Tag: Israel

မေ ၁၇၊ ၂၀၂၁
M-Media

-ပါလက်စတိုင်းပိုင် ဂါဇာကမ်းမြှောင်ကို အစ္စရေးက လေကြောင်းကနေ တိုက်ခိုက်နေတာ ၈ ရက်မြောက် ရှိသွားပြီဖြစ်ပြီး ကလေးငယ်တွေအပါအဝင် သေဆုံးသူအရေအတွက်ဟာလည်း ၁၉၈ ဦး ရှိလာပြီဖြစ်ပါတယ်။

တနင်္လာနေ့မနက်ပိုင်းက တိုက်ခိုက်မှုမှာပဲ အနည်းဆုံး ၄၂ ဦးသေဆုံးကာ ဒါဇင်နဲ့ချီ ဒဏ်ရာရခဲ့ပါတယ်။

အစ္စရေးက ကျူးကျော်သိမ်းပိုက်ထားတဲ့ ပါလက်စတိုင်းပိုင် အနောက်ဖက်ကမ်းမှာ ပြီးခဲ့တဲ့ ဧပြီလအတွင်း ပါလက်စတိုင်းနေအိမ်တွေကို ဂျူးအခြေချသူတွေက လုယူသိမ်းပိုက်ခဲ့ပြီးတဲ့နောက် ပါလက်စတိုင်းနဲ့ အစ္စရေးတို့အကြား တင်းမာမှုတွေ မြင့်တက်လာတာပါ။

ဒီလုယူမှုကို မကျေနပ်တဲ့အတွက် ပါလက်စတိုင်းတွေက ဂျေရုစလင်မှာရှိတဲ့ အလ်အက္ကဆွာဗလီမှာ ထိုင်သပိတ်ပြုလုပ်ခဲ့ပြီး အစ္စရေးတပ်ဖွဲ့က အင်အားသုံးဖြိုခွဲမှုကြောင့် လူ ၇၀၀ လောက် ဒဏ်ရာရခဲ့ပြီးတဲ့နောက် ပါလက်စတိုင်းလွတ်မြောက်ရေးအဖွဲ့ ဟားမက်စ်က ဂါဇာကနေ အစ္စရေးဘက်ကို ဒုံးကျည်တွေနဲ့ ပြီးခဲ့တဲ့တစ်ပတ် တနင်္လာနေ့မှာ ပစ်ခတ်ခဲ့ပါတယ်။

အဲဒီနောက်ပိုင်းမှာတော့ အစ္စရေးက နေ့စဉ်ရက်ဆက် ဂါဇာကို လေကြောင်းကနေ တိုက်ခိုက်ခဲ့တာ ဖြစ်ပါတယ်။

လူနေအဆောက်အဦးတွေကို ပစ်မှတ်ထားတိုက်ခိုက်မှုတွေလည်း ရှိနေပြီး ဒီနေ့အထိ သေဆုံးသူ ပါလက်စတိုင်းအရေအတွက်က ၁၉၈ ဦး ရှိလာပြီဖြစ်ပါတယ်။ အဲဒီအထဲမှာ ကလေးငယ် ၅၈ ဦး ပါဝင်ပါတယ်။ ဒဏ်ရာရသူကတော့ ၁၃၀၀ ကျော်ပါပြီ။

အစ္စရေးကပိတ်ဆို့ထားတဲ့ ပါလက်စတိုင်းပိုင် အနောက်ဖက်ကမ်းမှာလည်း အစ္စ​ရေးလုံခြုံရေးတပ်ဖွဲ့တွေနဲ့ ဂျူးအခြေချနေထိုင်သူတွေရဲ့ လက်ချက်ကြောင့် ပါလက်စတိုင်းတွေသေဆုံးမှု မြင့်တက်နေပါတယ်။

ဟားမက်စ်ကလည်း အစ္စရေးဖက်ကို ဒုံးကျည်တွေနဲ့ ပစ်နေပြီး ကလေးငယ် ၂ ဦး အပါအဝင် အနည်းဆုံး ၁၀ ဦး သေဆုံးခဲ့ပါတယ်။

