နိုဝင်ဘာ ၃၀၊ ၂၀၂၀
M-Media

ဆိုရှယ်မီဒီယာပို့စ်ကြောင့် မန်ယူတိုက်စစ်မှူး ကာဗာနီ ၃ ပွဲပယ်ခံရဖွယ်ရှိနေ
==================
ဆောက်သမ်ကို အနိုင်ရပြီး သိပ်မကြာခင်မှာ Instagram မှာ မန်ယူတိုက်စစ်မှူး ကာဗာနီ ​Share လုပ်ခဲ့တဲ့ ပို့စ်တစ်ခုအတွက် စုံစမ်းစစ်ဆေးမှုတွေ ပြုလုပ်နေပြီး စည်းမျဉ်းစည်းကမ်းတွေ ချိုးဖောက်တာတွေ့ရင် ၃ ပွဲပယ်ပြစ်ဒဏ် ကျခံရနိုင်တယ်လို့ အင်္ဂလန်ဘောလုံးအဖွဲ့ချုပ် FA က ပြောကြားလိုက်ပါတယ်။

၂ ဂိုး အရှုံးကနေ ၃ ဂိုး ပြန်သွင်းကာ အနိုင်ရခဲ့တဲ့ အဲဒီပွဲမှာ ကာဗာနီက ၂ ဂိုး သွင်းခဲ့ပါတယ်။

ကာဗာနီ ပြန်လည်မျှဝေတဲ့ပို့စ်ဟာ သူ့ရဲ့ စွမ်းဆောင်ရည်ကို ပရိတ်သတ်တွေက ချီးကျူးထားတာဖြစ်ပေမယ့် လူမည်းတွေကို စော်ကားတဲ့အသုံးနှုန်း ပါဝင်နေတာပါ။ နောက်ပိုင်းမှာ ဒီပို့စ်ကို ပြန်ဖျက်သွားပါတယ်။

FA ရဲ့ ဆိုရှယ်မီဒီယာ စည်းမျဉ်းစည်းကမ်းမှာ လူမျိုးရေးခွဲခြားတဲ့ အသုံးအနှုန်းကို ကိုယ်တိုင်ရေးတင်တာ ဒါမှမဟုတ် တစ်ဆင့် ပြန် Share တာ နှစ်မျိုးစလုံးကို တားမြစ်ထားပြီး ချိုးဖောက်ရင် အရေးယူခံရမှာ ဖြစ်ပါတယ်။

အထုတ်ခံရမည်ကို မစိုးရိမ်ဟု အာဆင်နယ်နည်းပြပြော
====================
မိမိအနေနဲ့ အသင်းကထုတ်ပယ်ခံရမှာကို မစိုးရိမ်ဘူးလို့ အာဆင်နယ်နည်းပြ မီခေးလ် အာတီတာက ပြောကြားလိုက်ပါတယ်။

မနေ့က ဝုလ်ဗ်ကို အိမ်ကွင်းမှာ ရှုံးခဲ့တဲ့ အာဆင်နယ်ဟာ ၁၀ ပွဲကစားအပြီးမှာ ၅ ပွဲအထိရှုံးကာ အဆင့် ၁၄ နေရာကို ရောက်နေပါတယ်။ ဒါဟာ ၁၉၈၁ ခုနှစ်နောက်ပိုင်း ရာသီအစမှာ အဆိုးရွားဆုံး အခြေအနေနဲ့ ကြုံတွေ့နေရတာပါ။

အာတီတာကတော့ နည်းပြဖြစ်လာကတည်းက တစ်နေ့မဟုတ်တစ်နေ့ အထုတ်ခံရနိုင်တယ်ဆိုတာကို သိထားပြီး၊ လက်ရှိမှာ ရှိတဲ့ကစားသမားတွေနဲ့ အသင်းကို အကောင်းဆုံးပေးဆပ်သွားဖို့သာ ရည်ရွယ်ထားတယ်လို့ ပြောကြားခဲ့ပါတယ်။

မိမိတို့မှာ မြင်းပုလေးသားဖြစ်သည်ဟု စပါးနည်းပြပြော
================
စပါးဟာ ပရီးမီးယားလိဂ်ချန်ပီယံဘွဲ့ကို စိန်ခေါ်လာနေတယ်ဆိုတဲ့ သတင်းတွေကို မော်ရင်ဟိုက ထပ်မံငြင်းဆိုလိုက်ပြီး မိမိတို့အသင်းဟာ စိန်ခေါ်နိုင်စွမ်းမရှိတဲ့ ‘မြင်းပူလေး’ သာ ဖြစ်တယ်လို့ ပြောကြားလိုက်ပါတယ်။

မနေ့က ချယ်ဆီးနဲ့ ဂိုးမရှိသရေကျခဲ့ပြီးတဲ့နောက် ဂိုးကွာခြားချက်အသာနဲ့ စပါးဟာ ဇယားထိပ်ကို ရောက်လာပြီး ဒါဟာ ၁၉၈၅ ခုနှစ်နောက်ပိုင်း ၁၀ ပွဲအပြီး ပထမဆုံးအကြိမ် အဆင့် ၁ နေရာကို ရရှိတာပါ။

