News @ M-Media

Tag: EPL2020-21

  • တနင်္ဂနွေနေ့ ဘောလုံးသတင်းများ

    တနင်္ဂနွေနေ့ ဘောလုံးသတင်းများ

    ဒီဇင်ဘာ ၂၇၊ ၂၀၂၀
    M-Media

    လာမယ့်တစ်ပတ်က တန်းဆင်းဇုန်မှလွတ်ရေး အရေးကြီးကာလဟု အာတီတာပြော

    မိမိတိုအသင်း တန်းဆင်းဇုန်ကလွတ်မြောက်ရေးအတွက် လာမယ့်တစ်ပတ်ဟာ အရေးပါလိမ့်မယ်လို့ အာဆင်နယ်နည်းပြ အာတီတာက ပြောကြားလိုက်ပါတယ်။

    မနှစ်က FA ဖလား၊ အခုနှစ်အစမှာ ကွန်မြူနတီဒိုင်းတို့ ရရှိခဲ့တဲ့ အာဆင်နယ်ဟာ ပြီးခဲ့တဲ့ ၉ ပွဲမှာ နိုင်ပွဲပျောက်ကာ ပရီးမီးယားလိဂ်မှာ အဆင့် ၁၅ အထိ ရောက်ခဲ့ပါတယ်။ မနေ့ကပွဲမှာတော့ ဇယားထိပ်ပိုင်းက ချယ်ဆီးကို ၃ ဂိုး ၁ ဂိုးနဲ့ နိုင်ခဲ့ပါတယ်။

    အာတီတာက လက်တလော အရှုံးတွေအတွက် ဆင်ခြေမပေးလိုဘဲ တာဝန်အပြည့်ယူကြောင်း၊ ပရီးမီးယားလိဂ်မှာ ပြန်လည်ဦးမော့နိုင်ရေး လာမယ့် ၈ ရက်က အရေးကြီးကြောင်း မနေ့ကပွဲအပြီးမှာ ထည့်သွင်းပြောဆိုခဲ့ပါတယ်။ လာမယ့်တစ်ပတ်မှာ အာဆင်နယ်ဟာ ဘရိုက်တန်၊ ဝက်စ်ဘရွန်းတို့နဲ့ ကစားရမှာ ဖြစ်ပါတယ်။

    မန်ယူကွင်းလယ်လူ ဖာနန်ဒ်ဇ် ပရီးမီးယားလိဂ်မှတ်တမ်းသစ်တစ်ခု ရရှိ

    မန်ယူကွင်းလယ်လူ ဘရူနိုဖာနန်ဒက်ဇ်ဟာ ခရစ္စတီယာနိုရော်နယ်ဒိုနောက်ပိုင်း ပရီးမီးယားလိဂ်မှာ တစ်ရာသီအတွင်း ၁၀ ဂိုးသွင်းတဲ့ ပထမဆုံး ပေါ်တူဂီကစားသမား ဖြစ်လာပါတယ်။

    လက်စတာနဲ့ ၂ ဂိုးစီသရေကျတဲ့ မနေ့ကပွဲမှာ ဖာနန်ဒက်စ်က ဒုတိယဦးဆောင်ဂိုး သွင်းခဲ့ပြီး ဒီရာသီ ပရီးမီးယားလိဂ်သွင်းဂိုး ၁၀ ဂိုး ရှိလာပါပြီ။ ၂၀၀၈-၀၉ ပရီးမီးယားလိဂ်မှာ ၁၈ ဂိုးသွင်းခဲ့တဲ့ ခရစ္စတီယာနို ရော်နယ်ဒိုနောက်ပိုင်း တစ်ရာသီအတွင်း ၁၀ ဂိုးသွင်းတဲ့ ပထမဆုံး ပေါ်တူဂီကစားသမားအဖြစ် မှတ်တမ်းဝင်ခဲ့ပါတယ်။

