ဧပြီ ၂၊ ၂၀၂၀
M-Media
-ကိုရိုနာဗိုင်းရပ်စ် ကူးစက်သူ၊ ဗိုင်းရပ်စ်ကြောင့် သေဆုံးသူအရေအတွက်ကို တရုတ်အစိုးရက ထိန်ချန်ထားပြီး အမှန်တကယ် သေဆုံးသူအရေအတွက်က သန်းချီရှိနိုင်တယ်လို့ အမေရိကန်နဲ့ တရုတ်နိုင်ငံအရေး ကျွမ်းကျင်သူတွေက ပြောဆိုခဲ့ပါတယ်။
မတ်လ ၃၀ ရက် တနင်္လာနေ့အထိ တရုတ်မှာ ကူးစက်မှုအရေအတွက်ဟာ ၈၂၄၄၇ ဦးရှိပြီး သေဆုံးမှုက ၃၃၁၀ ဦး ရှိပါတယ်။
တရုတ်ကွန်မြူနစ်ပါတီကို ဆန့်ကျင်တဲ့ Epoch Times ရဲ့ အခုတစ်ပတ်မှာဖော်ပြတဲ့ ဆောင်းပါးမှာ လေ့လာဆန်းစစ်သူတွေက တရုတ်နိုင်ငံအတွင်း မိုဘိုင်းသုံးစွဲမှုနှုန်း အကြီးအကျယ် ကျဆင်းသွားတာကို ထောက်ပြခဲ့ပါတယ်။
၂၀၂၀ ခုနှစ် ဖေဖော်ဝါရီလအတွင်း နိုင်ငံတစ်ဝှမ်း မိုဘုန်းဖုန်းသုံးစွဲမှု အရေအတွက်ကို တရုတ်အစိုးရက မတ်လ ၁၉ ရက်နေ့မှာ ထုတ်ပြန်ခဲ့ပါတယ်။ သုံးစွဲသူအရေအတွက်ဟာ ၁.၅၈ ဘီလီယံရှိပြီး ၂၀၁၉ ဒီဇင်ဘာလက ထုတ်ပြန်မှုတုန်းက ၁.၆၀၁ ဘီလီယံ ရှိတာကြောင့် ၂၁ သန်းလောက် လျော့ကျသွားတာကို တွေ့ရပါတယ်။
အမေရိကန်အခြေစိုက် တရုတ်နိုင်ငံရေးရာ ကျွမ်းကျင်သူ Tang Jingyuan က နိုင်ငံအတွင်း သွားလာခွင့်ရဖို့၊ အလုပ်လုပ်ကိုင်ခွင့်ရဖို့အတွက် တရုတ်ဟာ မိုဘိုင်းဖုန်းအခြေခံတဲ့ ကျန်းမာရေးအသိအမှတ်ပြုလက်မှတ် ထုတ်ပေးမှုစနစ်ကို လုပ်ဆောင်ထားတဲ့အတွက် လူတစ်ယောက်ဟာ ဆင်းကဒ်ကို ပိတ်ဖို့ဆိုတာ မဖြစ်နိုင်ဘူးလို့ ပြောကြားခဲ့ပါတယ်။
တရုတ်ဟာ ဒီစနစ်ကို မတ်လ ၁၀ ရက်နေ့မှာ စတင်ခဲ့တာပါ။ ပြည်သူတွေဟာ အက်ပလီကေးရှင်းတစ်ခုကို ဖုန်းထဲ ထည့်သွင်းရပြီး မိမိတို့ရဲ့ ကျန်းမာရေးအချက်အလက်တွေကို ဖြည့်သွင်းတဲ့အခါ QR ကုဒ်တစ်ခုကို ရရှိပါတယ်။ ကုဒ်မှာ အနီ၊ အဝါနဲ့ အစိမ်းဆိုပြီး ၃ ရောင်ရှိကာ အစိမ်းရောင်ရမှ သွားလာနိုင်မှာ ဖြစ်ပါတယ်။
Epoch Times ရဲ့ ဆောင်းပါးမှာတော့ ကိုရိုနာဗိုင်းရပ်စ်ကြောင့် သေဆုံးသွားသူတွေရဲ့ အကောင့်တွေ ပိတ်သွားတာကြောင့် ဖုန်းသုံးသူအရေအတွက် ဒီလို သိသိသာသာ ကျဆင်းသွားလားဆိုတာ မေးခွန်းထုတ်စရာ ဖြစ်နေတယ်လို့ ရေးသားခ့ဲပါတယ်။
“လက်ရှိတော့ အချက်အလက် အသေးစိတ်ကို ဘာမှ မသိရသေးပါဘူး။ ဖုန်းသုံးသူ လျော့ကျမှုရဲ့ ၁၀ ရာခိုင်နှုန်းဟာ ကိုရိုနာဗိုင်းရပ်စ်ကြောင့် သေဆုံးသွားသူတွေသာဆိုရင် သေဆုံးသူအရေအတွက်က ၂ သန်းလောက် ရှိမှာဖြစ်ပါတယ်”
