Tag: indonesia

ဖေဖော်ဝါရီ ၄၊ ၂၀၂၀
M-Media

-ဘာလီမြို့မှာရှိတဲ့ ဟိန္ဒူဓမ္မတက္ကသိုလ် Hindu Dharma State Institute (IHDN) ကို နိုင်ငံရဲ့ ပထမဆုံး ဟိန္ဒူတက္ကသိုလ်အဖြစ် သတ်မှတ်တဲ့ အမိန့်တစ်ရပ်ကို အင်ဒိုနီးရှားသမ္မတ ဂျိုကိုဝီဒိုဒိုက ပြီးခဲ့တဲ့တစ်ပတ်မှာ ထုတ်ပြန်လိုက်ပါတယ်။

I Gusti Bagus Sugriwa State Hindu University (UHN) လို့ အမည်ပေးမယ့် အဲဒီတက္ကသိုလ်ဟာ ဟိန္ဒူလူ့အဖွဲ့အစည်း အဆင့်မြင့်ပညာ ရရှိရေးကို ရည်ရွယ်ပြီး ဟိန္ဒူဓမ္မအပါအဝင်၊ နိုင်ငံရဲ့ အဆင့်မြင့်ပညာရပ်အားလုံးကို သင်ကြားပေးမှာ ဖြစ်ပါတယ်။ လက်ရှိ IHDN ကျောင်းသားတွေဟာ UHN ကျောင်းသားတွေအဖြစ် တက္ကသိုလ်မှာ ဆက်လက်တက်ရောက်နိုင်မှာပါ။

IHDN ရဲ့ ပါမောက္ခချုပ် I Gusti Ngurah Sudiana က အစိုးရက ဒီလိုအသိအမှတ်ပြုလိုက်တဲ့အတွက် အလွန် ဝမ်းမြောက် ပျော်ရွှင်မိတယ်လို့ ပြောကြားခဲ့ပါတယ်။

အဲဒီ ဓမ္မတက္ကသိုလ်ကို ၁၉၉၃ ခုနှစ်မှာ ဟိန္ဒူဘာသာရေးဆရာများ အကယ်ဒမီအဖြစ် စတင်ဖွင့်လှစ်ခဲ့တာဖြစ်ပြီး၊ ၁၉၉၉ ခုနှစ်မှာ ဟိန္ဒူဓမ္မကောလိပ်၊ ၂၀၀၄ ခုနှစ်မှာ ဟိန္ဒူဓမ္မတက္ကသိုလ်အဖြစ် အဆင့်ဆင့်ပြောင်းလဲလာခဲ့တာ ဖြစ်ပါတယ်။

သမ္မတဝီဒိုဒိုရဲ့ အခုအမိန့်ဟာ နိုင်ငံအတွင်းမှာရှိနေတဲ့ ဟိန္ဒူလူ့အဖွဲ့အစည်းအတွက် သမိုင်းဝင်ကာလတစ်ခု ဖြစ်တယ်လို့လည်း Sudiana က ထည့်သွင်းပြောဆိုခဲ့ပါတယ်။

“လူ့စွမ်းအားအရင်းအမြစ် တိုးတက်စေဖို့အတွက် ဘာလီက ဟိန္ဒူပညာရေးအသင်းအဖွဲ့အပေါ် သမ္မတ ဝီဒိုဒိုက အထူးအလေးထားတယ်ဆိုတာ ပြသလိုက်တာပါ။ ဒီအခြေအနေကို အသုံးပြုပြီး အနာဂတ် ဘာလီရဲ့ လူ့စွမ်းအားအရင်းအမြစ် ကောင်းမွန်အောင် ဆောင်ရွက်နိုင်မှာ‌ ဖြစ်ပါတယ်”

Ref: The Star

ဇန်နဝါရီ ၄၊ ၂၀၂၀
M-Media

-မြို့တော် ဂျကာတာမှာ မိုးသည်းထန်ပြီး ရေကြီးရေလျှံနေတာကို တားမြစ်ဖို့အတွက် အင်ဒိုနီးရှားဟာ မိုးနည်းအောင် နည်းပညာအသုံးပြု ဆောင်ရွက်လာပါတယ်။

နှစ်သစ်ကူးကစလို့ မုန်တိုင်းငယ်တစ်ခုကြောင့် ဂျကာတာနဲ့ ပတ်ဝန်းကျင်ဒေသမှာ မိုးသည်းထန်စွာရွာသွန်းကာ ရေကြီးရေလျှံမှု ဖြစ်ပွားနေတာပါ။ ရေကြီးမှုကြောင့် အနည်းဆုံး ၄၃ ဦးသေဆုံးကာ ၁၉၂၀၀၀ ဦး ဘေးလွတ်ရာကို ရွှေ့ပြောင်းနေရပါတယ်။

