေအတွက် မိဘတွေကို အပြစ်ပေမယ့် ဥပဒေတစ်ခု ပြဌာန်းဖို့ လုပ်နေတယ်လို့ အခုတစ်ပတ်အစောပိုင်းမှာ ထုတ်ပြန်ပါတယ်။

Ref: Reuters

အောက်တိုဘာ ၁၇၊ ၂၀၂၁
M-Media

-တရုတ်နိုင်ငံဟာ ဩဂုတ်လအတွင်း အသံထက်မြန်တဲ့ ဒုံးပျံတစ်စင်းကို စမ်းသပ်ပစ်လွှတ်ခဲ့ပြီး ဒီနည်းပညာမှာ ထင်တားတာထက် ပိုမိုရှေ့ရောက်နေတာကြောင့် အမေရိကန်က အံ့အားသင့်ခဲ့တယ်လို့ Financial Times သတင်းဌာနက ဖော်ပြပါတယ်။

ဒီဒုံးပျံဟာ ပတ်လမ်းအနိမ့်ကနေ ကမ္ဘာကိုပတ်ခဲ့ပြီး ပစ်မှတ်ရှိရာကို ပြန်ဆင်းလာခဲ့ပေမယ့် ပစ်မှတ်နဲ့ မိုင် ၂၀ အဝေးမှာ ကျသွားခဲ့တယ်လို့ ဒီကိစ္စနဲ့ နီးစပ်သူတွေက ပြောပါတယ်။

တရုတ်ဟာ အသံထက်မြန်တဲ့ ဒုံးကျည်နည်းပညာမှာ အမေရိကန်အာဏာပိုင်တွေ ထင်ထားတာထက် ပိုပြီး ရှေ့ရောက်နေကာ ဒီသတင်းအတွက် အမေရိကန် ထောက်လှမ်းရေးအသိုင်းအ၀ိုင်းက အံ့အားသင့်ခဲ့ရတယ်လို့လည်း သတင်းရင်းမြစ်တွေက ပြောပါတယ်။

အာကာသစီမံကိန်းတွေ၊ ဒုံးကျည်စီမံကိန်းတွေကို တရုတ်က ပုံမှန်ထုတ်ဖော်ပြောဆိုလေ့ရှိပေမယ့် ဩဂုတ်လက ဒီကိစ္စကို တရုတ်ဖက်က လျှို့ဝှက်ထားခဲ့တာပါ။

အမေရိကန်စစ်ဌာနချုပ် (ပင်တဂွန်) ပြောရေးဆိုခွင့်ရှိသူ ဂျွန်ကီရ်ဘီက အခုသတင်းအတွက် မှတ်ချက်မပေးခဲ့ဘဲ၊ တရုတ်ရဲ့ စစ်အင်အားဟာ ဒေသတွင်းနဲ့ ကမ္ဘာကြီးမှာ တင်းမာမှုတွေကိုသာ ပိုမိုဖြစ်စေနိုင်တဲ့အတွက် စိုးရိမ်မှုတွေရိတယ်လို့ ပြောကြားခဲ့ပါတယ်။

အသံထက်မြန်တဲ့ ဒုံးကျည်နည်းပညာကို အမေရိကန်၊ တရုတ်နဲ့ ရုရှားတို့အပါအဝင် ကမ္ဘာ့နိုင်ငံပေါင်း အနည်းဆုံး ၅ နိုင်ငံလောက်က ဖန်တီးထုတ်လုပ်နေကြတာ ဖြစ်ပါတယ်။ ဒီဒုံးပျံတွေဟာ နျူထိပ်ဖူး တပ်ဆင်လို့ရပြီး အသံထက် ၅ ဆလောက် မြန်မြန်သွားနိုင်ပါတယ်။

Ref: AFP

အောက်တိုဘာ ၁၂၊ ၂၀၂၁

M-Media

-တရုတ်နိုင်ငံမြောက်ပိုင်း ရှန်းကျီပြည်နယ်မှာ အခုလအစောပိုင်းက မိုးသည်းထန်စွာရွာသွန်းပြီး ရေကြီးရေလျှံမှုတွေ ဖြစ်ခဲ့တာကြောင့် အနည်းဆုံး လူ ၁၅ ဦး သေဆုံးခဲ့တယ်လို့ သိရပါတယ်။

ကျောက်မီးသွေးအဓိကထွက်တဲ့ ဒီဒေသဟာ ပုံမှန်အားဖြင့် ခြောက်သွေ့ဒေသဖြစ်ပေမယ့် ပြီးခဲ့တဲ့ သီတင်းပတ်အတွင်း ၃ လစာမိုး ရွာသွန်းခဲ့တာပါ။ တရုတ်နိုင်ငံမှာ ကျောက်မီးသွေးပြတ်လတ်မှုကြောင့် စွမ်းအင်ထုတ်လုပ်မှု ပြဿနာ ရှိနေပြီး အခုရေကြီးမှုက ဒီအခြေအနေကို ပိုဆိုးစေတာ ဖြစ်ပါတယ်။

အခုရေကြီးမှုကြောင့် အဆောက်အဦး ၁၉၀၀၀ လောက် ပျက်ဆီးခဲ့ပြီး အဲဒီ အထဲက ၁၈၀၀၀ လောက်ဟာ ဆိုးဆိုးရွားရွား ပျက်ဆီးခဲ့တာပါ။ သေဆုံးသူ ၁၅ ဦး ရှိသလို ပျောက်ဆုံးနေသူတွေလည်း အများအပြား ရှိနေပါတယ်။

လူဦးရေ ၁.၇ သန်းလောက် ရေကြီးရေလျှံမှုကို ခံစားခဲ့ရပြီး အိုးအိမ်စွန့်ခွာ ထွက်ပြေးရသူအရေအတွက်က ၁၂၀၀၀၀ လောက် ရှိပါတယ်။

ဇူလိုင်လအတွင်းက နိုင်ငံအလယ်ပိုင်း ဟီနန်ပြည်နယ်မှာ စံချိန် ရေကြီးမှု ဖြစ်ပွားခဲ့ပြီး လူ ၃၀၀ ကျော် သေဆုံးခဲ့ပါတယ်။

Ref : CNA