Tag: China

ဧပြီ ၂၀၊ ၂၀၂၀
M-Media

-Covid-19 ကပ်ရောဂါ ပြန့်နှံ့မှုနဲ့ပတ်သက်ပြီး တရုတ်ရဲ့ ကိုင်တွယ်လုပ်ဆောင်ပုံတွေပွင့်လင်းမြင်သာမှု ရှိ၊ မရှိ စစ်ဆေးဖို့အတွက် ဩစတေးလျနိုင်ငံက နိုင်ငံတကာအသိုင်းအဝိုင်းကို တိုက်တွန်းလိုက်ပြီး တရုတ်ကတော့ ဒါကို ကန့်ကွက်ခဲ့ပါတယ်။

တရုတ်ဟာ ကိုဗစ်ကူးစက်ပြန့်နှံ့မှုကိစ္စ ကမ္ဘာကို စောစောစီးစီး အသိမပေးဘဲ သတင်းထိန်ချန်ခဲ့တယ်လို့ အမေရိကန်နဲ့ မဟာမိတ်နိုင်ငံတွေက စွပ်စွဲထားတာပါ။ ဒီကိစ္စမှာ WHO က လည်း အလိုတူအလိုပါဖြစ်တယ်လို့ဆိုကာ အမေရိကန်က ရန်ပုံငွေ ဖြတ်တောက်ခဲ့ပါတယ်။

ဩစတေးလျ နိုင်ငံခြားရေးဝန်ကြီး မာရီ ပေနီက ဘေဂျင်းနဲ့ WHO တို့ရဲ့ ကပ်ရောဂါအပေါ် တုန့်ပြန့်မှုနဲ့ပတ်သက်ပြီး စုံစမ်းစစ်ဆေးမှု ပြုလုပ်ဖို့ တောင်းဆိုတယ်လို့ ပြီးခဲ့တဲ့ရက်ပိုင်းမှာ ပြောကြားခဲ့ပါတယ်။

တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဂျန်ရွှမ်က ဒီစွပ်စွဲချက်တွေဟာ ကပ်ရောဂါကို အားသွန်ခွန်စိုက် တိုက်ဖျက်ခဲ့တဲ့ တရုတ်ပြည်သူတွေရဲ့ လုပ်ဆောင်မှုတွေကို မလေးစားရာ ရောက်တယ်လို့ ပြန်လည်တုန့်ပြန်ခဲ့ပါတယ်။

“တရုတ်နိုင်ငံရဲ့ ကူးစက်ရောဂါ တားဆီးတိုက်ဖျက်ရေးလုပ်ငန်းရဲ့ ပွင့်လင်းမြင်သာမှုနဲ့ပတ်သက်ပြီး မေးခွန်းထုတ်တာဟာ တကယ့် အချက်အလက်တွေနဲ့ မကိုက်ညီပါဘူး”

တရုတ်အစိုးရက ရောဂါကူးစက်မှု၊ သေဆုံးမှုအရေအတွက်တွေ ကောက်ယူရာမှာ တစ်သတ်မတ်တည်း မရှိမှုနဲ့ ပတ်သက်ပြီး ဝေဖန်မှုတွေလည်း ရှိနေပါတယ်။

ကိုရိုနာဗိုင်းရပ်စ်ဟာ ဝူဟန်မြို့ ဓာတ်ခွဲခန်းတစ်ခုက ပေါက်ထွက်လာပြီး တရုတ်က သိလျက်နဲ့ လွှတ်ပေးခဲ့တယ်လို့ အမေရိကန်စွပ်စွဲထားပြီး ဒါကိုလည်း တရုတ်ဖက်က ငြင်းထားပါတယ်။

Ref: Starits Times

ဧပြီ ၁၉၊ ၂၀၂၀
M-Media

-ကိုရိုနာဗိုင်းရပ်စ် သိသိကြီးနဲ့ ပြန့်နှံ့စေခဲ့တဲ့ တရုတ်အနေနဲ့ နောက်ဆက်တွဲ ရလဒ်တွေကို ခံစားရမယ်လို့ အမေရိကန်သမ္မတ ဒေါ်နယ်ထရမ့်က မနေ့မှာ သတိပေးလိုက်ပါတယ်။

ဝူဟန်က ဓာတ်ခွဲခန်းတစ်ခုမှာ မွေးထားတဲ့ Covid-19 ဗိုင်းရပ်စ်ဟာ အဲဒီကနေ့ ပေါက်ထွက်ပြီး ကမ္ဘာတစ်ဝှမ်းကို ကူးတာဖြစ်ကာ တရုတ်အစိုးရက ဒါကို သိခဲ့တယ်လို့ အမေရိကန်က စွပ်စွဲထားတာပါ။ ပြန့်နှံ့မှုနဲ့ပတ်သက်ပြီး ကမ္ဘာကို တရုတ်က စောစောစီးစီး အသိမပေးခဲ့ဘူးလို့လည်း ဆိုပါတယ်။

ထရမ့်ကတော့ ဒီဗိုင်းရပ်စ်ပိုး ကမ္ဘာကိုမပြန့်ခင်ကတည်းက တရုတ်ဟာ ရပ်တန့်နိုင်ရမှာဖြစ်ပြီး ဒီလို မလုပ်ခဲ့တဲ့အတွက် အခုလို ကမ္ဘာကြီးက ခံစားနေရတာဖြစ်တယ်လို့ မနေ့က အိမ်ဖြူတော် သတင်းစာရှင်းလင်းပွဲမှာ ပြောကြားခဲ့ပါတယ်။

