Tag: China

ဩဂုတ် ၂၇၊ ၂၀၂၀
M-Media

-လေယာဉ်တင်သင်္ဘောဖျက် ဒုံးကျည်အပါအဝင် ဒုံးကျည်နှစ်စင်းကို တောင်တရုတ်ပင်လယ်မှာ တရုတ်က ပစ်ခတ်ခဲ့ပြီး လေယာဉ်မပျံသန်းရဇုန်မှာ အမေရိကန်ရဲ့ လေကြောင်းလှုပ်ရှားမှုတွေကို တုန့်ပြန်တာဖြစ်တယ်လို့ ဆိုပါတယ်။

တာလတ်ပစ် ဒုံးကျည်တွေဖြစ်တဲ့ DF-26B နဲ့ DF-21D တွေကို ဗုဒ္ဓဟူးနေ့က
ပိုင်ဆိုင်မှုအငြင်းပွားနေတဲ့ ပါရာဆဲလ်ကျွန်းနဲ့ ဟိုင်နန်ပြည်နယ် အကြားက ရေပြင်ကို ပစ်ခတ်ခဲ့တယ်လို ဟောင်ကောင်အခြေစိုက် South China Morning Post က ဒီကနေ့မှာ ဖော်ပြပါတယ်။

မိုင် ၂၈၀၀ အကွာအဝေးအထိ ပစ်ခတ်နိုင်တဲ့ DF-26B ဒုံးကျည်ဟာ ပင်လယ်ထဲက ရွေ့လျားနေတဲ့ ပစ်မှတ်တွေကို ပစ်ခတ်နိုင်စွမ်းရှိတဲ့အတွက် ‘လေယာဉ်တင်သင်္ဘောခွင်းဒုံး’ လို့ အမည်ပေးခြင်း ခံထားရပါတယ်။ တရုတ်ဟာ ဒီဒုံးကျည်ကို အခုလအစောပိုင်းမှာ တရားဝင်ထုတ်ပြခဲ့တာပါ။

အင်္ဂါနေ့ တရုတ်ရေတပ်က ကျည်အစစ်နဲ့ စစ်​ရေးလေ့ကျင့်နေစဉ် အမေရိကန်ရဲ့ U-2 ထောက်လှမ်းရေးလေယာဉ်ဟာ လေယာဉ်မပျံသန်းရဇုန်ထဲကို ဝင်ရောက်ပျံသန်းလာတယ်လို့ တရုတ်ဖက်က စွပ်စွဲထားပြီး မိမိတို့ရဲ့ စစ်ရေးလေ့ကျင်မှုကို ဆိုးဆိုးရွားရွား နှောက်ယှက်တာဖြစ်တယ်လို့ ယူကေဆိုင်ရာ တရုတ်သံအမတ် လျိုရှောင်မင်းက ပြောကြားခဲ့ပါတယ်။

အမေရိကန်က ကာကွယ်ရေးဝန်ကြီး မာ့ခ် အက်စ်ပါက တရုတ်ဟာ နိုင်ငံတကာဥပဒေတွေကို လိုက်နာမယ်ဆိုတဲ့ ကတိကဝတ်တွေကို အကြိမ်ကြိမ်ကြိုးဖောက်ပြီး ​အရှေ့တောင်အာရှမှာ အင်အားချဲ့ထွင်လာပုံရတယ်လို့ တရုတ်ရဲ့ မနေ့က ဒုံးကျည်ပစ်ခတ်မှုနဲ့ပတ်သက်ပြီး တုန့်ပြန်ပြောကြားခဲ့ပါတယ်။

တရုတ်နိုင်ငံခြားရေးဝန်ကြီးဌာနရဲ့ ပြောရေးဆိုခွင့်ရှိသူ ကျိုလီကျန်းကလည်း ထောက်လှမ်းရေးလေယာဉ် ပျံသန်းမှုဟာ ရန်စမှုတစ်ခုဖြစ်ပြီး ဒီလိုလုပ်ရပ်မျိုး ရပ်တန့်ဖို့ အမေရိကန်ကို တိုက်တွန်းကြောင်း ပြောကြားခဲ့ပါတယ်။

Ref: Aljazeera

ဩဂုတ် ၁၈၊ ၂၀၂၀
M-Media

-တရုတ်နိုင်ငံအတွက် သူလျှိုလုပ်ပေးမှုနဲ့ CIA နဲ့ FBI အရာရှိဟောင်း တရုတ်လူမျိုးတစ်ဦးကို ဖမ်းဆီးထားတယ်လို့ အမေရိကန်အစိုးရက မနေ့မှာ ထုတ်ပြန်ပါတယ်။

