News @ M-Media

Tag: Jordan

  • ဂျော်ဒန်မှာ အနူလက်သီး မိသွားတဲ့ အမေရိကန်

    ဂျော်ဒန်မှာ အနူလက်သီး မိသွားတဲ့ အမေရိကန်

    ဇန်န၀ါရီ ၂၉၊ ၂၀၂၄

    M-Media


    -Tower 22 လို့ အမည်တွင်တဲ့ ဂျော်ဒန်က အမေရိကန် စစ်အခြေစိုက်စခန်းဟာ တနင်္ဂနွေနေ့မှာ ဒရုန်းနဲ့ တိုက်ခိုက်ခံလိုက်ရပါတယ်။ 

    တိုက်ခိုက်မှုကြောင့် စစ်သား ၃ ဦး သေဆုံးခဲ့ပြီး ၃၄ ဦး ဒဏ်ရာရတယ်လို့ အမေရိကန်က ထုတ်ပြန်ပါတယ်။ 

    ဂါဇာမှာ အစ္စရေးက လူသတ်ပွဲစတဲ့ အောက်တိုဘာ ၇ ရက်နေ့နောက်ပိုင်း အရှေ့အလယ်ပိုင်းမှာ အမေရိကန်တွေ ပထမဆုံး အထိနာတဲ့ တိုက်ခိုက်မှုလည်းဖြစ်ပါတယ်။ 

    အီရတ်မှာအခြေစိုက်ပြီး အီရန်ကျောထောက်နောက်ခံပြုထားတဲ့ လက်နက်ကိုင်အဖွဲ့ Islamic Resistance က တိုက်ခိုက်မှုကို သူတို့လုပ်တာလို့ ထုတ်ပြန်ပါတယ်။ 

    လူပေါင်း ၂၆၀၀၀ ကျော် အသတ်ခံထားရတဲ့ အစ္စရေးရဲ့ ဂါဇာလူသတ်ပွဲမှာ အမေရိကန်က ပံ့ပိုးပေးနေတာကို လက်တုန့်ပြန်တာလို့လည်း ဆိုပါတယ်။ 

    အမေရိကန်က သမ္မတ ဂျိုးဘိုင်ဒန်က တိုက်ခိုက်သူတွေကို ပြင်းပြင်းထန်ထန် တုန့်ပြန်သွားမယ်လို့ ကတိပြု ပြောဆိုပါတယ်။ 

    Tower 22 

    ————-

    Tower 22 ဟာ အမေရိကန်ရဲ့ အရှေ့အလယ်ပိုင်းက ထောက်ပို့စခန်းတစ်ခုပါ။ 

    ဂျော်ဒန်နိုင်ငံ အရှေ့မြောက်ပိုင်း ဆီးရီးယား၊ အီရတ်တို့နဲ့ ကပ်နေတဲ့ ဒေသမှာ တည်ရှိပါတယ်။ အမေရိကန် ကြည်းတပ်နဲ့ လေတပ်က စစ်သား အနည်းဆုံး ၃၅၀ လောက်ရှိပြီး လက်နက်တွေလည်း တော်တော်များများရှိပါတယ်။ 

    ဒီလိုစခန်းမျိုးမှာ လေကြောင်းရန်ကာကွယ်ရေးစနစ် ချမထားဘူးလား၊ ဒါမှမဟုတ် အလုပ်မလုပ်တာလား စတဲ့ မေးခွန်းတွေက တိုက်ခိုက်ခံရမှုအပြီးမှာ မြင့်တက်လာပါတယ်။ 

    ဆီးရီးယားနိုင်ငံ အလ်-တနက်ဖ်မြို့က ကန်စစ်သား ၂၅၀၀ လောက် လက်ရှိ ရှိနေတဲ့ စစ်စခန်းအတွက် Tower 22 က အဓိက ထောက်ပို့ဌာန ဖြစ်ပါတယ်။ 

