ဇွန် ၂၆၊ ၂၀၂၀
M-Media
-Covid-19 ကူးစက်မှုမြင့်တက်လာတဲ့ အိန္ဒိယနိုင်ငံမှာ ဆေးရုံ၊ ဆေးပေးခန်းတွေ မလုံလောက်မှု ဖြစ်ပွားနေပြီး နိုင်ငံမြောက်ပိုင်း မဟာရက်ရှ်ထရာပြည်နယ်က ဗလီဝတ်ကျောင်းတော်တစ်လုံးကတော့ ဒီကွက်လပ်ကို ဖြည့်ဆည်းပေးနေပါတယ်။
ဘီဝမ်ဒီမြို့က ‘မက္ကာဟ်မတ်စ်ဂျစ်ဒ်’ ဗလီဝတ်ကျောင်းတော်ဖြစ်ပြီး အိန္ဒိယ အစ္စလာမ့်အဖွဲ့အစည်းတစ်ခုဖြစ်တဲ့ ‘ဂျမာအသ် အလ် အစ္စလာမီ ဟင်ဒ်’ (JIH) အဖွဲ့က စီမံခန့်ခွဲတာပါ။
လက်ရှိ ဗလီဝတ်ကျောင်းတော်မှာ လူနာ ၅ ဦးစာအတွက် ကုတင်နဲ့ အောက်စီဂျင်ဘူးတွေကို စီစဉ်ကာ ကုသပေးထားပါတယ်။ နောက်ထပ် လူနာတွေကို လက်ခံနိုင်အောင် ဗလီပရဝုဏ်အတွင်း အနေရာထိုင်ခင်း ပြင်ဆင်ပေးထားပြီး အပြင်က ကိုဗစ်လူနာတွေအတွက် လိုအပ်ရင် အောက်ဆီဂျင်ဘူးတွေကို အခမဲ့ လိုက်လံပို့ဆောင် ကူညီပေးနေပါတယ်။
ဘီဝမ်ဒီမြို့မှာ ကိုဗစ်ကူးစက်သူအရေအတွက် ၁၃၃၂ ဦးရှိပြီး သေဆုံးသူက ၈၈ ဦး ရှိနေပါတယ်။
ဘီဝမ်ဒီ JIH ဥက္ကဌ အောက်ဆက်ဖ် အဟ်မဒ် ဖာလာဟီက မြို့အတွင်း ကျန်းမာရေးစောင့်ရှောက်မှုစနစ် အားနည်းတဲ့အတွက် အခုလို ကူညီဆောင်ရွက်ပေးတာဖြစ်တယ်လို့ ပြောကြားခဲ့ပါတယ်။
မက္ကာဟ်မတ်စ်ဂျစ်ဒ် ဗလီဝတ်ကျောင်းတော်ဟာ ဆရာဝန် ၂ ယောက်ထားရှိပေးထားပြီး လက်ရှိအချိန်အထိ ကိုဗစ်လူနာ ၇၀ လောက်ကို ကုသပေးထားပါတယ်။ အောက်ဆီဂျင်ဘူး စုစုပေါင်း ၁၅ ဘူးထားရှိပြီး ကိုဗစ်လူနာ ၈ ဦးကို အိမ်အထိ လိုက်လံကာ အောက်ဆီဂျင်ထောက်ပံ့ပေးထားပါတယ်။
“ရွေ့လျားသွားလာမှု ကန့်သတ်ချက်ကြောင့် ဗလီဝတ်ကျောင်းတော်မှာ ဝတ်ပြုခွင့်ပိတ်ထားပါတယ်။ ဒါ့ကြောင့် ကုသမှုကောင်းကောင်းမရတဲ့သူတွေကို ကူညီပေးနိုင်ဖို့အတွက် ဗလီကိုအသုံးပြုဖို့ ဆုံးဖြတ်ခဲ့တာပါ” လို့ ဂေါပကအဖွဲ့ဝင်တစ်ဦးဖြစ်သူ ကိုက်ဆာ မီရ်ဇာက ပြောကြားခဲ့ပါတယ်။
Ref: New Indian Express