News @ M-Media

Tag: EPL 2019-20

  • တနင်္ဂနွေနေ့ ဘောလုံးသတင်းများ

    တနင်္ဂနွေနေ့ ဘောလုံးသတင်းများ

    မေ ၃၊ ၂၀၂၀
    M-Media

    ငယ်စဉ်က တောင်းရမ်းခဲ့ရသည်ဟု မန်ယူနောက်ခံလူဟောင်း ဝန်ခံ

    မိမိရဲ့ ငယ်ဘ၀ဟာ ကြမ်းတမ်းခဲ့ပြီး လမ်းပေါ်မှာ ပိုက်ဆံလိုက်တောင်းရတဲ့အထိ ဖြစ်ခဲ့တယ်လို့ မန်ယူအသင်းရဲ့ ပြင်သစ်နောက်ခံလူဟောင်း ပက်ထရစ် အီဗရာက ပြောကြားလိုက်ပါတယ်။

    လက်ရှိ ၃၈ နှစ်ရှိပြီဖြစ်တဲ့ အီဗရာဟာ မိုနာကို၊ မန်ယူနဲ့ ဂျူဗင်တပ်စ်တို့မှာ နှစ်ပေါင်း ၂၀ ကျော်ကြာ ကစားသမားဘ၀ကို ဖြတ်သန်းခဲ့တာပါ။ မန်ယူမှာကစားတဲ့အချိန်ဟာ အအောင်မြင်ဆုံးကာလဖြစ်ခဲ့ပြီး ပရီးမီးယားလိဂ် ၅ ကြိမ်၊ ချန်ပီယံလိဂ် ၁ ကြိမ်အပါအဝင် ဆုဖလားပေါင်း ၁၅ ခု ရရှိခဲ့ပါတယ်။ ငယ်စဉ်က ကြုံတွေ့ခဲ့ရတဲ့ အဲဒီအခက်အခဲတွေဟာ ဘ၀မှာ ကြံ့ကြံ့ခံနိုင်တဲ့ လူတစ်ယောက်ဖြစ်ဖို့ အထောက်အကူပေးခဲ့တယ်လို့လည်း သူက ဆိုပါတယ်။

    မန်ယူကို ပြောင်းဖို့ ဟယ်ရီကိန်းကို ဘာဘာတော့ဗ် တိုက်တွန်း

    စပါးအသင်းတိုက်စစ်မှူး ဟယ်ရီကိန်းအနေနဲ့ အခုနှစ်နွေရာသီမှာ မန်ယူကို ပြောင်းသင့်တယ်လို့ တိုက်စစ်မှူးဟောင်း ဘာဘာတော့ဗ် တိုက်တွန်းလိုက်ပါတယ်။

    ပရီးမီးယားလိဂ် ရွှေဖိနပ်ဆုကို ၂ ကြိမ်တိုင်တိုင် ရရှိထားတဲ့ အသက် ၂၆ နှစ်အရွယ် ဟာရီကိန်းဟာ အဓိကဆုဖလား တစ်ခုမှ မရသေးပါဘူး။ ၂၀၀၈ ခုနှစ်မှာ စပါးကနေ မန်ယူကို ပြောင်းသွားတဲ့ ဘာဘာတော့ဗ်က သူဒီလိုပြောင်းသွားတာကို လူတစ်ချို့က သဘောမကျပေမယ့် ဒီလိုအခွင့်အရေးမျိုး နှစ်ခါမရနိုင်တဲ့အတွက် မိမိလမ်းကြောင်းကို မိမိလျှောက်ခဲ့တာဖြစ်ကြောင်း၊ ဟယ်ရီကိန်းအနေနဲ့ လက်ရှိမှာ ဒီလိုအခြေအနေမျိုး ကြုံတွေ့နေရပြီး ဆုံးဖြတ်ချက် ဝေဝါးနေတာကို တွေ့ရကြောင်း ထည့်သွင်းပြောကြားခဲ့ပါတယ်။

