News @ M-Media

Tag: EPL 2019-20

  • တနင်္လာနေ့ ဘောလုံးသတင်းများ

    တနင်္လာနေ့ ဘောလုံးသတင်းများ

    ဇန်နဝါရီ ၂၀၊ ၂၀၂၀
    M-Media

    အမှတ်ဖြတ်ထားသော်လည်း လီဗာပူးလ်နည်းပြ မပျော်နိုင်သေး

    အသင်း ပရီမီးယားလိဂ်ဖလား ရရှိတော့မယ်လို့ ပရိတ်သတ်တွေ ယုံကြည်လာတာကို မြင်ရတာ ပျော်ရွှင်မိပေမယ့် မိမိတို့ကတော့ အပြည့်အ၀ မပျော်နိုင်သေးဘဲ လက်ကျန် တစ်ပွဲချင်းစီကို အာရုံစိုက်သွားဖို့ လိုအပ်တယ်လို့ လီဗာပူးလ်နည်းပြ ယာဂန်ကလော့ပ်က ပြောကြားလိုက်ပါတယ်။ မန်ယူကို ၂ ဂိုးပြတ်နဲ့ အနိုင်ရခဲ့တဲ့ ဒီ‌နေ့မနက်ပွဲမှာ ပရိတ်သတ်တွေက ‘ငါတို့ ပရီးမီးယားလိဂ်ဖလား ရတော့မယ်’ ဆိုတဲ့ သီချင်းကို ဆိုခဲ့‌ကြပါတယ်။ လီဗာပူးလ်ဟာ ရာသီပြီးဆုံးဖို့ ၁၆ ပွဲအလိုမှာ ၁၆ မှတ်ဖြတ်ကာ ဦးဆောင်ထားနိုင်ပြီး ပရီးမီးယားလိဂ်လို့ အမည်ပြောင်းပြီးနောက်ပိုင်း ပထမဆုံး ချန်ပီယံဖြစ်မယ့် အားအလာကောင်းကို ပိုင်ဆိုင်ထားနိုင်ပြီ ဖြစ်ပါတယ်။

    ချန်ပီယံလိဂ်ဝင်ခွင့်ကိုသာ အာရုံစိုက်တော့မယ့် မန်စီးတီး

    မန်စီးတီးအသင်းရဲ့ အဓိကရည်ရွယ်ချက်ဟာ လာမယ့်နှစ် ချန်ပီယံလိဂ် ဝင်ခွင့်ရရေး ဖြစ်တယ်လို့ နည်းပြ ပက်ပ် ဂွါဒီယိုလာက ပြောကြားလိုက်ပါတယ်။ မနေ့က ခရစ္စတယ်ပဲလေ့စ်အသင်းကို ၂ ဂိုးစီသရေကျ‌ပြီးတဲ့နောက် လက်ရှိချန်ပီယံ မန်စီးတီးဟာ ပထမနေရာက လီဗာပူးလ်နဲ့ ၁၆ မှတ်အထိ ကွာဟသွားတာပါ။ ဂွါဒီယိုလာကတော့ အနိုင်ရဖို့ ကြိုးစားခဲ့ပေမယ့် ကံမကောင်းခဲ့ဘူးလို့ ဆိုပါတယ်။