    အရှေ့အလယ်ပိုင်းမှာ ဂျော်ဒန်ဟာ အမေရိကန်နဲ့ နီးကပ်တဲ့ စစ်ရေးဆက်ဆံမှုရှိပြီး၊ အမေရိကန်ကပေးတဲ့ စစ်ရေးအထောက်အပံ့ အများဆုံးရတဲ့ နိုင်ငံအနည်းငယ်ထဲမှာလည်း ဂျော်ဒန် ပါ၀င်ပါတယ်။ 

    နောက်ကျောမလုံ

    ——————-

    အောက်တိုဘာ ၇ ရက်နေ့က ဂါဇာမှာစတင်တဲ့ အစ္စရေးရဲ့ တစ်ကျော့ပြန် လူသတ်ပွဲနောက်ပိုင်း အရှေ့အလယ်ပိုင်းက အမေရိကန်စစ်စခန်းတွေဟာ ပိုမို တိုက်ခိုက်ခံလာရပါတယ်။ 

    အီရတ်နဲ့ ဆီးရီးယားက အမေရိကန်စစ်စခန်းတွေဟာ ၃ လအတွင်း တိုက်ခိုက်မှုပေါင်း ၁၇၀ ကျော်ကို ကြုံခဲ့ရပါတယ်။ ဒီတိုက်ခိုက်မှုတွေကို အီရန်ကျောထောက်နောက်ခံပြု လက်နက်ကိုင် အဖွဲ့အစည်းတွေက လုပ်ဆောင်တာပါ။ 

    Tower 22 ကို တိုက်ခိုက်ခဲ့တဲ့ Islamic Resistance က အစ္စရေးရဲ့ အစုလိုက်အပြုံလိုက် သတ်ဖြတ်မှုတွေကို တုန့်ပြန်တဲ့ အနေနဲ့ အမေရိကန် စစ်စခန်းတွေကို ဆက်လက်တိုက်ခိုက်သွားမယ်လို့ ထုတ်ပြန်ပါတယ်။

    Ref: Aljazeera 

  • စားပြီးအိပ်လို့ရမယ့် ဂျော်ဒန်က စားသောက်ဆိုင်

    စားပြီးအိပ်လို့ရမယ့် ဂျော်ဒန်က စားသောက်ဆိုင်

    ဇူလိုင် ၁၇၊ ၂၀၂၃

    M-Media 


    -ဂျော်ဒန်နိုင်ငံ အမ်မန်မြို့က စားသောက်ဆိုင်တစ်ခုဟာ လာစားသောက်တဲ့ ဖောက်သည်တွေ အိပ်စက်နိုင်ဖို့အတွက်ပါ စီစဥ်ပေးထားပါတယ်။ 

    မန်ဆက်ဖ် (mansaf) လို့ခေါ်တဲ့ နာမည်ကျော် ဂျော်ဒန်ရိုးရာထမင်း ရောင်းချတဲ့ဆိုင် ဖြစ်ပါတယ်။ မန်ဆက်ဖ်ဟာ အဆီအနှစ် အလွန်များတဲ့ အစားအသောက်ဖြစ်ပြီး စားပြီးတဲ့အချိန် အိပ်ငိုက်တာတွေ ဖြစ်တတ်ပါတယ်။

    ဒါ့ကြောင့် စားသုံးသူတွေဟာ အများအားဖြင့် အိမ်ကိုသာ မှာယူစားသုံးကြပါတယ်။ ဒီအခြေအနေကို ဖြေရှင်းဖို့အတွက် အမ်မန်မြို့က Moab ဆိုတဲ့ စားသောက်ဆိုင်တစ်ခုဟာ စားသုံးသူတွေအတွက် အိပ်ဖို့နေရာပါ စီစဥ်ပေးထားပါတယ်။ 