    ဖာနန်ဒက်ဇ်က ကစားသမားကောင်းတွေနဲ့ တွဲကစားရပြီး သူတို့ရဲ့ ဖေးမမှုကြောင့် ကိုယ့်ကိုယ်ကို ယုံကြည်မှုရကာ အခုလိုခြေစွမ်းမျိုးပြနိုင်တာဖြစ်တယ်လို့ ပြောကြားခဲ့ပါတယ်။ ဖာနန်ဒက်ဇက်ဟာ မန်ယူကိုရောက်လာပြီးနောက်ပိုင်း စုစုပေါင်း ၁၈ ဂိုးသွင်း ာ၁၃ ဂိုး ဖန်တီးပေးထားပါတယ်။

    ထိပ်ဆုံး ၄ သင်းစာရင်းဝင်ရေး မလွယ်သေးဟု ဂွါဒီယိုလာပြော

    လက်ရှိ အသင်းရဲ့ စွမ်းဆောင်ရည်ကို ကျေနပ်မိပေမယ့် အဆင့် ၄ အတွင်းဝင်ရေး မိမိရည်မှန်းချက် အောင်မြင်ဖို့အတွက် လွယ်ကူမှာမဟုတ်ဘူးလို့ မန်စီးတီးနည်းပြ ပက်ပ်ဂွါဒီယိုလာက ဖွင့်ဟလိုက်ပါတယ်။

    မန်စီးတီးဟာ မနေ့က နယူးကာဆယ်ကို ၂ ဂိုးပြတ်နဲ့ အနိုင်ရခဲ့ပြီး အဆင့် ၅ နေရာကို ရောက်လာပါတယ်။ ရာသီအစမှာ ရလဒ်တွေဆိုးခဲ့တဲ့ မန်စီးတီးဟာ အခုနောက်ပိုင်းမှာတော့ ခြေစွမ်းကောင်းတွေ ပြသလာပါတယ်။

    ဂွါဒီယိုလာက အခုနှစ် ပရီးမီးယားလိဂ်မှာ အသင်းတိုင်းဟာ မထင်မှတ်တဲ့ရလဒ်တွေ ရတတ်တဲ့အတွက် တည်ငြိမ်ဖို့ လိုအပ်ကြောင်း၊ ပြိုင်ပွဲ ၃ ခု ဝင်ပြိုင်နေရတဲ့ မိမိတို့အသင်းဟာ ၃ ရက်ကို တစ်ပွဲနှုန်းကစားရတာကြောင့် မျှော်လင့်ချက်ကို အများကြီးမထားကြောင်း မနေ့ကပွဲအပြီးမှာ ပြောကြားခဲ့ပါတယ်။

    Ref: BBC, Goal

  • သောကြာနေ့ ဘောလုံးသတင်းများ

    သောကြာနေ့ ဘောလုံးသတင်းများ

    ဒီဇင်ဘာ ၂၅၊ ၂၀၂၀
    M-Media

    ပဲလေ့စ်ကွင်းလယ်လူ အီဇီ

    ဆာလာဟ်ထွက်မည်ဆိုသည့်သတင်း မဟုတ်ဟု က​လော့ငြင်း

    အီဂျစ်တိုက်စစ်မှူး မိုဟာမက် ဆာလာဟ် အသင်းမှာမပျော်တော့ဘူးဆိုတဲ့ သတင်းတွေကို လီဗာပူးလ်နည်းပြ ယာဂန်ကလော့က ငြင်းဆိုလိုက်ပါတယ်။

    ချန်ပီယံလိဂ် ပွဲစဉ်တစ်ခုမှာ အသင်းခေါင်းဆောင် မခန့်တဲ့အတွက် စိတ်ပျက်မိတယ်လို့ ဆာလာဟ်က ပြီးခဲ့တဲ့ပတ်ပတ်မှာ လူသိရှင်ကြား ပြောကြားထားသလို အီဂျစ်အသင်းဖော်တစ်ဦးကလည်း ဆာလာဟ်တစ်ယောက် အသင်းပြောင်းဖို့ စဉ်းစားနေတယ်လို့ ထုတ်ပြောထားပါတယ်။

