ဇန်နဝါရီ ၂၊ ၂၀၂၁
M-Media
အင်ဒိုရီခရိုင်တွင် ဖြစ်ပွားခဲ့သည့် တိုက်ခိုက်မှု မြင်ကွင်း
-နိုင်ငံအလယ်ပိုင်း မဒ်ယာပရာဒက်ရှ်မြို့မှာ ပြီးခဲ့တဲ့ နှစ်ပတ်အတွင်း မွတ်စလင်တွေကို ပစ်မှတ်ထားတဲ့ တိုက်ခိုက်မှု အနည်းဆုံး ၃ ခု ဖြစ်ပွားခဲ့ပြီးနောက် လူ ၅၀ လောက်ကို ရဲတပ်ဖွဲ့က ဖမ်းဆီးထားပါတယ်။
အူတာပရာဒက်ရှ်ပြည်နယ် အယွဒ္ဒယမြို့က ဖျက်ဆီးခံထားရတဲ့ ဘာဘရီဗလီနေရာမှာ ရာမဘုရားကျောင်း ဆောက်လုပ်နိုင်ရေး ဟိန္ဒူလက်ယာစွန်းရောက်အုပ်စုတွေက လူစုပြီး ရန်ပုံငွေကောက်ခံမှုအတွင်း ဒီလိုတိုက်ခိုက်မှုတွေ ဖြစ်ခဲ့တာပါ။
အင်္ဂါနေ့ အင်ဒိုရီခရိုင်က မွတ်စလင်အများစုနေထိုင်တဲ့ ကျေးရွာတစ်ခုကိုရောက်စဉ် ရန်ပုံငွေ လှည့်လည်ကောက်ခံတဲ့ ဟိန္ဒူလူအုပ်ဟာ ဗလီအရှေ့မှာရပ်ပြီး ဟိန္ဒူဘုရားစာတွေရွတ်တာ၊ အော်ဟစ်ရန်စတာတွေ လုပ်ဆောင်ခဲ့တာပါ။ နောက်ပိုင်းမှာ ဗလီကို လူအုပ်က စီးနင်းကာ တိုက်ခိုက်ဖျက်ဆီးမှုတွေ လုပ်ခဲ့ပါတယ်။
အခင်းဖြစ်တဲ့နေရာမှာ ရဲတပ်ဖွဲ့က ရှိနေပေမယ့် လူအုပ်နဲ့ ရဲအင်အား မမျှတဲ့အတွက် တားဆီးဟန့်တားနိုင်မှု မရှိခဲ့ဘူးလို့ အိန္ဒိယရဲတပ်ဖွဲ့ စုံစမ်းစစ်ဆေးရေးမှူး ယိုဂတ်ရှ် ဒက်ရှ်မွခ်က ပြောကြားခဲ့ပါတယ်။ ဒီလုပ်ရပ်ဟာ ရှက်စရာကောင်းပြီး တိုက်ခိုက်သူတွေကို ဖော်ထုတ်ဖမ်းဆီးဖို့ အဖွဲ့တစ်ခု ဖွဲ့စည်းတာဝန်ပေးထားတယ်လို့လည်း သူက ဆိုပါတယ်။
ဒီအဖြစ်အပျက်နဲ့ပတ်သက်ပြီး လူ ၂၉ ဦးကို ရဲတပ်ဖွဲ့က ဖမ်းဆီးထားပါတယ်။
မဒ်ယာပရာဒက်ရှ်ပြည်နယ် အူဂျန်ခရိုင်က မွတ်စလင်အများစုရှိတဲ့ ဘေဂွန်ဘဂ် ရပ်ကွက်မှာလည်း ဒီဇင်ဘာ ၂၅ ရက်နေ့က အလားတူဖြစ်ရပ်မျိုး ဖြစ်ပွားခဲ့ပါတယ်။
အာဏာရ ဟိန္ဒူအမျိုးသားရေးပါတီရဲ့ လူငယ်အဖွဲ့ BJYM ဟာ ဖျက်ဆီးခံ ဘာဘရီဗလီနေရာမှာ ရာမဘုရားကျောင်းဆောက်လုပ်ဖို့ လူစုပြီး ရန်ပုံငွေကောက်ခံစဉ် ဘေဂွန်ဘဂ်ရွက်ကွက်အတွင်း အကြိမ်ကြိမ်လှည့်လည်ကာ ဆဲဆို စော်ကားမှုတွေ ပြုလုပ်ခဲ့တယ်လို့ မျက်မြင်သက်သေတွေက ပြောပါတယ်။
အဲဒီနောက် BJYM လူအုပ်နဲ့ ဒေသခံတွေ အပြန်အလှန် ခဲတွေနဲ့ ပစ်ပေါက်တဲ့အထိ ဖြစ်ခဲ့ပြီး ဘေဂွန်ဘဂ်ရပ်ကွက်က ဆိုင်ကယ်တွေ၊ ကားတွေ၊ ဆေးခန်းတစ်ခုနဲ့ အဆောက်အဦးတစ်ချို့ ဖျက်ဆီးခံခဲ့ရပါတယ်။
မန်ဆူရ်ခရိုင်မှာလည်း အင်္ဂါနေ့က ဟိန္ဒူလူအုပ်ဟာ ဗလီတစ်လုံးရဲ့ မင်နာရတ်မျှော်စင်ကို ဖျက်ဆီးဖို့ ကြိုးပမ်းခဲ့ပါတယ်။
ဒီအဖြစ်အပျက်တွေအတွက် ရဲ့တပ်ဖွဲ့က လူ ၁၀၀ ကို အမှုဖွင့်ထားပြီး ၅၀ လောက်ကို ဖမ်းဆီးထားပါတယ်။
အတိုက်အခံ All India Majlis-e-Ittehadul Muslimeen ပါတီ အကြီးအကဲ အဆာအွတ်ဒင် အိုဝိုက်ဆီက အစိုးရကိုယ်တိုင် လူတွေကို အစွန်းရောက်အောင် လုပ်ဆောင်နေပြီး၊ အကြမ်းဖက်ဖို့ လှုံဆော်နေတယ်လို့ ဝေဖန်ပြောဆိုခဲ့ပါတယ်။
မဒ်ယာ ပရာဒက်ရှ်ပြည်နယ်ရဲ့ BJP အစိုးရအဖွဲ့က တာဝန်ရှိသူ ရဂျ်နက်ရှ် အဂ်ရာဝါလ်က ရာဇဝတ်မှုကျူးလွန်သူတွေကို လူမျိုးဘာသာ မခွဲခြားဘဲ အရေးယူသွားမယ်လို့ ပြောကြားခဲ့ပါတယ်။
Ref: Aljazeera