    “အိပ်ယာထားပေးဖို့ အိုက်ဒီယာက နောက်ရင်းပြောင်ရင်းနဲ့ ဖြစ်လာတာ။ မန်ဆက်ဖ်က အဆီများတော့ စားပြီး အိပ်ချင်လာတဲ့သူတွေ အိပ်လို့ရအောင် ဖန်တီးပေးထားပါတယ်” လို့ ဆိုင်ပိုင်ရှင်ရဲ့ သားဖြစ်သူ မူဆက်ဘ် မူဘိုင်ဒင်းက ပြောပါတယ်။ 

    မန်ဆက်ဖ်ကို ဆန်အကောင်းစား၊ သိုးသား၊ ထောပတ်တွေနဲ့ စီမံချက်ပြုတ်တာဖြစ်ပါတယ်။ 

    “စားပြီးရင် အိပ်ချင်လာတဲ့ စားသုံးသူတွေက ခင်ဗျားတို့ အိပ်ယာ ဘာလို့မထားပေးတာလဲ ဆိုပြီး ခဏခဏပြောကြတယ်။ ဒါ့ကြောင့် ဆိုင်မှာ သီးသန့်နေရာလုပ်ပြီး အိပ်ယာတွေ ထားပေးလိုက်တယ်။ အခုဆိုရင် မန်ဆက်ဖ် လာစားတဲ့သူတွေ ခနတစ်ဖြုတ် ၀င်၀င်နှပ်ကြပါတယ်”

    Moab ဆိုင်ဟာ အိပ်ဖို့နေရာကို လေအေးပေးစက်တွေနဲ့ ကျကျနန ဖန်တီးပေးထားတာ ဖြစ်ပါတယ်။ 

    Ref: Arab News

  • အစ္စရေးသမ္မတနှင့် ဂျော်ဒန်ဘုရင်တို့ လျှို့ဝှက် တွေ့ဆုံဆွေးနွေးခဲ့

    အစ္စရေးသမ္မတနှင့် ဂျော်ဒန်ဘုရင်တို့ လျှို့ဝှက် တွေ့ဆုံဆွေးနွေးခဲ့

    စက်တင်ဘာ ၅၊ ၂၀၂၁
    M-Media

    -အစ္စရေးသမ္မတ အိုက်ဇက် ဟာဇွဂ်နဲ့ ဂျော်ဒန်ဘုရင် အဘ်ဒူလာ ၂ တို့ ပြီးခဲ့တဲ့တစ်ပတ်မှာ လျှို့ဝှက် တွေ့ဆုံခဲ့ပြီး အရှေ့အလယ်ပိုင်းအရေး ဆွေးနွေးခဲ့ကြတယ်လို့ သိရပါတယ်။

    ဒီတွေ့ဆုံမှုကို အစ္စရေးသမ္မတက ပြည်တွင်းရုပ်သံတစ်ခုကို စနေနေ့အင်တာဗျူးမှာ ဖွင့်ဟပြောကြားလိုက်တာပါ။

    “ပြီးခဲ့တဲ့တစ်ပတ် ဂျော်ဒန်ဘုရင်နဲ့ ကျွန်တော် တွေ့ဆုံခဲ့ပြီး စကားတွေလည်း အကြာကြီး ပြောခဲ့ပါတယ်။ သူ့ရဲ့နန်းတော်မှာ တစ်​ညနေလုံး ကျွန်တော် ရှိခဲ့ပါတယ်။ သိပ်ကိုထူးခြားတဲ့ တွေ့ဆုံမှုပါပဲ”

    အစ္စရေးသမ္မတရုံးက ထုတ်ပြန်တဲ့ ကြေငြာချက်မှာတော့ ဂျော်ဒန်ဟာ အလွန်အရေးပါတဲ့ တိုင်းပြည်တစ်ခုဖြစ်ပြီး ဘုရင်အဘ်ဒူလာဟာ လေးစားဖို့အကောင်းဆုံးခေါင်းဆောင်၊ ဒေသတွင်း အရေးပါတဲ့ပုဂ္ဂိုလ်ဖြစ်တယ်လို့ ဟာဇွဂ်က ပြောပါတယ်။