    ပရီးမီးယားလိဂ် လက်ကျန်ပွဲများကို လာကစားရန် ပါ့သ်မြို့ ကမ်းလှမ်း

    ပရီးမီးယားလိဂ် လက်ကျန်ပွဲစဉ်တွေကို လာကစားဖို့အတွက် ဩစတေးလျနိုင်ငံ ပါ့သ်မြို့က ကမ်းလှမ်းမှုတွေ ရှိနေပါတယ်။

    Covid-19 ပြန့်နှံ့မှုကြောင့် အင်္ဂလန်မှာ ဘောလုံးပြိုင်ပွဲတွေအားလုံးကို ရပ်နားထားရတာပါ။ ပရီးမီးယားလိဂ်ပွဲ လေ့လာသုံးသပ်သူ မန်ယူနောက်ခံလူဟောင်း ဂယ်ရီနဗီးလ်က ပွဲစဉ်တွေကို နိုင်ငံရပ်ခြားမှာ ကွင်းပိတ်ကျင်းပကာ ရာသီကို အဆုံးသတ်သင့်တယ်လို့ ပြီးခဲ့တဲ့ရက်ပိုင်းမှာ တိုက်တွန်းခဲ့ပြီးနောက် ပါ့သ်မြို့ လွှတ်တော်အမတ်က သူတို့မြို့မှာ လာကစားဖို့ ဖိတ်ခေါ်ခဲ့တာပါ။ ပရီးမီးယားလိဂ် တာဝန်ရှိသူတွေက လတ်တလော တုန့်ပြန်မှု မလုပ်သေးပါဘူး။

    Ref: Goal

  • ကြာသာပတေးနေ့ ဘောလုံးသတင်းများ

    ကြာသာပတေးနေ့ ဘောလုံးသတင်းများ

    ဧပြီ ၃၀၊ ၂၀၂၀
    M-Media

    စပါးကိုပြန်လာကာ ဆုဖလားရယူချင်နေသည့် ပိုချက်တီနို

    အနာဂတ်မှာ စပါးအသင်းကို ပြန်လာချင်ပြီး အသင်းနဲ့အတူ ဆုဖလားတွေ ရယူချင်တယ်လို့ နည်းပြဟောင်း မော်ရီစီယို ပိုချက်တီနိုက ပြောကြားလိုက်ပါတယ်။

    အသင်းကို ၅ နှစ်ကြာ တာဝန်ယူခဲ့တဲ့ ပိုချက်တီနိုဟာ ရလဒ်ဆိုးရွားမှုကြောင့် ပြီးခဲ့တဲ့နှစ် နိုဝင်ဘာလမှာ ထုတ်ပယ်ခံခဲ့ရပါတယ်။ သူကိုင်တွယ်တဲ့အချိန်အတွင်း ပရီးမီးယားလိဂ် ဒုတိယနေရာကို ၂ ကြိမ်၊ တတိယနေရာကို ၁ ကြိမ် ရခဲ့ပြီး၊ ၂၀၁၈-၁၉ ချန်ပီယံလိဂ်မှာ နောက်ဆုံးဗိုလ်လုပ်ပွဲအထိ တက်ရောက်နိုင်ခဲ့ပါတယ်။ ဒါပေမယ့် ဆုဖလားတစ်လုံးမှ ရရှိခြင်းမရှိခဲ့ပါဘူး။

    ပိုချက်တီနိုက အသင်းအပေါ်မှာ သံယောဇဉ်ရှိနေဆဲဖြစ်ပြီး ထွက်ခွာပြီးတဲ့နောက် ပြန်လာဖို့သာ အိပ်မက်မက်နေတယ်လို့ ဆိုပါတယ်။

    စပိန်လာလီဂါကို ဇွန်လအလယ်ပိုင်းတွင် ပြန်စရန် စီစဉ်

    စပိန်လာလီဂါ​ ပြိုင်ပွဲကို လာမယ့် ဇွန်လအလယ်ပိုင်းလောက်မှာ ပြန်လည်စတင်ဖို့ စီစဉ်​နေတယ်လို့ သိရိပါတယ်။