    ကလော့ပ်ကတော့ ဆာလာဟ်ဟာ အသင်းမှာ ပျော်ရွှင်နေပြီး မိမိအတွက် ဒါက ပိုအရေးကြီးကြောင်း၊ မီဒီယာတွေက ထင်ရာရေးကြပေမယ့် လက်တွေ့မှာ အမှန်မဟုတ်ကြောင်း ထည့်သွင်းပြောဆိုခဲ့ပါတယ်။

    ချန်ပီယံဖြစ်နိုင်တယ်ဆိုတဲ့ ပြောကြားမှုတွေအတွက် ကလော့ပ်က မိမိတို့ဟာ ရာသီဝက်မှာ ဇယားကို ဦးဆောင်ထားနိုင်ပေမယ့် ပြိုင်ဘက်အသင်းတွေရဲ့ အရည်အသွေးကြောင့် နောက်ရာသီဝက်မှာ ဘာမဆိုဖြစ်နိုင်တယ်လို့ ဆိုပါတယ်။

    ပီအက်စ်ဂျီနည်းပြသစ် ပိုချက်တီနိုဖြစ်မယ်ဟု သတင်းထွက်

    စပါးနည်းပြဟောင်း ပိုချက်တီနိုတစ်ယောက် ပီအက်စ်ဂျီနည်းပြသစ် ဖြစ်လာဖွယ်ရှိတယ်လို့ သတင်းတွေ ထွက်နေပါတယ်။

    ပီအက်စ်ဂျီဟာ နည်းပြ သောမတ်စ် တူချဲလ်ကို ဗုဒ္ဓဟူးနေ့က စထရာဘော့ဂ်ကိုနိုင်ပြီး နာရီပိုင်းအကြာမှာ ထုတ်ပယ်လိုက်ပါတယ်။ လွန်ခဲ့တဲ့ နှစ်ပတ်လောက်ကတည်းက အသင်းတာဝန်ရှိသူတွေဟာ ပိုချက်တီနိုနဲ့ ဆွေးနွေးခဲ့ပြီး ကစားသမားတွေကိုလည်း နည်းပြသစ် ပိုချက်တီနိ ဖြစ်လာမယ်လို့ ပြောဆိုထားကြောင်း သတင်းတွေ ထွက်လာပါတယ်။

    ၂၀၁၈ ခုနှစ်က ၂ နှစ်စာချုပ်နဲ့ ရောက်လာတဲ့ တူချဲလ်ဟာ လိဂ်ဝမ်းဖလား ၂ ကြိမ်အပါအဝင် စုစုပေါင်း ပြည်တွင်းဖလား ၄ လုံးရအောင် စွမ်းဆောင်ပေးထားနိုင်ပြီး ပြီးခဲ့တဲ့နှစ် ချန်ပီယံလိဂ်မှာ ဗိုလ်လုပွဲ​ရောက်အောင် နည်းပြပေးခဲ့ပါတယ်။

    အာဆင်နယ်ကလက်လွှတ်ချိန် ငိုခဲ့ရသည်ဟု ပဲလေ့စ်ကွင်းလယ်လူပြော

    လူငယ်ကစားသမားဘ၀ အာဆင်နယ်အသင်းက လက်လွှတ်တော့မယ်လို့ သိလိုက်ရတဲ့အခါ မိခင်ဖြစ်သူနဲ့အတူ မျက်ရည်ကျခဲ့ရတယ်လို့ ခရစ္စတယ်ပဲလေ့စ် ကွင်းလယ်လူ အီဘရီချီအီဇီက ဖွင့်ဟလိုက်ပါတယ်။

