ဖေဖော်ဝါရီ ၁၉၊ ၂၀၂၀
M-Media

ပေါ့ဘာအတွက် မန်ယူက ပြောင်းရွှေ့ကြေး ပေါင် သန်း ၁၅၀ လိုချင်နေ

• အခုနှစ်နွေရာသီမှာ အသင်းကနေ ထွက်ခွာဖို့ရှိတဲ့ ကွင်းလယ်လူ ပေါ့ဘာအတွက် မန်ယူအသင်းက ပြောင်းရွှေ့ကြေး ပေါင် သန်း ၁၅၀ လောက် လိုချင်နေတယ်လို့ သတင်းထွက်လာပါတယ်။ ပေါ့ဘာဟာ မန်ယူမှာ နောက်ထပ် စာချုပ်တစ်နှစ်သာ ကျန်တော့ပြီး ရီးယဲလ်မက်ဒရစ်က ပေါင် သန်း ၅၀ နဲ့ခေါ်ယူချင်နေတာပါ။ အပြောင်းအရွှေ့ကိစ္စအတွက် ပေါ့ဘာအေးဂျင့် ရိုင်အိုလာက မန်ယူနည်းပြ ဆိုးလ်ရှားနဲ့ တွေ့ဆုံချင်နေပြီး ပေါ့ဘာရဲ့ညီဖြစ်သူ မာသီယက်စ်ကလည်း သူ့အကိုဟာ ချန်ပီယံလိဂ်ကစားရဖို့နဲ့ ဖလားတွေရဖို့အတွက် မန်ယူကနေ ထွက်ချင်နေတယ်ဆိုတာ လူတိုင်းသိတယ်လို့ ပြောကြားထားပါတယ်။

လူကျွံဘောဥပဒေပြင်ရန် အာဆင်ဝင်းဂါးအကြံပြု

ဘောလုံးကစားနည်းမှာ VAR ဒိုင်လူကြီး ရှိလာတဲ့အတွက် လူကျွံဘောစည်းကမ်းကို အနည်းငယ် လျော့ပေါ့ပေးသင့်တယ်လို့ ဖီဖာရဲ့ ကမ္ဘာလုံးဆိုင်ရာ ဘောလုံးအားကစားနည်းတိုးတက်ရေးအကြီးအကဲ အာဆင်နယ်နည်းပြဟောင်း အာဆင်ဝင်းဂါးက ပြောကြားလိုက်ပါတယ်။ လက်ရှိစည်းမျဉ်းအရ ခန္ဓာကိုယ်က ဂိုးသွင်းနိုင်တဲ့ ဘယ်လိုအစိတ်အပိုင်းမျိုးမဆို နောက်ဆုံးနောက်ခံလူရဲ့အရှေ့ကို ထွက်နေရင် လူကျွံတယ်လို့ သတ်မှတ်တာပါ။ ဝင်းဂါးက ‌ဒါဟာ နှာခေါင်းအစိတ်အပိုင်းလေး ထွက်နေရင်တောင် လူကျွံဘောအဖြစ် သတ်မှတ်ခံရမယ့်အနေအထားမျိုး ဖြစ်နေတယ်လို့ ထောက်ပြခဲ့ပါတယ်။ ဝင်းဂါးဟာ ဘောလုံးဥပဒေတွေကို သတ်မှတ်ပြဌာန်းနေတဲ့ နိုင်ငံတကာ ဘောလုံးအဖွဲ့ချုပ်များ ဘုတ်အဖွဲ့ (ifab) မှာလည်း နေရာတစ်နေရာ ရရှိထားပါတယ်။