လာမယ့်ရက်ပိုင်းအတွင်း မိုးသည်းထန်စွာရွာသွန်းဖို့ ရှိနေတာကြောင့် အာဏာပိုင်တွေဟာ မိုးသားတိမ်တိုက်တွေထဲ ဓာတုပစ္စည်းတွေသွင်းကာ မိုးရွာသွန်းမှုလျော့ကျအောင် လုပ်ဆောင်နေပါတယ်။

မနေ့က လေယာဉ် ၂ စီးဟာ ဂျကာတာကိုရောက်မယ့် မိုးသားတွေကို ဓာတုပစ္စည်းထည့်သွင်း ဖြိုခွဲတာတွေ လုပ်ဆောင်ခဲ့ပါတယ်။

နှစ်စဉ် ဒီလိုအချိန် ဂျာကာတာမှာ မိုးကြီးရေလျှံမှု ပုံမှန်ဖြစ်ပွားလေ့ရှိပြီး လက်ရှိ ကြုံတွေ့နေရတာဟာ ၂၀၁၃ ခုနှစ်နောက်ပိုင်း အဆိုးဆုံးအခြေအနေ ဖြစ်ပါတယ်။

လူပေါင်းသန်းချီနေထိုင်တဲ့ ဂျကာတာမြို့ဟာ ကမ္ဘာပေါ်မှာ အမြန်ဆန်ဆုံး ရေထဲနစ်ဝင်နေတဲ့ မြို့တစ်မြို့ဖြစ်ပြီး ၂၀၅၀ ခုနှစ်ရောက်ရင် လုံး၀ ရေမြုပ်သွားမယ်လို့ ကျွမ်းကျင်သူတွေက ခန့်မှန်းထားပါတယ်။

မြို့တော်ကို ဘောနီယိုကျွန်းအရှေ့ပိုင်းကို ရွှေ့မယ့် သမ္မတဝီဒိုဒို အစီအစဉ်ရဲ့ အကြောင်းအရင်းတွေထဲမှာ ဒီအချက်လည်း ပါဝင်ပါတယ်။

Ref: BBC

ဒီဇင်ဘာ ၁၂၊ ၂၀၁၉
M-Media

-အင်ဒိုနီးရှားနိုင်ငံ ဆူလာဝေစီဒေသက ဂူတစ်ခုမှာ နှစ်ပေါင်း ၄၄၀၀၀ သက်တမ်းရှိတဲ့ အနုပညာလက်ရာတစ်ခုကို တွေ့ရှိခဲ့ရပါတယ်။

ကျွဲပုံသဏ္ဍာန် သတ္တဝါကြီးတစ်ကောင်ကို လူလို၊ သတ္တဝါလို ပုံရိပ်တွေက ကြိုးတွေ၊ လှံတွေနဲ့ ဖမ်းဆီးနေပုံကို ဖော်ကျူးထားတာပါ။ သုတေသနပညာရှင်တွေကတော့ ဒီပုံရိပ်ဟာ ကမ္ဘာပေါ်က မှတ်တမ်းတင်ထားသမျှတွေထဲမှာ သက်တမ်းအရင့်ဆုံး မှတ်တမ်းတင်ထားမှုဖြစ်မယ်လို့ ယူဆနေကြပါတယ်။

ဩစတေးလျနိုင်ငံ Griffith တက္ကသိုလ်က ရှေးဟောင်းသုတေသနပညာရှင် အဒမ် ဘရမ်က ဒီလက်ရာကို လွန်ခဲ့တဲ့ ၂ နှစ်အရင်က တွေ့ရှိခဲ့တာဖြစ်ပြီး သုတေသနပြုမှုတွေ လုပ်ဆောင်ပြီးတဲ့နောက် Nature ဂျာနယ်မှာ ဖော်ပြခဲ့ပါတယ်။

အင်ဒိုနီးရှားက ဒီနံရံပန်းချီဟာ ကမ္ဘာပေါ်က သက်တမ်းအရင့်ဆုံးပန်းချီတော့ မဟုတ်ပါဘူး။ တောင်အာဖရိက ကျောက်တုံးအပိုင်းအစမှာ တွေ့ရတဲ့ ပန်းချီလက်ရာတစ်ခုဟာ နှစ်ပေါင်း ၇၃၀၀၀ သက်တမ်းရှိတယ်လို့ ပြီးခဲ့တဲ့နှစ်မှာ သိပ္ပံပညာရှင်တွေက ထုတ်ပြန်ခဲ့ပါတယ်။

Ref: BBC