သြဂုတ် ၃၁၊ ၂၀၁၅
M-Media
စပိန်မီးပန်းစက်ရုံပေါက်ကွဲမှု လေးဦးပျောက်ဆုံးနေ
………………………………….
စပိန်နိုင်ငံအရှေ့မြောက်ပိုင်း ဇာရာဂိုဇာမြို့အနီးရှိ မီးပန်းစက်ရုံတစ်ခု၌ ယနေ့တွင် ပေါက်ကွဲမှုတစ်ခု ဖြစ်ပွားခဲ့သောကြောင့် လူ ၄ ဦး ပြင်းထန်စွာ ဒဏ်ရာရခဲ့ကာ လေးဦးမှာ ပျောက်ဆုံးနေသည်ဟု Reuters သတင်းဌာနက ဖော်ပြခဲ့သည်။ မီးခြစ်ဆံနှင့် မီးပန်းများထုတ်လုပ်သည့် အဆိုပါစက်ရုံ ပေါက်ကွဲမှုအကြောင်းအရင်းကို သိရှိခြင်းမရှိသေးဟု အာရဂွန် အရေးပေါ်ဌာနမှ ပြောရေးဆိုခွင့်ရှိသူတစ်ဦးက ပြောကြားခဲ့သည်။
သြစတြီးယား-ဟန်ဂေရီမှ ဒုက္ခသည်များကို ဂျာမနီပို့မည်
………………………………………….
ပြောင်းရွှေ့အချေခြသူ ဒုက္ခသည်များပါဝင်ပြီး ဘူဒါပက်စ်မြို့မှ ဂျာမနီနိုင်ငံ မြူးနစ်မြို့သို့ ထွက်ခွာသွားသည့် ရထားနှစ်စင်းမှာ ဟန်ဂေရီ-သြစတြီးယားနယ်စပ်ရှိ ဟီဂျေရှာလွန်မြို့၌ ရပ်တန့်ထားပြီး အာဏာပိုင်များ၏ ဆောင်ရွက်မှုကို စောင့်ဆိုင်းနေသည်ဟု သတင်းများက ဖော်ပြကြသည်။ ဘူဒါပက်စ်မှ အခြားရထားတစ်စီးကိုလည်း ရပ်တန့်ထားကာ သြစတြီးယား ရထားပို့ဆောင်ရေးကမူ ရထားများမှာ
လူများနေသောကြောင့်ဖြစ်ပြီး ခရီးသည်အချို့ကို ဖယ်ရှားပြီးပါက နယ်စပ်ဖြတ်ကျော်ခွင့်ပြုမည်ဟု ပြောကြားခဲ့သည်။
ဘန်ကောက်ဗုံးကွဲမှုကို ကျူးလွန်သူ ၁၀ ဦးအထိရှိမည်ဟု ထိုင်း ပြောပြန်
………………………………………..
ဘန်ကောက်မြို့ရှိ ဧရာဝဏ်နတ်ကွန်း ဗုံးဖောက်ခွဲသူများတွင် ထိုင်းနိုင်ငံသားများနှင့် နိုင်ငံခြားသားများ အနည်းဆုံး ၁၀ ဦးခန့်ပါဝင်ပြီး၊ သံသယရှိသူအသစ်များကို စုံစမ်းရှာဖွေမှုများ ပြုလုပ်နေသည်ဟု ထိုင်းရဲတပ်ဖွဲ့က ယနေ့တွင် ပြောကြားလိုက်သည်။ စနေနေ့က ဘန်ကောက်မြို့ ဆင်ခြေဖုံးရှိ တိုက်ခန်းတစ်ခုတွင် ထိုဗုံးပေါက်ကွဲမှု၌ ပါဝင်ပတ်သက်သူဟု ယူဆရသည့် နိုင်ငံခြားသားတစ်ဦးကို ရဲတပ်ဖွဲ့က ဖမ်းဆီးခဲ့ပြီးနောက် ယနေ့တွင်လည်း အခြားနေရာတစ်ခုကို ၀င်ရောက်ရှာဖွေခဲ့သည်။ ထို့ပြင် ထိုင်းအမျိုးသမီးတစ်ဦး အပါအ၀င် သံသယရှိသူ နှစ်ဦး၏ ဓာတ်ပုံနှင့် ပုံကြမ်းများကိုလည်း ထုတ်ပြန်ခဲ့သည်။
Ref: News Agencies