ပြင်သစ်ဘောလုံးပွဲတစ်ခုတွင် ငယ်ပါကို ကိုက်မှုဖြစ်

ပြိုင်ဘက်ကစားသမားရဲ့ ငယ်ပါကို ကိုက်ခဲ့တဲ့ ဘောလုံးသမားတစ်ဦးကို ပြင်သစ်ဘောလုံးအဖွဲ့ချုပ်က ၅ နှစ် ပွဲပယ်ပြစ်ဒဏ်ချမှတ်လိုက်ပါတယ်။ နိုင်ငံအရှေ့မြောက်ပိုင်း လူဇင်ဘတ်နဲ့ကပ်နေတဲ့ နယ်စပ်က အပျော်တမ်းဘောလုံးပြိုင်ပွဲတစ်ခုမှာ ဒီအဖြစ်အပျက် ဖြစ်ပွားခဲ့တာပါ။ SC Terville အသင်းနဲ့ AS Soetrich အသင်းတို့က ကစားသမား ၂ ဦးဟာ ပွဲချိန်အတွင်း စကားများရာကနေ ပွဲအပြီး အဝတ်လဲခန်းနဲ့ ကားပါကင်မှာပါမှာ ထိုးကြိတ်မှုဖြစ်ခဲ့တာ ဖြစ်ပါတယ်။ Terville ကစားသမားတစ်ဦးက ဒီရန်ပွဲကို ဖြန်ဖြေရာမှာ Soetrich ကစားသမားက ငယ်ပါကို ကိုက်လိုက်တာ ဖြစ်ပါတယ်။ ကျူးလွန်သူဟာ ၅ နှစ်ပွဲပယ်ပြစ်ဒဏ်အပြင် ယူရို ၂၀၀ ဒဏ်ငွေပါ ပေးဆောင်ခဲ့ရပါတယ်။

Ref: BBC

ဖေဖော်ဝါရီ ၁၈၊ ၂၀၂၀
M-Media

လူမျိုးရေးခွဲခြားခံရလျှင် ကွင်းအတွင်းမှ ထွက်သွားနိုင်တော့မည်

လူမျိုးရေးခွဲခြားခံရမှုကြောင့် ပွဲဆက်မကစားပဲ ထွက်သွားတဲ့ ကစာသမားတွေကို အားပေးထောက်ခံသွားမယ်လို့ ကမ္ဘာ့ ဘောလုံးကစားသမားများ သမဂ္ဂ FIFPRO က မနေ့မှာ ပြောကြားလိုက်ပါတယ်။ တနင်္ဂနွေနေ့က ပေါ်တူဂီအမှတ်ပေးဖလားပြိုင်ပွဲ ပေါ်တိုနဲ့ ဗစ်တိုးရီးယား ဂီမာရက်ဇ်တို့ ပွဲစဉ်မှာ ပေါ်တိုအသင်းရဲ့ မာလီတိုက်စစ်မှူး မူဆာမာရီဂါဟာ ပြိုင်ဘက်ပရိတ်သတ်တွေရဲ့ တစ်ပွဲလုံးနီးပါး လူမျိုးရေးခွဲခြား စော်ကားခံရတာကြောင့် ပွဲဆက်မကစားဘဲ ထွက်သွားခဲ့ပါတယ်။ FIFPRO ဟာ အရင်က ပွဲဆက်မကစားဘဲ ထွက်သွားတဲ့ ကစားသမား တစ်ဦးချင်းစီကို ထောက်ခံအားပေးလေ့ရှိပေမယ့် အခုတစ်ကြိမ်ကတော့ ဒီလိုဖြစ်စဉ်နဲ့ပတ်သက်ပြီး ပထမဆုံး ခြုံငုံကြေငြာမှု ဖြစ်ပါတယ်။ ဒီလို ခွဲခြားဆက်ဆံမှုမျိုးခံရတဲ့ ကစားသမားတွေအတွက် စိုးရိမ်မိပြီး လူမျိုးရေးခွဲခြားမှုအတွက် အသင်းကို ဒဏ်တပ်တာ၊ ကစားကွင်းပိတ်တာ စတဲ့ ပြစ်ဒဏ်တွေလို လက်ရှိ အပြစ်ပေးအရေးယူမှုတွေကလည်း အလုပ်မဖြစ်ဘူးလို့ FIFPRO က ထုတ်ပြန်ခဲ့ပါတယ်။