    တွေ့ဆုံမှုအတွင်း နိုင်ငံရေ၊ စီးပွားရေး နှစ်နိုင်ငံ ပူးပေါင်းဆောင်ရွက်ရေး၊ ဒေသတွင်း မဟာဗျူဟာကျတဲ့ ကိစ္စတွေအကြောင်း ဆွေးနွေးခဲ့ကြတယ်လို့လည်း ကြေငြာချက်ကဆိုပါတယ်။

    အစ္စရေးနဲ့ နယ်စပ်ချင်းကပ်နေတဲ့ နိုင်ငံတွေထဲမှာ ဂျော်ဒန်နဲ့ အီဂျစ်တို့သာ ငြိမ်းချမ်းရေးစာချုပ် ချုပ်ဆိုထားတာပါ။

    အစ္စရေးဝန်ကြီးချုပ်ဟောင်း နေတန်ယာဟုလက်ထက်မှာ ဂျေရုစလင်က အလ်အက်ဆွာဗလီဝတ်ကျောင်းတော်ကို အစ္စရေးတပ်ဖွဲ့တွေ ဝင်ရောက်အကြမ်းဖက်မှု၊ အနောက်ဖက်ကမ်းက ပါလက်စတိုင်းရွာတွေကို အစ္စရေးက ကျူးကျော်သိမ်းပိုက်မှု၊ တရားမဝင် အိမ်ယာတွေကို အစ္စရေးက တိုးချဲ့ဆောက်လုက်မှု စတဲ့ ကိစ္စတွေကြောင့် ဂျော်ဒန်နဲ့ ဆက်ဆံရေး ဆိုးရွားခဲ့ပါတယ်။

    ဇွန်လမှာ အစ္စရေးဝန်ကြီးချုပ်ဖြစ်လာတဲ့ နက်ဖ်တာလီ ဘန်နက်ဟာ အာဏာရပြီး နောက်တစ်ပတ်မှာပဲ ဂျော်ဒန်ကိုသွားကာ ဘုရင်အဘ်ဒူလာနဲ့ တွေ့ဆုံခဲ့ပြီး အဲဒီနောက် ရေအရင်းမြစ်နဲ့ ကုန်သွယ်ရေးဆိုင်ရာ သဘောတူညီစာချုပ်တွေ ချုပ်ဆိုနိုင်ခဲ့ပါတယ်။

    Ref: Aljazeera

  • အာဏာသိမ်းရန်ကြံစည်မှုကိစ္စ ဂျော်ဒန်က ပထမဆုံး ကြားနာစစ်ဆေး

    အာဏာသိမ်းရန်ကြံစည်မှုကိစ္စ ဂျော်ဒန်က ပထမဆုံး ကြားနာစစ်ဆေး

    ဇွန် ၂၁၊ ၂၀၂၁
    M-Media

    အိမ်ရှေ့မင်းသားဟောင်း ဟမ်ဇာ

    -ဘုရင် အဘ်ဒူလာ ၂ ကို ဖြုတ်ချ အာဏာသိမ်းဖို့ ကြိုးစားတယ်ဆိုတဲ့ ခေါင်းစဉ်နဲ့ လူ ၂ ဦးကို ဂျော်ဒန်က တရားစွဲဆိုပြီး ဒီကနေ့မှာ ပထမဆုံး ကြားနာ စစ်ဆေးပါတယ်။