    အသက် ၂၂ နှစ်အရွယ် အီဇီဟာ ဩဂုတ်လက ကျူပီအာရ်ကနေ ပဲလေ့စ်ကို ပေါင် ၁၇ သန်းနဲ့ ပြောင်းလာပြီး ခြေစွမ်းပြနေသူပါ။ ကလေးဘ၀က အာဆင်နယ်ကင်းထောက်ကတွေ့ပြီး စုဆောင်းခံခဲ့ရပေမယ့် အသက် ၁၃ နှစ်မှာ အီဇီတစ်ယောက် အသင်းက ထွက်ခဲ့ရကာ ဖူလ်ဟမ်း၊ ရီဒင်း၊ မီဝေါလ်နဲ့ ကျူပီအာရ်တို့မှာ ကျင်လည်ခဲ့ရပါတယ်။

    အာဆင်နယ်လက်လွှတ်လိုက်စဉ် ရရှိခဲ့တဲ့ခံစားချက်ကနေ ခွန်အားတွေ၊ သတ္တိတွေရကာ ဒီနေ့ ဒီလိုအဆင့်မျိုးကို ရောက်လာတာလို့လည်း သူက ထည့်သွင်းပြေဆိုခဲ့ပါတယ်။

    Ref: BBC

  • ကြာသာပတေးနေ့ ဘောလုံးသတင်းများ

    ကြာသာပတေးနေ့ ဘောလုံးသတင်းများ

    ဒီဇင်ဘာ ၂၄၊ ၂၀၂၀
    M-Media

    မာရာဒိုနာအလောင်း ခွဲစိပ်စစ်ဆေးမှု အဖြေထွက်လာ

    အာဂျင်တီးနားအသင်းရဲ့ ဂန္တဝင်ကစားသမား မာရာဒိုနာ သေဆုံးမှုဟာ ကျောက်ကပ်၊ နှလုံးနဲ့ အဆုတ်ရောဂါတို့ကြောင့်ဖြစ်ပြီး မူးယစ်ဆေးကြောင့်မဟုတ်ဘူးလို့ အာဂျင်တီးနား မှုခင်းရဲတပ်ဖွဲ့က ထုတ်ပြန်ပါတယ်။

    နိုဝင်ဘာလကဖြစ်ခဲ့တဲ့ ဒီသေဆုံးမှုဟာ ဓမ္မတာအတိုင်း သေဆုံးမှု မဟုတ်ဘူးလို့ ပြောကြားမှုတွေရှိခဲ့ပြီး မာရာဒိုနာကို ပုံမှန်ကုသပေးနေတဲ့ ဆရာဝန်လည်း စစ်ဆေးခံခဲ့ရပါတယ်။

    မသေခင်ရက်အနည်းငယ်အတွင်း မာရာဒိုနာဟာ မူးယစ်ဆေးသုံးခဲ့တယ်ဆိုတဲ့ စွပ်စွဲချက်တွေ ရှိပေမယ့် အလောင်းခွဲစိပ်စစ်ဆေးမှုအရ ဒီလိုသုံးစွဲတာမျိုး မတွေ့ရဘူးလို့ ရဲတပ်ဖွဲ့က ဆိုပါတယ်။

    မာရာဒိုနာဟာ အရက်နဲ့ မူးယစ်ဆေးစွဲမှု ပြဿနာကို နှစ်များစွာ ကြုံခဲ့ရတာပါ။ နောက်ပိုင်း စုံစမ်း စစ်ဆေးမှုတွေမှာ DNA နမူနာတွေ ရယူဖို့ဆိုတဲ့ခေါင်းစဉ်နဲ့ မာရာဒိုနာရဲ့အလောင်းကို ပြန်ဖော်တာ၊ မီးသင်္ဂြိုဟ်တာမျိုး မလုပ်ရဘူးလို့ ပြီးခဲ့တဲ့တစ်ပတ်မှာ တရားရုံးက ဆုံးဖြတ်ချက် ချခဲ့ပါတယ်။