ဒီအတွက် နောက်ဆက်တွဲ ရလဒ်တွေကို တရုတ်က ခံစားရလားမလို့ သတင်းထောက်တွေက မေးမြန်းရာမှာ ထရမ့်က ခံစားရလိမ့်မယ်လို့ ဖြေကြားခဲ့ပါတယ်။

“သူတို့ သိသိကြီးနဲ့ လုပ်တာပါ။ ဒါက သေချာပါတယ်။ ဒါဟာ အမှားတစ်ခုလို့ ပြောရင် အဲဒီအမှားကိုက မှားနေတာပါ။ ဒါပေမယ့် သူတို့ သိသိကြီးနဲ့ လုပ်တာပါ။ နောက်ဆက်တွဲဆိုးကျိုးဆိုတာလည်း ရှိလာမှာပါ။ အမှားတစ်ခုကြောင့် ဗိုင်းရပ်စ် ပေါက်ထွက်လာတာနဲ့ တမင်ပေါက်ထွက်အောင်လုပ်တာနဲ့ လုံး၀ မတူပါဘူး”

မိမိတို့ ဝင်ရောက်ကိုင်တွယ်ဖို့ အစကတည်းက တောင်းဆိုခဲ့ပေမယ့် တရုတ်က ခွင့်မပြုခဲ့ဘဲ ဒါဟာ တစ်ခုခုမှားနေပြီဆိုတာ သိပြီး ရှက်တဲ့အတွက်ဖြစ်ကြောင်း ထရမ့်က ထည့်သွင်းပြောဆိုခဲ့ပါတယ်။

ဝူဟန်ဓာတ်ခွဲခန်းကနေ ဗိုင်းရပ်စ်ပြန့်တယ်ဆိုတဲ့ အမေရိကန်ရဲ့ စွပ်စွဲချက်ကို တရုတ်နိုင်ငံခြားရေးဝန်ကြီး ကျောက်လီကျန်းက ငြင်းပါတယ်။ ကိုရိုနာဗိုင်းရပ်စ်ကို အမေရိကန်စစ်တပ်က တရုတ်နိုင်ငံထံ ယူဆောင်လာတာ ဖြစ်နိုင်တယ်လို့ ကျောက်လီကျန်းက အရင် ပြောဆိုခဲ့ဖူးပါတယ်။

Ref: CNA

ဧပြီ ၁၃၊ ၂၀၂၀
M-Media

-Covid-19 လူလူချင်းကူးစက်မှုဟာ တရုတ်နိုင်ငံမှာ ဒီဇင်ဘာလ အလယ်ပိုင်းလောက်ကတည်းက ဖြစ်ပေါ်နေပေမယ့် တရုတ်အစိုးရက ကမ္ဘာကို နောက်ကျမှ အသိပေးတယ်လို့ အမေရိကန်သမ္မတရဲ့ ကိုရိုနာဆိုင်ရာအကြံပေး ဒေါက်တာ အန်သိုနီ ဖောင်စီက ပြောကြားလိုက်ပါတယ်။

ဝူဟန်မြို့မှာ ကူးစက်ရောဂါတစ်မျိုး ဖြစ်ပွားနေကြောင်း တရုတ်ဆိုရှယ်မီဒီယာမှာ အစောဆုံးရေးသားခဲ့တဲ့ ဆရာဝန် ၈ ဦးကို တရုတ်အစိုးရက ခေါ်ယူသတိပေးခဲ့ပြီး အဲဒီအထဲက တစ်ဦးဆိုရင် ဝါဒမဖြန့်ဘူးလို့ ခံဝန်လက်မှတ်ပါ ထိုးပေးခဲ့ရပါတယ်။ ​ဗိုင်းရပ်စ် ကူးစက်ပြန့်ပွားနေကြောင်းကိုတရုတ်က ဇန်နဝါရီလရောက်မှ ကမ္ဘာကို အသိပေးခဲ့တာ ဖြစ်ပါတယ်။

အမေရိကန်က တရုတ်အစိုးရဟာ ကူးစက်ပြန့်နှံ့မှုကို စောစောအသိမပေးဘဲ ဖုံးကွယ်ခဲ့တယ်လို့ စွပ်စွဲထားပါတယ်။

အိမ်ဖြူတော် ကိုရိုနာဗိုင်းရပ်စ် တားဆီးတိုက်ဖျက်ရေးအဖွဲ့က အဓိကအဖွဲ့ဝင် ဒေါက်တာ ဖောင်စီက ​ဗိုင်းရပ်စ်ဟာ လူလူချင်းမကူးဘဲ တိရစ္ဆာန်က​နေ လူကိုသာကူးတာဖြစ်တယ်၊ ဇန်နဝါရီလ အလယ်ပိုင်းလောက်ကမှ လူအများအပြားကို ကူးစက်သွားတာဖြစ်တယ်လို့ တရုတ်အစိုးရရဲ့ ပြောကြားချက်တွေဟာ မှန်ကန်မှုမရှိဘူးလို့ Fox News သတင်းဌာရဲ့ တနင်္ဂနွေနေ့ အစီအစဉ်တစ်ခုမှာ ပြောကြားခဲ့ပါတယ်။

“ဒီပြောဆိုချက် ၂ ခုစလုံးမှာ မမှန်ပါဘူး။ အစကတည်းက သတင်းမှန်မရတာပါ။ ဝါဒဖြန့်ထားတဲ့ သတင်းတွေကိုသာ အစကတည်းက ကျွန်တော်တို့ ကြားခဲ့ရတာပါ”

Ref: Washington Times