Tag: China

ဒီဇင်ဘာ ၂၀၊ ၂၀၂၂

M-Media 

– တရုတ်နိုင်ငံ မြို့ကြီးတစ်ချို့မှာ ဖြစ်ပွားနေတဲ့ ကိုဗစ်လှိုင်းသစ်ကြောင့် မီးသင်္ဂြိုဟ်စက်တွေမှာ အလျင်မီ မသင်္ဂြိုဟ်နိုင်တဲ့အထိ သေဆုံးမှုတွေ များနေတယ်လို့ သတင်းထွက်လာပါတယ်။ 

AFP သတင်းဌာနရဲ့ စုံစမ်းမေးမြန်းမှုအရ ကိုဗစ်ပြန့်နှံ့နေတဲ့ ဘေဂျင်း၊ ချုံကျင်းနဲ့ ကွမ်ကျိုးမြို့တို့က မီးသင်္ဂြိုဟ်စက်တွေမှာ သင်္ဂြိုဟ်သူတွေဟာ ပုံမှန်ထက် ပိုမိုများနေပြီး တစ်ချို့နေရာတွေမှာ အသုဘထားဖို့ နေရာမရှိတာမျိုးတွေ ဖြစ်နေတယ်လို့ ဆိုပါတယ်။ 

တရုတ်အစိုးရကတော့ အင်္ဂါနေ့ ကိုဗစ်ကူးစက်မှု အရေအတွက်ဟာ ၅၂၄၂ ဦးရှိပြီး သေဆုံးသူ ၅ ဦးလို့ သတင်းထုတ်ပြန်ပါတယ်။ 

တရုတ်မှာ တစ်ကျော့ပြန် ကိုဗစ်ဟာ ပြီးခဲ့တဲ့လကတည်းက စတင်ခဲ့တာဖြစ်ပြီး တရုတ်အစိုးရရဲ့ တင်းကြပ်တဲ့ ကိုဗစ်စည်းမျဥ်းတွေကြောင့် ပြည်သူတွေ ဆန္ဒပြတဲ့အထိ ဖြစ်ပေါ်ခဲ့ပါတယ်။ 

ကျန်းမာရေးဆိုင်ရာ ကျွမ်းကျင်သူတွေက လာမယ့်လအနည်းငယ်အတွင်း တရုတ်လူဦးရေရဲ့ ၆၀ ရာခိုင်နှုန်း ကိုဗစ်ကူးစက်ဖို့ ရှိနေပြီး လူ ၂ သန်း သေနိုင်တဲ့အထိ ဆိုးရွားနိုင်တယ်လို့ သုံးသပ်ပါတယ်။ 

Ref: AFP

နို၀င်ဘာ ၁၄၊ ၂၀၂၂

M-Media

-G20 ထိပ်သီးအစည်းအ၀ေးအတွက် အင်ဒိုနီးရှားနိုင်ငံကို ရောက်ရှိနေတဲ့ အမေရိကန်သမ္မတ ဂျိုးဘိုင်ဒန်နဲ့  တရုတ်သမ္မတ ရှီကျင့်ဖျင်တို့ဟာ ဒီကနေ့မှာ ၃ နာရီကြာ တွေ့ဆုံ ဆွေးနွေးခဲ့ကြပါတယ်။

ထိုင်၀မ်အရေး သတိပေး 

———————

သမ္မတရှီက ထိုင်၀မ်ကိစ္စမှာ ၀ေး၀ေးနေဖို့ ဘိုင်ဒန်ကို သတိပေးခဲ့တယ်လို့ တရုတ်နိုင်ငံပိုင် မီဒီယာတွေက ဖော်ပြပါတယ်။ 

တရုတ်က ထိုင်၀မ်ဟာ သူတို့ပိုင်နက်ဖြစ်ပြီး လိုအပ်ရင် စစ်အင်အားသုံး သိမ်းယူမယ်လို့ ပြောထားတာပါ။ အမေရိကန်က ထိုင်၀မ်ရဲ့ သီးခြားရပ်တည်နေမှုကို အသိအမှတ်ပြုပြီး ကျူးကျော်သူရှိလာရင် ကာကွယ်ပေးမယ်လို့ ပြောကြားထားပါတယ်။ 