မော်ရင်ဟိုကတော့ ရလဒ်အတွက် အသင်းသားတွေ မပျော်ရွှင်ပေမယ့် အသင်းရဲ့ ကစားကွက်ပိုင်းဆိုင်ရာနဲ့ စိတ်ဓာတ်ပိုင်းဆိုင်ရာ တိုးတက်လာတယ်လို့ မှတ်ချက်ပေးခဲ့ပါတယ်။ ​

စပါးဟာ ၁၉၅၁ နဲ့ ၁၉၆၁ ခုနှစ်တွေမှာ ပရီးမီးယားလိဂ်ဖလား ရရှိထားပြီး နှစ်ကြိမ်စလုံးဟာ ၁ နဲ့ဆုံးတဲ့နှစ်တွေ ဖြစ်တဲ့အတွက် အခုနှစ်မှာလည်း ဖလားရနိုင်ဖွယ်ရှိတယ်လို့ သုံးသပ်နေကြပါတယ်။

Ref: BBC

#mmFootballNews

ဒီဇင်ဘာ ၁၊ ၂၀၂၀
M-Media

မကြာခင်ပြန်လာရန် မျှော်လင့်သည်ဟု ဝုလ်ဗ်တိုက်စစ်မှူးပြော
============
ဒဏ်ရာအမြန်ပျောက်ပြီး သိပ်မကြာခင်မှာ ကွင်းထဲပြန်လာဖို့ မျှော်လင့်တယ်လို့ ဝုလ်ဗ်တိုက်စစ်မှူး ရာအူးလ် ဂျီမီနက်ဇ်က ပြောကြားလိုက်ပါတယ်။

အခုတစ်ပတ် အာဆင်နယ်ကို ၂ ဂိုး ၁ ဂိုးနဲ့ အနိုင်ရတဲ့ပွဲမှာ ဂျီမီနက်ဇ်ဟာ အာဆင်နယ်နောက်ခံလူ ဒေးဗစ်လူးဝစ်နဲ့ ထိခိုက်မိပြီး ဦးခေါင်းအက်ကွဲဒဏ်ရာ ရရှိခဲ့တာပါ။

ကွင်းအတွင်း သတိမေ့သွားပြီး အောက်ဆီဂျင်ပေးကာ ကွင်းပြင်ထုတ်ခဲ့ရတာကြောင့် အသင်းသားတွေနဲ့ ပရိတ်သတ်တွေအကြား စိုးရိမ်မှုတွေ မြင့်တက်ခဲ့ပါတယ်။

ဒါပေမယ့် ဆေးရုံမှာ သတိပြန်ရခဲ့ပြီး ခွဲစိပ်ကုသမှုလည်း ခံယူခဲ့ရပါတယ်။ ဂျီမီနက်ဇ်က မိမိကို အားပေးခဲ့ကြတဲ့သူတွေအတွက် ကျေးဇူးတင်တယ်လို့ ဒဏ်ရာရအပြီး ပထမဆုံးတင်တဲ့ မနေ့က Twitter ပို့စ်မှာ ရေးသားခဲ့ပါတယ်။

ဆိုရှယ်မီဒီယာမှ လူမျိုးရေးခွဲခြားသည့် စကားလုံးအတွက် ကာဗာနီ ပြန်တောင်းပန်
=================
Instagram အကောင့်က ပို့စ်တစ်ခုမှာ လူမျိုးရေးခွဲခြားတဲ့စကားလုံး ပါသွားတဲ့အတွက် မန်ယူတိုက်စစ်မှူး အက်ဒင်ဆန် ကာဗာနီက ပြန်လည်တောင်းပန်လိုက်ပါတယ်။

သူ ၂ ဂိုး သွင်းပြီး ဆောက်သက်တမ်ကို ၃ ဂိုး ၂ ဂိုးနဲ့ အနိုင်ရတဲ့ ဒီတစ်ပတ် ပရီးမီးယားလိဂ်ပွဲအပြီး သူ့ရဲ့ စွမ်းဆောင်ရည်ကို သူငယ်ချင်းတစ်ယောက်က ချီးကျူးထားတဲ့ပို့စ်ကို Share ရာမှာ စပိန်ဘာသာစကားနဲ့ ရေးထားတဲ့ ဒီစကားလုံး ပါသွားတာ ဖြစ်ပါတယ်။

ဒီအတွက် ​အင်္ဂလိပ်ဘောလုံးအဖွဲ့ချုပ် FA ကလည်း စုံစမ်းစစ်ဆေးမှု ပြုလုပ်နေပါတယ်။ ကာဗာနီက မိမိဟာ လူမျိုးရေးခွဲခြားမှုကို လုံး၀ဆန့်ကျင်သူဖြစ်ပြီး ပို့စ်မှာ ဒီစကားလုံးပါတယ်ဆိုတာ သိတာနဲ့ ဖျက်ပစ်ခဲ့ကြောင်း ပြောကြားခဲ့ပါတယ်။

မန်ယူက ထုတ်ပြန်တဲ့ ကြေငြာချက် ကာဗာနီဟာ တမင်လုပ်ခဲ့တာမဟုတ်ကြောင်း မိမိတို့အသင်းနဲ့ ကစားသမားတွေဟာ လူမျိုးရေးခွဲခြားမှုကို တစ်စိုက်မတ်မတ် ဆန့်ကျင်သွားမှာဖြစ်ကြောင်း ဖော်ပြထားပါတယ်။

Ref: BBC