နိုဝင်ဘာ ၈၊ ၂၀၂၀
M-Media
-နိုဝင်ဘာ ၃ ရက်နေ့က ကျင်းပခဲ့တဲ့ အမေရိကန်ရဲ့ သမ္မတရွေးကောက်ပွဲမှာ ဒီမိုကရက်တစ်ပါတီက သမ္မတလလောင်း ဂျိုးဘိုင်ဒန်က လက်ရှိသမ္မတ ဒေါ်နယ်ထရမ့်ကို အနိုင်ရသွားခဲ့ပါတယ်။
ဒုတိယသမ္မတနေရာအတွက် အနိုင်ရသူကလည်း ဒီမိုကရက်တစ်ပါတီက အသက် ၅၆ နှစ်အရွယ် အမျိုးသမီး ကာမာလာ ဟာရစ် ဖြစ်ပါတယ်။ ကာမာလာဟာ ကယ်လီဖိုးနီးယားပြည်နယ် ကိုယ်စားပြုတဲ့ ပထမဆုံး လူမည်းအမျိုးသမီးအမတ်အဖြစ် မှတ်တမ်းဝင်သလို၊ အခုအချိန်မှာတော့ ပထမဆုံး အမျိုးသမီး ဒုတိယသမ္မတ၊ ပထမဆုံး အာဖရိက-အိန္ဒိယ သွေးနှော ဒုတိယသမ္မတ ဖြစ်ပါတယ်။
ကယ်လီဖိုးနီးယားပြည်နယ်ကိုစားပြု အထက်လွှတ်တော်အမတ်ဖြစ်တဲ့ ကာမာလာ ဟာရစ်ဟာ အမေရိကန်ကို ပြောင်းရွှေ့အခြေချတဲ့ မိဘနှစ်ပါးကနေ ပေါက်ဖွားလာတာပါ။
မိခင်က အိန္ဒိယနိုင်ငံ တမီလ်နာဒူးကနေ အမေရိကန်ကို အလုပ်လုပ်ဖို့လာတဲ့ တမီလ်လူမျိုး ရှာမာလာ ဂိုပါလန် ဖြစ်ပြီး၊ ဖခင်က ဂျမေကာနိုင်ငံကနေ ကျောင်းတက်ဖို့လာတဲ့ လူမည်းအမျိုးသား ဒေါ်နယ် ဂျေ ဟာရစ် ဖြစ်ပါတယ်။ နောက်ပိုင်းမှာ ဂျေဟာရစ်က စီးပွားရေးပါရဂူတစ်ဦးဖြစ်လာပြီး၊ မိခင် ဂိုပါလန်က ဇီ၀ဆေးဝါးဆိုင်ရာ သိပ္ပံပညာရှင်တစ်ဦး ဖြစ်လာခဲ့ပါတယ်။
ဟောင်းဝပ်တက္ကသိုလ်ကနေ ဘီအေဘွဲ့၊ ကယ်လီဖိုးနီးရားတက္ကသိုလ်ကနေ ဥပဒေဒေါက်တာဘွဲ့ရခဲ့တဲ့ ကာမာလာဟာ ရှေ့နေ့တစ်ဦးဖြစ်ပြီး ဒီမိုကရက်တစ်ပါတီမှာ ပြီးခဲ့တဲ့ နှစ်ပေါင်း ၂၀ အတွင်း တစ်ဖြည်းဖြည်း အရေးပါသူတစ်ဦး ဖြစ်လာတာပါ။ ဆန်ဖရန်စစ္စကို ခရိုင်ရှေ့နေချုပ်အဖြစ် ၂၀၀၄ ခုနှစ်ကနေ ၂၀၁၁ ခုနှစ်အထိ တာ၀န်ထမ်းဆောင်ခဲ့ပြီး၊ ကယ်လီဖိုးနီးယားပြည်နယ်ရှေ့နေချုပ် တာဝန်တွေကိုတော့ ၂၀၁၁ ခုနှစ်ကနေ ၂၀၁၇ ခုနှစ်အထိ ထမ်းဆောင်ခဲ့ပါတယ်။ အဲဒီနောက်ပိုင်း ကာမာလာဟာ အထက်လွှတ်တော်မှာ ပြည်နယ်ကိုယ်စားပြု အမတ် ဖြစ်လာပါတယ်။
ကာမာလာဟာ ၂၀၂၀ သမ္မတရွေးကောက်ပွဲအတွက် ဒီမိုကရက်တစ်ပါတီရဲ့ သမ္မတလောင်းအဖြစ် ဝင်ရောက်ယှဉ်ပြိုင်ခဲ့ပေမယ့် ဂျိုးဘိုင်ဒန်ကို မကျော်နိုင်ခဲပါဘူး။ ဒါပေမယ့် ဂျိုးဘိုင်ဒန်က ဒုတိယသမ္မတလောင်းအဖြစ် ဝင်ပြိုင်ဖို့ ဆွဲဆောင်ခဲ့ပါတယ်။ ဂျိုးဘိုင်ဒန်ရဲ့ ရွေးကောက်ပွဲ မဲဆွယ်ရေးအဖွဲ့ကို ကာမာလာ ဝင်ရောက်လာကတည်းက လူမည်းတွေ၊ အာရှနွယ်ဖွားတွေရဲ့ ထောက်ခံမှုကို တစ်ခဲနက်ရခဲ့ပြီး ပထမလေးနာရီအတွင်းမှာပဲ မဲဆွယ်ရေးအဖွဲ့ဟာ အလှူငွေ ကန်ဒေါ်လာ ၁၁ သန်း ရခဲ့ပါတယ်။
