Tag: China

နိုဝင်ဘာ ၂၁၊ ၂၀၂၁
M-Media

-ထိပ်တန်း ကွန်မြူနစ်ပါတီဝင် ဒုဝန်ကြီးချုပ်ဟောင်းက အဓမ္မကျင့်တာကို ထုတ်ပြောပြီးတဲ့နောက် ပျောက်ဆုံးနေတဲ့ နာမည်ကြီး တရုတ်တင်းမယ် ဖန်ရွှေရဲ့ ဓာတ်ပုံနဲ့ ဗီဒီယိုတွေ ထွက်ပေါ်လာပါတယ်။

တရုတ်အိုးပင်း တင်းနစ်ပြိုင်ပွဲက ဦးစီးကျင်းပတဲ့ တင်းနစ်ပြိုင်ပွဲ Fila Kids Junior Tennis Challenger Finals ကို ဧည့်သည်တော်အဖြစ် တနင်္ဂနွေနေ့မနက်ပိုင်းက တက်ရောက်ခဲ့တဲ့ ဖန်ရွှေရဲ့ ပုံရိပ်တွေ ဖြစ်ပါတယ်။

ပြိုင်ပွဲကျင်းပတဲ့ အဖွဲ့အစည်းက အဖြူရောင်အင်္ကျီအပေါ်မှာ အပြာရောင်ကုတ် ထပ်ဝတ်ထားတဲ့ ဖန်ရွှေရဲ့ပုံကို သူတို့ရဲ့ WeChat ပေ့ချ်မှာ တင်ခဲ့သလို၊ တရုတ်ကွန်မြူနစ်အာဘော်သတင်းစာ Global Times ရဲ့ အယ်ဒီတာက အာဏာပိုင်တွေနဲ့ အတူတွဲရပ်ပြီး ဖန်ရွှေပြုံးနေတဲ့ ဗီဒီယိုတစ်ခုကို Twitter စာမျက်နှာမှာ လွှင့်တင်ခဲ့ပါတယ်။

ကွန်မြူနစ်ပါတီရဲ့ ထိပ်တန်းပုဂ္ဂိုလ်ဖြစ်တဲ့ ကျန်းဂေါင်လီဟာ ၂၀၁၄ ခုနှစ် ဒုတိယဝန်ကြီးချုပ်တာဝန် ထမ်းဆောင်နေစဉ် သူရဲ့အိမ်ကို ဖိတ်ကြားတဲ့အချိန်၊ အိပ်ခန်းထဲခေါ်ကာ အဓမ္မပြုကျင့်ခဲ့တယ်လို့ ဖန်ရွှေက တရုတ်ဆိုရှယ်မီဒီယာ (Weibo) မှာ နိုဝင်ဘာ ၂ ရက်နေ့က ရေးသား လွှင့်တင်ခဲ့ပါတယ်။ ဒီပို့စ်ကို တရုတ်အစိုးရက ဖြုတ်ချခဲ့ပါတယ်။

ဒီပို့စ်တင်ပြီးနောက်ပိုင်း ဖန်ရွှေဟာ လူမြင်ကွင်းကနေ ပျောက်ဆုံးသွားခဲ့တာပါ။ ကမ္ဘာ့တင်းနစ်အဖွဲ့ချုပ် WTA၊ အမေရိကန်နဲ့ ကုလသမဂ္ဂတို့က ဖန်ရွှေ လွတ်လွတ်လပ်လပ်ရှိကြောင်း ထုတ်ပြန်ပေးဖို့၊ သူမပြောကြားတဲ့ ကိစ္စအတွက် ပွင့်လင်းမြင်သာစွာ စုံစမ်းစစ်ဆေးပေးဖို့ တရုတ်အစိုးရကို တောင်းဆိုခဲ့ပါတယ်။

WTA အဖွဲ့ရဲ့ ပြောရေးဆိုခွင့်ရှိသူက တနင်္ဂနွေနေ့မှာ ထွက်ပေါ်လာတဲ့ ဖန်ရွှေရဲ့ ဒီပုံရိပ်တွေဟာ သူမ အန္တရာယ်ကင်းစွာ ရှိနေကြောင်း လုံလောက်တဲ့ အထောက်အထား မဟုတ်သလို၊ သူမနဲ့ ပတ်သက်တဲ့ စိုးရိမ်မှုတွေကိုလည်း မဖြေရှင်းပေးနိုင်ဘူးလို့ တုန့်ပြန်ပြောကြားခဲ့ပါတယ်။