    ၁၅ နှစ်အတွင်း ခေါင်းတိုက်သည့်ဓလေ့ ပျောက်မည်ဟု စပါးကွင်လယ်လူဟောင်း ပြော

    လာမယ့် ၁၀ နှစ် ၁၅ နှစ်အတွင်း ဘောလုံးလောကမှာ ခေါင်းတိုက်တဲ့ဓလေ့ ပျောက်ကွယ်သွားလိမ့်မယ်လို့ စပါးကွင်းလယ်လူဟောင်း ရိုင်ယန် မာဆန်က ပြောပါတယ်။

    လတ်တလော လေ့လာမှုအရ ဘောလုံးသမားတွေဟာ အသိဉာဏ်ချို့ယွင်းမှုရောဂါ (ဒမန်းရှား) ဖြစ်ပွားဖို့ ၃ ပုံ ၂ ပုံ ပိုများတယ်ဆိုတာ​ တွေ့ရပါတယ်။

    ၂၀၁၇ ခုနှစ် ဟားလ်စီးတီးမှာကစားစဉ် ဦးခေါင်းခွဲအက်ဒဏ်ရာကြောင့် ဘောလုံးလောကကနေ အနားယူခဲ့ရတဲ့ မာဆန်က လေ့လာဆန်းစစ်မှုတွေအရ တုန်လှုပ်စရာတွေအများကြီး တွေ့ရဖို့ရှိနေကြောင်း၊ ဒီလိုထိခိုက်နိုင်တယ်ဆိုတာကို ဘောလုံးသမားတွေက သတိမပြုမိသေးဘဲ၊ အသိပညာပေးဖို့ လိုအပ်ကြောင်း ထည့်သွင်းပြောကြားခဲ့ပါတယ်။

    ဦးခေါင်း ပြင်းပြင်းထန်ထန်ထိခိုက်ရင် ၂ ဦးအထိ လူစားလဲခွင့်ရမယ့် စည်းမျဉ်းတစ်ခုကို ပရီးမီးယားလိဂ်မှာ ဇန်နဝါရီလကစပြီး ကျင့်သုံးနေပါတယ်။

    ဖလားကိုင်မြှောက်ချိန်တန်ပြီဟု မန်ယူနောက်ခံလူပြော

    မန်ယူအသင်း ဆုဖလားတွေ ကိုင်မြှောက်ချိန်တန်ပြီလို့ နောက်ခံလူ ဟယ်ရီ မက်ဂွီရီက ပြောကြားလိုက်ပါတယ်။

    မနေ့က Carabao ဖလားမှာ အဲဗာတန်ကို အနိုင်ရပြီးနောက် မန်ယူဟာ ဆီမီးဖိုင်နယ်ကို တက်သွားပြီး မန်စီးတီးနဲ့ တွေ့ရတော့မှာ ဖြစ်ပါတယ်။ မန်ယူရဲ့ နောက်ဆုံး ပြည်တွင်းဖလား ရရှိမှုဟာ ၂၀၁၇ ခုနှစ် League ဖလား ကိုင်မြှောက်နိုင်မှု ဖြစ်ပါတယ်။

    Carabao ဖလား ဆီမီးဖိုင်နယ်ကိုရောက်သွားတာဟာ အရေးပါတဲ့ အောင်မြင်မှုဖြစ်ပြီး ဗိုလ်စွဲဖို့ မျှော်လင့်နေတယ်လို့ မက်ဂွီရီက ဆိုပါတယ်။ ဆိုလ်းရှားက မိမိတို့အသင်းဟာ မနှစ်က ဆီမီးဖိုင်နယ် ၃ ခုကို ရောက်ခဲ့ပြီး အခုအခြေအနေဟာ မလုံလောက်သေးဘူးလို့ ပွဲအပြီးမှာ ​ပြောပါတယ်။