    စပိန်ဟာ ကိုရိုနာဗိုင်းရပ်စ်ဒဏ်ကို အဆိုးဝါးဆုံး ခံရတဲ့ ဥရောပနိုင်ငံတွေထဲက တစ်ခုဖြစ်ပါတယ်။ ဗိုင်းရပ်စ်ကြောင့် ဘောလုံးပြိုင်ပွဲတွေကို မတ်လကတည်းက ရပ်ဆိုင်းထားခဲ့ရတာပါ။ အသင်းတွေက ဘောလုံးသမားတွေကို အိမ်မှာပဲ လေ့ကျင့်ခိုင်းထားပါတယ်။

    ဒါပေမယ့် နောက်တစ်ပတ်ကစပြီး လေ့ကျင့်ရေးကွင်းတွေမှာ လေ့ကျင်ဖို့ စပိန်ဝန်ကြီးချုပ် ပက်ဒရိုဆန်းချက်က မနေ့မှာ ခွင့်ပြုခဲ့ပါတယ်။ ဘောလုံးသမားတွေဟာ လေ့ကျင့်ရေးမဆင်းခင် အရင်ဆုံး ဗိုင်းရပ်စ် ရှိ၊ မရှိ စစ်ဆေးရမှာ ဖြစ်ပါတယ်။

    ကစားသမား ၅ ဦးအထိ ဝယ်ယူရန် မန်ယူကို တိုက်စစ်မှူးဟောင်း တိုက်တွန်း

    မန်စီးတီးနဲ့ လီဗာပူးလ်အသင်းတို့ကို လိုက်မီဖို့အတွက် မန်ယူဟာ ကစားသမား ၄ ဦးကနေ၊ ၅ ဦးအထိ ဝယ်ဖို့လိုတယ်လို့ တိုက်စစ်မှူးဟောင်း အန်ဒီကိုးလ်က ပြောကြားလိုက်ပါတယ်။

    ၂၀၁၃ ခုနှစ် ဆာအဲလက်စ်ဖာဂူဆန် အနားယူသွားပြီးနောက်ပိုင်း မန်ယူဟာ ပရီးမီးယားလိဂ်မှာ ရုန်းကန်ခဲ့ရပြီး ဒေးဗစ်မိုယက်စ်၊ ဗန်ဟားလ်နဲ့ မော်ရင်ဟိုတို့ တာဝန်ယူခဲ့ပေမယ့် အောင်မြင်မှု မရခဲ့ပါဘူး။

    အန်ဒီကိုးလ်က ပရီးမီးယားလိဂ်ချန်ပီယံဖြစ်ဖို့ လက်တစ်ကမ်းအလိုရောက်နေတဲ့ လီဗာပူးလ်အသင်း ဒီအခြေအနေကိုရောက်ဖို့ နှစ်ပေါင်း ၃၀ လောက် စောင့်လိုက်ရတာဟာ အသင်းတွေအကြား ကွာဟချက် တစ်ဖြည်းဖြည်း ကြီးမားလာလို့ဖြစ်ကြောင်း၊ မန်ယူဟာ ဒီကွာဟာချက်ကို ဖြည့်ဖို့လိုအပ်ပြီး နိုင်လိုစိတ်ရှိဖို့ လိုအပ်ကြောင်း ထည့်သွင်း ပြောဆိုခ့ဲပါတယ်။

