မေ ၁၇၊ ၂၀၁၈
M-Media
ပါလက်စတိုင်းနှင့်ပတ်သက်လျှင် ကုလက အလုပ်မဖြစ်ဟု အာဒိုဂန်ပြော
=================
အခုတစ်ပတ်အတွင်း ဂါဇာကမ်းမြှောင်မှာ အစ္စရေးလက်ချက်ကြောင့် ပါလက်စတိုင်း ၆၀ ကျော် သေဆုံးသွားတဲ့ကိစ္စမှာ အရေးယူဖို့ပျက်ကွက်ခဲ့တဲ့ ကုလဟာ အလုပ်မဖြစ်တော့ဘူးလို့ တူရကီသမ္မတ အာဒိုဂန်က မနေ့မှာ ပြောကြားလိုက်ပါတယ်။ ဂါဇာက အဲဒီအဖြစ်အပျက်ကို အာဒိုဂန်ဟာ ပြီးခဲ့တဲ့ရက်ပိုင်းကတည်းက ပြင်းပြင်းထန်ထန် ဝေဖန်ခဲ့တာဖြစ်ပြီး အစ္စရေးမှာရှိတဲ့ သူတို့သံအမတ်ကို ပြန်ခေါ်ခဲ့ကာ တူရကီဆိုင်ရာ အစ္စရေးသံမတ်ကိုလည်း နှင်ထုတ်ခဲ့ပါတယ်။ မတ်လ ၃၀ ရက်နေ့ကစလို့ ဂါဇာက ဆန္ဒပြမှုအတွင်း အစ္စရေးရဲ့ ပစ်ခတ်သတ်ဖြတ်မှုကြောင့် သေဆုံးသူဟာ ၉၀ ကျော်လာခဲ့ပြီ ဖြစ်ပါတယ်။
ကင်ဂျုံအွန်နှင့်တွေ့ဆုံရေး အမေရိကန်က ဆက်လက်စီစဉ်နေ
==============
လာမယ့်လ ထရမ့်နဲ့တွေ့ဆုံဖို့ စီစဉ်ထားမှုကို ရပ်စဲနိုင်တယ်လို့ မြောက်ကိုရီးယားခေါင်းဆောင် ကင်ဂျုံအန်က မနေ့မှာ ခြိမ်းခြောက်ခဲ့ပေမယ့် မိမိတို့ထံ ဘယ်လိုအကြောင်းကြားမှုမျိုးမှ မရောက်သေးဘူးလို့ အမေရိကန်က ထုတ်ပြန်ပါတယ်။ ကင်က ကန်-တောင်ကိုရီးယား ပူးတွဲစစ်ရေးလေ့ကျင့်မှုကြောင့် မနေ့မှာ ပြုလုပ်ဖို့ စီစဉ်ထားတဲ့ နှစ်နိုင်ငံအဆင့်မြင့်အစည်းအဝေးကိုလည်း ရပ်ဆိုင်းခဲ့ပါတယ်။ ကန်အစိုးရ ပြောရေးဆိုခွင့်ရှိသူကတော့ ကင်ဟာ အမေရိကန်နဲ့ တောင်ကိုရီးယားတို့ စစ်ရေးလေ့ကျင့်မှု ဆက်လုပ်ဖို့ကို နားလည်ကြောင်း ယခင်က ပြောကြားထားတာ ရှိတဲ့အတွက် ထရမ့်နဲ့တွေ့ဆုံမယ့်ကိစ္စကို ဆက်လက်စီစဉ်နေတယ်လို့ ပြောကြားခဲ့ပါတယ်။
ကက်ရ်ှမီးယားတွင် အိန္ဒိယက ရမ်ဇာန်တစ်လ အပစ်ရပ်မည်
=================
ရမ်ဇာန်ဥပုသ်လမှာ ကက်ရ်ှမီးယားပြည်သူတွေ အေးအေးချမ်းချမ်းနဲ့ ဥပုသ်သီလ ဆောက်တည်နိုင်ဖို့အတွက် သူပုန်တွေနဲ့ တိုက်ခိုက်မှုကို တစ်လတာ ရပ်ဆိုင်းလိုက်တယ်လို့ အိန္ဒိယက မနေ့မှာ ကြေငြာလိုက်ပါတယ်။ အစိုးရတပ်ဖွဲ့တွေနဲ့ ကက်ရ်ှမီးယားသူပုန်တွေဟာ ပြီးခဲ့တဲ့သီတင်းပတ်တွေအတွင်း တိုက်ခိုက်မှုတွေ ပြင်းပြင်းထန်ထန် ဖြစ်ပွားခဲ့ကြတာပါ။ အိန္ဒိယအစိုးရရဲ့ အခုလို အပစ်ရပ်တာဟာ နှစ်ပေါင်း ၂၀ အတွင်း ပထမဆုံးအကြိမ်လည်း ဖြစ်ပါတယ်။ ဒါပေမယ့် သူပုန်တွေက တိုက်ခိုက်လာရင် တပ်ဖွဲ့တွေဟာ ပြန်လည် လက်တုန့်ပြန်ခွင့်ရှိတယ်လို့ ပြည်ထဲရေးဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။
မြို့တစ်မြို့ကိုသိမ်းရန်ကြိုးပမ်းသည့် တာလီဘန်များကို အာဖဂန် မောင်းထုတ်နိုင်
=================
တိုင်းပြည်အနောက်ပိုင်းက ဖာရာမြို့ကို ၀င်သိမ်းဖို့ကြိုးစားတဲ့ တာလီဘန်စစ်သွေးကြွတွေကို အာဖဂန်နဲ့ အမေရိကန်တပ်ဖွဲ့တွေက မောင်းထုတ်နိုင်ခဲ့ပါတယ်။ အင်္ဂါနေ့က အဲဒီမြို့မှာ တာလီဘန်တွေရဲ့ လက်နက်ကြီးတွေနဲ့ တိုက်ခိုက်မှုကြောင့် အာဖဂန်လုံခြုံရေးတပ်ဖွဲ့ဝင် ၂၅ ဦးနဲ့ အရပ်သား ၅ ဦး သေဆုံးခဲ့ရပါတယ်။ အပြန်အလှန် တိုက်ခိုက်မှုအတွင်း တာလီဘန်တိုက်ခိုက်ရေးသမား အနည်းဆုံး ၃၀၀ လောက် သေဆုံးခဲ့ပြီး မြို့က အစိုးရရဲ့ ထိန်းချုပ်မှုအောက်မှာ ရှိနေကာ နယ်မြေရှင်းလင်းရေးလုပ်ငန်းတွေ ဆက်လက်လုပ်ဆောင်နေတယ်လို့ အာဖဂန်အစိုးရက ထုတ်ပြန်ပါတယ်။
Ref: Aljazeera
