News @ M-Media

Tag: Iran

  • အီရန်တွင် ပြုပြင်ပြောင်းလဲရေးသမား သမ္မတဖြစ်လာ

    အီရန်တွင် ပြုပြင်ပြောင်းလဲရေးသမား သမ္မတဖြစ်လာ

    ဇူလိုင် ၇၊ ၂၀၂၄
    M-Media

    -ဇူလိုင်လ ၅ ရက်နေ့က ကျင်းပပြုလုပ်ခဲ့တဲ့ အီရန်သမ္မတ ရွေးကောက်ပွဲမှာ ပြုပြင်ပြောင်းလဲရေးသမား မာဆွတ် ပီဇက်ကီယန်က သဘောထားတင်းမာသူ စအီဒ် ဂျာလီလီကို ကျော်ဖြတ်ပြီး ရွေးကောက်တင်မြှောက်ခံခဲ့ရပါတယ်။

    သမ္မတ အီဘရာဟင် ရိုင်စီ မေလအတွင်း ရုတ်တရက် လေယာဥ်ပျက်ကျ သေဆုံးပြီးတဲ့နောက် အီရန်မှာ ကြားဖြတ်သမ္မတ ရွေးကောက်ပွဲ ကျင်းပပြုလုပ်ခဲ့တာဖြစ်ပြီး အဓိပတိကောင်စီက အသိအမှတ်ပြုထားတဲ့ သမ္မတလောင်း ၄ ဦး ၀င်ရောက်ယှဥ်ပြိုင်ခဲ့ကြပါတယ်။

    ရွေးကောက်ပွဲကို ဇွန်လ ၂၈ ရက်နေ့မှာ ကျင်းပပြုလုပ်ခဲ့ပေမယ့် မဲပေးခွင့်ရှိသူ ၆၀ ရာခိုင်နှုန်းကျော် လာရောက်မဲမပေးတဲ့အတွက် ရလဒ်က အကြုံးမ၀င်ပါဘူး။ ဇူလိုင် ၅ ရက်နေ့ နောက်တစ်ကျော့ ကျင်းပရာမှာတော့ အလယ်အလတ်သမား မာဆွတ် ပီဇက်ကီယန် အနိုင်ရခဲ့တာ ဖြစ်ပါတယ်။

    စနေနေ့က ပထမဆုံးမိန့်ခွန်းမှာ တိုင်းပြည်အတွက် စာမျက်နှာသစ် ဖွင့်လှစ်သွားမယ်လို့ အသက် ၆၉ နှစ်အရွယ် ပီဇက်ကီယန်က ကတိပြုခဲ့ပါတယ်။

    “ပြည်သူတွေကို သာယာ၀ပြောတဲ့ ဘ၀မျိုး ပေးနိုင်ဖို့အတွက် စမ်းသပ်မှုတွေ၊ စိန်ခေါ်မှုတွေ၊ အခက်အခဲတွေ အများကြီးကို ကျွန်တော်တို့ ကျော်ဖြတ်ရအုံးမှာ ဖြစ်ပါတယ်”

    ပြည်သူတွေရဲ့အသံကို နားထောင်သွားမှာဖြစ်ပြီး၊ ကတိက၀တ်တွေကိုလည်း အကောင်အထည်ဖော်သွားမယ်လို့ ပီဇက်ကီယန်က ထည့်သွင်းပြောဆိုခဲ့ပါတယ်။

    မာဆွတ် ပီဇက်ကီယန်ဟာ မဲအရေအတွက် ၅၃ ဒဿမ ၆ ရာခိုင်နှုန်း ရရှိခဲ့ပြီး အနီးကပ်ဆုံးပြိုင်ဘက် ဆအီးဒ် ဂျာလီလီက ၃၈ ဒဿမ ၇ ရာခိုင်နှုန်း ရရှိခဲ့ပါတယ်။ ပီဇက်ကီယန်ဟာ လွှတ်တော်အမတ်တစ်ဦးဖြစ်ပြီး၊ ဂျာလီလီက အီရန်ရဲ့ နျူအရေး ညှိနှိုင်းဆွေးနွေးမှုအဖွဲ့ အကြီးအကဲဟောင်းဖြစ်ပါတယ်။