    တရားစွဲခံရသူတွေဟာ ဘုရင် အဘ်ဒူလာရဲ့ ဆွေမျိုး ရှရစ်ဖ် ဟာဆန် ဘင် ဇိုက်နဲ့ နန်းတွင်းဆိုင်ရာ အကြီးအကဲဟောင်း ဘာဆမ် အာဝါဒွလ္လာဟ်တို့ ဖြစ်ပါတယ်။ သူတို့တွေဟာ ဘုရင် အဘ်ဒူလာရဲ့ ဖအေတူ အမေကွဲညီ မင်းသား ဟမ်ဇာနဲ့ ပေါင်းကာ နိုင်ငံခြားအကူအညီ ရယူပြီး အာဏာသိမ်းဖို့ ကြံတယ်လို့ စွပ်စွဲခံထားရတာပါ။

    ဒါဟာ ဂျော်ဒန်နိုင်ငံသမိုင်းမှာ အကြီးမားဆုံး တရားစွဲဆိုမှုလည်း ဖြစ်ပါတယ်။

    အိမ်ရှေ့မင်းသားဟောင်းဖြစ်ခဲ့တဲ့ မင်းသားဟမ်ဇာက သူဟာ နေအိမ်အကျယ်ချုပ် ချခံထားရတယ်လို့ ဧပြီလက ဗီဒီယိုရိုက်ကာ အွန်လိုင်းမှာ လွှင့်တင်ခဲ့တဲ့နောက် ဂျော်ဒန်နန်းတွင်းအရှုပ်တော်ပုံ လူသိရှင်ကြား ဖြစ်လာတာပါ။

    ဂျော်ဒန်အစိုးရကလည်း ဒီသတင်းကို အတည်ပြုခဲ့ပြီး ဘုရင်ဖြစ်ချင်နေတဲ့ ဟမ်ဇာဟာ ရှရစ်ဇ်ဟာဆန်၊ ဘာဆမ် အာဝါဒွလ္လာဟ်တို့နဲ့ပေါင်းကာ နိုင်ငံခြားအကူအညီရယူပြီး အာဏာသိမ်းဖို့၊ တိုင်းပြည်မတည်မငြိမ်ဖြစ်အောင်လုပ်ဖို့ ကြံစည်ခဲ့ကြောင်း ထုတ်ပြန်ခဲ့ပါတယ်။

    ဟမ်ဇာကတော့ အာဏာသိမ်းဖို့ကြိုးစားတယ်ဆိုတဲ့ သတင်းတွေကို ငြင်းပြီး အစိုးရအတွင်း ခြစားမှုတွေ၊ စီမံခန့်ခွဲမှု အမှားတွေကို ထောက်ပြတဲ့အတွက် ပစ်မှတ်ထားခံရတာလို့ တုန့်ပြန်ပြောဆိုခဲ့ပါတယ်။

    ဘုရင် အဘ်ဒူလာဟာ ၂၀၀၄ ခုနှစ်မှာ ဟမ်ဇာကို အိမ်ရှေ့အရာကနေချပြီး သူ့ရဲ့သား အကြီးဆုံးကို အရာအပ်နှင်းခဲ့တာ ဖြစ်ပါတယ်။

    အိမ်ရှေ့မင်းသားဟောင်း ဟမ်ဇာကတော့ တရားစွဲဆိုခြင်း မခံရပါဘူး။

    Ref: Aljazeera

  • အာဏာသိမ်းရန် ကြိုးပမ်းမှုခေါင်းစဉ်ဖြင့် ဂျော်ဒန်တွင် ထိပ်တန်း ပုဂ္ဂိုလ်များ ဖမ်းဆီးခံထားရ

    အာဏာသိမ်းရန် ကြိုးပမ်းမှုခေါင်းစဉ်ဖြင့် ဂျော်ဒန်တွင် ထိပ်တန်း ပုဂ္ဂိုလ်များ ဖမ်းဆီးခံထားရ