အသက် ၇၈ နှစ်အရွယ် ဂျိုးဘိုင်ဒန်ဟာ သမ္မတသက်တမ်း တစ်ကြိမ် ၄ နှစ်သာ တာဝန်ထမ်းဆောင်ဖို့ရှိပြီး ကာမာလာကို ဆက်ခံသူအဖြစ်ထားဖို့ ရည်ရွယ်ထားတယ်လို့လည်း သတင်းတွေ ထွက်နေပါတယ်။
ဘိုင်ဒန်က ကာမာလာဟာ ‘အကြောက်တရားကင်းတဲ့ တိုက်စစ်မှူးတစ်ဦး၊ အကောင်းဆုံး ပြည်သူ့ဝန်ထမ်းတွေထဲကတစ်ဦး ဖြစ်တယ်’ လို့ ချီးကျူးပြောကြားခဲ့ပါတယ်။
ဒုတိယသမ္မတလောင်းအဖြစ် ရွေးချယ်ခံရပြီးနောက် လက်ရှိဒုတိယသမ္မတ မိုက်ပန့်စ်နဲ့ စကားစစ်ထိုးပွဲမှာ ချက်ကျလက်ကျပြောနိုင်မှုအတွက် အမေရိကန်နိုင်ငံရေးအသိုင်းအဝိုင်းရဲ့ ချီးကျူးဩဘာပေးမှုကိုလည်း ကာမာလာတစ်ယောက် ရရှိခဲ့ပါတယ်။
ရွေးကောက်ပွဲ အနိုင်ရမိန့်ခွန်းမှာ ကာမာလာက နောင်အနာဂတ် အမေရိကန်နိုင်ငံမှာ မိမိလိုသမိုင်းသစ်ရေးမယ့် အမျိုးသမီးတွေ ပေါ်ထွက်လာလိမ့်မယ်လို့ ထည့်သွင်းပြောကြားခဲ့ပါတယ်။
“ကျွန်မဟာ အိမ်ဖြူတော်မှာ ပထမဆုံး အမျိုးသမီး ဒုတိယသမ္မတ ဖြစ်လာပေမယ့် ကျွန်မနဲ့ပဲ အဆုံးသတ်သွားမှာ မဟုတ်ပါဘူး။ ဘာ့ကြောင့်လည်းဆိုတော့ ကျွန်မတို့တိုင်းပြည်မှာ မဖြစ်နိုင်တာ မရှိဘူးဆိုတာကို မိန်းကလေးငယ်တိုင်းက ဒီညမှာ မြင်သွားကြလို့ပါပဲ”
ဘ၀တိုးတက်ရေး အပတ်တကုတ်ကြိုးစားအားထုတ်ဖို့လိုအပ်တယ်ဆိုတဲ့ မိခင်ရဲ့ ခံယူချက်ကနေ အားအင်တွေရရှိခဲ့သလို၊ မိမိ ဒီလိုအခြေအနေရောက်လာဖို့အတွက် အရင့်အရင်က အမေရိကန်အမျိုးသမီးတွေ လမ်းခင်းပေးခဲ့တယ်လို့လည်း ကာမာလာက ဆိုပါတယ်။
“အမေ့အကြောင်း၊ လူမည်းအမျိုးသမီးတွေအကြောင်း ကျွန်မစဉ်းစားတွေးတောလေ့ ရှိပါတယ်။ ဒီညမှာ ဒီလိုအခြေအနေမျိုး ရဖို့အတွက် အာရှသားတွေ၊ လူဖြူတွေ၊ လက်တင်သားတွေနဲ့ ဌာနေအမေရိကန်တွေဟာ သမိုင်းတစ်လျှောက် လမ်းခင်းပေးခဲ့ကြတာပါ။ လူသားအားလုံး တန်းတူညီမျှရေး၊ လွတ်လပ်ခွင့်နဲ့ တရားမျှတမှုတွေအတွက် အမျိုးသမီးတွေေ အကြီးအကျယ် စွန့်လွှတ်စတေးပြီး တိုက်ပွဲဝင်ခဲ့ကြပါတယ်။ ဒီတိုက်ပွဲမှာ ပါဝင်ခဲ့ကြတဲ့ လူမည်းအမျိုးသမီးတွေဟာ မကြာခဏ လစ်လျူရှု ခံခဲ့ရပါတယ်။ ဒါပေမယ့် သူတို့ဟာ ဒီမိုကရေစီရဲ့ကျောရိုးဆိုတာကို အခွင့်အရေးရတိုင်း ကိုယ်တိုင်ကိုယ်ကျ သက်သေပြခဲ့ကြပါတယ်”
ပြီးခဲ့တဲ့နှစ်အနည်းငယ်အတွင်း ကြမ်းတမ်းခက်ခဲမှု ကြုံတွေ့ခဲ့ရတာကို ပြန်လည်ကုစားသွားမယ်လို့ ကာမာလာက ပြောကြားခဲ့ပြီး ပြည်သူအားလုံး စုစည်းညီညွတ်ကြဖို့လည်း တိုက်တွန်းခဲ့ပါတယ်။
Ref : Reuters, Aljazeera