    အီရန်ကို ကမ္ဘာ့အသိုင်းအ၀ိုင်းထဲ ပိုမို၀င်ဆံ့နိုင်အောင် ကြိုးပမ်းဆောင်ရွက်သွားမယ်လို့ ပီဇက်ကီယန်က ကတိပြုထားပါတယ်။ သမ္မတသစ်ဟာ ရွေးကောက်ပွဲအပြီး ရက်ပေါင်း ၃၀ အတွင်း တာ၀န်စတင်ထမ်းဆောင်ရမှာ ဖြစ်ပါတယ်။

    ၀ေဖန်သူ

    သမ္မတဟောင်း ရိုင်စီလက်ထက် အီရန်အမျိုးသမီး ကာ့ဒ် မာရှာ အေမီနီ ပု၀ါမဆောင်းတာကို ဘာသာရေးရဲတွေက ဖမ်းဆီးကာ စစ်ကြောရေးမှာ သတ်ပစ်ခဲ့တဲ့ အဖြစ်အပျက်နဲ့ ပတ်သက်ပြီး ပီဇက်ကီယန်က ပြင်းပြင်းထန်ထန် ၀ေဖန်ခဲ့ဖူးပါတယ်။

    အေမီနီအသတ်ခံရမှုအတွက် စုံစမ်းစစ်ဆေးရေးကော်မတီဖွဲ့စည်း စစ်ဆေးဖို့ ပီဇက်ကီယန်က တိုက်တွန်းခဲ့ပြီး၊ အခု သမ္မတရွေးကောက်ပွဲ မဲဆွယ်မှုမှာလည်း သူက ဒီကိစ္စကို ထပ်မံ ထောက်ပြခဲ့ပါဝယ်။

    “ဘယ်သူ့အပေါ်မှာမဆို အကြမ်းဖက်တာ၊ လူမဆန်တဲ့ အပြုအမူတွေ ပြုလုပ်တာကို ကျွန်တော်တို့ ဆန့်ကျင်ပါတယ်။ အထူးသဖြင့် ကျွန်တော်တို့ရဲ့ အမ၊ ညီမတွေ၊ သမီးတွေအပေါ်မှာ ဒီလို လုပ်ဆောင်တာကို ခွင့်ပြုမှာ မဟုတ်ပါဘူး”

    နိုင်ငံအတွင်း အင်တာနက်အသုံးပြုမှု ကန့်သတ်ထားတာကို ဖြေလျော့ပေးမှာဖြစ်ပြီး၊ အစိုးရအဖွဲ့မှာလည်း လူမျိုးစုကိုယ်စားလှယ်တွေ ပိုမိုထည့်သွင်းသွားမယ်လို့ ပီဇက်ကီယန်က ကတိပြုထားပါတယ်။

    ၂၀၁၅ ခုနှစ်က အနောက်နိုင်ငံတွေနဲ့ သဘောတူညီနိုင်ခဲ့ပြီး နောက် ၃ နှစ်အကြာမှာ ပျက်ပြယ်သွားတဲ့ သမိုင်း၀င် နျူသဘောတူညီချက်ကို ပြန်လည်အသက်သွင်းနိုင်ဖို့ ပီဇက်ကီယန်က ကြိုးပမ်းသွားမှာ ဖြစ်ပါတယ်။

    နိုင်ငံရေးဘ၀

    ပီဇက်ကီယန်ကို နိုင်ငံအနောက်မြောက်ပိုင်း မာဟာဘတ်မြို့မှာ ၁၉၅၄ ခုနှစ်က မွေးဖွားပါတယ်။ ဖခင်က တူရကီအနွယ်ဖြစ်ပြီး၊ မိခင်က ကာ့ဒ်လူမျိုးပါ။

    ၂၀၀၈ ခုနှစ်ကစတင်ကာ လွှတ်တော်အမတ် ဖြစ်လာခဲ့ပါတယ်။ သမ္မတဟောင်းခါတာမီလက်ထက်မှာ ကျန်းမာရေး၀န်ကြီးအဖြစ် တာ၀န်ထမ်းဆောင်ခဲ့ပြီး ၁၉၈၀-၈၈ အီရန်-အီရတ်စစ်ပွဲမှာ ရှေ့တန်း ဆေးအဖွဲ့ကို ကြီးကြပ်ခဲ့ပါတယ်။

