Tag: India

ဒီဇင်ာ ၃၁၊ ၂၀၂၁
M-Media

-လွတ်လပ်ရေးဗိသုကာ မဟတ္တမ ဂန္ဒီကို စော်ကားပြောဆိုပြီး၊ ဂန္ဒီကို သတ်ဖြတ်တဲ့ လူသတ်သမားကို ချီးကျူးခဲ့တဲ့ ဟိန္ဒူဘုန်းကြီးကို အိန္ဒိယ ရဲတပ်ဖွဲ့က ဖမ်းဆီးလိုက်ပါတယ်။

ဂန္ဒီဟာ ၁၉၄၈ ခုနှစ် မြို့တော်ဒေလီက ဆုတောင်းပွဲတစ်ခုမှာ ဟိန္ဒူအစွန်းရောက်တစ်ဦးရဲ့ သေနတ်နဲ့ ပစ်ခတ်သတ်ဖြတ်ခြင်းကို ခံခဲ့ရတာပါ။ ခေတ်​အဆက်ဆက် သဘောထားတင်းမာတဲ့ ဟိန္ဒူအဖွဲ့အစည်းတွေက ဂန္ဒီဟာ မွတ်စလင်တွေအပေါ် အရမ်းဂရုဏာသက်တယ်ဆိုပြီး ဝေဖန်ရှုတ်ချခဲ့ကြတာ ဖြစ်ပါတယ်။

ဒီဇင်ဘာလစောပိုင်း နိုင်ငံမြောက်ပိုင်းက ဟိန္ဒူဘာသာရေးမြို့ ဟာရစ်ဒ်ဝါမှာ ပြုလုပ်တဲ့ ဘာသာရေးအခမ်းအနားမှာ ဟိန္ဒူဘုန်းကြီးတွေက ဂန္ဒီကို ရှုတ်ချပြောဆိုခဲ့သလို နိုင်ငံအတွင်းက မွတ်စလင်တွေကို လူမျိုးတုန်းသတ်ဖြတ်ဖို့လည်း တိုက်တွန်းခဲ့ပါတယ်။

ဒီဟောပြောပွဲမှာ ပါဝင်ခဲ့တဲ့ ဟိန္ဒူဘုန်းကြီး ကလီချာရန် မဟာရက်ဂျ်ကို ရဲတပ်ဖွဲ့က နိုင်ငံအလယ်ပိုင်း မဒ်ယာ ပရာဒက်ရှ်မြို့မှာ မနေ့က ဖမ်းဆီးလိုက်ပါတယ်။ ဟောပြောပွဲမှာ ဘာသာတရားနှစ်ခုအကြား အမုန်းပွားအောင် လုပ်ဆောင်မှုကြောင့် ဒီလိုဖမ်းဆီးတာလို့ ရဲတပ်ဖွဲ့ရဲ့ပြောကြားမှုကို ကိုးကားပြီး အိန္ဒိယမီဒီယာတွေက ဖော်ပြပါတယ်။

မဟာရက်ဂျ်က ဂန္ဒီဟာ အိန္ဒိယာနိုင်ငံကို ဖျက်ဆီးခဲ့သူဖြစ်ပြီး သူ့ကိုသတ်ခဲ့တဲ့ လူသတ်သမား နာသူရမ် ဂေါ့ဒ်ဆီကို အလေးပြုတယ်လို့ တရားပွဲမှာ ထည့်ပြောခဲ့တာပါ။ ရဲတပ်ဖွဲ့က စုံစမ်းစစ်ဆေးမှုတွေ ဆက်လုပ်နေပြီး အမှုခိုင်လုံရင် တရားစွဲခံရမှာ ဖြစ်ပါတယ်။