အစ္စရေးဝန်ကြီးချုပ် ဘင်ဂျမင် နေတန်ယာဟုကတော့ ဂါဇာကို တိုက်ခိုက်မှုတွေ ဆက်လုပ်သွားမယ်လို့ မနေ့မှာ ပြောကြားခဲ့ပါတယ်။ ကုလသမဂ္ဂ လုံခြုံရေးကောင်စီကလည်း တင်းမာမှုလျော့ချရေး မနေ့က အစည်းအဝေးလုပ်ခဲ့ပေမယ့် ကြေ​ငြာချက် မထုတ်နိုင်ခဲ့ပါဘူး။

အမေရိကန်ရဲ့နှောက်ယှက်မှုကြောင့် ကြေငြာချက်မထုတ်နိုင်ခဲ့တာလို့ တရုတ်က ပြောပါတယ်။

Ref: Aljazeera

မေ ၁၅၊ ၂၀၂၁
M-Media

-ပါလက်စတိုင်းပိုင် ဂါဇာကမ်းမြှောင်ဒေသကို အစ္စရေးက လေကြောင်းက​နေတိုက်ခိုက်မှု ၆ ရက်ဆက် ဖြစ်လာတဲ့အချိန် သေဆုံးသူအရေအတွက်က အနည်းဆုံး ၁၄၀ လောက် ရှိလာပြီ ဖြစ်ပါတယ်။

သေဆုံးသူတွေထဲမှာ ကလေးငယ် ၄၀ လောက် ပါဝင်ပြီး၊ ဒဏ်ရာရသူက ၉၅၀ လောက် ရှိပါတယ်။ အစ္စရေးရဲ့ တိုက်ခိုက်မှုကြောင့် လူနေ အထပ်မြင့်အဆောက်အဦးတွေ ပြိုကျပျက်ဆီးမှုလည်း မြင့်တက်လာပါတယ်။

ပြီခဲ့တဲ့ သီတင်းပတ်အနည်းအငယ်အတွင်း အစ္စရေးက ကျူးကျော်သိမ်းပိုက်ထားတဲ့ ပါလက်စတိုင်းပိုင် အနောက်ဖက်ကမ်းမှာ ပါလက်စတိုင်းနေအိမ်တွေကို ဂျူးအခြေချသူတွေက လုယူသိမ်းပိုက်ခဲ့ပြီးတဲ့နောက် ပါလက်စတိုင်းနဲ့ အစ္စရေးတို့အကြား တင်းမာမှုတွေ မြင့်တက်လာတာပါ။

ဒီလုယူမှုကို မကျေနပ်တဲ့အတွက် ပါလက်စတိုင်းတွေက ဂျေရုစလင်မှာရှိတဲ့ အလ်အက္ကဆွာဗလီမှာ ထိုင်သပိတ်ပြုလုပ်ခဲ့ပြီး အစ္စရေးတပ်ဖွဲ့က အင်အားသုံးဖြိုခွဲမှုကြောင့် လူ ၇၀၀ လောက် ဒဏ်ရာရခဲ့ပြီးတဲ့နောက် ပါလက်စတိုင်းလွတ်မြောက်ရေးအဖွဲ့ ဟားမက်စ်က ဂါဇာကနေ အစ္စရေးဘက်ကို ဒုံးကျည်တွေနဲ့ ပြီးခဲ့တဲ့တစ်ပတ် တနင်္လာနေ့မှာ ပစ်ခတ်ခဲ့ပါတယ်။

အစ္စရေးကလည်း တနင်္လာနေ့မှာပဲ ဂါဇာကို လေကြောင်းကနေ တုန့်ပြန်တိုက်ခိုက်ခဲ့ပါတယ်။

ပါလက်စတိုင်း အနောက်ဖက်ကမ်းမှာလည်း ဂျူးအခြေချနေထိုင်သူတွေက ပါလက်စတိုင်းနေအိမ်ကို လုယူတာ၊ အုပ်စုဖွဲ့ကာ ပါလက်စတိုင်းတွေကို တိုက်ခိုက်တာတွေ တိုးမြှင့်လုပ်ဆောင်လာပြီး တင်းမာမှုတွေက ပိုမြင့်လာပါတယ်။