    Ref: BBC

  • ဗုဒ္ဓဟူးနေ့ ဘောလုံးသတင်းများ

    ဗုဒ္ဓဟူးနေ့ ဘောလုံးသတင်းများ

    ဒီဇင်ဘာ ၂၃၊ ၂၀၂၀
    M-Media

    ဘရာဇီးလ်ဂန္တဝင်ကစားသမား ပီလီ၏ စံချိန်တစ်ခုကို မက်ဆီချိုးဖျက်

    မနေ့က ရီးယဲလ် ဗယ်လာဒိုလစ်ကို ၃ ဂိုးပြတ်နဲ့ အနိုင်ရတဲ့ပွဲမှာ ၁ ဂိုးသွင်းပေးခဲ့တဲ့ မက်ဆီဟာ ကလပ်အသင်းတစ်ခုတည်းအတွက် ဂိုးအများဆုံးသွင်းထားတဲ့ ဘရာဇီးလ်ဂန္တဝင်ကစားသမား ပီလီရဲ့စံချိန်ကို ချိုးဖျက်နိုင်ခဲ့ပြီ ဖြစ်ပါတယ်။

    ပီလီဟာ ဆန်းတို့စ်အသင်းမှာ ၁၉၅၆ ခုနှစ်ကနေ ၁၉၇၄ ခုနှစ်အထိ ၁၉ ရာသီကစားခဲ့စဉ်အတွင်း ၆၄၃ ဂိုး သွင်းယူခဲ့ပြီး မက်ဆီကတော့ ၂၀၀၅ ခုနှစ်ကနေစပြီးအခုအချိန်အထိ ဘာစီလိုနာအတွက် ၆၄၄ ဂိုး သွင်းထားနိုင်တာ ဖြစ်ပါတယ်။

    မက်ဆီဟာ ဩဂုတ်လတုန်းက အသင်းကထွက်ဖို့ ကြိုးစားခဲ့ပါသေးတယ်။ နည်းပြ ရော်နယ်ဒိုကိုးမန်းက မက်ဆီဟာ အသင်းမှာ ပျော်ရွှင်နေပြီး ဒီလို ဖန်တီးမှုကောင်းတဲ့ ကစားသမားမျိုးဟာ အသင်းအတွက် အရေးပါတယ်လို့ မနေ့ကပွဲအပြီးမှာ ပြောကြားခဲ့ပါတယ်။

    ဥက္ကဌဟောင်းကို ရာဇဝတ်မှုဖြင့် ဖီဖာက တရားစွဲ

    ဇူးရစ်ချ်မြို့က အရှုံးပြခဲ့တဲ့ ဘောလုံးပြတိုက်မှာ စီမံခန့်ခွဲမှုအမှားတွေရှိတယ်လို့ဆိုကာ ဥက္ကဌဟောင်း ဆပ်ဘလတ္တာကို ကမ္ဘာ့ဘောလုံးအဖွဲ့ချုပ် ဖီဖာက ရာဇဝတ်မှုနဲ့ ဇူးရစ်ချ်မြို့မှာ တိုင်ကြားလိုက်ပါတယ်။

    ၂၀၁၆ ခုနှစ် ဖေဖော်ဝါရီလက ဖွင့်လှစ်ခဲ့တဲ့ ဒီပြတိုက်အတွက် ဘလတ္တာလက်ထက်က ဒေါ်လာ သန်း ၁၄၀ သုံးစွဲခဲ့ရာမှာ မလျော်မကန်သုံးမှုတွေ ပါခဲ့တယ်လို့ လက်ရှိ ဖီဖာ ဘဏ္ဍာရေးအဖွဲ့က ပြောပါတယ်။

    ဒီပြတိုက်ဟာ စဖွင့်တဲ့နှစ်မှာပဲ ဒေါ်လာ သန်း ၅၀ ရှုံးခဲ့ပြီး နောက်ပိုင်းမှာ ပိတ်ဖို့အထိတောင် စီစဉ်ခဲ့တာပါ။ ဘလတ္တာရဲ့ရှေ့နေကတော့ ဖီဖာရဲ့ ဒီစွဲချက်ဟာ အခြေအမြစ်မရှိဘူးလို့ တုန့်ပြန်ပြောကြားခဲ့ပါတယ်။

