စက်တင်ဘာ ၁၉၊ ၂၀၂၀
M-Media

-အင်ဒိုနီးရှားနိုင်ငံက ဒေသတစ်ချို့မှာ အာဏာပိုင်တွေက အပြင်ထွက်တဲ့အခါ နှာခေါင်စည်း မတပ်တဲ့သူတွေကို အသုဘအတွက် ကျင်းတူးခိုင်းတဲ့ ပြစ်ဒဏ်မျိုး ပေးနေပါတယ်။

အင်ဒိုနီးရှားနိုင်ငံမှာ Covid-19 ကူးစက်မှု၊ သေဆုံးမှု အရေအတွက်ဟာ အခုအချိန်အထိ မြင့်တက်နေဆဲပါ။ ပြန့်နှံ့မှုကို ထိန်းချုပ်နိုင်ဖို့အတွက် တင်းကြပ်တဲ့ စည်းမျဥ်းစည်းကမ်းတွေကိုလည်း အစိုးရက ထုတ်ပြန်ထားပါတယ်။

အရှေ့ဂျာဗားက ကျယ်ရမီဆိုတဲ့ ဒေသမှာတော့ အပြင်ထွက်တဲ့အခါ နှာခေါင်းစည်းမတပ်သူတွေကို အာဏာပိုင်တွေက မှတ်သားလောက်တဲ့ ပြစ်ဒဏ်မျိုး ပေးနေပါတယ်။

ဒါကတော့ ကိုဗစ်ကြောင့် ကွယ်လွန်သွားသူတွေကို မြှုပ်နှံဖို့အတွက် ကျင်းတူးခိုင်းတာပါ။
ကျယ်ရမီဒေသအကြီးအကဲ ဆူယိုနိုက သူတို့ဒေသမှာ အသုဘကျင်းတူးသူ နည်းနေတာကြောင့် ဒီစိတ်ကူးမျိုးရခဲ့ပြီး၊ ဒီလိုပြစ်ဒဏ်ပေးမှုဟာ စည်းကမ်းလိုက်နာဖို့ တွန်းအားတစ်ခု ဖြစ်လိမ့်မယ်လို့ ယုံကြည်ကြောင်း ပြောကြားခဲ့ပါတယ်။

နှာခေါင်းစည်းမတပ်သူတွေဟာ ကျင်းတူရုံ တူးပေးရတာဖြစ်ပြီး အသုဘချရာမှာတော့ မပါ၀င်ရပါဘူး။

ဒီပြစ်ဒဏ်အပြင် ဒဏ်ငွေဆောင်ခိုင်းတာ၊ အများပြည်သူနဲ့ သက်ဆိုင်တဲ့နေရာတွေကို သန့်ရှင်းရေးလုပ်ခိုင်းတာ၊ ဒိုက်ထိုးခိုင်းတာ စတဲ့ ပြစ်ဒဏ်မျိုးတွေလည်း ပေးတယ်လို့ ဆူယိုနိုက ဆိုပါတယ်။

Ref: CNN

ဩဂုတ် ၂၆၊ ၂၀၂၀
M-Media

-ပြည်သူလူထု ကျန်းမာရေးစောင့်ရှောက်မှုမှာ ကိုယ့်အားကိုယ်ကိုးနိုင်ရေးအတွက် ဆေးဘက်ဆိုင်ရာပစ္စည်း ၇၀ ရာခိုင်နှုန်းကို ပြည်တွင်းမှာပဲ ထုတ်လုပ်ဖို့ ရည်မှန်းဆောင်ရွက်နေတယ်လို့ အင်ဒိုနီးရှားက ထုတ်ပြန်ပြောကြားလိုက်ပါတယ်။

လက်ရှိ အင်ဒိုနီးရှားဟာ ကျန်းမာရေးနဲ့ စားနပ်ရိက္ခာ ဖူလှုံရေးမှာ နိုင်ငံရပ်ခြားက တင်သွင်းတဲ့ ပစ္စည်းတွေကို မှီခိုနေရတာပါ။

ဆေးဝါးပစ္စည်း ၉၀ ရာခိုင်နှုန်းကို နိုင်ငံရပ်ခြားကနေ တင်သွင်းနေရတဲ့အတွက် ပြည်တွင်မှာပဲ ထုတ်လုပ်နိုင်အောင် စီစဉ်နေတယ်လို့ ရေကြောင်းနှင့် ရင်းနှီးမြှုပ်နှံမှုဆိုင်ရာ ဝန်ကြီး လူဟတ် ပန်ဂျိုင်တန်က မနေ့က မီဒီယာတစ်ခုကို ပြောကြားခဲ့ပါတယ်။

“ဆေးဘက်ဆိုင်ရာ ပစ္စည်းတွေရဲ့ ၇၀ ရာခိုင်နှုန်းကို အင်ဒိုနီးရှာမှာပဲ ထုတ်လုပ်နိုင်အောင် ပစ်မှတ်ထား ဆောင်ရွက်နေပါတယ်”

Covid-19 ဒဏ်ကို ခံစားနေရတဲ့ အင်ဒိုနီးရှားမှာ အခြေခံ ဆေးဝါပစ္စည်းတွေ မပြည့်မစုံဖြစ်တဲ့ ပြဿနာကို ကြုံတွေ့နေရတာ ဖြစ်ပါတယ်။