ဒီကနေ့ ဆွေးနွေးမှုမှာ ဘိုင်ဒန်က တရုတ်တစ်နိုင်ငံတည်းမူ၀ါဒကို ထောက်ခံတယ်လို့ ပြောကြားခဲ့ပါတယ်။ ထိုင်၀မ်ကိစ္စမှာ အတင်းအကြပ် လုပ်ဆောင်တာမျိုး မလုပ်ဖို့ကိုတော့ ရှီကို ဘိုင်ဒန်က သတိပေးခဲ့ပါတယ်။ 

နျူစစ်ပွဲ မဖြစ်စေရ

————–

ရုရှားက ယူကရိန်းအပေါ် ကျူးကျော်တိုက်ခိုက်မှုအကြောင်းကို ခေါင်းဆောင်နှစ်ဦး ဆွေးနွေးခဲ့ကြပြီး ဒီပြဿနာကနေ နျူကလီးယားစစ်ပွဲမဖြစ်အောင် ဆောင်ရွက်ဖို့ သဘောတူခဲ့ကြပါတယ်။ 

အပြင်းအထန်ပြိုင်မယ်

————–

ရှီနဲ့ တွေ့ဆုံမှုမှာ ပွင့်ပွင်းလင်းလင်းနဲ့ ရိုးရိုးသားသား ပြောဆိုဆွေးနွေးခဲ့တယ်လို့ ဆွေးနွေးပွဲအပြီး ပြုလုပ်တဲ့ သတင်းစာရှင်းလင်းပွဲမှာ သမ္မတဘိုင်ဒန်က ပြောပါတယ်။

တရုတ်နဲ့ ပြင်းပြင်းထန်ထန် ဆက်လက်ယှဥ်ပြိုင်သွားမှာဖြစ်ပြီး ဒီပြိုင်ဆိုင်မှုက ပဋိပက္ခအသွင်အထိ ဦးတည်သွားအောင် လုပ်ဆောင်မှာမဟုတ်ဘူးလို့ ဘိုင်ဒန်က ရှီကို ပြောကြားခဲ့ပါတယ်။

မြောက်ကိုရီးယား

—————-

မြောက်ကိုရီးယားက နျူလက်နက်စမ်းသပ်ဖို့ရှိတယ်ဆိုတဲ့သတင်း ထွက်နေတာကြောင့် နိုင်အောင်ထိန်းနိုင်မလားဆိုပြီး ဂျိုးဘိုင်ဒန်က ရှီကျင့်ဖျင်ကို မေးခဲ့ပါတယ်။ 

တရုတ်ဟာ မြောက်ကိုရီးယားကို ဟန့်တားဖို့ တာ၀န်ရှိပြီး၊ ထိန်းနိုင်မယ်လို့တော့မထင်ကြောင်း သတင်းစာရှင်းလင်းပွဲမှာ ဘိုင်ဒန်က မှတ်ချက်ပေးပါတယ်။ 

မြောက်ကိုရီးယားဖက်က နျူစမ်းသပ်မှုလုပ်လာရင် ကာကွယ်ရေးဆိုင်ရာ အစီအစဥ်တွေ ပြုလုပ်သွားမှာဖြစ်ကြောင်း ဒါဟာ တရုတ်ကို တိုက်ရိုက် ရည်ညွှန်းတာမျိုးမဟုတ်ကြောင်း ဘိုင်ဒန်က ဆိုပါတယ်။

ညှိနှိုင်းလိုစိတ်ရှိ

————–

ရှီကျင့်ဖျင်ဟာ ပွင့်ပွင်းလင်းလင်း ပြတ်ပြတ်သားသား ပြောဆိုတတ်သူဖြစ်တာကို တွေ့ရတယ်လို့ ဘိုင်ဒန်က ဆိုပါတယ်။ 