အသက် ၆၇ နှစ်အရွယ်ရှိပြီဖြစ်တဲ့ အလက်ဇန်းဒါး ယွတ်ချင်မာဆိုသဖြစ်ပြီး သောကြာနေ့က ဖမ်းဆီးခံခဲ့ရတာပါ။ နိုင်ငံခြားအစိုးရထံ ကာကွယ်ရေး သတင်းအချက်အလက်တွေ ပေးမှုနဲ့ တရားစွဲဆိုခံထားရပြီး ​ပြစ်မှုထင်ရှားရင် အမြင့်ဆုံး ထောင်ဒဏ် တစ်သက်တစ်ကျွန်း ကျခံရနိုင်တယ်လို့ တရားရေးဌာနက ပြောပါတယ်။

မာဟာ ၁၉၈၂ ခုနှစ်ကစတင်ကာ CIA မှာ ဝင်ရောက်အမှုထမ်းခဲ့တာဖြစ်ပြီး ၂၀၀၁ ခုနှစ် အစောပိုင်းမှာ တရုတ်ထောက်လှမ်းရေးအဖွဲ့အတွက် သူလျှိုလုပ်ပေးခဲ့တာပါ။ မာနဲ့ အခြား CIA အမှုထမ်းတစ်ယောက်တို့ဟာ တရုတ်ထောက်လှမ်းရေး တာဝန်ရှိသူတွေနဲ့ ဟောင်ကောင်မှာ တွေ့ဆုံခဲ့ပြီး အမေရိကန် ကာကွယ်ရေးဌာနနဲ့ ထိပ်တန်းလျှို့ဝှက် အချက်အလက်တွေကို ​ပေးခဲ့ကြတယ်လို့ ဒီကိစ္စကို စုံစမ်းခဲ့တဲ့ CIA အေးဂျင့်ရဲ့ မှတ်တမ်းမှာ ဖော်ပြထားပါတယ်။

၂၀၀၄ ခုနှစ်မှာ FBI ကို ပြောင်းရွှေ့အမှုထမ်းခဲ့တဲ့ မာဟာ ၂၀၁၀ ခုနှစ်အထိ သူလျှိုအလုပ်တွေ ဆက်လက်လုပ်ဆောင်ခဲ့ပါတယ်။ FBI ဟာ ၂၀၁၉ ခုနှစ် နှစ်ဆန်းပိုင်းကစတင်ပြီး အသွင်ယူစုံစမ်းထောက်လှမ်းမှုလုပ်ကာ မာရဲ့ သူလျှိုလုပ်မှုကို ဖော်ထုတ်နိုင်ခဲ့တာ ဖြစ်ပါတယ်။

အမေရိကန် အစိုးရအဖွဲ့တွေဟာ တရုတ်သူလျှိုတွေရဲ့ ခြိမ်းခြောက်မှုဒဏ်ကို ခံနေရပြီး ပြီးခဲ့တဲ့လတွေအတွင်း တရုတ်သူလျှို တစ်ချို့ကို ဖော်ထုတ်ဖမ်းဆီးနိုင်ခဲ့ပါတယ်။

Ref: Aljazeera

ဇူလိုင် ၂၅၊ ၂၀၂၀
M-Media

-တရုတ်က အမေရိကန်ကို လျှို့ဝှက်ထောက်လှမ်းရာမှာ ဟူစတန်မြို့ ကောင်စစ်ဝန်ရုံးက အဆိုးဆုံးဖြစ်နေတဲ့အတွက် ပိတ်ခိုင်းလိုက်တာဖြစ်တယ်လို့ အမေရိကန်အစိုးရ တာဝန်ရှိသူတွေက ပြောကြားလိုက်ပါတယ်။

တက္ကဆက်ပြည်နယ် ဟူစတန်က တရုတ်ကောင်စစ်ဝန်ရုံးကို လာမယ့်သောကြာနေ့ နောက်ဆုံးထား ပိတ်ပေးဖို့ အမေရိကန်က ပြီးခဲ့တဲ့ရက်ပိုင်းအတွင်း အမိန့်ပေးခဲ့ပြီး တရုတ်ကလည်း ချန်ဒူးမြို့က အမေရိကန်ကောင်စစ်ဝန်ရုံးကို ပိတ်ဖို့ အမိန့်ထုတ်ထားပါတယ်။

အမေရိကန်ရဲ့ ကိုရိုနာဗိုင်းရပ်စ်ကာကွယ်ဆေးသုတေသနတွေကို တရုတ်က ခိုးယူဖို့ ကြိုးစားနေပြီး ဟူစတန်ကောင်စစ်ဝန်ရုံးက အဓိကအခန်းကဏ္ဍကနေ ပါဝင်နေတယ်လို့ မနေ့က အမေရိကန်အစိုးရ တာဝန်ရှိသူတွေက သတင်းစာရှင်းလင်းပွဲမှာ ပြောကြားခဲ့ပါတယ်။