    Ref: Goal

    mmFootballNews

  • ဗုဒ္ဓဟူးနေ့ ဘောလုံးသတင်းများ

    ဗုဒ္ဓဟူးနေ့ ဘောလုံးသတင်းများ

    ဧပြီ ၂၂၊ ၂၀၂၀
    M-Media

    ဆော်ဒီအိမ်ရှေ့မင်းသား ပရီးမီးယားလိဂ်သို့ ခြေလှမ်းမှု AI သတိပေး

    ဆော်ဒီအိမ်ရှေ့မင်းသား မိုဟာမက် ဘင်ဆလ်မန်က နယူးကာဆယ်အသင်းကို ဝယ်ယူဖို့ ကြိုးစားမှုကို ခွင့်ပြုလိုက်ရင် ပရီးမီးယားလိဂ်ဟာ အစာသွပ်မုန့်လို ဖြစ်သွားလိမ့်မယ်လို့ နိုင်ငံတကာ လူ့အခွင့်အရေးအဖွဲ့ Amnesty International က သတိပေးလိုက်ပါတယ်။ မင်းသားနဲ့အဖွဲ့ဟာ နယူးကာဆယ်အသင်းရဲ့ ရှယ်ယာ ၈၀ ရာခိုင်နှုန်းကို ဝယ်ယူဖို့ နီးစပ်နေတာဖြစ်ပါတယ်။ ဒါပေမယ့် ဆော်ဒီရဲ့ လူ့အခွင့်အရေးချိုးဖောက်မှု မှတ်တမ်းတွေကြောင့် ဒီဝယ်ယူမှုအပေါ် နိုင်ငံတကာ လူ့အခွင့်အရေးအဖွဲ့တွေက ဝေဖန်ကန့်ကွက်နေကြပါတယ်။

    အင်တာအသင်း၏ ကစားသမား ၂၃ ဦးတွင် ကိုရိုနာလက္ခဏာတွေ့ခဲ့ရဟု လူကာကူ ဖွင့်ဟ

    အင်တာမီလန်အသင်းရဲ့ လူစာရင်း ၂၅ ယောက်မှာ ၂၃ ယောက်က ပြီးခဲ့တဲ့နှစ် ဒီဇင်ဘာလောက်ကတည်းက ကိုရိုနာဗိုင်းရပ်စ် ကူးစက်နေတဲ့ လက္ခဏာတွေကို တွေ့ခဲ့ရတယ်လို့ တိုက်စစ်မှူး လူကာကူက ပြောကြားလိုက်ပါတယ်။ အီတလီဟာ ဗိုင်းရပ်စ်ကူးစက်မှုဒဏ်ကို အဆိုးဝါးဆုံး ခံစားခဲ့ရပြီး စီးရီးအေက ကစားသမားတစ်ချို့မှာလည်း ကူးစက်မှုတွေ ရှိခဲ့ပါတယ်။ အင်တာမီလန်အသင်းမှာတော့ ကူးစက်တယ်လို့ သတင်းထွက်မလာသေးပါဘူး။ ဒါပေမယ့် ဒီဇင်ဘာနဲ့ ဇန်နဝါရီလမှာ ကစားသမားအချို့ ဖျားနာတာလာတာကြောင့် ပွဲကစားချိန်အတွင်း လူစားလဲခဲ့ရတာတွေ ရှိခဲ့ပါတယ်။

    ဆေးရုံမှ သူနာပြုလစာ ၃ လစာကို တာဝန်ယူရဲ့ ဂျာမနီနောက်ခံလူ

    ဂျာမန်ဘွန်ဒစ်လီဂါက စတုဂတ်အသင်းရဲ့ နောက်ခံလူ အန်တိုနီယို ရူဒီဂါဟာ သူမွေးဖွားခဲ့တဲ့ ဘာလင်က ဆေးရုံတစ်ခုမှာ သူနာပြုအားလုံးရဲ့ လခ ၃ လစာကို ပေးချေလှူဒါန်းသွားမယ်လို့ သိရပါတယ်။ ဂျာမနီဟာ ဥရောပမှာ ကိုရိုနာဗိုင်းရပ်စ်ဒဏ်ကို ဆိုးဆိုးဝါးဝါး ခံစားနေရတဲ့ နိုင်ငံတွေထဲကတစ်ခု​ ဖြစ်ပါတယ်။ ရူဒီဂါဟာ ၁၉၉၃ ခုနှစ်က​​ ဘာလင်မြို့မှာရှိတဲ့ Charité ဆေးရုံမှာ မွေးဖွားခဲ့တာဖြစ်ပါတယ်။ ကိုရိုနာဗိုင်းရပ်စ်တိုက်ဖျက်ရေးအတွက် ကမ္ဘာ့ထိပ်တန်း ဘောလုံးကစားသမားတွေဟာ စုပေါင်းလှူဒါန်းမှုတွေ ပြုလုပ်နေပါတယ်။