    အသက် ၈၄ နှစ်အရွယ် ရှိပြီဖြစ်တဲ့ ဘလတ္တာဟာ UEFA ဥက္ကဌ မိုက်ကယ် ပလာတီနီကို ဒေါ်လာ ၂.၂၄ သန်း ပေးမှုမှာ မသမာမှုရှိခဲ့ကြောင်း တွေ့ရပြီးနောက် ဘောလုံးလောကကနေ ၆ နှစ် ပိတ်ပင်ခံထားရပါတယ်။

    စီးရီးအေ ပထမဆုံးအရှုံးအတွက် ပီယာလိုက ကစားသမားများကို အပြစ်တင်

    ကစားသမားတွေဟာ ပွဲအပေါ် အာရုံစူးစိုက်မှုမရှိဘူးလို့ ဂျူဗင်တပ်စ်နည်းပြ ​အန်ဒရီယာ ပီယာလိုက ဝေဖန်ပြောကြားလိုက်ပါတယ်။

    ဂျူဗင်တစ်ပ်ဟာ မနေ့က ဖီအိုရင်တီးနားကို အိမ်ကွင်းမှာ ၃ ဂိုးပြတ်နဲ့ အရှက်တကွဲရှုံးနိမ့်ခဲ့ပြီး ဒါဟာ အခုနှစ် စီးရီးအေ ပထမဆုံး ရှုံးပွဲဖြစ်သလို၊ ​၂၀၁၁ ခုနှစ်နောက်ပိုင်း အိမ်ကွင်း အဆိုးဝါးဆုံး ရှုံးနိမ့်မှုပါ။

    ပီယာလိုကတော့ ကစားသမားတွေဟာ လာတော့မယ့် ခရစ္စမတ်အားလပ်ရက်ကိုပဲ အာရုံရောက်နေပြီး ရှုံးနိမ့်မှုအတွက် မိမိတို့မှာသာ အပြစ်ရှိတယ်လို့ ဆိုပါတယ်။

    Ref: Goal, BBC

  • သောကြာနေ့ ဘောလုံးသတင်းများ

    သောကြာနေ့ ဘောလုံးသတင်းများ

    ဒီဇင်ဘာ ၁၈၊ ၂၀၂၀
    M-Media

    ဖီဖာ၏ တစ်နှစ်တာအကောင်းဆုံး ကစားသမားအဖြစ် လီဝမ်ဒေါ့စကီး ရွေးချယ်ခံရ

    ဘိုင်ယန်မြူးနစ်တိုက်စစ်မှူး ရောဘတ် လီဝမ်ဒေါ့စကီးဟာ ကမ္ဘာ့ဘောလုံးအဖွဲ့ချုပ် Fifa ရဲ့ တစ်နှစ်တာအကောင်းဆုံး ဘောလုံးသမားအဖြစ် ရွေးချယ်ခံခဲ့ရပါတယ်။

    အသက် ၃၂ နှစ်အရွယ် သူဟာ ဘာစီလိုနာတိုက်စစ်မှူး မက်ဆီ၊ ဂျူဗင်တပ်စ်တိုက်စစ်မှူး ရော်နယ်ဒိုတို့ကို ကျော်ဖြတ်ပြီး ဆွတ်ခူးခဲ့တာပါ။

    မနှစ်က ဖလား ၃ လုံးရတဲ့ ဘိုင်ယန်မှာ အဓိကကစားသမားဖြစ်ခဲ့ပြီး ၄၇ ပွဲကစားကာ ၅၅ ဂိုး သွင်းယူပေးနိုင်ခဲ့ပါတယ်။