    မန်ယူ၏ လူခေါ်ယူမှုကို ဂယ်ရီနဗီးလ် ဝေဖန်

    မန်ယူအသင်းရဲ့ ကစားသမားခေါ်ယူမှု ပေါ်လစီကို နောက်ခံလူဟောင်း ဂယ်ရီနဗီးလ်က ဝေဖန်လိုက်ပြီး အဲဒီရဲ့အကျိုးဆက်ကို လာမယ့်ရာသီဝက်မှာ ခံစားရလိမ့်မယ်လို့ ပြောကြားလိုက်ပါတယ်။ မန်ယူဟာ ပြီးခဲ့တဲ့ ၃ နှစ်အတွင်း ပေါ့ဘာ၊ လူကာကူ၊ ဆန်းချက်ဇ်တို့လို နာမည်ကြီးကစားသမားတွေကို ခေါ်ယူအားဖြင့်ခဲ့ပေမယ့် မျှော်မှန်းထားသလောက် ခြေစွမ်းမပြနိုင်ကြပါဘူး။ ပြီးခဲ့တဲ့နွေရာသီကလည်း ပေါင် သန်း ၁၃၀ လောက် အသုံးပြုကာ ကစားသမားတွေ ခေါ်ယူခဲ့ပေမယ့် လက်ရှိ အမှတ်ပေးဇယားမှာ ထိပ်ဆုံးက လီဗာပူးလ်ထက် အမှတ် ၃၀ ကွာကာ၊ ချန်ပီယံလိဂ်ဝင်ခွင့်နေရာထက် ၅ မှတ်လျော့နည်းနေပါတယ်။ နဗီးလ်ကတော့ မန်ယူအသင်းဟာ နေရာပေါင်းစုံမှာ နောက်ပြန်သွားနေပြီး ဆိုးဆိုးဝါးဝါး အခြေအနေတွေနဲ့ ကြုံတွေ့ရမယ်လို့ ထည့်သွင်းပြောကြားခဲ့ပါတယ်။

    Ref: BBC

  • ဗုဒ္ဓဟူးနေ့ ဘောလုံးသတင်းများ

    ဗုဒ္ဓဟူးနေ့ ဘောလုံးသတင်းများ

    ဇန်နဝါရီ ၁၅၊ ၂၀၂၀
    M-Media

    ဘာကာနည်းပြဖြစ်လာရန် စိတ်ကူးပင်မယဉ်မိဟု စတီယန်ပြော

    ဘာစီလိုနာအသင်းရဲ့ နည်းပြဖြစ်လာဖို့ စိတ်ကူးမယဉ်ခဲ့မိဘူးလို့ နည်းပြသစ် ကီကေး စတီယန်က ပြောကြားလိုက်ပါတယ်။ အသက် ၆၁ နှစ်အရွယ် ရီးယဲလ်ဘက်တစ်နည်း‌ပြဟောင်း စတီယန်ဟာ မနေ့က ၂ နှစ်ခွဲစာချုပ် ချုပ်ဆိုခဲ့တာပါ။ ဒုတိယတန်းအသင်း လက်စ် ပါးလ်မက်စ်နဲ့ လာလီဂါမှာ စွမ်းဆောင်ရည်ကောင်းပြသခဲ့တဲ့ စတီယန်ဟာ ရီးယဲလ်ဘက်တစ်နဲ့ ပထမဆုံးရာသီမှာပဲ ‌အဆင့် ၆ နဲ့ ယူရိုပါလိဂ်ရအောင် စွမ်းဆောင်ပေးနိုင်ခဲ့တာပါ။ အခုလို အခွင့်အရေးပေးတဲ့အတွက် ဘာစီလိုနာအသင်းကို ကျေးဇူးတင်ပြီး စိန်ခေါ်မှုတွေအတွက် ‌စိတ်လှုပ်ရှားမိတယ်လို့လည်း စတီယန်က ထည့်သွင်းပြောဆိုခဲ့ပါတယ်။ ‌

    လုံခြုံရေးစိုးရိမ်မှုကြောင့် ပင်လယ်ကွေ့လေ့ကျင့်မှုအစီအစဉ်ကို မန်ယူပယ်ဖျက်

    နောက်လ ဆောင်းရာသီ အနားပေးချိန်မှာ ကာတာ ဒါမှမဟုတ် ဒူဘိုင်းကို သွားရောက်လေ့ကျင့်ဖို့ စီစဉ်ထားမှုကို လုံခြုံရေးအခြေအနေကြောင့် မန်ယူအသင်းက ဖျက်သိမ်းလိုက်ပါတယ်။ မန်ယူဟာ ပြီးခဲ့တဲ့နှစ် ဇန်နဝါရီနဲ့ နိုဝင်ဘာလတွေမှာ ယူအေအီးနိုင်ငံ ဒူဘိုင်းမြို့ကို သွားရောက်ကာ ‌လေ့ကျင့်ခဲ့သလို၊ ကာတာနိုင်ငံမြို့ ဒိုဟာမှာလည်း လေ့ကျင်ခဲ့ဖူးပါတယ်။ ပြီးခဲ့တဲ့တစ်ပတ်အတွင်း အီရန်နဲ့ အမေရိကန်တို့အကြား တင်းမာမှုအရှိ ပိုမိုမြင့်တက်မှုကြောင့် ပင်လယ်ကွေ့ဒေသမှာ လုံခြုံရေးအခြေအနေ စိုးရိမ်လာရတာပါ။ နည်းပြ ဆိုးရှားဟာ ပင်လယ်ကွေ့နိုင်ငံတွေအစား စပိန် ဒါမှမဟုတ် ပေါ်တူဂီကိုသွားရောက်လေ့ကျင့်ဖို့ စီစဉ်ထားပါတယ်။