    Ref: Goal

  • စနေနေ့ ဘောလုံးသတင်းများ

    စနေနေ့ ဘောလုံးသတင်းများ

    မတ် ၂၁၊ ၂၀၂၀
    M-Media

    ဥရောပဘောလုံးပြိုင်ပွဲများကို မေလလယ်တွင် ပြန်စရန် စီစဉ်

    ကိုရိုနာဗိုင်းရပ်စ် ပြန့်နှံ့မှုကြောင့် လက်ရှိရပ်ဆိုင်းထားတဲ့ ဥရောပ ဘောလုံးပြိုင်ပွဲတွေအားလုံးကို လာမယ့် မေလအလယ်ပိုင်းလောက် ပြန်စနိုင်ဖို့ မျှော်မှန်းထားတယ်လို့ စပိန်လာလီဂါ ကျင်းပရေးအဖွဲ့ ဥက္ကဌ ဂျာဗီယာတီဗက်စ်က ပြောကြားလိုက်ပါတယ်။ ယူရို ၂၀၂၀ ကို နောက်နှစ် ရွှေ့လိုက်တာကြောင့် ဥရောပနိုင်ငံတွေက ဘောလုံးပြိုင်ပွဲတွေ ဆက်လက်ကျင်းပဖို့ အချိန်ရသွားတာ ဖြစ်ပါတယ်။ တီဘက်စ်က ရပ်ဆိုင်းထားရတဲ့ အမှတ်ပေးပြိုင်ပွဲတွေ၊ ရှုံးထွက်ဖလားပြိုင်ပွဲတွေဟာ ၃၀ လောက်ရှိပြီး ပြန်လည်ကျင်းပနိုင်ရေးအတွက် ပူးပေါင်းဆောင်ရွက်သွားမယ်လို့ ဆိုပါတယ်။

    ဆွစ်ကလပ်တစ်ခုက ကစားသမားကို ၉ ဦးကို တစ်ပြိုင်တည်းထုတ်ပယ်

    • ဆွစ်ဇာလန် ဆူပါလိဂ်ကလပ် FC Sion အသင်းဟာ ကစားသမား ၉ ဦးကို မနေ့က တစ်ပြိုင်တည်း ထုတ်ပယ်လိုက်ပါတယ်။ ကိုရိုနာဗိုင်းရပ်စ် ကာလအတွင်း လခလျော့ယူဖို့ ညှိနှိုင်းမှုကို လက်မခံတဲ့အတွက် ဒီလို ထုတ်ပယ်လိုက်တာပါ။ ထုတ်ပယ်ခံရသူတွေထဲမှာ အာဆင်နယ်ကစားသမားဟောင်း အဲလက်ဆောင်းနဲ့ ဂျိုဟန် ဂျိုရူး၊ ဖူလ်ဟမ် ကွင်းလယ်ကစားသမားဟောင်း ပက်ဂျ်တင် ကာဆာမီတို့ ပါဝင်ပါတယ်။ ဆွစ်ဇာလန်အစိုးရက လူ ၁၀၀၀ ထက် ပိုမစုရဘူးလို့ အမိန့်ထုတ်ပြန်ထားတာကြောင့် ဆူပါလိဂ်ကို မတ်လ ၁ ရက်နေ့ကတည်းက ရပ်ဆိုင်းထားပါတယ်။

