Tag: Ebola

သြဂုတ် ၂ ၊ ၂၀၁၄
M-Media

– အနောက်အာဖရိကနိုင်ငံများတွင် လူပေါင်း ၇၀၀ ကျော်သေဆုံးခဲ့သည့် အီဘိုလာ ဗိုင်းရပ်စ်ပိုး ပြန့်နှံ့မှုမှာ ထိန်းချုပ်၍ မရတော့ဘဲ လျင်မြန်စွာ ပြန့်နှံ့နေသည်ဟု ကမ္ဘာ့ကျန်းမာရေးအဖွဲ့ WHO မှ အကြီးအကဲ မာဂရက်ချန်က ပြောကြားလိုက်သည်။

ဂီနီနိုင်ငံမြို့တော် ကိုနာကရီတွင် ယမန်နေ့က ပြုလုပ်ခဲ့သည့် အစည်းအဝေးတွင် ချန်က ထိုကဲ့သို့ ပြောကြား လိုက်ခြင်းပြီး ထိုပြဿနာမှ ဆိုးရွားသည့် နောက်ဆက်တွဲ အကျိုးဆက်များ ဖြစ်မလာစေရန်အတွက် ကြိုးပမ်းဆောင်ရွက်ကြရန် ဂီနီ၊ လိုက်ဘေးရီးယား စီရာ လီယိုနီနှင့် အိုက်ဗရီကိုစ့်သမ္မတများကို တိုက်တွန်းခဲ့သည်။

“ကျွန်မတို့ ထိန်းချုပ်ဖို့ ကြိုးစားနေတာထက် ပိုမြန်မြန်ဖြစ်နေပါတယ်။ ဒီအခြေအနေ ဆက်လက် ဆိုးရွားနေမယ် ဆိုရင် အသက်တွေဆုံးရှုံးတာ၊ လူမှုစီးပွားရေးကို ဆိုးရွားစွာ ပျက်ဆီးစေနိုင်တာ၊ အခြား တိုင်းပြည်တွေကို ပြန့်ပွားမှုအန္တရာယ် မြင့်တက်လာတာ စတဲ့ နောက်ဆက်တွဲ အကျိုးဆက်တွေ ဖြစ်လာနိုင် ပါတယ်။ ဒီအစည်းအဝေးဟာ ဒီပြဿနာကို တုံ့ပြန်ရာမှာ အလှည့်အပြောင်းတစ်ခုဖြစ်စေရပါမယ်” ဟု ချန်က အဆိုပါ အစည်းအဝေးတွင် ပြောကြားခဲ့ပြီ ဗိုင်းရပ်စ်ပိုး ထိန်းချုပ်ကုသရေးလုပ်ငန်းငွန်းအတွက် ကန်ဒေါ်လာ သန်း ၁၀၀ ထောက်ပံ့ပေးအပ်ခဲ့သည်။

အဆိုပါ ဗိုင်းရပ်စ်ပိုး ပေါ်ပေါက်လာခဲ့သည့် လေးနှစ်တာကာလအတွင်း ယခုအခြေအနေမှာ အဆိုးရွားဆုံးဖြစ်နေပြီး ဗိုင်းရပ်စ် ပိုးကူးစက်မှု ၁၃၂၃ မှုအတွင်း ကျန်းမာရေးဝန်ထမ်း ၆၀ အပါအ၀င် ၇၂၉ ဦးသေဆုံးခဲ့ပြီဖြစ်သည်။

ယခင်အတွေ့အကြုံများရ ဗိုင်းရပ်စ်ပြန့်နှံ့မှုကို ရပ်တန့်နိုင်ပြီး လူအများအား ကူးစက်မှုအန္တရာယ် မမြင့်မားခဲ့သော်လည်း ယခုလက်ရှိတွင် အချိန်အတော်ကြာ ကျယ်ကျယ်ပြန့်ပြန့် ပြန့်နှံ့ရန် ခွင့်ပြုထားခြင်းမှာ ဆိုးရွားသည့် မိုက်မဲမှုဖြစ်သည်ဟု ချန်ကဆိုသည်။

ထို့ပြင် ပြည်သူများ၏ ရိုးရာဓလေ့ထုံးတမ်းများနှင့် ဘာသာရေး အယူဝါဒ ပြင်းပြမှုများကလည်း အဆိုပါရောဂါပိုး ပိုမိုပြန့်နှံ့စေပြီး ရောဂါပိုးအား ထိန်းချုပ်မှုတွင် သိသာသည့် အတားအဆီး ဖြစ်စေသည်ဟု ၎င်းက ထည့်သွင်းပြောကြားခဲ့သည်။

“ကြောက်ရွံ့မှု၊ နားလည်မှုလွဲများခြင်းတွေက ဒေါသအဖြစ်ပြောင်းသွားတဲ့အခါ ပြည်သူတွေရဲ့ အပြုအမူတွေက ကုသရေးလုပ်နေတဲ့အဖွဲ့တွေအတွက် လုံခြုံရေးဆိုင်ရာ ခြိမ်းခြောက်မှုတွေ ဖြစ်လာနိုင် ပါတယ်” ဟု ချန်ကဆိုသည်။

ရောဂါဖြစ်ပွားနေသူများအား သီးသန့်ခွဲထားခြင်းကို ပြည်သူများက မနှစ်မြို့ကြပဲ မိမိတို့၏ အိမ်တွင်ထား ရှိကာ ကုသလိုကြခြင်း သို့မဟုတ် ရိုးရာဆေးဆရာများနှင့် ကုသခြင်း စသည်တို့က ရောဂါ ပိုးအား ထိန်းချုပ်ရန် ကြိုးပမ်းမှုကို အတားအဆီးဖြစ်စေသည်။

ရောဂါပိုး မပြန့်နှံ့စေရန်အတွက် ဂီနီနိုင်ငံက ၎င်းတို့၏ နယ်စပ်ဝင်ပေါက်အချို့ကို ပိတ်ထား လိုက်ပြီး လေဆိပ်များ တွင်လည်း စမ်းသပ်စစ်ဆေးရေး စင်တာများ ထားရှိရန် ဆောင်ရွက်နေသည်။ ဆီရာ လီယိုနီ သမ္မတကလည်း ရောဂါဖြစ်ပွားနေသည့် ဒေသများတွင် အသွားအလာ ထိန်းချုပ်ကန့်သတ်ရန် စစ်တပ်ချထားခဲ့ပြီး ကျန်းမာရေး ၀န်ထမ်းများအား ဒေသခံပြုသူများက တိုက်ခိုက်မှုကိုလည်း ကာကွယ်ပေးရန် ဆောင်ရွက်ခဲ့သည်။

Agencies