    အာတီတာသာ အသင်းအတွက် သင့်တော်သည့်လူဟု အိုဇေးလ်ပြော

    နည်းပြဟောင်း အူနိုင်း အမ်မရီလက်ထက်မှာ အာဆင်နယ်အသင်းရဲ့ တန်ဖိုးတွေ ပျောက်ဆုံးခဲ့တယ်လို့ ကွင်းလယ်လူ အိုဇေးလ်က ဝေဖန်ပြောကြားလိုက်ပါတယ်။ အူနိုင်းရဲ့ ၁၈ လ နည်းပြသက်တမ်းမှာ အိုဇေးလ်ဟာ ပုံမှန်ကစားခွင့်မရခဲ့ဘဲ နည်းပြသစ် အာတီတာရဲ့ လက်ထက်ရောက်မှ ပွဲထွက်ခွင့်ရခဲ့တာ ဖြစ်ပါတယ်။ အာတီတာလက်အောက်မှာ အသင်းရဲ့ တိုက်ပွဲဝင်စိတ်ဓာတ်၊ ပိုင်ဆိုင်မှုအသားပေးတဲ့ အသင်းရဲ့ ကစားပုံတွေ ပြန်ရလာပြီး ကစားသမားတွေအားလုံး ပျော်ရွှင်ကျေနပ်နေကြကြောင်း အာတီတာသာလျှင် အာဆင်နယ်အတွက် မန်ကန်တဲ့နည်းပြဖြစ်ကြောင်း အိုဇေးလ်က ထည့်သွင်းပြောဆိုခဲ့ပါတယ်။

    Ref: BBC, Daily Mail

  • အင်္ဂါနေ့ ဘောလုံသတင်းများ

    အင်္ဂါနေ့ ဘောလုံသတင်းများ

    ဇန်နဝါရီ ၁၄၊ ၂၀၂၀
    M-Media

    ဘာစီလိုနာအသင်းက နည်းပြ ဗာလ်ဗာဒီကို ထုတ်ပယ်

    ဘာစီလိုနာအသင်းဟာ နည်းပြ ဗာလ်ဗာဒီကို အသင်းက ထုတ်ပယ်လိုက်ပြီး ရီးရဲလ်ဘက်တစ်နည်းပြဟောင်း ကီ‌ကေး ဆတီယန်ကို အစားထိုးခန့်အပ်လိုက်ပါတယ်။ အသက် ၅၅ နှစ်အရွယ် ဗာလ်ဗာဒီဟာ အသင်းကို ပြီးခဲ့တဲ့ ၂ နှစ်မှာ လာလီဂါချန်ပီယံဖြစ်အောင် စွမ်းဆောင်ပေးနိုင်ခဲ့ပြီး အခုရာသီမှာလည်း အမှတ်ပေးဇယားကို ဦးဆောင်ထားနိုင်ပါတယ်။ ဒါပေမယ့် ချန်ပီယံလိဂ်ဖိုင်နယ် ရောက်ရှိအောင်နဲ့ ‌ကောင်းမွန်တဲ့ကစားပုံ ရရှိအောင် မစွမ်းဆောင်နိုင်တာတွေကြောင့် ဝေဖန်ခံခဲ့ရပါတယ်။ အသက် ၆၁ နှစ်အရွယ် ဆတီယန်ဟာ ပြီးခဲ့တဲ့နှစ်က ဘက်တစ်အသင်းကို ၁၄ နှစ်အတွင်း လာလီဂါမှာ အမြင့်ဆုံးအဆင့် ရရှိအောင်၊ ဘုရင့်ဖလားမှာ ဆီမီးဖိုင်နယ်အထိ ရရှိအောင် စွမ်းဆောင်ပေးနိုင်ခဲ့ပါတယ်။