    ကိုရိုနာဗိုင်းရပ်စ်တိုက်ဖျက်ရေး ရိုးမားအသင်းက စက်ပစ္စည်းနှင့် ငွေများ လှူဒါန်း

    စီးရီးအေကလပ် ရိုးမားအသင်းဟာ ရောမမြို့က ဆေးရုံတစ်ခုကို အသင်းမှာရှိနေတဲ့ အရေးပေါ် အသက်ရှူစက် ၃ ခုနဲ့ ကုတင် ၈ ခုကို လှူဒါန်းခဲ့ပါတယ်။ ဒါ့အပြင် ပထမအသင်း ကစားသမားတွေနဲ့ နည်းပြတွေရဲ့ တစ်ရက်စာ လုပ်အားခ စုစုပေါင်း ယူရို ၄၆၀၀၀၀ ကိုလည်း ကိုရိုနာဗိုင်းရပ်စတိုက်ဖျက်ရေးအတွက် လှူဒါန်းခဲ့ပါတယ်။ အီတလီဟာ ဥရောပမှာ ကိုရိုနာဗိုင်းရပ်စ်ဒဏ်ကို အဆိုးဝါးဆုံး ရင်ဆိုင်နေရတဲ့ နိုင်ငံ ဖြစ်လာပါတယ်။

    Ref: BBC

    #mmFootballNews

  • ကြာသာပတေးနေ့ ဘောလုံးသတင်းများ

    ကြာသာပတေးနေ့ ဘောလုံးသတင်းများ

    မတ် ၁၉၊ ၂၀၂၀
    M-Media

    ရပ်ဆိုင်းထားသည့် အင်္ဂလိပ်ဘောလုံးပြိုင်ပွဲများကို ပြီးဆုံးသည်အထိ ကျင်းပမည်

    • ရပ်ဆိုင်းထားတဲ့ ဘောလုံးပြိုင်ပွဲတွေအားလုံး ပြန်လည်ကျင်းပနိုင်ရေး နည်းလမ်းရှာသွားမှာဖြစ်ပြီး၊ အခွင့်သာတာနဲ့ ၂၀၁၉-၂၀၂၀ ဘောလုံးရာသီပြီးဆုံးအောင် ကျင်းပသွားမယ်လို့ ​ပရီးမီးယားလိဂ် ပြိုင်ပွဲကျင်းပရေးအဖွဲ့နဲ့ အင်္ဂလိပ်ဘောလုံးအဖွဲ့ချုပ် (FA) တို့က ဒီကနေ့မှာ ကြေငြာချက်တစ်ရပ် ထုတ်ပြန်လိုက်ပါတယ်။ ကိုရိုနာဗိုင်းရပ်စ် ​ြပန်နှံ့မှုကြောင့် ပြိုင်ပွဲတွေကို လက်ရှိမှာ ဧပြီလအစောပိုင်းအထိ ရပ်ဆိုင်းထားတာပါ။ ဒီကနေ့ထုတ်ပြန်တဲ့ကြေငြာချက်မှာတော့ ဒီရပ်ဆိုင်းမှုကို ဧပြီလကုန်အထိ ထပ်တိုးနိုင်တယ်လို့ ဖော်ပြထားပါတယ်။ အခုနှစ် ဘောလုံးရာသီကို ဇွန်လ ၁ ရက်နေ့ အဆုံးသတ်ဖို့ စီစဉ်ထားတာဖြစ်ပါတယ်။ ယူရို ၂၀၂၀ ကို နောက်နှစ်ရွှေ့လိုက်တာကြောင့် ဥရောပမှာ ပြည်တွင်းပြိုင်ပွဲတွေ ပြီးဆုံးအောင်ကစားနိုင်မယ့် အနေအထားမျိုး ဖြစ်လာတာပါ။ လက်ရှိမှာ ယူကေအစိုးရဟာ အားကစားပြိုင်ပွဲတွေအပါအဝင် လူစုလူဝေးတွေမလုပ်ဖို့ တားမြစ်ထားပါတယ်။

    ဂယ်ရီနဗီးလ်ပိုင်ဆိုင်သည့် ဟိုတယ် ၂ လုံးတွင် ကျန်းမာရေးဝန်ထမ်းများ အခမဲ့နေထိုင်နိုင်မည်

