Tag: India

မေ ၂၅၊ ၂၀၂၁
M-Media

-လေယာဉ်စင်းလုံးငှားပြီး ဧည်သည့် ၁၆၀ ကျော်နဲ့ လေပေါ်မှာပြုလုပ်ခဲ့တဲ့ မင်္ဂလာပွဲတစ်ခုကို ကိုဗစ်ဖောက်ဖျက်မှုနဲ့ အိန္ဒိယအာဏာပိုင်တွေက စစ်ဆေးနေပါတယ်။

အမည်မထုတ်ပြန်တဲ့ စုံတွဲနှစ်ဦးဟာ SpiceJet လေယာဉ်ကို စင်းလုံးငှားပြီး တမီလ်နာဒူးပြည်နယ် မာဒူရိုင်မြို့ကနေ ကာနာတာကာပြည်နယ် ဘန်ဂလူမြို့ကို သမိုင်းဝင် Meenakshi Amman ဘုရားကျောင်းပေါ် ပျံသန်းကာ မင်္ဂလာပွဲ ကျင်းပခဲ့တာပါ။

မိသားစုနဲ့ သူငယ်ချင်းမိတ်ဆွေတွေအပါအဝင် လူပေါင်း ၁၆၁ ဦး လေယာဉ်ပေါ်မှာ လိုက်ပါခဲ့ပြီး ဓာတ်ပုံတွေရိုက်ကာ ဆိုရှယ်မီဒီယာတွေမှာ တင်ခဲ့ကြပါတယ်။ ကိုဗစ်ကူးစက်မှု အကြီးအကျယ်ဖြစ်နေတာကြောင့် လူ ၅၀ ထက်ပိုမစုဖို့ အိန္ဒိယအစိုးရက အမိန့်ထုတ်ထားတာ ဖြစ်ပါတယ်။

နှာခေါင်းစည်းတပ်တာ၊ ခပ်ခွာခွာထိုင်တာ စတဲ့ လေကြောင်းစည်းမျဉ်းစည်းကမ်းတွေကိုလည်း တစ်ဦးမှ လိုက်နာခြင်းမရှိတာကို ဓာတ်ပုံတွေမှာ တွေ့ရပါတယ်။

အိန္ဒိယ အရပ်ဖက်လေကြောင်းဌာနက ဒီကိစ္စအတွက် စုံစမ်းစစ်ဆေးမှုလုပ်ဖို့ SpiceJet ကို အမိန့်ပေးထားပြီး၊ လေယာဉ်ဝန်ထမ်းတွေကိုလည်း ရာထူးကနေ ရပ်ဆိုင်းထားပါတယ်။

မင်္ဂလာမောင်နှံနဲ့ မင်္ဂလာပွဲကို တက်ရောက်သူတွေအားလုံး လေယာဉ်စီးနင်းမှု ပိတ်ပင်ခံရနိုင်တယ်လို့ လေကြောင်းလိုင်းတာဝန်ရှိသူတစ်ဦးက AFP သတင်းဌာနကို ပြောကြားခဲ့ပါတယ်။

Ref: AFP

မေ ၃၊ ၂၀၂၁
M-Media

-မိမိတို့ရဲ့သတိပေးမှုကို အစိုးရက မလိုက်နာ အကောင်အထည်မဖော်တဲ့အတွက် ဆိုးဆိုးဝါးဝါး ကိုဗစ်ဒုတိယလှိုင်းကို ကြုံတွေ့ရတာဖြစ်တယ်လို့ အိန္ဒိယ ကျန်းမာရေး သုတေသနပညာရှင်တွေက ပြောကြားလိုက်ပါတယ်။

အိန္ဒိယအစိုးရက ဖွဲ့စည်းပေးထားတဲ့ သုတေသန ပညာရှင်အဖွဲ့ INSACOG က မူရင်းကိုဗစ်ဗိုင်းရပ်စ်ထက် ပိုပြီးကူးစက်လွယ်တဲ့ ကြောက်စရာ ပုံပြောင်း ဗိုင်းရပ်စ်တစ်မျိုး ပြန့်နှံ့လာနိုင်တယ်လို့ မတ်လ အစောပိုင်းကတည်းက သတိပေးခဲ့တာ ဖြစ်ပါတယ်။