    ၁၉၉၃ ခုနှစ်မှာ ဇနီးနဲ့ ကလေးတစ်ဦးကို ကားမတော်တဆမှုမှာ ဆုံးရှုံးခဲ့ရတဲ့ ပီဇက်ကီယန်ဟာ ကျန်ရစ်ခဲ့တဲ့ သားနှစ်ဦးနဲ့ သမီးတစ်ဦးတို့ကို ပြုစုပျိုးထောင်ရင်း ဘ၀ခရီးလမ်းကို လျှောက်လှမ်းခဲ့တာ ဖြစ်ပါတယ်။

    Ref: Aljazeera, Al-Awsat

  • အီရန် သမ္မတနှင့် ထိပ်ပိုင်းခေါင်းဆောင်တစ်ချို့ အံ့အားသင့်ဖွယ် လေယာဥ်ပျက်ကျသေဆုံး

    အီရန် သမ္မတနှင့် ထိပ်ပိုင်းခေါင်းဆောင်တစ်ချို့ အံ့အားသင့်ဖွယ် လေယာဥ်ပျက်ကျသေဆုံး

    မေ ၁၉၊ ၂၀၂၄
    M-Media 

    (ဓာတ်ပုံ- အီရန်သမ္မတနှင့် နိုင်ငံခြားရေး၀န်ကြီး)

    -သမ္မတ အီဘရာဟင် ရိုင်စီနဲ့ နိုင်ငံခြားရေး၀န်ကြီး အမီရ်အဘ်ဒိုလာဟင်တို့ဟာ နိုင်ငံ အနောက်မြောက်ပိုင်းမှာ ရဟတ်ယာဥ်ပျက်ကျ သေဆုံးသွားတယ်လို့ အီရန်နိုင်ငံပိုင် သတင်းဌာနက ဖော်ပြပါတယ်။ 

    လူ ၉ ဦးလိုက်ပါသွားတဲ့ Bell Textron ရဟတ်ယာဥ်ဟာ အရှေ့အဇာဘိုင်ဂျန်ပြည်နယ်မှာ ရာသီဥတု ဆိုးရွားနေတဲ့အချိန် ပျက်ကျသွားခဲ့တာဖြစ်တယ်လို့ ထုတ်ပြန်ချက်မှာ ဖော်ပြပါတယ်။ 

    လေယာဥ်ပျက်ကျရတဲ့ အကြောင်းအရင်းကို တိတိကျကျ မသိရသေးပါဘူး။ 

    အသက် ၆၃ နှစ်အရွယ် ရိုင်စီဟာ ၂၀၂၁ ခုနှစ်မှာ သမ္မတအဖြစ် ထပ်မံ ရွေးကောက်တင်မြှောက်ခံခဲ့ရတာဖြစ်ပါတယ်။ အီရန်နဲ့ အနောက်နိုင်ငံတွေအကြား စေ့စပ်ဆွေးနွေးရေးမှာ သဘောထား တင်းမာသူအဖြစ် ထင်ရှားပါတယ်။ 

    နိုင်ငံခြားရေး၀န်ကြီး အမီရ် အဘ်ဒူလာဟင်ဟာ အတွေ့အကြုံကြွယ်၀တဲ့ သံတမန်တစ်ဦးဖြစ်ပြီး ဒေသတွင်း ရန်ဖက် ဆော်ဒီအာရေဗျနဲ့ ဆက်ဆံရေး အဆင်ပြေအောင် မကြာသေးခင်ကပဲ ဆောင်ရွက်ထားနိုင်သူ ဖြစ်ပါတယ်။ 

    အီရန် ဖွဲ့စည်းပုံအခြေခံဥပဒေအရ သမ္မတသေဆုံးသွားရင် ဒုတိယသမ္မတက အာဏာရယူရမှာဖြစ်ပြီး အဲဒီနောက် ရက် ၅၀ အတွင်း ရွေးကောက်ပွဲ လုပ်ပေးရမှာ ဖြစ်ပါတယ်။ 

    လက်ရှိမှာ ဒုတိယသမ္မတ မိုဟာမက် မွခ်ဘာရ်က ယာယီသမ္မတအဖြစ် တာ၀န်ထမ်းဆောင်နေပြီး၊ အစိုးရကလည်း နှောင့်နှေး ကြန့်ကြာမှုမရှိ ဆက်လက်လည်ပတ်သွားမယ်လို့ အီရန်အစိုးရက ထုတ်ပြန်ပါတယ်။ 