    • ကိုရိုနာဗိုင်းရပ်စ် တိုက်ဖျက်ရေးလုပ်ငန်းမှာ ပါဝင်​ဆောင်ရွက်နေကြတဲ့ ကျန်းမာရေးဝန်ထမ်းတွေကို မိမိပိုင်ဆိုင်တဲ့ ဟိုတယ် ၂ ခုမှာ အခမဲ့ နေထိုင်ခွင့်ပေးသွားမယ်လို့ မန်ယူအသင်းနဲ့ အင်္ဂလန်အသင်းနောက်ခံလူဟောင်း ဂယ်ရီနဗီးလ်က ပြောကြားလိုက်ပါတယ်။ နဗီးလ်ဟာ မန်ယူကွင်းလယ်လူဟောင်း ရိုင်ယန်ဂစ်နဲ့အတူ မန်ချက်စတာမြို့မှာ ဟိုတယ် ၂ လုံး ပိုင်ဆိုင်ထားတာပါ။ လာမယ့် တနင်္ဂနွေနေ့ကစလို့ အများပြည်သူ လာရောက်တည်းခိုမှုကို ပိတ်ပင်မှာဖြစ်ပြီး ကျန်းမာရေးဝန်ကြီးဌာနနဲ့ ဆွေးနွေးမှုလုပ်ကာ ကျန်းမာရေးဝန်ထမ်းကို သောကြာနေ့က စတင်နေထိုင်ခွင့်ပြုသွားမယ်လို့ နဗီးလ်က ဆိုပါတယ်။ အလုပ်သမားတွေကို အလုပ်ထုတ်မှာမဟုတ်သလို လစာမဲ့ခွင့် ယူခိုင်းတာမျိုးလည်း လုပ်မှာမဟုတ်ဘူးလို့ သူက ထည့်သွင်းပြောဆိုခဲ့ပါတယ်။ ချယ်ဆီးအသင်းကလည်း သူတို့ပိုင်တဲ့ ဟိုတယ်ကို ကိုရိုနာတိုက်ဖျက်ရေးမှာ ပါဝင်နေတဲ့ ကျန်းမာရေးဝန်ထမ်းတွေ နေထိုင်ဖို့ စီစဉ်ပေးထားပါတယ်။

    COVID-19 တိုက်ဖျက်ရေးအတွက် အီဗရာဟီမိုဗစ် ရန်ပုံငွေမတည်

    • အေစီမီလန်အသင်းတိုက်စစ်မှူး အီဘရာဟီမိုဗစ်ဟာ ကိုရိုနာဗိုင်းရပ်စ်တိုက်ဖျက်ရေး ရန်ပုံငွေတစ်ရပ်ကို ထူထောင်လိုက်ပြီး အခြားဘောလုံးသမားတွေ ပါဝင်ကြဖို့လည်း ဆိုရှယ်မီဒီယာကနေတစ်ဆင့် တိုက်တွန်းလိုက်ပါတယ်။ စီးရီးအေပြိုင်ပွဲရှိရာ အီတလီနိုင်ငံဟာ လက်ရှိမှာ တရုတ်ပြီးတဲ့နောက် ဗိုင်းရပ်စ်ဒဏ်ကို အကြီးအကျယ် ခံစားနေရတဲ့နိုင်ငံ ဖြစ်လာပါတယ်။ မိုဗစ်က ဗိုင်းရပ်စ်တိုက်ဖျက်ရေးလုပ်ငန်းအတွက် ယူရို တစ်သိန်းလောက် မတည်လှူဒါန်းထားပြီးဖြစ်ပါတယ်။ သူ့ရဲ့ လှူဒါန်းမှုမှာ ပါဝင်ကြဖို့ Twitter မှာ ပို့စ်လွှင့်တင်ပြီးနောက်ပိုင်း သိပ်မကြာခင်မှာပဲ ရန်ပုံငွေ ယူရို တစ်သိန်းကျော်လောက် ကောက်ခံရရှိခဲ့ပါတယ်။

    Ref: BBC