အနောက်ဖက်ကမ်းမှာ အစ္စရေးလုံခြုံရေးတပ်ဖွဲ့တွေနဲ့ ဂျူးအခြေချနေထိုင်သူတွေရဲ့ လက်ချက်ကြောင့် ပါလက်စတိုင်း​ အနည်းဆုံး ၁၃ ဦး သေဆုံးခဲ့ပါတယ်။

Ref: Aljazeera

မတ် ၃၊ ၂၀၂၀၁
M-Media

-အစ္စရေးက ကျူးကျော်သိမ်းပိုက်ထားတဲ့ ပါလက်စတိုင်းပိုက်နက်တွေမှာ စစ်ရာဇဝတ်မှုတွေ ရှိတယ်ဆိုတဲ့ စွပ်စွဲချက်အတွက် စုံစမ်းစစ်ဆေးမှု တရားဝင် စတင်နေပြီလို့ နိုင်ငံတကာ ရာဇဝတ်ခုံရုံး (ICC) အကြီးအကဲ ဖာတူ ဘန်ဆူဒါက ပြောပါတယ်။

စုံစမ်းမှုကို ဘက်မလိုက်ဘဲ လွတ်လွတ်လပ်လပ်နဲ့ ဓမ္မဓိဌာန်ကျကျ ပြုလုပ်သွားမယ်လို့ ဘန်ဆူဒါနဲ့ ဒီကနေ့ ထုတ်ပြန်ချက်မှာ ဖော်ပြထားပါတယ်။

ဂါဇာကမ်းမြှောင်က အစ္စရေးစစ်တပ်ရဲ့ လုပ်ရပ်တွေ၊ အနောက်ဖက်ကမ်းက တရားမဝင်အခြေချအိမ်ယာ ဆောက်လုပ်ထားမှု​ေတွအပါအဝင် ပါလက်စတိုင်းပိုင်နက်တွေမှာ အစ္စရေးက စစ်ရာဇဝတ်မှု ကျူးလွန်မှု ရှိလားဆိုတဲ့ကိစ္စကို စုံစမ်းဖို့ ခိုင်မာတဲ့ အခြေခံအကြောင်းအရင်းတွေ ရှိတယ်လို့ ဘန်ဆူဒါက ၂၀၁၉ ခုနှစ်မှာ ပြောကြားခဲ့ပါတယ်။

ပါလက်စတိုင်းပိုင်နက်တွေမှာ အစ္စရေးတပ်ဖွဲ့နဲ့ ဟားမက်စ်လို ပါလက်စတိုင်းလက်နက်ကိုင် အုပ်စုတွေက ကျူးလွန်မှုတွေ ရှိနိုင်တယ်လို့လည်း သူမက ဆိုပါတယ်။

“၂၀၁၄ ခုနှစ် ဇွန်လ ၁၃ ရက်နေ့ နောက်ပိုင်း ကျူးလွန်တယ်လို့ စွပ်စွဲခံရပြီး တရားရုံးရဲ့ စီရင်ပိုင်ခွင့်ရှိအောက်မှာ ရှိနေတဲ့ ရာဇဝတ်မှုတွေအတွက် စုံစမ်းစစ်ဆေးမှု ပြုလုပ်သွားမှာပါ”

၁၉၆၇ ခုနှစ်စစ်ပွဲမှာ အစ္စရေးက ကျူးကျော်သိမ်းပိုက်ထားတဲ့ ပါလက်စတိုင်းပိုင်နက်တွေမှာ မိမိတို့ တရားစီရင်ပိုင်ခွင့်ရှိတယ်လို့ ICC က ဖေဖော်ဝါရီလမှာ ဆုံးဖြတ်ခဲ့ပါတယ်။

ဒီဆုံးဖြတ်ချက်ကို အစ္စရေးနဲ့ အမေရိကန်တို့က ပြင်းပြင်းထန်ထန် ကန့်ကွက်ခဲ့ပါတယ်။

Ref: Aljazeera