    Ref : Reuters 

  • အစ္စရေးရန်ကြောင့် နျူလက်နက်မူ၀ါဒ ပြောင်းလဲသွားနိုင်သည်ဟု အီရန်သတိပေး

    အစ္စရေးရန်ကြောင့် နျူလက်နက်မူ၀ါဒ ပြောင်းလဲသွားနိုင်သည်ဟု အီရန်သတိပေး

    မေ ၉၊ ၂၀၂၄
    M-Media

    (ဓာတ်ပုံ – အီရန်အဓိပတိ အယာတိုလာ အလီခါမေနီ၏ အကြံပေး ကမာလ် ခါရာဇီ)

    -မိမိတို့ရဲ့ တည်ရှိမှုကို အစ္စရေးက ခြိမ်းခြောက်လာရင် နျူလက်နက်ထုတ်လုပ်ရေး ဆောင်ရွက်သွားမယ်လို့ အီရန်က သတိပေးလိုက်ပါတယ်။

    အီရန်မှာ လက်ရှိ နျူစီမံကိန်း ရှိနေပေမယ့် ဒါဟာ အရက်ဖက်မှာ အသုံးပြုဖို့သာ မူ၀ါဒရှိတယ်လို့ အီရန်က အခိုင်အမာ ပြောကြားထားတာ ဖြစ်ပါတယ်။

    ဂါဇာက တစ်ကျော့ပြန်လူသတ်ပွဲနဲ့အတူ ဒေသတွင်းမှာ အစ္စရေးရဲ့ ခြိမ်းခြောက်မှု ပိုမိုကြီးမားလာတာကြောင့် နျူမူ၀ါဒ ပြောင်းလဲသွားနိုင်တယ်လို့ အီရန်အဓိပတိ အယာတိုလာ အလီခါမေနီရဲ့ အကြံပေး ကမာလ် ခါရာဇီက မတ်လ ၉ ရက်နေ့မှာ ပြောကြားခဲ့ပါတယ်။

    “နျူဗုံးဖန်တီးဖို့ ကျွန်တော်တို့မှာ မူ၀ါဒ မရှိပါဘူး။ ဒါပေမယ့် အီရန်ရဲ့တည်ရှိမှု ခြိမ်းခြောက်ခံရလားဆိုတဲ့အပေါ်မှာ မူတည်ပါတယ်။ အဲဒီလိုဖြစ်လာရင် ကျွန်တော်တို့ရဲ့ စစ်ရေးမူ၀ါဒကို ပြောင်းလဲဖို့အပြင် ရွေးချယ်စရာ မရှိပါဘူး။ ဇိုင်ယွန်အာဏာရှင်က ကျွန်တော်တို့ရဲ့ နျူအဆောက်အဦးတွေကို တိုက်ခိုက်လာမယ်ဆိုရင် ကျွန်တော်တို့ရဲ့ ကာကွယ်ရေးမူ၀ါဒလည်း ပြောင်းလဲသွားမှာပါ”

    အီရန်ရဲ့နျူစီမံကိန်းဟာ လက်နက်ထုတ်လုပ်ဖို့ဖြစ်တယ်လို့ အမေရိကန်နဲ့ အပေါင်းအပါနိုင်ငံတွေက စွပ်စွဲထားကြတာ ဖြစ်ပါတယ်။

    နိုင်ငံရဲ့ မူ၀ါဒေရေးရာမှာ နောက်ဆုံး အဆုံးအဖြတ်ပေးတဲ့ အဓိပတိ အယာတိုလာ အလီခါမေနီက နျူလက်နက်ထုတ်လုပ်မှုဟာ ဘာသာရေးအရ တရားမ၀င်တဲ့အတွက် လုပ်ဆောင်မှာမဟုတ်ဘူးလို့ ၂၀၀၀ ပြည့်နှစ် အစောပိုင်းတွေမှာ ထုတ်ပြန်ထားဖူးပါတယ်။