တရုတ်အစိုးရရဲ့ သတင်းအချက်အလက်နဲ့ ဆက်သွယ်ရေးဆိုင်ရာ ညွှန်ကြားရေး Han Xia က ဆဲလ်ဖုန်းသုံးစွဲသူ လျော့ကျမှုဟာ ဖေဖော်ဝါရီလအတွင်း အစိုးရရဲ့ ကန့်သတ်မှု ပေါ်လစီအရ စီးပွားရေးလုပ်ငန်းတွေ ပိတ်တာကြောင့် ဖြစ်ကြောင်း၊ ဖုန်းဆိုင်တွေ ပိတ်တဲ့အတွက် ပြည်သူတွေဟာ ဆင်းကဒ်အကောင့်အသစ်တွေ ဖွင့်လို့မရခဲ့ကြောင်း မတ်လ ၂၅ ရက်နေ့မှာ ပြောကြားခဲ့ပါတယ်။
အီတလီက ကူးစက်မှုပမာဏနဲ့ သေဆုံးမှု အချိုးအစားတွေကို နှိုင်းယှဉ်ကြည့်မယ်ဆိုရင် တရုတ်နိုင်ငံမှာ သေဆုံးမှုအရေအတွက်ဟာ ထုတ်ပြန်ထားတာထက် ပိုများနိုင်တယ်ဆိုတာကို တွေ့ရကြောင်းလည်း Epoch Times ရဲ့ ဆောင်းပါးမှာ ထည့်သွင်းဖော်ပြခဲ့ပါတယ်။
ဆောင်းပါးမှာ နောက်ထပ် ထောက်ပြမှုတစ်ခုကတော့ ဗိုင်းရပ်စ် အဓိကပြန့်နှံရာ ဝူဟန်မြို့က မီးသင်္ဂြိုဟ်စက် ၇ ခုမှာ ဇန်နဝါရီ နှောင်းပိုင်းကစပြီး နေ့စဉ် ၂၄ နာရီပတ်လုံး မီးသင်္ဂြိုဟ်တာ၊ အလောင်းနဲ့ ဆေးဝါးစွန့်ပစ်ပစ္စည်း ၅ တန်လောက်ကို မီးရှို့နိုင်တဲ့ ရွေ့လျား မီးသင်္ဂြိုဟ်စက် ၄၀ ကို ဖေဖော်ဝါရီ ၁၆ ရက်နေ့ကစပြီး ဟူဘေးပြည်နယ်က နေရာအနှံ့မှာ အသုံးပြုလာတာတွေ ဖြစ်ပါတယ်။ ဒါကို ကြည့်ခြင်းအားဖြင့် သေဆုံးသူအရေအတွက်ဟာ ထုတ်ပြန်ထားတာထက် ပိုများနိုင်တယ်ဆိုတာ တွေ့ရကြောင်း ဆောင်းပါးမှာ သုံးသပ်ထားပါတယ်။
အမေရိကန်၏ လျှို့ဝှက် အစီရင်ခံစာ
အမေရိကန် ထောက်လှမ်းရေးဌာနကနေ အိမ်ဖြူတော်ကို ပြီးခဲ့တဲ့တစ်ပတ်မှာ တင်သွင်းတဲ့ လျှို့ဝှက် အစီရင်ခံစာတစ်စောင်မှာလည်း တရုတ်ဟာ ကူးစက်မှု၊ သေဆုံးမှု ပမာဏကို ထိန်ချန်ထုတ်ပြန်တယ်လို့ ဖော်ပြထားပါတယ်။
ဒီအစီရင်ခံစာနဲ့ပတ်သက်ပြီး အမည်မဖော်လိုတဲ့ အမေရိကန်အစိုးရ တာဝန်ရှိသူ ၃ ဦးက Bloomberg သတင်းဌာနကို ထုတ်ပြောခဲ့ပါတယ်။ ဒါပေမယ့် အသေးစိတ်တော့ မဟုတ်ပါဘူး။
သမ္မတထရမ့်ကလည်း တရုတ်အစိုးရက သတင်းထိန်ချန်ထားမှုကို မနေ့က ထုတ်ပြောခဲ့ပြီး၊ ဒုတိယသမ္မတ မိုက်ပန့်စ်က COVID-19 ပြန့်နှံ့မှုကို ကမ္ဘာကြီးက ၂၀၁၉ ခုနှစ် ဒီဇင်ဘာရောက်မှ သိရပေမယ့် တရုတ်မှာ အနည်းဆုံး အဲဒီထက်အရင် တစ်လလောက်ကတည်းက ဖြစ်ပွားနေတာဖြစ်ပြီး တရုတ်က ဒါကို ထုတ်မပြောခဲ့ဘူးလို့ ဝေဖန်ခဲ့ပါတယ်။
တရုတ်အစိုးရဲ့ အာဘော်သတင်းစာ Global Times ရဲ့ အယ်ဒီတာချုပ် Hu Xijin က အမေရိကန်ထောက်လှမ်းရေးရဲ့ ကောက်ချက်ဟာ အမေရိကန်နဲ့ အနောက်နိုင်ငံတွေမှာ သေဆုံးမှု မြင့်တက်လာတာကို အာရုံလွှဲဖို့ ဖြစ်ကြောင်း၊ ဒီပြဿနာကို တုန့်ပြန်မှုအတွင်း အစိုးရဌာနမျိုးစုံ ပါဝင်ပတ်သက်ရတာကြောင့် အချက်အလက်တွေ ထိန်ချန်ထားဖို့ဆိုတာ မဖြစ်နိုင်ဘူးလို့ တရုတ်ဆိုရှယ်မီဒီယာ Weibo မှာ ရေးသားခဲ့ပါတယ်။
Ref: Bloomberg, Epoch Times
