ဧပြီ ၁၈၊ ၂၀၂၁
M-Media
-အိန္ဒိယနိုင်ငံမှာ ကိုဗစ်ကူးစက်မှု အလွန်အမင်း ပြန်လည်မြင့်တက်လာပြီး ကျန်းမာရေးစနစ် လဲပြိုသွားနိုင်တဲ့ အခြေအနေမျိုးအထိ ရောက်လာနိုင်တယ်လို့ ကျွမ်းကျင်သူတွေက သတိပေးထားပါတယ်။
ပြီးခဲ့တဲ့ ၂၄ နာရီအတွင်း ကူးစက်မှု ၂ သိန်း ၆ သောင်းကျော် ရှိခဲ့ပြီး ၄ ရက်ဆက် ၂ သိန်းကျော်တာ ဖြစ်ပါတယ်။ ဒါ့ကြောင့် စုစုပေါင်း ကူစက်မှု ၁၄.၇ သန်း ရှိပြီး အမေရိကန်ပြီးရင် ကမ္ဘာမှာ ဒုတိယအများဆုံး ကိုဗစ်ကူစက်တဲ့နိုင်ငံလည်း ဖြစ်ပါတယ်။
မနေ့က ကိုဗစ်ကြောင့် သေဆုံးသူ ၁၅၀၀ ရှိခဲ့ပြီး စုစုပေါင်း သေဆုံးမှုဟာ ၁၇၇၁၅၀ ဦး ရှိလာတာပါ။
ကိုဗစ်ကူးစက်မှု ပြန်လည်မြင့်တက်လာတာကြောင့် ဆေးရုံနဲ့ ဆေးဝါး မလုံလောက်မှုတွေ ဖြစ်နေပြီး ဆိုးရွားတဲ့ ဒေသတစ်ချို့မှာ အစိုးရက ခေတ္တညမထွက်ရအမိန့် ထုတ်ပြန်ထားပါတယ်။
အာဏာရ BJP ပါတီဟာ လာမယ့်တစ်ပတ်အတွင်း လူအများအပြားပါဝင်မယ့် လူထုချီတက်ပွဲ အနည်းဆုံး ၂ ခုလုပ်ဖို့ စီစဉ်ထားသလို၊ ဟိန္ဒူဘာသာရေးပွဲတစ်ချို့လည်း နိုင်ငံတစ်ဝှမ်း ကျင်းပဖို့ ရှိတာကြောင့် လူစုလူဝေးများပြီး ကိုဗစ်ကူးစက်မှု အဆမတန် မြင့်တက်လာနိုင်တယ်ဆိုတဲ့ စိုးရိမ်မှုတွေလည်း ရှိနေပါတယ်။
Ref: Reuters