ပရိတ်သတ်များ၏ နှလုံးသား ဖျက်ဆီးခံခဲ့ရသည်ဟု ချယ်ဆီးနည်းပြ ဖွင့်ဟ

အိမ်ကွင်းမှာ မန်ယူကို ၂ ဂိုး ဂိုးမရှိနဲ့ ရှုံးနိမ့်ခဲ့တဲ့ ဒီကနေ့မနက်ပွဲမှာ VAR ဒိုင် ခရစ်ကာဗာနက် ရဲ့ဆုံးဖြတ်ချက်ဟာ မှန်ကန်မှုမရှိဘဲ ပရိတ်သတ်တွေရဲ့ နှလုံးသားကို နင်းချေဖျက်ဆီးလိုက်တယ်လို့ ချယ်ဆီးနည်းပြ လမ်းပတ်က ဝေဖန် ပြောကြားလိုက်ပါတယ်။ ချယ်ဆီးအသင်းရဲ့ ဂိုး ၂ ဂိုးကို VAR ဒိုင်က ပယ်ချခဲ့ပါတယ်။ ပရီးမီးယားလိဂ်မှာ ဂိုး ၂ ဂိုးရပြီး ၂ ဂိုးစလုံးကို VAR အဆုံးအဖြတ်နဲ့ ပယ်ချခံရတာဟာ ချယ်ဆီးက ဒုတိယမြောက်အသင်းဖြစ်ပြီး ပြီးခဲ့တဲ့ဒီဇင်ဘာတုန်းက ဘရိုက်တန်အသင်းဟာ ဒီလိုအခြေအနေမျိုး ပထမဆုံး ကြုံတွေ့ခဲ့ရပါတယ်။

အသင်းဒဏ်ရာအခြေအနေ ဒီထက်ပို မဆိုးနိုင်တော့ဟု မော်ရင်ဟိုပြော

ဒဏ်ရာရနေတဲ့ တိုက်စစ်မှူး ဆွန်ဟွေမင်းကို ရာသီကုန်အထိ မမျှော်လင့်တော့ဘဲ အသင်းရဲ့ ဒဏ်ရာရကစားသမားအခြေအနေက ထပ်ပြီး မဆိုးနိုင်တော့ဘူးလို့ စပါးအသင်းနည်းပြ ‌မော်ရင်ဟိုက ပြောကြားလိုက်ပါတယ်။ ဆွန်ဟွေမင်းဟာ တနင်္ဂနွေနေ့က အက်စတွန်ဗီလာကို အနိုင်ရမယ့်ပွဲမှာ လက်အရိုးအက်ဒဏ်ရာ ရရှိခဲ့ပြီး ခွဲစိပ်ကုသရမှာ ဖြစ်ပါတယ်။ တိုက်စစ်မှူး ဟယ်ရီကိန်းဟာ ဇန်နဝါရီကပွဲမှာ ဒူးအရွတ် စုတ်ပြဲဒဏ်ရာကြောင့် အနားယူနေရတာပါ။ မော်ရင်ဟိုက အရန်ခုံမှာ တိုက်စစ်မှူးမရှိမှာကို စိတ်ပူခဲ့ပေမယ့်၊ ကွင်းအတွင်းမှာ တိုက်စစ်မှူးမရှိတဲ့အခြေအနေ ဖြစ်လာကြောင်း၊ ပရိတ်သတ်တွေအနေနဲ့ အသင်းအောင်နိုင်ရေး ကူညီဖို့ တောင်းဆိုကြောင်း ထည့်သွင်းပြောဆိုခဲ့ပါတယ်။

Ref: BBC

ဖေဖော်ဝါရီ ၁၂၊ ၂၀၂၀
M-Media

စပါးနည်းပြဟောင်း ပိုချက်တီနို ပရီးမီးယားလိဂ် ပြန်လာချင်နေ

ဘောလုံးလောထဲ ပြန်လာဖို့အတွက် ဆန္ဒပြင်းပြနေပြီး အထူးသဖြင့် ပရီးမီးလိဂ်အသင်း တစ်ခုခုကို နည်းပြချင်တယ်လို့ စပါးနည်းပြဟောင်း မော်ရီစီယို ပိုချက်တီနိုက ပြောကြားလိုက်ပါတယ်။ စပါးကို ပရီးမီးယားလိဂ် ထိပ်သီး ၄ သင်းစာရင်းမှာ အဆက်မပြတ် ပါဝင်နိုင်အောင် လုပ်ဆောင်ကာ ချန်ပီယံလိဂ် ဗိုလ်လုပွဲအထိ ပို့ဆောင်ပေးနိုင်ခဲ့တဲ့ ပိုချက်တီနိုဟာ အခုနှစ် ဘောလုံးရာသီမှာ ရလဒ်ကောင်းရအောင် မစွမ်းဆောင်နိုင်တာကြောင့် ပြီးခဲ့တဲ့နိုဝင်ဘာလမှာ ထုတ်ပယ်ခံလိုက်ရတာပါ။ ပရီးမီးယားလိဂ်ကို ပြန်လာဖို့ဆိုတာ ခက်ခဲပေမယ့်၊ ဘောလုံးမှာ ဘာမဆိုဖြစ်နိုင်တာကြောင့် အဆင်သင့်ဖြစ်အောင် ပြင်ဆင်ထားတယ်လို့လည်း ပိုချက်တီနိုက ဆိုပါတယ်။

