Tag: China

ဇွန် ၄၊ ၂၀၂၀
M-Media

-ဝူဟန်မြို့မှာရှိနေတဲ့ လူ ၁၀ သန်းနီးပါးကို ကိုဗစ် ရှိ၊ မရှိ စစ်ဆေးပြီးပြီဖြစ်ပြီး ကိုဗစ်အန္တရာယ် ကင်းသွားပြီလို တရုတ်အာဏာပိုင်တွေက မနေ့မှာ ကြေငြာလိုက်ပါတယ်။

တရုတ်နိုင်ငံအလယ်ပိုင်းက ဝူဟန်မြို့ဟာ Covid-19 စတင်ရာဒေသဖြစ်ပြီး အဲဒီကနေတစ်ဆင့် ကမ္ဘာတစ်ဝှမ်းကို ပြန့်နှံ့သွားခဲ့တာပါ။ တရုတ်နိုင်ငံက ကိုဗစ်ကူးစက်သူ၊ သေဆုံးသူအရေအတွက်ရဲ့ ၈၀ ရာခိုင်နှုန်းက ဝူဟန်ကဖြစ်ပြီး ရောဂါထိန်းချုပ်နိုင်ရေးအတွက် မြို့ကို လနဲ့ချီ တံခါးပိတ်ခဲ့ပါတယ်။

အာဏာပိုင်တွေဟာ မေလ ၁၄ ရက်နေ့ကနေ ဇွန်လ ၁ ရက်နေ့အထိ မြို့မှာနေထိုင်တဲ့ လူပေါင်း ၉.၉ သန်းကို ကိုရိုနာဗိုင်းရပ် ရှိ၊ မရှိ စစ်ဆေးခဲ့တာပါ။ လူပေါင်း ၃၀၀ မှာ ကိုရိုနာဗိုင်းရပ်စ်ရှိပေမယ့် ရောဂါလက္ခဏာမပြဘဲ သူတို့နဲ့ ဆက်နွယ်နေသူ ၁၁၇၄ ဦးမှာတော့ ဗိုင်းရပ်စ် လုံး၀မရှိတာကို တွေ့ခဲ့ရပါတယ်။

ဝူဟန်မြို့မှာ လူဦးရေ ၁၁ သန်းလောက် ရှိနေပြီး အသက် ၅ နှစ်အထက်ရှိသူ အားလုံးကိုစစ်ဆေးခဲ့တာ ဖြစ်ပါတယ်။

“ဒီလိုစစ်ဆေးမှုကြောင့် ဝူဟန်ပြည်သူတွေ စိတ်အေးသွားစေရုံတင်မကဘဲ နိုင်ငံတစ်ဝှမ်းက ပြည်သူတွေရဲ့ ယုံကြည်မှုကိုလည်း မြင့်တက်လာစေပါတယ်။ ဝူဟန်မြို့ဟာ အန္တရာယ်ကင်းသွားပါပြီ” လို့ ရောဂါထိန်းချုပ်ရေးနဲ့ ကာကွယ်ရေးစင်တာက ဒုတိယညွှန်ကြားရေးမှူး ဖန်ဂျီကျန်းက ပြောကြားခဲ့ပါတယ်။

ရောဂါလက္ခဏာမပြသူတွေကြောင့် နောက်ပိုင်းမှာ အန္တရာယ်ဘယ်လောက် ရှိနိုင်လဲဆိုတာကိုတော့ သူမက ထည့်သွင်းပြောကြားခဲ့ခြင်း မရှိပါဘူး။

Ref: Aljazeera

မေ ၁၄၊ ၂၀၂၀
M-Media

-Covid-19 ကို ဖြစ်စေတဲ့ ကိုရိုနာဗိုင်းရပ်စ်ဟာ HIV ပိုးလို ကမ္ဘာပေါ်မှာ အမြဲတမ်းရှိနေမယ့် ပိုးတစ်ခု ဖြစ်လာနိုင်တယ်လို့ ကမ္ဘာ့ကျန်းမာရေးအဖွဲ့ WHO က သတိပေးလိုက်ပြီး တိုက်ဖျက်ရေးလုပ်ငန်းကို အားထုတ် လုပ်ကိုင်ကြဖို့လည်း တိုက်တွန်းလိုက်ပါတယ်။