    အီရန်ဟာ လက်ရှိမှာ ယူရေနီယံသတ္တုကို ၆၀ ရာခိုင်နှုန်းအထိ သန့်စင်နိုင်အောင် ကြိုးစားနေပါတယ်။ နျူလက်နက်ထုတ်လုပ်နိုင်ဖို့အတွက်ဆိုရင် ယူရေနီယံကို ၉၀ ရာခိုင်နှုန်းအထိ သန့်စင်နိုင်ရမှာ ဖြစ်ပါတယ်။

    အီရန်မှာ လက်ရှိပိုင်ဆိုင်ထားတဲ့ ယူရေနီယံပမာဏကို ၉၀ ရာခိုင်နှုန်းအထိ သန့်စင်နိုင်ရင်တောင် နျူဗုံး ၂ လုံးလောက်သာ ရနိုင်မယ်လို့ နိုင်ငံတကာ အနုမြူစွမ်းအင်အေဂျင်စီ IAEA က ပြောကြားထားပါတယ်။

    အမေရိကန်နဲ့ အစ္စရေးမှာ နျူလက်နက် ရာချီရှိနေတာဖြစ်ပါတယ်။

    Ref: Aljazeera

  • ၄၅ နှစ်ပြည့်ပြီဖြစ်သည့် အီရန်က အစ္စလာမ့်မစ်တော်လှန်ရေး

    ၄၅ နှစ်ပြည့်ပြီဖြစ်သည့် အီရန်က အစ္စလာမ့်မစ်တော်လှန်ရေး

    ဖေဖော်၀ါရီ ၁၂၊ ၂၀၂၄

    M-Media 


    -အမေရိကန်ကျောထောက်နောက်ခံပြု အာဏာရှင် ရှားဘုရင်ကို ဖြုတ်ချနိုင်ခဲ့တဲ့ အစ္စလာမ့်မစ်တော်လှန်ရေး ၄၅ နှစ်မြောက် နှစ်ပတ်လည် အခမ်းအနားကို အီရန်မှာ ဖေဖော်၀ါရီ ၁၁ ရက်နေ့က ကျင်းပခဲ့ပါတယ်။ 

    နိုင်ငံတစ်၀ှမ်း ချီတက်လမ်းလျှောက်ပွဲတွေ လုပ်ခဲ့ပြီး မြို့တော် တီဟီရန်မှာ အီရန်စစ်တပ်က စစ်ရေးပြအခမ်းအနားတွေပါ လုပ်ဆောင်ခဲ့ပါတယ်။ 

    ပြည်ထွင်းထုတ် တိုက်ချင်းပစ်ဒုံးကျည်တွေ၊ ဂြိုဟ်တုတွေ၊ ဒရုန်းတွေကိုလည်း ထုတ်ပြခဲ့ပါတယ်။ 

    သမ္မတ အီဘရာဟင် ရိုင်စီရဲ့ မိန့်ခွန်းမှာတော့ ဇိုင်ယွန်၀ါဒကို ဒေသတွင်းကနေ မောင်းထုတ်ပစ်ရမယ်လို့ ထည့်သွင်းပြောဆိုခဲ့ပါတယ်။ 

    စစ်ရေးပြအခမ်းအနားမှာ လေထီးသမားတစ်ယောက်က ပါလက်စတိုင်းအလံကို လွှင့်ထူပြီး အလှပြခုန်ဆင်းတဲ့ ပြကွက်လည်း ပါ၀င်ပါတယ်။ 

    အမေရိကန်ကျောထောက်နောက်ခံပြု အာဏာရှင် ရှားဘုရင်ကို ဖြုတ်ချတဲ့ အီရန်လူထုရဲ့ အစ္စလာမ့်မစ်တော်လှန်ရေးမှာ လူရာချီ သတ်ဖြတ်ခံခဲ့ရပါတယ်။ 

    ၁၉၇၈ ခုနှစ် ဇန်န၀ါရီ ၇ ရက်နေ့ စတင်တဲ့ အာဏာရှင်ဖြုတ်ချရေး လှုပ်ရှားမှုဟာ၊ ရှားဘုရင် တိုင်းပြည်က ထွက်ပြေးသွားတဲ့ ၁၉၇၉ ခုနှစ် ဇန်န၀ါရီ ၁၆ ရက်နေ့မှာ အဆုံးသတ်သွားခဲ့ပါတယ်။ 