ဘာကာတောင်ပံကစားသမား ဒမ်ဘီလီ ၆ လ နားရမည်

ဘာစီလိုနာအသင်းရဲ့ တောင်ပံကစားသမား အသက် ၂၂ နှစ်အရွယ် အူစမာနီ ဒမ်ဘီလီဟာ ပြင်းထန်တဲ့ ဒူးအရွတ် စုတ်ပြဲဒဏ်ရာကြောင့် ၆ လ အနားယူရတော့မှာ ဖြစ်ပါတယ်။ ၂၀၁၇ ခုနှစ် ဒေါ့မွန်အသင်းကနေ ပြောင်းလာပြီးတဲ့နောက် ဒမ်ဘီလီဟာ ဒဏ်ရာပြဿနာတွေနဲ့ ရုန်းကန်နေရပြီး အခုရာသီမှာ ပွဲချိန်ပြည့် ၃ ပွဲသာ ကစားထားရပါတယ်။ ပြီးခဲ့တဲ့တစ်ပတ်ကလည်း ပေါင်ဒဏ်ရာကြောင့် လေ့ကျင်ရေးအစီအစဉ်ကနေ နှုတ်ထွက်ခဲ့ရပါတယ်။

ဂျာမန်ကလပ်အသင်းတစ်ခု လူမျိုးရေးခွဲခြားမှုတိုက်ဖျက်ရေးအတွက် ရန်ပုံငွေပေးမည်

ဂျာမန်ဖလား ဟာသာဘာလင်နဲ့ ကစားတဲ့ပွဲမှာ ပြိုင်ဘက်ကစားသမားအပေါ် ပရိတ်သတ်တွေက လူမျိုးရေးခွဲခြားမှုကြောင့် ဒဏ်တပ်ခံရတဲ့ ငွေ‌ကြေး တစ်စိတ်တစ်ပိုင်းကို လူမျိုးရေးခွဲခြားမှုတိုက်ဖျက်ရေး အခမ်းအနားတစ်ခုအတွက် အသုံးပြုဖို့ ဂျာမန်ကလပ် ရှော်ကေးအသင်းက စီစဉ်နေပါတယ်။ ဂျာမန်ဘောလုံးအဖွဲ့ချုက်က ရှောလ်ကေးကို ယူရို ၅၀၀၀၀ ဒဏ်ရိုက်ခဲ့တာဖြစ်ပြီး အဲဒီအထဲက ၁၆၀၀၀ ကို လူမျိုးရေးခွဲခြားမှုတိုက်ဖျက်ရေး ဆွေးနွေးပွဲအတွက် သုံးရမှာပါ။ နောက်တစ်ခါ ပရိတ်သတ်တွေက ဒီလိုအပြုအမူတွေလုပ်ရင် ပိုမိုပြင်းထန်တဲ့ အပြစ်ပေးမှုတွေ ပြုလုပ်သွားမယ်လို့လည်း ဂျာမန်ဘောလုံးအဖွဲ့ချုပ်က သတိပေးခဲ့ပါတယ်။