တက္ကဆက်ပြည်နယ်ဟာ အစိုးရက ထောက်ပံ့ပေးထားတဲ့ ဆေးဘက်ဆိုင်ရာ သုတေသနလုပ်ငန်းတွေ အဓိကအလုပ်ဆောင်တဲ့ ပြည်နယ်လည်း ဖြစ်ပါတယ်။ တရုတ်က ကိုဗစ်ကာကွယ်ဆေး သုတေသနကို ဘယ်လောက်အနေအထားအထိ ရရှိဖို့ ပစ်မှတ်ထားခဲ့လဲဆိုတာကိုတော့ ကန်အစိုးရ တာဝန်ရှိသူတွေက မပြောခဲ့ပါဘူး။

တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဝမ်၀န်ဘင်းက အမေရိကန်ရဲ့ ဒီပြောဆိုမှုတွေဟာ ရန်ညှိုးထား သွားပုပ်လေလွင့်စကားတွေဖြစ်တယ်လို့ တုန့်ပြန်ခဲ့ပါတယ်။

အမေရိကန်တရားရေးဌာန အကြီးတန်းအရာရှိတစ်ဦးကလည်း နိုင်ငံခြားကောင်စစ်ဝန်ရုံးတွေကို နိုင်ငံခြားထောက်လှမ်းရေး အခြေစိုက်နေရာအဖြစ် အသုံးပြုခွင့် အမေရိကန်က ပေးထားပေမယ့် တရုတ်ကောင်စစ်ဝန်ရုံးက​တော့ စည်းဖောက်ခဲ့တယ်လို့ ပြောကြားခဲ့ပါတယ်။

Ref: Reuters

ဇူလိုင် ၂၂၊ ၂၀၂၀
M-Media

-တက္ကဆက်ပြည်နယ် ဟူစတန်မြို့က တရုတ်ကောင်စစ်ဝန်ရုံးကို ပိတ်ပစ်ဖို့အတွက် အမေရိကန်အစိုးရက ဒီကနေ့မှာ အမိန့်ထုတ်လိုက်ပြီး ကမ္ဘာ့အင်အားကြီး နှစ်နိုင်ငံအကြား တင်းမာမှုတွေ ပိုမိုမြင့်တက်လာနိုင်တယ်လို့ သုံးသပ်မှုတွေ ရှိလာပါတယ်။

အမေရိကန်အစိုးရရဲ့ ပြောရေးဆိုခွင့်ရှိသူ မော်ဂန် အော်တာဂုစ်က အမေရိကန်ရဲ့ ဉာဏစွမ်းအားတွေ၊ ပုဂ္ဂိုလ်ရေး သတင်းအချက်အလက်တွေကို ကာကွယ်ဖို့ ဒီလိုပိတ်ခိုင်းတာဖြစ်တယ်လို့ ဒီကနေ့ထုတ်ပြန်တဲ့ ကြေငြာချက်မှာ ပြောကြးာခဲ့ပေမယ့် အသေးစိတ် မပြောခဲ့ပါဘူး။

တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဝမ်ဝန်ဘင်းက အမေရိကန်အစိုးရဟာ ကောင်စစ်ဝန်ရုံးပိတ်ဖို့ ၃ ရက် အချိန်ပေးထားပြီး ဒါဟာ လတ်တလော တရုတ်ကိုဆန့်ကျင်တဲ့ အမေရိကန်ရဲ့ မကြုံစဖူး ဆောင်ရွက်ချက်ဖြစ်တယ်လို့ တုန့်ပြန်ခဲ့ပါတယ်။ အထင်မှားအမြင်မှားနဲ့ လုပ်လိုက်တဲ့ ဒီဆောင်ရွက်ချက်ကို ရုပ်သိမ်းဖို့ ဝမ်ဝန်ဘင်းက အမေရိကန်အစိုးရကို တိုက်တွန်းခဲ့ပြီး၊ ထိထိရောက်ရောက် ပြန်လည်တုန့်ပြန်သွားမယ်လို့လည်း ဆိုပါတယ်။

ကိုရိုနာဗိုင်းရပ်စ် ကိစ္စ၊ ဟောင်ကောင်ကိစ္စ၊ ရှင်ကျန်းပြည်နယ်က ဝီဂါနဲ့ အခြားလူနည်းစုတွေကို ဖိနှိပ်မှုကိစ္စ၊ တောင်တရုတ်ပင်လယ်ကိစ္စတွေနဲ့ပတ်သက်ပြီး အမေရိကန်နဲ့ တရုတ်တို့အကြား ပြီးခဲ့တဲ့သီတင်းပတ်တွေအတွင်း တင်းမာမှုတွေ မြင့်တက်နေတာ ဖြစ်ပါတယ်။

တရုတ်ဟာ အမေရိကန်ရဲ့ ဉာဏထုတ်ကုန်တွေ၊ နည်းပညာတွေကို ခိုးယူနေတယ်လို့ အမေရိကန်အစိုးရက တစ်စိုက်မတ်မတ် စွပ်စွဲထားပြီး တရုတ်ကတော့ ဒီစွပ်စွဲချက်တွေကို ငြင်းဆိုထားပါတယ်။

Ref: Aljazeera