    မက်ဆီ၊ ရော်နယ်ဒိုတို့နဲ့ တစ်တန်းတည်းဖြစ်တဲ့အတွက် မယုံကြည်နိုင်လောက်အောင်ဖြစ်ရပြီး ဒီဆုဟာ အလွန်အဓိပ္ပါယ်ရှိကြောင်း၊ မိမိအနေနဲ့ အရမ်းမျှော်လင့်ခဲ့ရတဲ့ ဆုတစ်ခုဖြစ်ကြောင်း လီဝမ်ဒေါ့စကီးက ပြောကြားခဲ့ပါတယ်။

    ဖီဖာရဲ့ အကောင်းဆုံးနည်းပြဆုကို လီဗာပူးလ်နည်းပြ ယာဂန်ကလော့ပ်က ရရှိခဲ့ပြီး၊ အကောင်းဆုံးသွင်းဂိုးဆုကို စပါးတိုက်စစ်မှူး ဆွန်ဟွန်မင်က ရရှိခဲ့ပါတယ်။

    အသင်းဘုတ်အဖွဲ့က မိမိကို ထောက်ခံဆဲဟု အာတီတာပြော

    မိမိကို အသင်းဘုတ်အဖွဲ့ဝင်တွေက အပြည့်အ၀ထောက်ခံတယ်လို့ အာဆင်နယ်နည်းပြ မီခေးလ် အာတီတာက ဒီကနေ့သတင်းစာရှင်းလင်းပွဲမှာ ပြောပါတယ်။

    အာဆင်နယ်ဟာ လက်ရှိမှာ အဆင့် ၁၅ နေရာနဲ့ ၃၉ နှစ်အတွင်း အဆိုးရွားဆုံး ရာသီအစခြေအနေကို ရင်ဆိုင်နေရတာပါ။

    အာတီတာက အသင်းကစားပုံ ဆိုးရွားနေတာကို ဝန်ခံခဲ့ပေမယ့် လက်ရှိအနေအထားကို တည်ငြိမ်အောင်လုပ်ဖို့ လိုအပ်တယ်လို့ ဆိုပါတယ်။ ဒါပေမယ့် အသင်းကြုံတွေ့နေရတဲ့ ပြဿနာတွေဟာ အချိန်တိုတိုအတွင်းမှာ ပြေလည်မှာ မဟုတ်ဘူးလို့လည်း သူက ထည့်သွင်းပြောကြားခဲ့ပါတယ်။

    ရူနီ၏သား မန်ယူနှင့် စာချုပ်ချုပ်

    မန်ယူတိုက်စစ်မှူးဟောင်း ဝိန်းရူနီရဲ့ သားဖြစ်သူဟာ မန်ယူလူငယ်အသင်းနဲ့ စာချုပ် ချုပ်ဆိုလိုက်ပါတယ်။

    အသက် ၁၁ နှစ်အရွယ် ကီယာဖြစ်ပြီး သားဖြစ်သူရဲ့ လက်မှတ်ထိုးမှုပုံကို ရူနီက Twitter စာမျက်နှာ တင်ခဲ့ပါတယ်။ ကီယာဟာ ရူနီရဲ့ ကလေး ၄ ယောက်ထဲက အကြီးဆုံး ဖြစ်ပါတယ်။

    ရူနီဟာ မန်ယူမှာ ၁၃ ရာသီမှာ ပွဲ ၅၀၀ ကျော်ကစား ၂၅၃ ဂိုးသွင်းကာ ပရီးမီးယားလိဂ် ၅ လုံး၊ ချန်ပီယံလိဂ် ၁ လုံး အပါအဝင် စုစုပေါင်း ဆုဖလား ၁၆ လုံးအထိ ရရှိခဲ့ပါတယ်။ ရူနီဟာ မန်ယူသမိုင်းမှာ ဂိုးအများဆုံးသွင်းတဲ့ ကစားသမားအဖြစ်လည်း မှတ်တမ်းဝင်ပါတယ်။ လက်ရှိမှာတော့ ဒါဘီကောင်တီမှာ ကစားသမားနည်းပြအဖြစ် ဆောင်ရွက်နေပါတယ်။

    Ref: BBC