    လက်တွေ့ကျသည့်နည်းလမ်းမျိုးသာ လိုအပ်ဟု မော်ရင်ဟိုပြော

    စပါးအသင်း ကစားပုံနဲ့ပတ်သက်လို့ ဝေဖန်မှုကို နည်းပြမော်ရင်ဟိုက ပယ်ချလိုက်ပြီး အသင်းအတွက် လက်တွေ့ကျတဲ့ နည်းလမ်းမျိုးသာ လိုအပ်တယ်လို့ ‌တုန့်ပြန်ခဲ့ပါတယ်။ လီဗာပူးလ်ကို ၁ ဂိုး ဂိုးမရှိနဲ့ရှုံးခဲ့တဲ့ ပြီးခဲ့တဲ့တစ်ပတ်ပွဲမှာ နောက်ခံလူ ၅ ဦးအထိ မော်ရင်ဟိုက အသုံးပြုခဲ့ပြီး ပထမပိုင်းမှာ အသင်းဟာ ဘောလုံးပိုင်ဆိုင်မှု ၂၈ ရာခိုင်နှုန်းသာ ရှိခဲ့ပါတယ်။ ဒီအတွက် ဝေဖန်ခံနေရတာပါ။ မော်ရင်ဟိုက နောက်ပိုင်းမှာ အသင်း ကစားပုံကောင်းလာတာကို ထောက်ပြခဲ့ပြီး ဒါဟာ မဟာဗျူဟာအရ နောက်ပွဲအတွက် စိတ်ဓာတ်ခွန်အား ဖြစ်စေခဲ့တယ်လို့ ဆိုပါတယ်။

    ကမ္ဘာ့ဝင်ငွေအကောင်းဆုံးအသင်းအဖြစ် ဘာစီလိုနာအသင်း ရပ်တည်

    ပြီးခဲ့တဲ့ဘောလုံးရာသီက ဝင်ငွေအကောင်းဆုံး ဘောလုံးအသင်းစာရင်းကို Deloitte အဖွဲ့က ထုတ်ပြန်ရာမှာ ဘာစီလိုနာအသင်းက ထိပ်ဆုံးမှာရပ်တည်နေပြီး သမိုင်းတစ်လျှောက် ပထမဆုံး ရပ်တည်နိုင်တာလည်းဖြစ်ပါတယ်။ ပြိုင်ဘက် ရီးယဲလ်မက်ဒရစ်က ဒုတိယနေရာမှာ ရှိနေကာ ပရီးမီးယားလိဂ်က မန်ယူကတော့ တတိယနေရာမှာ ရှိနေပါတယ်။ မန်ယူဟာ လာမယ့်နှစ်မှာ ပရီးမီးယားလိဂ်ရဲ့ ဝင်ငွေအကောင်းဆုံး ဘောလုံးအသင်းနေရာကို ဆုံးရှုံးရဖွယ် ရှိနေတယ်လို့လည်း ဆိုပါတယ်။ ကမ္ဘာ့ဝင်ငွေအကောင်းဆုံး ဘောလုံးအသင်း ၁၀ သင်းမှာ ပရီးမီးယားလိဂ်က ၅ သင်း၊ လာလီဂါက ၂ သင်း၊ ဘွန်ဒစ်လီဂါ၊ ပြင်သစ်လီဂူးနဲ့ စီးရီး‌အေတို့က ၁ သင်းစီ ပါဝင်ပါတယ်။