သမ္မတ ဂျိုကို ဝီဒိုဒိုက မိမိတို့ဟာ တစ်လအတွင်း PPE ဝတ်စုံ ၁၇ သန်းလောက်ကို ထုတ်လုပ်နိုင်စွမ်း ရှိလာပြီလို့ ဇွန်လမှာ ပြောကြားခဲ့ပါတယ်။ ဒါဟာ နိုင်ငံအတွင်း လိုအပ်တဲ့ အရေအတွက် ၅ သန်းထက် ပိုများတဲ့ ပမာဏလည်း ဖြစ်ပါတယ်။ အင်ဒိုနီးရှား အင်ဂျင်နီယာအဖွဲ့ တစ်ခုကလည်း စျေးသက်သာတဲ့ အသက်ရှုစက်ကို အောင်မြင်စွာ ထုတ်လုပ်နိုင်ခဲ့ပါတယ်။

ဝန်ကြီး ပန်ဂျိုင်တန်က စားနပ်ရိက္ခာ ထုတ်လုပ်ရာမှာလည်း အင်ဒိုနီးရှားဟာ ကိုယ့်အားကိုယ်ကိုးနိုင်ဖို့ လိုအပ်တယ်လို့ ထည့်သွင်းပြောကြားခဲ့ပါတယ်။ အင်ဒိုနီးရှားဟာ အရှေ့တောင်အာရှရဲ့ စီးပွားရေးအကြီးမားဆုံးနိုင်ငံ ဖြစ်ပါတယ်။

Ref: CNA

ဧပြီ ၁၃၊ ၂၀၂၀
M-Media

-ကိုရိုနာဗိုင်းရပ်စ်ပြန့်နှံ့နေတဲ့ အခုကာလအတွင်း ပြည်သူတွေ အိမ်ထဲမှာ နေထိုင်ဖို့အတွက် အင်ဒိုနီးရှားက ရွာတစ်ရွာမှာ သရဲခြောက်တဲ့ နည်းလမ်းကို အသုံးပြုလာပြီး အတော်အသင့် အောင်မြင်မှုရနေပါတယ်။

ဂျာဗားကျွန်းက ကေပူဆိုတဲ့ရွာမှာဖြစ်ပြီး ပိတ်ဖြူဖတ်ထားကာ မျက်နှာကို ပေါင်ဒါတွေလိမ်းထားတဲ့ သရဲတွေဟာ ညဘက်ဆိုရင် ရွာမှာ လှည့်ပတ်နေတာဖြစ်ပါတယ်။

“ကြောက်လန့်စရာကောင်းတဲ့ သရဲကို အသုံးပြုပြီး လူတွေကို အိမ်ထဲမှာနေအောင် ဖန်တီးထားတာ ဖြစ်ပါတယ်” လို့ ရွာရဲ့ ကာလသားခေါင်း Anjar Pancaningtyas က ပြောကြားခဲ့ပါတယ်။

သူတို့အဖွဲ့ဟာ ရဲတွေနဲ့ပူးပေါင်းပြီး ဒီနည်းလမ်းကို အခုလအစောပိုင်းမှာ စတင်အကောင်အထည်ဖော်တာပါ။ သရဲတွေကို တစ်နေရာထဲမှာထိုင်စေတဲ့ အစပိုင်းက လူတွေဟာ စူးစမ်းလိုစိတ်နဲ့ လာရောက်ကြည့်ရှုကြတာကြောင့် မအောင်မြင်ခဲ့ပါဘူး။

နောက်ပိုင်းမှာတော့ ခုန်ဆွခုန်ဆွနဲ့ ရွာကိုလှည့်ပတ်နေတဲ့စနစ်ကို ကျင့်သုံးခဲ့ပြီး အောင်မြင်မှုလည်း ရရှိခဲ့ပါတယ်။ သရဲယောင်ဆောင်ဖို့အတွက် ရွာကလူတွေဟာ အလှည့်ကျ စေတနာ့ဝန်ထမ်း တာဝန်ယူပေးကြတာ ဖြစ်ပါတယ်။

အင်ဒိုနီးရှားနိုင်ငံမှာ မနေ့ကအထိ Covid-19 ကူးစက်သူ ၄၂၄၁ ဦးရှိပြီး သေဆုံးသူက ၃၇၃ ဦး ရှိပါတယ်။ ဒါဟာ တရုတ်နိုင်ငံပြီးတဲ့နောက် အာရှမှာ သေဆုံးမှုနှုန်း အများဆုံးလည်း ဖြစ်ပါတယ်။

လက်ရှိ မြို့တော်ဂျကာတာမှာ ရွေ့လျားသွားလာမှု ကန့်သတ်မိန့် ထုတ်ပြန်ထားပေမယ့် တစ်နိုင်ငံလုံးမှာ ဒီအမိန့် ထုတ်ပြန်မှာမဟုတ်သေးဘူးလို့ သမ္မတ ဂျိုကိုကို ဝီဒိုဒိုက ပြောကြားထားပြီး၊ ပြည်သူတွေအနေနဲ့ အိမ်မှာသာနေဖို့ လူစုလူဝေးမလုပ်ဖို့ တိုက်တွန်းခဲ့ပါတယ်။

Ref: Reuters