ဒီဇင်ဘာ ၂၁၊ ၂၀၁၃
M-Media
မန်ယူအသစ် ဒဏ်ရာစာရင်း နောက်တယောက်ထပ်တိုး
– မန်ချက်စတာယူနိုက်တက်အသင်း၏ ကွင်းလယ်ကစားသမားဖြစ်သူ ရော်နီ ဖယ်လိုင်နီမှာ နောက်ကျောနှင့် လက်ကောက်ဝတ် ဒဏ်ရာကြောင့် နှစ်လခန့် အနားယူရမည်ဟု မန်ယူအသင်းက ယမန်နေ့ညတွင် ပြောကြားခဲ့သည်။ မန်ယူအသင်းတွင် တိုက်စစ်မှူး ရူနီ၊ ဗန်ပါစီ၊ ကွင်းလယ်လူ မိုက်ကယ် ကာရစ်နှင့် နာနီ စသည့်ကစားသမားများမှာလည်း ဒဏ်ရာများနှင့် ရင်ဆိုင်နေရပြီး ယခုသတင်းက နည်းပြမိုယက်စ်အတွက် ထိုးနှက်ချက် တစ်ခုလည်းဖြစ်ခဲ့သည်။
…………………………
ဆွာရက်ဇ်ကို တလ ပေါင်း ၁သန်း နီးပါးဖြင့် စာချူပ်သစ်ချူပ်
– တိုက်စစ်မှူး ဆွာရက်ဇ်အား လီဗာပူးလ်အသင်းက တစ်လလုပ်ခ ပေါင် ၁-သန်းနီးပါးပေးကာ စာချုပ်သစ်ချုပ်ဆိုလိုက်သည်ဟုသိရသည်။ ထိုစာချုပ်သစ်အရ ဆွာရက်ဇ်မှာ လာမည့် ၂၀၁၈-ခုနှစ်အထိ အသင်းတွင်ရှိနေမည်ဖြစ်ပြီး ပရီးမီးယားလိဂ် လခအမြင့်ဆုံးကစားသမားအဖြစ် မန်ယူတိုက်စစ်မှူး ရူနီ၊ မန်စီးတီးကွင်းလယ်လူ ယာယာတိုးရေးတို့နှင့်အတူ ရပ်တည်နိုင်ခဲ့ပြီဖြစ်သည်။
ပြီးခဲ့သည့် နွေရာသီတွင် အသင်းမှထွက်ခွာရန် စီစဉ်ခဲ့ဖူးသည့် ဆွာရက်ဇ်က စာချုပ်သစ်ချုပ်ဆိုရခြင်းအတွက် ၀မ်းသာမိကြောင်၊ လီဗာပူးလ်မြို့နှင့် လီဗာပူးလ်အသင်းကို နှစ်သက်ကြောင်း၊ အခက်အခဲများနှင့်ကြုံတွေ့နေရစဉ် မိမိအား အားပေးနှစ်သိမ့်ခဲ့သည့် ပရိတ်သတ်များအား ကျေးဇူးတင်ပါကြောင်း ပြောကြားခဲ့သည်။
………………………….
အသစ်စိတ်ဓါက်ကို ပြောင်းလဲပစ်ခဲ့ဟု နာပိုလီနည်းပြ ဘင်နီတက်ဇ်ပြော
– နည်းပြအဖြစ်တာဝန်ယူပြီးကတည်းက အသင်း၏ စိတ်ဓာတ်အား ပြောင်းလဲပစ်ခဲ့သည်ဟု နာပိုလီအသင်း၏ နည်းပြဖြစ်သူ ဘင်နီတက်ဇ်က ပြောကြားလိုက်သည်။ ဘင်နီတက်ဇ်မှာ နာပိုလီအသင်းသို့ ပြီးခဲ့သည့် နွေရာသီကမှ စတင်ရောက်ရှိလာခဲ့ခြင်းဖြစ်ပြီး အသင်းအား ကိုင်တွယ်သည့် ခြောက်လအတွင်းတွင် ပုံစံကောင်းများရရှိခဲ့သည်။ ယခုအချိန်တွင် စီးရီးအေ ထိပ်ဆုံး၌ ဦးဆောင်နေသည့် ဂျူဗင်တပ်စ်အသင်းနှင့် ၁၆ မှတ် ကွာဟနေသော်လည်း အသင်း၏ ရလဒ်အားကျေနပ်ကြောင်း၊ မိမိစရောက်စဉ်ကထက်စာလျှင် အသင်းမှာ အပြုသဘောဆောင်သောပြောင်းလဲမှုများ ဖြစ်ပေါ်လာခဲ့ကြောင်း ဘင်နီတက်ဇ်က သတင်းထောက်များအား ပြောကြားခဲ့သည်။
………………………..
လေ့ကျင့်ခန်းပိုမိုလုပ်ဆောင်ပြီး ကြိုးစားရန် မိုယက်စ်ပြောကြားမှု ဝဲလ်ဘက် ငြင်းဆန်
– လေ့ကျင့်ခန်းများ ပိုမိုလုပ်ဆောင်ကာ စွမ်းဆောင်ရည်တိုးတက်လာအောင် ကြိုးစားရန် လိုအပ်သည်ဟု နည်းပြမိုယက်စ်၏ ပြောကြားမှုအား မန်ချက်စတာ ယူနိုက်တက်အသင်း၏ တိုက်စစ်မှူးဖြစ်သူ ၀ဲလ်ဘတ်က ငြင်းဆန်လိုက်သည်ဟု သိရသည်။ ၀ိန်းရူနီအား နမူနာယူကာ ပွဲအကြို ပြင်ဆင်မှုများအား တိုးမြှင့်လုပ်ဆောင်ရန် ၀ဲလ်ဘတ်အား ပြီးခဲ့သည့် တစ်လခန့်က သတိပေးခဲ့သည်ဟု နည်းပြမိုယက်စ်က ယခုသီတင်း အပတ် အစောပိုင်းက ပြောကြားခဲ့ပြီးနောက် ၀ဲလ်ဘက်က ယခုကဲ့သို့ တုံ့ပြန်ပြောဆိုလိုက်ခြင်းဖြစ်ပြီး၊ မန်ယူအသင်းသို့ ရောက်ရှိလာပြီးကတည်းက လေ့ကျင့်ခန်းများကို လုပ်ဆောင်ခဲ့ကြောင်း၊ ဂိုးများများသွင်းနိုင်ရန် မျှော်လင့်နေကြောင်း ထည့်သွင်းပြောကြားခဲ့သည်။