၂၀၁၉ ခုနှစ် နှောင်းပိုင်းကစတင်ပြီး တရုတ်နိုင်ငံ ဝူဟန်မြို့ကနေ ပြန့်နှံ့လာခဲ့တဲ့ Covid-19 ရောဂါဟာ လက်ရှိမှာတော့ ကမ္ဘာတစ်ဝှမ်းက လူပေါင်း ၄.၂ သန်းကျော်ကို ကူးစက်ခဲ့ပြီး သေဆုံးသူ ၂၉၁၀၀၀ ဦး ရှိလာပြီဖြစ်ပါတယ်။ ရောဂါကူးစက်သူတွေထဲမှာ ပြန်လည်ကောင်းမွန်သူ အရေအတွက်က ၁.၅ သန်း ရှိပါတယ်။

“ဒီဗိုင်းရပ်စ်ဟာ ကျွန်တော်တို့ လူ့အဖွဲ့အစည်းမှာ အမြဲတမ်းရှိနေမယ့် ဗိုင်းရပ်စ်မျိုး ဖြစ်တယ်ဆိုတာကို လက်ခံစဉ်စားဖို့ အရေးကြီးပါတယ်။ ဒီဗိုင်းရပ်စ်ဟာ ဘယ်တော့မှ ပျောက်သွားမှာ မဟုတ်ပါဘူး” လို့ WHO ရဲ့ အရေးပေါ်အခြေအနေဆိုင်ရာ ကျွမ်းကျင်သူ မိုက်ခ် ရိုင်ယန်က ပြောကြားခဲ့ပါတယ်။

လက်ရှိမှာ Covid-19 ကာကွယ်ရေး ဖြစ်နိုင်ချေရှိတဲ့ ကာကွယ်ဆေးပါင်း ၁၀၀ ကျော်လောက် ဖော်ထုတ်ထားပြီး အချို့ဆေးတွေကို ဆေးဘက်ဆိုင်ရာ စမ်းသပ်မှုတွေ လုပ်ဆောင်နေပါတယ်။ ဒါပေမယ့် ထိရောက်တဲ့ဆေးမျိုး ရှာတွေ့ဖို့ သိပ်မလွယ်ဘူးလို့ ပညာရှင်တွေက မှတ်ချက်ပြုထားပါတယ်။

ရိုင်ယန်က ကာကွယ်ဆေးရှိပေမယ့် ကမ္ဘာပေါ်ကနေ ပျောက်မသွားတဲ့ ရောဂါတွေ အများကြီးရှိတယ်လို့ ထောက်ပြခဲ့ပြီး ကိုရိုနာဗိုင်းရပ်စ် တိုက်ဖျက်ရေးအတွက် အကြီးအကျယ် အားထုတ်ကြိုးပမ်းဖို့ လိုအပ်တယ်လို့ ဆိုပါတယ်။

ဗိုင်းရပ်စ်ပြန့်ပွားမှုကြောင့် တိုင်းပြည်တွေကို တံခါးပိတ်ထားရပြီး စီးပွားရေးဖက်မှာ အလွန်အမင်း ထိခိုက်မှုတွေ ရှိလာပါတယ်။ ဒါ့ကြေကြောင့် အမေရိကန်နဲ့ ဥရောပနိုင်ငံတွေအပါအဝင် နိုင်ငံတော်တော်များများက ကန့်သတ်မှုတွေကို ဖြေလျော့ပြီး တိုင်းပြည်ကို တံခါးပြန်ဖွင့်ဖို့ ပြင်ဆင်လာကြပါတယ်။

ရိုင်ယန်က ပြည်တွင်းမှာ လှုပ်ရှားသွားလာမှု ကန့်သတ်တာကို ဖြေလျော့ပေးတာဟာ နိုင်ငံရပ်ခြား လေကြောင်းသွားလာမှု ကန့်သတ်ချက် ဖြေလျော့တာမျိုးလို အန္တရာယ် မများဘူးလို့ ထည့်သွင်းပြောဆိုခဲ့ပါတယ်။ ကျန်းမာရေးဆိုင်ရာ ကျွမ်းကျင်သူတွေကတော့ နောက်ထပ် အကြီးအကျယ်ကူးစက်မှုတွေ မဖြစ်ပွားရအောင် သတိကြီးကြီးထားဖို့ လိုအပ်တယ်လို့ သတိပေးထားပါတယ်။