ဟာရစ်ဒ်ဝါက တရားပွဲမှာ ဟိန္ဒူဘုန်းကြီးတွေက မွတ်စလင်တွေအပေါ် လူမျိုးတုန်းသတ်ဖြတ်မှုလုပ်ဖို့ တိုက်တွန်းဆော်ဩနေတဲ့ ဗီဒီယိုဟာ ဒီဇင်ဘာအလယ်ပိုင်းလောက်က ဆိုရှယ်မီဒီယာမှာ ပြန့်နှံ့ခဲ့ပြီး နိုင်ငံတစ်ဝှမ်း ဝေဖန်မှုတွေလည်း မြင့်တက်လာပါတယ်။ ဘုန်းကြီးတွေဟာ မြန်မာစစ်တပ်က မွတ်စလင်တွေအပေါ် နှိပ်စက်သတ်ဖြတ်သလိုမျိုး လုပ်ဖို့ အိန္ဒိယစစ်တပ်၊ နိုင်ငံရေးသမားတွေနဲ့ ဟိန္ဒူတွေကို တိုက်တွန်းခဲ့တာပါ။

အိန္ဒိယပြည်သူတွေက ဒီလိုအမုန်းတရားဟောပြောမှုတွေကို ရှုတ်ချကြောင်း နိုင်ငံတစ်ဝှမ်းမှာ ဆန္ဒထုတ်ဖော်ခဲ့ကြပါတယ်။

တနင်္လာနေ့က နယူးဒေလီမြို့က ဆန္ဒထုတ်ဖော်မှုအတွင်း ကျောင်းသားအဖွဲ့အစည်းအများအပြားက အဖွဲ့ဝင်တွေ ပါဝင်ခဲ့ကြပါတယ်။

Ref: Aljazeera

ဒီဇင်ဘာ ၂၁၊ ၂၀၂၁
M-Media

-အိန္ဒိယနိုင်ငံအနောက်ပိုင်း မဟာရက်ရှ်ထရာပြည်နယ်မှာ မျောက်နဲ့ ခွေးတို့အကြား အပြန်အလှန် တိုက်ခိုက်မှုတွေ ဖြစ်ပွားတာကြောင့် အနည်းဆုံး ခွေးကောင်ရေ ၂၅၀ လောက် သေဆုံးပြီး၊ လူတွေကိုပါ မျောက်တွေက တိုက်ခိုက်လာတယ်လို့ ဒေသတွင်းမီဒီယာတွေက ဖော်ပြပါတယ်။

မျောက်ပေါက်လေးတစ်ကောင်ကို ခွေးတွေက ကိုက်သတ်ခဲ့တဲ့ ပြီးခဲ့တဲ့တစ်ပတ်ကစလို့ တိုက်ပွဲ စတင်ခဲ့ပြီး မျောက်တွေက လက်စာချေးတိုက်ခိုက်မှုတွေ ပိုလုပ်လာပါတယ်။

ဘိဒ်ခရိုင် မာဂျာလ်ဂေါင်မြို့မှာ တိုက်ခိုက်မှုတွေ အဓိကဖြစ်ပွားတာဖြစ်ပြီး မျောက်တွေက ခွေးပေါက်လေးတွေကို ဖမ်းကာ သစ်ပစ်အမြင့်တွေ၊ တိုက်အမြင့်တွေပေါ်ကနေ အောက်ကို ပစ်ချ သတ်ဖြတ်ကြတယ်လို့ ဒေသခံတွေက ပြောပါတယ်။

တိုက်ခိုက်မှုကြောင့် အနည်းဆုံး ခွေးအကောင်ရေ ၂၅၀ လောက်သေဆုံးခဲ့ပြီး တစ်ချို့ရွာတွေမှာ ခွေးပေါက်တွေ လုံး၀မရှိတော့သလောက် ဖြစ်သွားတယ်လို့ ဆိုပါတယ်။

မျောက်တွေဟာ ကလေးငယ်တွေကိုပါ တိုက်ခိုက်တာ၊ ဖမ်းတာတွေ လုပ်လာတာကြောင့် သားရိုင်းတိရိစ္ဆာန် ထိန်းသိမ်းရေးအာဏာပိုင်တွေကို ဒေသခံတွေက တိုင်ကြားမှု ရှိလာပါတယ်။
ဘိဒ်ခရိုင် သားရိုင်းတိရစ္ဆာန်ထိန်းသိမ်းရေး တာဝန်ရှိသူ ဆာချင်ကန်က တိုက်ခိုက်မှုမှာ ပါဝင်တယ်လို့ ယူဆရတဲ့ မျောက်နှစ်ကောင်ကို ဖမ်းဆီးထားတယ်လို့ ပြောပါတယ်။

