Tag: Iran

ဇန်န၀ါရီ ၃၀၊ ၂၀၂၃

M-Media 

-အီရန်နိုင်ငံအလယ်ပိုင်းက လက်နက်စက်ရုံတစ်ခုကို ဒရုန်းနဲ့ တိုက်ခိုက်မှု မနေ့က ဖြစ်ပွားခဲ့ပြီး အီရန်နဲ့ အမေရိကန်အာဏာပိုင်တွေက အစ္စရေးလက်ချက်လို့ ပြောပါတယ်။

အစ္စဖာဟန်မြို့မှာ ဖြစ်ပွားခဲ့တဲ့ ဒီတိုက်ခိုက်မှုမှာ ဒရုန်းလေယာဥ် ၃ စီးပါ၀င်ပြီး ၂ စီးကို ကြားဖြတ်ပစ်ချနိုင်ခဲ့ကာ တစ်စီးကတော့ တိုက်ခိုက်မှု လုပ်နိုင်ခဲ့တယ်လို့ အီရန် ကာကွယ်ရေး၀န်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။ 

လက်နက်စက်ရုံရဲ့ အဆောက်အဦး အနည်းငယ်ပျက်ဆီးသွားပြီး လူထိခိုက် သေဆုံးတာမျိုး မရှိဘူးလို့ ဆိုပါတယ်။  

အစ္စရေးဟာ ဆီးရီးယားနဲ့ အီရတ်က အီရန်စစ်အခြေစိုက်စခန်းတွေကို မကြာခဏ ကျူးကျော်တိုက်ခိုက်ဖူးပါတယ်။ 

အမေရိကန် ထိပ်တန်းမီဒီယာတစ်ခုဖြစ်တဲ့ Wall Street က တိုက်ခိုက်မှုကို အစ္စရေးက လုပ်ဆောင်တာဖြစ်ကြောင်း အမည်ဖော်လိုတဲ့ အမေရိကန်တာ၀န်ရှိသူတွေ၊ ဒီကိစ္စကို သိရှိသူတွေကို ကိုးကားပြီး ဖော်ပြပါတယ်။ 

နောက်ထပ် အမည်မဖော်လိုတဲ့ အမေရိကန်အစိုးရ တာ၀န်ရှိသူ တစ်ဦးကလည်း တိုက်ခိုက်မှုမှာ အစ္စရေးက ပါ၀င်ပတ်သက်ဖွယ်ရှိတယ်လို့ ရိုက်တာသတင်းဌာနကို ပြောကြားခဲ့ပါတယ်။ 

အီရန်နိုင်ငံခြားရေး၀န်ကြီး ဟိုစိန် အမီရ် အဘ်ဒိုလာဟင်က ဒီတိုက်ခိုက်မှုဟာ သရဲဘောကြောင်တဲ့ လုပ်ရပ်ဖြစ်ပြီး နိုင်ငံအတွင်း မတည်မငြိမ်ဖြစ်အောင် လုပ်ဆောင်တာလို့ ရှုတ်ချခဲ့ပါတယ်။ 

တိုက်ခိုက်ခံရတဲ့ အဆောက်အဦးဟာ လေတပ်စခန်းနဲ့ နျူကလီးယား လောင်စာ သုတေသနစင်တာတို့ တည်ရှိပါတယ်။ 

ဒီကိစ္စကြောင့် အီရန်ရဲ့ နျူစီမံကိန်းကို ထိခိုက်နိုင်လားလို့ မေးမြန်းရာမှာ နိုင်ငံခြားရေး၀န်ကြီးက နျူကလီးယားစွမ်းအင်ကို ငြိမ်းချမ်းစွာအသုံးပြုရေး ရည်ရွယ်တဲ့ အီရန်သိပ္ပံပညာရှင်တွေရဲ့ စိတ်ပိုင်းဖြတ်ထားမှုကို ထိခိုက်မှာမဟုတ်ဘူးလို့ ဖြေဆိုခဲ့ပါတယ်။ 

Ref: Aljazeera 

ဒီဇင်ဘာ ၄၊ ၂၀၂၂

M-Media 

-၀ေဖန်မှုတွေခံနေရတဲ့ ဘာသာရေးပုလိပ်အဖွဲ့ရဲ့ လုပ်ငန်းတာ၀န်တွေကို ရပ်ဆိုင်းလိုက်တယ်လို့ အီရန်ရှေ့နေချုပ်က ဒီကနေ့မှာ ကြေငြာပါတယ်။

အသက် ၂၂ နှစ်အရွယ် အမျိုးသမီး မာရှာ အေမီနီကို ဘာသာရေးဥပဒေ ချိုးဖောက်တယ်ဆိုတဲ့ စွပ်စွဲချက်နဲ့ ဘာသာရေးပုလိပ်အဖွဲ့က ဖမ်းဆီးခဲ့ပြီးနောက် အချုပ်ခန်းအတွင်း သေဆုံးခဲ့တာကို မကျေနပ်တဲ့အတွက် အီရန်နိုင်ငံမှာ ပြည်သူတွေ ဆန္ဒပြနေတာ ၂ လလောက် ကြာမြင့်နေပါပြီ။ 

မနေ့ကပြုလုပ်တဲ့ သတင်းစာရှင်းလင်းပွဲမှာ ရှေ့နေချုပ် မိုဟာမက် ဂျာဖာရ် မွန်တာဇီရီက ဘာသာရေးပုလိပ်အဖွဲ့ရဲ့ လုပ်ငန်းတာ၀န်တွေကို ရပ်ဆိုင်းလိုက်တယ်လို့ ပြောပါတယ်။ 

တရာရေးလုပ်ငန်းတွေမှာ ဒီပုလိပ်အဖွဲ့က ပါ၀င်ပတ်သက်တော့မှာ မဟုတ်ဘူးလို့လည်း မွန်တာဇီရီက ပြောပါတယ်။ 

ဒါပေမယ့် ဘာသာရေးပုလိပ်အဖွဲ့တွေက ပတ္တရောင်လှည့်တာ ဆက်ရှိနေမှာလား၊ ဒီအဖွဲ့ကို လုံး၀ ဖျက်သိမ်းမှာလားဆိုတာကို ရှေ့နေချုပ်က တိတိကျကျ မပြောခဲ့ပါဘူး။

အမျိုးသမီးတွေအပေါ် ဖိနှိပ်မှု ဆန့်ကျင်ရေး အီရန်ပြည်သူတွေရဲ့ ၂ လကြာ ဆန္ဒပြမှုကို အီရန်အာဏာပိုင်တွေက ပြင်းပြင်းထန်ထန် နှိမ်နှင်းနေပြီး အနည်းဆုံး လူ ၂၀၀ လောက် သေဆုံးခဲ့ပါတယ်။ 

Ref: Aljazeera