ထိပ်တိုက်တွေ့ဆုံရေးထက် ညှိနှိုင်းဆွေးနွေးရေးကို ရှီက ပိုမိုလိုလားတယ်လို့မြင်ကြောင်းလည်း ဘိုင်ဒန်က ထည့်သွင်းပြောဆိုခဲ့ပါတယ်။ 

တရုတ်နဲ့ စစ်အေးတိုက်ပွဲမျိုး ဖြစ်မယ်လို့မထင်ကြောင်း၊ တရုတ်ဟာ ထိုင်၀မ်ကို လတ်တလော ကျူးကျော်မယ့်ပုံစံမျိုး မရှိသေးကြောင်း ဘိုင်ဒန်က ပြောပါတယ်။

Ref: BBC

အောက်တိုဘာ ၇၊ ၂၀၂၂
M-Media

-တရုတ်စစ်တပ်က တိုင်းရင်းသား လူနည်းစုတွေအပေါ် ဖိနှိပ်ညှင်းပမ်းမှုမှာ ပူးပေါင်းပါ၀င်မှုအတွက် နာမည်ကျော် တရုတ်ဒရုန်းကုမ္ပဏီ DJI Technology ကို အမေရိကန် ကာကွယ်ရေး၀န်ကြီးဌာနက အမည်ပျက်စာရင်း သွင်းလိုက်ပါတယ်။

DJI ဟာ ကမ္ဘာတစ်၀ှမ်း လုံးငန်းသုံး ဒရုန်းစျေးကွက်ရဲ့ ထက်၀က်ကျော်ကျော်လောက်ကို လွှမ်းမိုးထားနိုင်တဲ့ ကုမ္ပဏီပါ။

ဗုဒ္ဓဟူးနေ့ အမေရိကန် ကာကွယ်ရေး၀န်ကြီးဌာနက ထုတ်ပြန်တဲ့ ကြေငြာချက်မှာ DJI အပါအ၀င် နည်းပညာနဲ့ စက်မှုလုပ်ငန်း စုစုပေါင်း ၁၃ ခုကို အမည်ပျက်စာရင်းထဲ ထည့်သွင်းကြောင်း ဖော်ပြထားပါတယ်။

၀ီဂါနဲ့ အခြား လူမျိုးစုငယ်တွေအပေါ် လူ့အခွင့်အရေးချိုးဖောက်မှုတွေ ကျူးလွန်နေတဲ့ တရုတ်စစ်တပ်နဲ့ အဆက်အသွယ်ရှိတဲ့အတွက်လို့ ဆိုပါတယ်။

ကန်ကာကွယ်ရေး၀န်ကြီးဌာနရဲ့ အမည်ပျက်စာရင်းမှာ ပါ၀င်တဲ့ တရုတ်လုပ်ငန်းပေါင်း ၆၀ ကျော် ရှိနေပြီး နာမည်ကြီး ဟွာ၀ေးကုမ္ပဏီလည်း ပါ၀င်ပါတယ်။

DJI နဲ့ ဆက်နွယ်နေတဲ့ လူပုဂ္ဂိုလ်တွေကို ပြီးခဲ့တဲ့နှစ်မှာ အမေရိကန် ဘဏ္ဍာရေး၀န်ကြီးဌာနက ပိတ်ဆို့မှုတွေ ပြုလုပ်ခဲ့ပါတယ်။

ကာကွယ်ရေး၀န်ကြီးဌာနက အခုလို အမည်ပျက်စာရင်းထဲ ထည့်သွင်းခဲ့တာကြောင့် အမေရိကန်သမ္မတဟာ ဒီလုပ်ငန်းတွေအပေါ် ပိတ်ဆို့အရေးယူမှုတွေ လုပ်ဆောင်နိုင်မှာ ဖြစ်ပါတယ်။

Ref: Reuters