Ref: BBC

ဖေဖောဝါရီ ၁၁၊ ၂၀၂၀
M-Media

နာမည်ကျော် ပီလီ အိမ်အပြင်ထွက်ရန် ရှက်ရွံ့နေ

ဘရာဇီးလ်နိုင်ငံရဲ့ ဂန္တဝင်ဘောလုံးသမား ပီလီဟာ ကျန်းမာရေးအခြေအနေ အလွန်ဆိုးရွားနေတာကြောင့် အပြင်ထွက်ဖို့တောင် ရှက်နေတယ်လို့ သားဖြစ်သူက ပြောကြားလိုက်ပါတယ်။ အသက် ၇၉ နှစ်အရွယ်ရှိပြီဖြစ်တဲ့ ပီလီဟာ တင်ပဆုံမှာ နာတာရှည်ဒဏ်ရာရှိနေပြီး ပြီးခဲ့တဲ့နှစ်ကလည်း ဆီးလမ်းကြောင်းပိုးဝင်မှုကြောင့် ဆေးရုံတက်ခဲ့ရပါတယ်။ ၂၀၁၅ ခုနှစ်တုန်းကလည်း ဆီးကြိတ်ကင်ဆာကြောင့် ၆ လအတွင်း ၂ ကြိမ်တိုင်တိုင် ဆေးရုံတင်ခဲ့ရပါတယ်။ လက်ရှိမှာ လမ်းလျှောက်ဖို့အတွက် အကူလိုပြီး၊ လတ်တလော လူမြင်ကွင်းမှာလည်း ဘီးတပ်ကုလားထိုင်နဲ့သာ တွေ့ရပါတယ်။ သားဖြစ်သူ အီဒင်ဟိုက တစ်ချိန်က ဘုရင်တစ်ပါးအဖြစ် သတ်မှတ်ခံရတဲ့အနေအထားကနေ လက်ရှိမှာ လမ်းတောင်မလျှောက်နိုင်တော့တာကြောင့် ပီလီဟာ အိမ်အပြင်ကို မထွက်ချင်ဘူးလို့ ဆိုပါတယ်။

ဝူဟန်ကိုလှောင်သည့် စပါးကွင်းလယ်လူအလီ ပြန်တောင်းပန်

တရုတ်ပြည်ကနေ စတင်ပြီး ကမ္ဘာတစ်ဝှမ်း ပြန့်နှံ့ဖြစ်ပွားနေတဲ့ ကိုရိုနာဗိုင်းရပ်သစ်အကြောင်း ဆိုရှယ်မီဒီယာမှာ လှောင်ပြောင်မှုအတွက် စပါးကွင်းလယ်လူ ဒီလီအလီက ပြန်လည်တောင်းပန်လိုက်ပါတယ်။ အလီဟာ အာရှအမျိုးသားတစ်ဦးနဲ့ ရောဂါကို လှောင်ပြောင်ထားတဲ့ ဗီဒီယိုတစ်ခုကို Snapchat မှာ တင်ခဲ့တာပါ။ နောက်ပိုင်းမှာ ဒီဗီဒီယိုကို ဖြုတ်ချခဲ့ပြီး တရုတ်ဆိုရှယ်မီဒီယာတစ်ခုဖြစ်တဲ့ Weibo မှာ ပြန်လည်တောင်းပန်ခဲ့ပါတယ်။ အင်္ဂလိပ်ဘောလုံးအဖွဲ့ချုပ် FA ကတော့ ဗိုင်းရပ်စ်ကို လှောင်ပြောင်တဲ့ပို့စ်နဲ့ပတ်သက်ပြီး ဖြေရှင်းချက်ပေးဖို့ အလီကို တောင်းဆိုထားပါတယ်။

လူမျိုးရေးခွဲခြားမှုအတွက် အသက် ၁၂ အရွယ်လူငယ် တရားစွဲခံရ

ဒီဇင်ဘာ ၂၉ ရက်နေ့က ကစားတဲ့ပွဲမှာ ရိန်းဂျားအသင်းတိုက်စစ်မှူး အလ်ဖရက်ဒို မိုရီလို့စ်အပေါ် လူမျိုးရေးစော်ကားမှုအတွက် ဆဲလ်တစ်ပရိတ်သတ် အသက် ၁၂ နှစ်အရွယ် လူငယ်တစ်ဦးကို စကော့တလန်အာဏာပိုင်တွေက တရားစွဲဆိုလိုက်ပါတယ်။ မိုရီလို့စ်ဟာ ကွင်းအတွင်း ဆဲလ်တစ်ပရိတ်သတ်အချို့ရဲ့ လူမျိုးရေးစော်ကားမှုကို ခံခဲ့ရတာပါ။ ရဲတပ်ဖွဲ့တာဝန်ရှိသူ မာ့ခ်ဆူသာလန်က ဒီလိုအဖြစ်အပျက်တွေဟာ လုံး၀ လက်မခံနိုင်စရာကိစ္စဖြစ်ပြီး စုံစမ်းစစ်ဆေးမှုတွေ လုပ်ဆောင်သွားမယ်လို့ ပြောကြားခဲ့ပါတယ်။

Ref: BBC