ဒါပေမယ့် ဝန်ကြီးချုပ်မိုဒီအစိုးရဟာ လိုအပ်တဲ့ ကန့်သတ်တားဆီးမှုတွေ မလုပ်ခဲ့သလို၊ လူသိန်းချီစုဝေးတဲ့ ဘာသာရေးပွဲတွေကို ကျင်းပခွင့်ပေးတာ၊ အာဏာရ BJP ပါတီနဲ့ အတိုက်အခံပါတီတွေက လူစုလူဝေးနဲ့ ချီတက်ဆန္ဒပြတာတွေ ရှိခဲ့တယ်လို့ ပညာရှင်တွေက ရိုက်တာသတင်းဌာနကို ပြောကြားခဲ့ပါတယ်။

အစိုးရရဲ့ စိုက်ပျိုးရေးမူဝါဒ ပြောင်းလဲမှုကို မကျေနပ်တဲ့ ထောင်နဲ့ချီတဲ့ လယ်သမားတွေကလည်း ဆန္ဒပြမှုုတွေ ပြုလုပ်ခဲ့ပါသေးတယ်။

အိန္ဒိယဟာ လက်ရှိမှာ ကိုဗစ်ဒုတိယလှိုင်းကို ကြုံတွေ့နေရပြီး ကူးစက်သေဆုံးမှုအရေအတွက်ဟာ ပထမလှိုင်းထက် ပိုမိုပြင်းထန်ကာ တစ်နေ့ကို အနည်းဆုံး ကူးစက်သူ ၃ သိန်းကျော် သေဆုံးသူ ၃ ထောင်ကျော် ရှိနေတာပါ။

INSACOG အဖွဲ့ဟာ ကိုဗစ်ဒုတိယလှိုင်းကို ဖြစ်စေတဲ့ ပုံပြောင်းဗိုင်းရပ်စ် B.1.617 ကို ဖေဖော်ဝါရီလ အစောပိုင်းကတည်းက တွေ့ခဲ့တာဖြစ်ပြီး ဒီအကြောင်း အသေးစိတ် အစီရင်ခံစာကို မတ်လ ၁၀ ရက်နေ့မှာ ကျန်းမာရေးဝန်ကြီးဌာနအောက်က ကူးစက်ရောဂါ ထိန်းချုပ်ရေးဌာန NCDC ကို ပေးအပ်ခဲ့ပါတယ်။ အစီရင်ခံစာမှာ ပုံပြောင်းဗိုင်းရပ်စ်ဟာ နိုင်ငံတစ်ဝှမ်းကို အလျင်အမြန် ပြန့်နှံ့နိုင်တယ်လို့ သတိပေးထားပါတယ်။

ဝန်ကြီးချုပ် နရန်ဒရာမိုဒီကို တိုက်ရိုက်အစီရင်ခံစာ တင်သွင်းရတဲ့ အစိုးရ ထိပ်တန်းတာဝန်ရှိသူတစ်ဦးကိုလည်း ဒီသတိပေးချက် ပေးပို့ခဲ့ပေမယ့် ဝန်ကြီးချုပ် ဒီအစီရင်ခံစာ ရရှိခဲ့လားဆိုတာ ရှင်းရှင်းလင်းလင်း မသိရပါဘူး။

INSACOG အဖွဲ့ရဲ့ ဥက္ကဌ ရှာဟစ် ဂျမီးလ်က အာဏာပိုင်တွေဟာ မိမိတို့အဖွဲ့ရဲ့ ရှာဖွေတွေ့ရှိမှုကိုအလေးထားရဲ့လားဆိုတာ မသိဘူးလို့ ပြောကြားခဲ့ပါတယ်။

“မူဝါဒဆိုတာ အခြားအရာတွေထက် သက်သေအထောက်အထားတွေကို အခြေခံပြီး ဆွဲရတာပါ။ မူဝါဒရေးဆွဲရာမှာ သိပ္ပံဆိုင်ရာတွေ့ရှိချက်တွေ ထည့်မတွက်မှာကို ကျွန်တော် စိုးရိမ်မိပါတယ်။ ကျွန်တော့်ရဲ့ ထင်မြင်ချက်ကို ဒီမှာပဲ ရပ်လိုက်တာ ကောင်းပါတယ်။ ကျွန်တော်တို့ သိပ္ပံပညာရှင်တွေက အထောက်အထားတွေပေးတယ်။ မူဝါဒချတာကတော့ အစိုးရအလုပ်ပါ”

Ref: Reuters