Ref : BBC

နိုဝင်ဘာ ၂၀၊ ၂၀၂၁
M-Media

-ဒုတိယဝန်ကြီးချုပ်ဟောင်း ကျန်းဂေါင်လီရဲ့ လိင်ပိုင်းဆိုင်ရာ အမြတ်ထုတ်မှုကို ထုတ်ပြောတဲ့ တရုတ် နာမည်ကြီးတင်းနစ်မယ် ဖန်ရွှေ ပျောက်ဆုံးနေပြီး သူဘယ်မှာရှိလဲဆိုတာ လူသိရှင်ကြား ထုန်ပြန်ပေးဖို့ အမေရိကန်နဲ့ ကုလသမဂ္ဂတို့က ​တရုတ်အစိုးရကို တောင်းဆိုလိုက်ပါတယ်။

ကမ္ဘာ့အဆင့် တင်းနစ်ကစားသမားဟောင်း ဖန်ရွှေ လူမြင်ကွင်းကနေ ပျောက်နေတဲ့အတွက် စိုးရိမ်မိပြီး သူမ လွတ်လွတ်လပ်လပ်ရှိနေကြောင်း ခိုင်မာတဲ့ အထောက်အထား ထုတ်ပြန်ပေးဖို့ အမေရိကန်အစိုးရက လိုလားကြောင်း အိမ်ဖြူတော် ပြောရေးဆိုခွင့်ရှိသူ ဂျန်ဆာကီက​ သောကြာနေ့မှာ ထုတ်ပြန်ခဲ့ပါတယ်။

ကုလသမဂ္ဂရဲ့ ထုတ်ပြန်ချက်မှာတော့ ကျန်းဂေါင်လီနဲ့ပတ်သက်တဲ့ ဖန်ရွှေရဲ့ ပြောဆိုချက်တွေကို ပွင့်လင်းမြင်သာမှုရှိအောင် စုံစမ်းဖော်ထုတ်ပေးဖို့ တရုတ်ကွန်မြူနစ်ပါတီကို တောင်းဆိုထားပါတယ်။

ကျန်းဂေါင်လီက ဖန်ရွှေအပေါ် လိင်ပိုင်းဆိုင်ရာ အမြတ်ထုတ်မှုကိစ္စကို စုံစမ်းစစ်ဆေး ဖော်ထုတ်မပေးရင် တရုတ်နိုင်ငံနဲ့ စီးပွားရေးဆက်သွယ်မှုအားလုံး ဖျက်သိမ်းသွားမယ်လို့ ကမ္ဘာ့တင်းနစ်အဖွဲ့ချုပ်က ကြေငြာထားပါတယ်။

၂၀၁၄ ခုနှစ် သူရဲ့အိမ်ကို ဖိတ်ကြားတဲ့အချိန်မှာ ကျန်းဂေါင်လီက သူ့ကို အိပ်ခန်းထဲခေါ်ကာ အဓမ္မပြုကျင့်ခဲ့ပြီး အဲဒီအချိန်မှာ အစောင့်တွေက အိပ်ခန်းအ၀ကို စောင့်ပေးထားတယ်လို့ ဖန်ရွှေက တရုတ်ဆိုရှယ်မီဒီယာ (Weibo) မှာ နိုဝင်ဘာ ၂ ရက်နေ့က ရေးသား လွှင့်တင်ခဲ့ပါတယ်။ နောက်ပိုင်းမှာ ဒီပို့စ်ကို တရုတ်အစိုးရက ဖြုတ်ချခဲ့ပါတယ်။

တရုတ်ကွန်မြူနစ်ပါတီရဲ့ ထိပ်တန်းခေါင်းဆောင်တစ်ဦး ဒီလိုစွပ်စွဲခံရတာဟာ ဒါ ပထမဆုံးပါ။

အဲဒီနောက်ပိုင်း ဖန်ရွှေကို လူမြင်ကွင်းမှာ မတွေ့ရတော့ပါဘူး။ ပြီးခဲ့တဲ့တစ်ပတ်က သူမ အဆင်ပြေတယ်လို့ ကမ္ဘာ့ တင်းနစ်အဖွဲ့ချုပ် (WTA) ကို ဖန်ရွှေက အီးမေးလ်ပို့ခဲ့ပေမယ့် ဒီမေးလ်ကိုပို့သူဟာ သူမ ဟုတ်ရဲ့လားဆိုတာ မသေချာပါဘူး။

ဖန်ရွှေကိစ္စနဲ့ပတ်သက်ပြီး စုံစမ်းစစ်ဆေးမှုတွေ ပြုလုပ်ပေးဖို့ ကမ္ဘာ့အစိုးရတွေ၊ လူ့အခွင့်အရေးအဖွဲ့တွေ၊ နာမည်ကြီးကစားသမားတွေက တောင်းဆိုထားပါတယ်။

Ref: Reuters