ဒီပြဿနာနဲ့ပတ်သက်ပြီး အိန္ဒိယ ဆိုရှယ်မီဒီယာအသုံးပြုသူတွေကြားမှာ ပြန့်နှံ့နေသလို အာဏာပိုင်တွေက တိရစ္ဆာန်တွေရဲ့ သဘောသဘာ၀ကို နားမလည်ဘဲ မျောက်တွေ တုန့်ပြန်လက်စားချေတဲ့ ပုံစံမျိုး မရေးသား မပြောဆိုကြဖို့ တိုက်တွန်းထားပါတယ်။

Ref: Vice

ဒီဇင်ဘာ ၁၅၊ ၂၀၂၁
M-Media

-ခရစ်ယာန်ဘာသာ အဓမ္မကူးပြောင်းခိုင်းတယ်ဆိုတဲ့ စွပ်စွဲချက်နဲ့ နိုဘယ်ငြိမ်းချမ်းရေးဆုရှင် မာသာထရီဇာ တည်ထောင်ခဲ့တဲ့ ပရဟိတအဖွဲ့ Missionaries of Charity ကို အိန္ဒိယရဲတပ်ဖွဲ့က စုံစမ်းစစ်​​ဆေးမှုတွေ ပြုလုပ်နေပါတယ်။

ဒါဟာ အာဏာရ ဟိန္ဒူအမျိုးသားရေးပါတီ BJP ရဲ့ လူနည်းစုခရစ်ယာန်ဘာသာဝင်တွေအပေါ် နှိပ်ကွပ်မှုတွေထဲက ပုံစံတစ်ခုလို့ လေ့လာစောင့်ကြည့်သူတွေက သုံးသပ်ပါတယ်။

BJP ကြီးစိုးတဲ့ နိုင်ငံအနောက်ပိုင်း ဂူဂျာရတ်ပြည်နယ် ဗာဒိုဒါရာမြို့မှာ Missionaries of Charity ပရဟိတအဖွဲ့က သူတို့စောင့်ရှောက်ထားတဲ့ အမျိုးသမီးငယ်တွေကို လက်၀ါးကပ်တိုင်ဆွဲကြိုးတွေ အတင်းဝတ်ခိုင်းတာ၊ သမ္မာကျမ်းစာ အဓမ္မဖတ်ခိုင်းတာတွေ လုပ်တယ်ဆိုတဲ့ သတင်းကြောင့် စုံစမ်းစစ်​ဆေးမှုတွေ လုပ်နေတယ်လို့ ပြည်နယ်အာဏာပိုင်တွေက ပြောပါတယ်။

ခရစ်ယာန်သာသနာပြုအဖွဲ့တွေက ဟိန္ဒူတွေကို အဓမ္မဘာသာပြောင်းခိုင်းတယ်လို့ စွပ်စွဲပြီး ခရစ်ယာန်တွေအပေါ် ကန့်သတ်နှိပ်ကွပ်မှုတွေကို ပြီးခဲ့တဲ့နှစ်တွေအတွင်း အိန္ဒိယက ပြည်နယ်တစ်ချို့မှာ လုပ်ဆောင်လာပြီး ဝန်ကြီးချုပ် နရန်ဒရာမိုဒီရဲ့ ဇာတိပြည်နယ် ဂူဂျာရတ်လည်း ဒီထဲမှာ ပါဝင်ပါတယ်။

Missionaries of Charity အဖွဲ့ရဲ့ လုပ်ရပ်တွေကို ကလေးသူငယ်ရေးရာအဖွဲ့တွေ၊ အခြားမြို့မှာရှိတဲ့ အာဏာပိုင်တွေက ​သတင်းပို့လာတာကြောင့် ရဲတပ်ဖွဲ့ကို တိုင်ကြားတာဖြစ်တယ်လို့ ဗာဒိုဒါရာမြို့ရဲ့ လူမှုဖူလှုံရေးဆိုင်ရာ အကြီးအကဲ မာယန့် ထရီဗီဒီက​ ပြောပါတယ်။