    အီရန်စစ်တပ်ဟာ အစောပိုင်းမှာ ရှားဘုရင်ဘက်က ရပ်တည်ကာ ကြားဖြတ် အာဏာရယူခဲ့ပေမယ့် နောက်ပိုင်းမှာ ကြားနေဖြစ် ရှိခဲ့ပြီး၊ အစ္စလာမ့်မစ် တော်လှန်ရေးကို လက်ခံခဲ့ပါတယ်။  

    အီရန် ဘာသာရေးခေါင်းဆောင် အယာတိုလာ ရူဟွလ္လာဟ် ခိုမေနီက ဒီတော်လှန်ရေးကို ဦးဆောင်ခဲ့ပါတယ်။ 

    Ref: Aljazeera 

  • အစ္စရေးလုံခြုံရေးအတွက် အီရန်ကို ကိုင်တွယ်ရမည်ဟု ကန်ထောက်လှမ်းရေးအကြီးအကဲပြော

    အစ္စရေးလုံခြုံရေးအတွက် အီရန်ကို ကိုင်တွယ်ရမည်ဟု ကန်ထောက်လှမ်းရေးအကြီးအကဲပြော

    ဇန်န၀ါရီ ၃၀၊ ၂၀၂၄

    M-Media 


    (ဓာတ်ပုံ – စီအိုင်အေအကြီးအကဲ ၀ီလီယံ ဘန်းစ်)

    -အစ္စရေးနဲ့ အရှေ့အလယ်ပိုင်း လုံခြုံရေးအတွက် အဓိကသော့ချက်ဟာ အီရန်ကို ကိုင်တွယ်ဆောင်ရွက်ဖို့ဖြစ်တယ်လို့ အမေရိကန် ထောက်လှမ်းရေးအဖွဲ့ CIA အကြီးအကဲ ၀ီလီယံ ဘန်းစ်က ပြောကြားလိုက်ပါတယ်။ 

    ဂါဇာမှာ အစ္စရေးရဲ့ လူသတ်ပွဲ ရပ်တန့်ရေးအတွက် ပဲရစ်မြို့က ဆွေးနွေးပွဲကို ၀ီလီဘန်းစ်လည်း တက်ရောက်ခဲ့ပါတယ်။ 

    အမေရိကန်နိုင်ငံရေးဂျာနယ် Foreign Affairs က ဘန်းစ်ရဲ့ ဆောင်းပါးမှာ အရှေ့အလယ်ပိုင်းဒေသအတွင်း အီရန်ရဲ့ အရေးပါလာပုံတွေကို ထောက်ပြထားပါတယ်။ 

    “(အရှေ့အလယ်ပိုင်းက) ပြဿနာတွေကြောင့် အီရန်ဟာ ပိုအားကောင်းလာပြီး လက်၀ေခံအဖွဲ့တွေကနေတစ်ဆင့် တိုက်ခိုက်ဖို့ အဆင်သင့်ဖြစ်လာတယ်။ နျူလက်နက်အစီအစဥ်ကို ချဲ့ထွင်နေသလို၊ ရုရှားရဲ့ ကျူးကျော်မှုကိုလည်း အီရန်က အကူအညီပေးနိုင်လာပါတယ်”

    ဘယ်လိုပုံစံမျိုးနဲ့ အီရန်ကို ကိုင်တွယ်ဆောင်ရွက်မလဲဆိုတာကို ဘန်းစ်က ထည့်သွင်းပြောဆိုခဲ့ခြင်းမရှိပါဘူး။ ဒါပေမယ့် အရှေ့အလယ်ပိုင်းက ဘယ်ပြဿနာကိုမဆို အမေရိကန်ရဲ့ ဦးဆောင်မှုမပါဘဲ မဖြေရှင်းနိုင်ဘူးလို့ သူက ဆိုပါတယ်။ 

    အီရတ်အခြေစိုက်ပြီး အီရန်က ကျောထောက်နောက်ခံပြုထားတဲ့ လက်နက်ကိုင်အဖွဲ့တစ်ခုက ဂျော်ဒန်မှာရှိတဲ့ အမေရိကန်စစ်စခန်းကို အထိနာအောင် ဒရုန်းနဲ့ တိုက်ခိုက်မှု ပြုလုပ်ပြီးတဲ့နောက် ဘန်းစ်ရဲ့ ဒီမှတ်ချက် ပေါ်ထွက်လာတာ ဖြစ်ပါတယ်။ 

    Ref: Aljazeera