Ref: Reuters

မေ ၁၂၊ ၂၀၂၀
M-Media

-ကိုရိုနာဗိုင်းရပ်စ် ကာကွယ်ဆေးဖော်ထုတ်ရေး သုတေသန အချက်အလက်တွေကို တရုတ်ဟက်ကာတွေက ခိုးယူဖို့ ကြိုးစားခဲ့တယ်လို့ အမေရိကန်အစိုးရ ထောက်လှမ်းရေးအဖွဲ့ FBI က ယုံကြည်နေပါတယ်။

သုတေသန အချက်အလက်တွေကို တရုတ်ဟက်ကာတွေက ဖောက်ထွင်းရယူဖို့ ကြိုးစားနေတဲ့အကြောင်း ကာကွယ်ဆေးရဖို့ အပြင်းအထန် ကြိုးစားနေတဲ့ အစိုးရအေဂျင်စီတွေ၊ ပုဂ္ဂလိက လုပ်ငန်းတွေထံ တရားဝင် သတိပေးသွားဖို့ FBI က စီစဉ်နေတယ်လို့ Wall Street ဂျာနယ်နဲ့ New York Times ဂျာနယ်တွေက မနေ့မှာ ဖော်ပြခဲ့ပါတယ်။

ဗိုင်းရပ်စ်စစ်ဆေးမှုနဲ့ ကုသမှုဆိုင်ရာ အချက်အလက်တွေကို ရယူဖို့လည်း ဟက်ကာတွေက ကြိုးစားနေပါတယ်။ အမေရိကန်အစိုးရ တာဝန်ရှိသူတွေက ဒီဟက်ကာတွေဟာ တရုတ်အစိုးရနဲ့ ဆက်စပ်နေတယ်လို့ စွပ်စွဲခဲ့ပါတယ်။

တရုတ် နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ကျောက်လီကျင်းက ဒီစွပ်စွဲချက်တွေကို ငြင်းဆိုခဲ့ပြီး တရုတ်ဟာ Covid-19 ကုသရေးနဲ့ ကာကွယ်ဆေးသုတေသနမှာ ရှေ့တန်းရောက်နေကြောင်း၊ အထောက်အထားမရှိဘဲ အခုလို စွပ်စွဲပြောဆိုတာတွေဟာ စော်ကားရာရောက်ကြောင်း တုန့်ပြန်ပြောကြားခဲ့ပါတယ်။

ဒီသတင်းနဲ့ ပတ်သက်ပြီး သမ္မထရမ့်ကို သတင်းထောက်တွေက မေးမြန်းရာမှာ အတည်မပြုခဲ့ပေမယ့် တရုတ်က ဒါမျိုးလုပ်တယ်ဆိုတာ အထူးအဆန်းမဟုတ်ကြောင်း၊ တရုတ်နဲ့ပတ်သက်ပြီး မိမိတို့ သဘောမကျဘဲ အနီးကပ် စောင့်ကြည့်နေကြောင်း ဖြေကြားခဲ့ပါတယ်။

Covid-19 တိုက်ဖျက်နေတဲ့ ကျန်းမာရေးဝန်ထမ်းတွေအပေါ် ပစ်မှတ်ထားတဲ့ ဆိုက်ဘာတိုက်ခိုက်မှုတွေ မြင့်တက်လာတာကို ဗြိတိန်နဲ့ အမေရိကန်ထောက်လှမ်းရေးတွေက ပြီးခဲ့တဲ့တစ်ပတ်မှာ လူသိရှင်ကြား သတိပေးခဲ့ပါတယ်။ ဒီလိုတိုက်ခိုက်မှုတွေကို နိုင်ငံခြားတိုင်းပြည်တွေက ရာဇဝတ်အဖွဲ့တွေ စုပေါင်းလုပ်ဆောင်တာလို့ ဆိုပါတယ်။

Ref: AFP