    Ref: BBC, Daily Mail

  • တနင်္လာနေ့ ဘောလုံးသတင်းများ

    တနင်္လာနေ့ ဘောလုံးသတင်းများ


    ဇန်နဝါရီ ၁၃၊ ၂၀၂၀
    M-Media

    စပိန်စူပါဖလားကို ရီးယဲလ်မက်ဒရစ်ဆွတ်ခူး
    ==============
    မနေ့က ဆော်ဒီအာရေဗျနိုင်ငံမှာ ကစားခဲ့တဲ့ စပိန်စူပါဖလား နောက်ဆုံးဗိုလ်လုပွဲမှာ ရီးယဲလ်မက်ဒရစ်က အက်သလက်တီကိုမက်ဒရစ်ကို ပင်နယ်တီအဆုံးအဖြတ်နဲ့ အနိုင်ရဗိုလ်စွဲသွားပါတယ်။ စူပါဖလားကို အခုနှစ်မှာ ပုံစံသစ်နဲ့ ကျင်းပတာဖြစ်ပြီး လာလီဂါက ဆင့် ၁နဲ့ ၂၊ စပိန်ဘုရင့်ဖလားက ပထမနဲ့ ဒုတိယရတဲ့အသင်း စုစုပေါင်း ၄ သင်း ယှဉ်ပြိုင်ကစားရတာ ဖြစ်ပါတယ်။

    တိုက်စစ်မှူးအဂူရိုကို ပက်ပ်ဂွါဒီယိုလာ ချီးကျူး
    ================
    တိုက်စစ်မှူး ဆာဂျီယိုအဂူရိုဟာ ဂိုးသွင်းရင်း သေဆုံးမယ့် ကစားသမားလို့ မန်စီးနည်းပြ ပက်ပ် ဂွါဒီယိုလာက ချီးကျူးလိုက်ပါတယ်။ မနေ့က အက်စတွန်ဗီလာအသင်းကို ၆ ဂိုး ၁ ဂိုးနဲ့ အနိုင်ရခဲ့တဲ့ပွဲမှာ အသက် ၃၁ နှစ်အရွယ် အဂူရိုဟာ ဟက်ထရစ် သွင်းယူနိုင်ခဲ့ပြီး ပရီးမီးယားလိဂ် သွင်းဂိုး စုစုပေါင်း ၁၇၇ ဂိုးရှိလာပါတယ်။ ဒါ့ကြောင့် ပရီးမီယားလိဂ်မှာ ဂိုးအများဆုံးသွင်းနိုင်တဲ့ နိုင်ငံခြားကစားသမားအဖြစ် မှတ်တမ်းဝင်ခဲ့ပါတယ်။ ဂွါဒီယိုလာက အဂူရိုဟာ ဂန္တဝင်ကစားသမားတစ်ဦး ဖြစ်ပြီး စံချိန်သစ်တစ်ခုရရှိချိန် မန်စီးတီးမှာ ရှိနေတာဟာ ဂုဏ်ယူဖွယ်ရာတစ်ခုဖြစ်တယ်လို့ ဆိုပါတယ်။

    ဘာစီလိုနာတိုက်စစ်မှူးဆွာရက်ဇ် ဒူးဒဏ်ရာကြောင့် ၄ လတာ အနားယူရမည်
    =================
    ဘာစီလိုနာတိုက်စစ်မှူး လူးဝစ် ဆွာရက်ဇ်ဟာ တနင်္ဂနွေနေ့က ဒူးခေါင်း ခွဲစိတ်မှု ပြုလုပ်ခဲ့ပြီးတဲ့နောက် ၄ လ‌ကြာ အနားယူရမှာဖြစ်ပြီး အခုနှစ်ဘောလုံးရာသီ လက်ကျန်ပွဲစဉ်တွေအားလုံးကို လွဲချော်မှာ ဖြစ်ပါတယ်။ သောကြာနေ့က ကစားခဲ့တဲ့ စူပါဖလား ဆီမီးဖိုင်နယ် အက်သလက်တီကိုကို ၃ ဂိုး ၂ ဂိုးနဲ့ ရှုံးနိမ့်ခဲ့တဲ့ပွဲစဉ်မှာ ရခဲ့တဲ့ ဒီဒဏ်ရာဟာ လာလီဂါကို ဦးဆောင်နေတဲ့ ဘာစီလိုနာအသင်းအတွက် ထိုးနှက်ချက်တစ်ခုလည်း ဖြစ်ပါတယ်။ အသက် ၃၂ နှစ်အရွယ် ဆွာရစ်ဇ်ဟာ အခုရာသီမှာ ဘာစီလိုနာအသင်းအတွက် ၂၃ ပွဲကစား ၁၄ ဂိုး သွင်းယူပေးထားပါတယ်။