စာကြည့်တိုက်ထဲမှာ သမ္မာကျမ်းစာ ၁၃ အုပ်တွေ့သလို၊ ရိပ်သာက မိန်းကလေးငယ်တွေကို သမ္မကျမ်းစာ အဓမ္မဖတ်ခိုင်းတာကို သိရတယ်လို့ တိုင်ကြားချက်မှာ ဖော်ပြထားပါတယ်။

Missionaries of Charity ပရဟိတအဖွဲ့ကို နိုဘယ်ငြိမ်းချမ်းရေးဆုရှင်ဖြစ်တဲ့ ခရစ်ယာန်ကက်သလစ် သီလရှင် မာသာထရီဇာက ၁၉၅၀ ခုနှစ်မှာ တည်ထောင်ခဲ့တာပါ။

အလ်ဘေးနီးယန်းလူမျိုးဖြစ်တဲ့ မာသာထရီဇာဟာ ဘ၀သက်တမ်းတစ်လျှောက်လုံးကို အိန္ဒိယနိုင်ငံ ကိုလ်ကတ္တားမြိုမှာ အခြေချကာ လူသားအကျိုးပြုလုပ်ငန်းတွေလုပ်ရင်း ကုန်ဆုံးခဲ့တာ ဖြစ်ပါတယ်။ HIV/AIDS၊ ကျောက်ရောဂါ၊ တီဘီရောဂါ ပပျောက်ရေး၊ စာတတ်မြောက်ရေးကနေ အိန္ဒိယပြည်သူတွေအတွက် နယ်ပယ်စုံမှာ မာသာထရီဇာက ကူညီပေးခဲ့ပြီး နိုင်ငံတကာက ဂုဏ်ပြုဆုတံဆိပ်ပေါင်းများစွာ ရရှိခဲ့သလို ၁၉၇၉ ခုနှစ်မှာ နိုဘယ်ငြိမ်းချမ်းရေးဆု ရရှိခဲ့ပါတယ်။

ခရစ်ယာန်ကက်သလစ်အသင်းတော်ရဲ့ အကြီးအကဲ ပုပ်ရဟန်းမင်းကြီး ဖရန်စစ်ဟာ ၂၀၁၆ ခုနှစ်မှာ မာသာထရီဇာကို ‘သူတော်စင်’ အဖြစ် သတ်မှတ်ကြေငြာခဲ့ပါတယ်။

ဟိန္ဒူအမျိုးသားရေးပါတီ BJP ၂၀၁၄ ခုနှစ်မှာ အာဏာရပြီးကတည်းက အိန္ဒိယမှာရှိနေတဲ့ လူနည်းစု ခရစ်ယာန်တွေဟာ ဟိန္ဒူလက်ယာစွန်းရောက်တွေရဲ့ တိုက်ခိုက်မှု၊ အစိုးရရဲ့ ကန့်သတ်နှိပ်ကွပ်မှုတွေကို ပိုမိုခံစားလာရတယ်လို့ တက်ကြွလှုပ်ရှားသူတွေက ပြောပါတယ်။

အခုနှစ်အတွင်းမှာပဲ နိုင်ငံတစ်ဝှမ်း ခရစ်ယာန်ဆန့်ကျင်ရေး တိုက်ခိုက်မှုပေါင်း ၃၀၀ ကျော် ဖြစ်ပွားခဲ့ပါတယ်။ နောက်ဆုံးအဖြစ်အပျက်က မဒ်ယာပရာဒက်ရှ်ပြည်နယ်မှာ ပြီးခဲ့တဲ့တစ်ပတ်က ဖြစ်ပွားခဲ့တာပါ။ ခရစ်ယာန်စာသင်ကျောင်းတစ်ခုမှာ ကျောင်းသားတွေ စာမေးပွဲဖြေနေတဲ့အချိန် လူ ၃၀၀ လောက်က ၀ိုင်းပြီး တိုက်ခိုက်ခဲ့တာ ဖြစ်ပါတယ်။

Ref: Reuters