    ဧပြီ ၄၊ ၂၀၂၁
    M-Media

    -ဘုရင် အလ်ဒူလာ ၂ ကို ဖြုတ်ချဖို့ ကြံစည်နေတယ်ဆိုတဲ့ခေါင်းစဉ်နဲ့ ဂျော်ဒန်မှာ အနည်းဆုံး လူ ၂၀ ဖမ်းဆီးခံထားရပြီး ဒီအထဲမှာ ဘုရင် အဘ်ဒူလာရဲ့ အဖေတူ အမေကွဲညီ အိမ်ရှေ့မင်းသားဟောင်း ဟမ်ဇာ ဘင် ဟူစိန်လည်း ပါဝင်ပါတယ်။

    မင်းသား ဟူစိန်ဟာ မနေ့က ဘီဘီစီသတင်းဌာနကို ဗီဒီယိုတစ်ခု ပေးပို့ခဲ့ပြီး သူ့အနေနဲ့ နေအိမ်အကျယ်ချုပ် ချထားခံရကြောင်း၊ နိုင်ငံရပ်ခြားက ဘယ်လိုကြံစည်မှုမျိုးမှာမှ မပါဝင်ကြောင်း ပြောကြားခဲ့ပါတယ်။ ဒါ့အပြင် ဘုရင်အဘ်ဒူလာအစိုးရဟာ အကျင့်ပျက်ခြစားတဲ့ အစိုးရဖြစ်နေတယ်လို့ ဝေဖန်ခဲ့ပါတယ်။

    ဂျော်ဒန်စစ်တပ်အကြီးအကဲ ဗိုလ်ချုပ် ယူဆက်ဖ် ဟွန်နိုင်တီက မင်းသားဟူစိန်ရဲ့ ပြောကြားမှုကို ငြင်းဆိုခဲ့ပြီး လက်ရှိမှာ စုံစမ်းစစ်ဆေးမှု ပြုလုပ်နေကာ ရလဒ်ကို ပွင့်လင်းမြင်သာမှုရှိစွာ ချပြသွားမယ်လို့ တုန့်ပြန် ပြောကြားခဲ့ပါတယ်။

    “ဂျော်ဒန်နိုင်ငံရဲ့ လုံခြုံရေးနဲ့ တည်ငြိမ်အေးချမ်းရေးရဲ့အထက်မှာ ဘယ်သူမှ မရှိရပါဘူး”

    လုံခြုံရေးအကြောင်းပြချက်နဲ့ ဖမ်းဆီးခံရသူတွေထဲမှာ ဘုရင် အဘ်ဒူလာရဲ့ အကြံပေးဟောင်း၊ ဘုရင်ရဲ့လူယုံ ဘဏ္ဍာရေးဝန်ကြီး အာဆမ် အဘ်ဒူလာ၊ နန်းတွင်းကိုယ်စားလှယ် ရှာရစ်ဖ် ဟာဆန် ဘင် ဇိုက်တို့ ပါဝင်တယ်လို့ သတင်းဌာနတွေက ဖော်ပြပါတယ်။

    ဘုရင် အဘ်ဒူလာ ၂ ဟာ သူ့ဖခင် ဘုရင်ဟူစိန်ကွယ်လွန်တဲ့ ၁၉၉၉ ခုနှစ်ကတည်းက တိုင်းပြည်ကို အုပ်စိုးလာတာပါ။ ဂျော်ဒန်ဟာ အမေရိကန်နဲ့ အနောက်နိုင်ငံတွေရဲ့ အနီးကပ်မဟာမိတ်ဖြစ်သလို အရှေ့အလယ်ပိုင်းက IS အကြမ်းဖက်အဖွဲ့ တိုက်ဖျက်ရေးမှာ အဓိကအခန်းကဏ္ဍကနေ ပါဝင်ပါတယ်။

    အမေရိကန်၊ အနောက်နိုင်ငံတွေနဲ့ အရှေ့အလယ်ပိုင်းဒေသတွင်းနိုင်ငံတွေက ဂျော်ဒန်က အခြေအ​နေတွေကို စောင့်ကြည့်နေတယ်လို့ ထုတ်ပြန်ထားပါတယ်။

    Ref: Washington Post, Aljazeera