    Ref : BBC, Goal

  • ကြာသာပတေးနေ့ ဘောလုံးသတင်းများ

    ကြာသာပတေးနေ့ ဘောလုံးသတင်းများ

    ဇန်နဝါရီ ၉၊ ၂၀၂၀
    M-Media

    လူမျိုးရေးခွဲခြားမှုအတွက် လာဇီယိုအသင်း ဒဏ်ရိုက်ခံရ

    ဘရက်စီယာအသင်းတိုက်စစ်မှူး ဘာလော့တယ်လီကို ပရိတ်သတ်တွေက လူမျိုးရေးခွဲခြား စော်ကားမှုအတွက် လာဇီယိုအသင်းကို အီတလီဘောလုံးအဖွဲ့ချုပ်က ဒဏ်‌ငွေ ယူရို ၂ သောင်း ချမှတ်လိုက်ပါတယ်။ တနင်္ဂနွေနေ့ကပွဲမှာ ဘာလော့တယ်လီကို လာဇီယိုပရိတ်သတ်တွေက ၂ ကြိမ်တိုင်တိုင် လူမျိုးရေးခွဲခြား စော်ကားခဲ့ပြီး ပွဲကို ခေတ္တ ရပ်ဆိုင်းရတဲ့အထိ ဖြစ်ခဲ့ပါတယ်။ လာဇီယိုကတော့ လူမျိုးရေးခွဲခြားမှုကို ပရိတ်သတ်အချို့ကသာ လုပ်ဆောင်တာဖြစ်ပြီး ဒီလိုအပြုအမူတွေရှုတ်ချတယ်လို့ ထုတ်ပြန်ခဲ့ပါတယ်။ အီတလီဘောလုံးအဖွဲ့က ဒီကိစ္စ ဖြစ်ပွားမှု အသေးစိတ်ကို စစ်ဆေးကာ အရေးယူမှု ထပ်လုပ်ဖို့လည်း ရှိနေပါတယ်။

    မန်ယူနည်းပြနေရာကို ဂျူဗင်တပ်စ်နည်းပြဟောင်းက စိတ်ဝင်စား

    ဂျူဗင်တပ်စ်နည်းပြဟောင်း မက်စ် အယ်လီဂရီဟာ မန်ယူအသင်းရဲ့ နည်းပြရာထူးကို ‌စောင့်ကြည့်နေတယ် လို့ Daily Mail သတင်းဌာနက ဖော်ပြခဲ့ပါတယ်။ ပရိတ်သတ်တွေ ကျေနပ်စေမယ့် ရလဒ်တွေ ရရှိအောင် မစွမ်းဆောင်ပေးနိုင်တာကြောင့် မန်ယူနည်းပြ ဆိုးလ်ရှားဟာ ဖိအားတွေနဲ့ ရင်ဆိုင်နေရတာပါ။ အသက် ၅၂ နှစ်အရွယ် အလ်လီဂရီဟာ ပြီးခဲ့တဲ့နှစ် ဂျူဗင်တပ်စ်ကနေ ထွက်ခွာခဲ့ပြီးတဲ့နောက် အသင်းလက်မဲ့ဖြစ်နေပြီး အာဆင်နယ်က ဆက်သွယ်ခဲ့ပေမယ့် မန်ယူအခြေအနေကို စောငင့်ကြည့်နေတယ်လို့ဆိုကာ အယ်လီဂရီက ပယ်ချခဲ့ပါတယ်။ မန်ယူနည်းပြနေရာကို စပါးနည်းပြဟောင်း ပိုချက်တီနိုကလည်း စိတ်ဝင်စားနေတယ်လို့ သတင်းထွက်နေပါတယ်။

    Ref: BBC, Daily Mail