သြဂုတ် ၃ ၊ ၂၀၁၄
M-Media
အီဘိုလာဗိုင်းရပ်စ်ပိုးရှိနေသူများကို လိုက်ဘေးရီးယားတွင် ဆေးကုသပေးရင်း အဆိုပါ ဗိုင်းရပ်စ်ပိုး ကူးစက်ခဲ့သည့် အမေရိကန်ဆရာဝန် တစ်ဦးမှာ အမေရိကန်နိုင်ငံသို့ ယမန်နေ့က ပြန်လည် ရောက် ရှိလာခဲ့သည်ဟု သိရသည်။
ဒေါက်တာ ကန့် ဘရန်တလီဆိုသူဖြစ်ပြီး အထူးကာကွယ်ရေး ပစ္စည်များတပ်ဆင်ထားသော လေယာဉ်ဖြင့် အတ္တလန်တာရှိ Dobbins လေတပ် စခန်းသို့ ရောက်ရှိလာခြင်းဖြစ်သည်။ ထို့နောက် ၎င်းအား Emory တက္ကသိုလ်ဆေးရုံသို့ ပို့ဆောင်ခဲ့ပြီး ရောဂါပြန့်နှံ့မည်ကို စိုးရိမ်ရသည့် အတွက် သီးသန့် အခန်းဖြင့် ထားရှိသည်။ ၎င်း၏အခြေအနေမှာ ဆိုးရွားသော်လည်း တည်ငြိမ်နေသည်ပြီး အမေရိကန်ရောဂါဘယ ထိန်းချုပ်ကုသရေး အဖွဲ့ CDC နှင့် ပူးပေါင်းကာ ဆေးကုသမှုများ ပြုလုပ်သွားမည်ဖြစ်သည်။
ဘရန်တလီမှာ အီဘိုလာဗိုင်းရပ်စ်ပိုး ကူးစက်ခြင်းခံရသည့် အမေရိကန် ၂ ဦးအနက် တစ်ဦးဖြစ်ပြီး အခြားတစ်ဦးဖြစ်သည့် သာသနာပြုအဖွဲ့မှာ နန်စီ ရိုက်ဘိုလ်ကိုမှာလည်း လာမည့် ရက်အနည်းငယ်အတွင်း အတ္တလန်တာသို့ ရောက်လာဖွယ်ရှိနေသည်။
အချို့သော အမေရိကန်များကမူ အီဘိုလာဗိုင်းရပ်စ်ပိုးရှိသူများကို အမေရိကန်နိုင်ငံအတွင်းသို့ အ၀င် မခံလိုကြဘဲ ရောဂါပိုးပြန့်နှံ့နေ သည့် နိုင်ငံများမှ လေကြောင်လိုင်းများကိုလည်း ရပ်တန့်စေလိုကြသည်။
သို့သ်ာလည်း အမေရိကန်နိုင်ငံတစ်ဝှမ်းရှိ ဆေးရုံများမှာ CDC ၏ ရောဂါပိုး ထိန်းချုပ်ရေး အစီအမံများကို ဆောင်ရွက်ထားသောကြောင့် လူနာကို ကောင်းစွာစောင့်ရှောက်နိုင်သည်ဟု CDC မှ ဒါရိုက်တာ တွမ် ဖရီဒ်ဒန်က ယမန်နေ့တွင် ၎င်း၏ Twitter စာမျက်နှာ၌ ဖော်ပြခဲ့သည်။
အီဘိုလာဗိုင်းရပ်စ်ပိုးကြောင့် အနောက်အာဖရိကနိုင်ငံများတွင် သေဆုံးသူ ၇၀၀ ကျော်ရှိလာခဲ့ပြီး ရောဂါပိုးမှာလည်း လျှင်မြန်စွာ ပြန့်နှံ့နေသည်။
ဆင်ဟွာ
Leave a Reply
You must be logged in to post a comment.