Tag: malaysia

မတ် ၂၀၊ ၂၀၂၀
M-Media

-COVID-19 ကူးစက်နေတဲ့ လွှတ်တော်အမတ်တစ်ဦးနဲ့ ထိတွေ့ဆက်ဆံခဲ့တဲ့ မလေးရှားဝန်ကြီးချုပ်ဟောင်း မဟာသီယာ မိုဟာမက်ဟာ လက်ရှိမှာ သီးခြားနေထိုင်နေပြီး အခြေအနေကို စောင့်ကြည့်နေတယ်လို့ သူ့ရဲ့ ပြောရေးဆိုခွင့်ရှိသူက မနေ့မှာ သတင်းထုတ်ပြန်ပါတယ်။

မဟာသီနဲ့ ထိတွေ့ဆက်ဆံခဲ့တဲ့ လွှတ်တော်အမတ်ဟာ ဒေါက်တာ ကယ်လ်ဗင် ယီ လီ ၀မ်ဖြစ်ပြီး ဗိုင်းရပ်စ်ကူးစက်နေကြောင်း မတ်လ ၁၇ ရက်နေ့တုန်းက Facebook စာမျက်နှာမှာ လွှင့်တင်ခဲ့တာပါ။ ဒေါက်တာကယ်လ်ဗင်ဟာ အခြားလွှတ်တော်အမတ်တစ်ဦးထံကနေ ကူးစက်ခံခဲ့ရတာဖြစ်ပြီး လက်ရှိ ဆာရာဝပ်ဆေးရုံမှာ ဆေးကုသမှုခံယူနေပါတယ်။

အသက် ၉၅ နှစ်အရွယ်ရှိပြီဖြစ်တဲ့ မဟာသီက ဒီကိစ္စကိုဖြေရှင်းရေး စည်းကမ်းလိုက်နာဖို့ လိုအပ်တယ်လို့ ပြည်တွင်းရုပ်သံနဲ့ အင်တာဗျူးမှာ ပြောကြားခဲ့ပါတယ်။

“၁၄ ရက်လောက် အိမ်မှာ သီးခြားနေထိုင်ဖို့ လိုအပ်ပါတယ်။ ဒီလိုလုပ်ခြင်းအားဖြင့် အခြားလူတွေထံ ဗိုင်းရပ်စ်ပြန့်နှံနိုင်ခြေ နည်းသွားမယ်။ အခုဆိုရင် ကျွန်တော် အိမ်မှာနေထိုင်နေတယ်။ အပြင်ထွက်လို့မရသလို၊ လူတွေနဲ့ တွေ့ဆုံလို့လည်း မရပါဘူး။ လက်ဆွဲလည်း မနှုတ်ဆက်နိုင်ဘူး။ ဒါပေမယ့် ဘုရားသခင်အလိုတော်နဲ့ ဒါဟာ ကျွန်တော့်အတွက် မခက်ခဲပါဘူး”

Ref: The Star

မတ် ၁၆၊ ၂၀၂၀
M-Media

-နိုင်ငံတစ်ဝှမ်း COVID-19 ပြန့်နှံ့မှုကို ထိန်းချုပ်နိုင်ဖို့အတွက် တိုင်းပြည်ကို ၂ ပတ်ကြာ တံခါးပိတ်သွားမယ်လို့ မလေးရှားနိုင်ငံက ဒီကနေ့ညပိုင်းမှာ ကြေငြာလိုက်ပါတယ်။

မလေးရှားမှာ ​COVID-19 ဗိုင်းရပ်စ်ကူးစက်မှုဟာ ပြီးခဲ့တဲ့ရက်ပိုင်းမှာ သိသိသာသာ မြင့်တက်လာခဲ့တာပါ။ မတ်လ ၁၆ ရက်နေ့အထိ ကူးစက်နေသူအရေအတွက် ၅၅၀ ကျော်လာခဲ့ပြီဖြစ်ပါတယ်။

ပြီးခဲ့တဲ့ ၂ ရက်အတွင်း ၂၀၀ ကျော် ကူးစက်နေတာကို တွေ့ခဲ့ရပြီး အားလုံးနီးပါးဟာ အခုလအစောပိုင်း ကွာလာလမ်ပူမြို့ ဆင်ခြေဖုံးက အစ္စလာမ်ဘာသာရေး အခမ်းအနားကို တက်ရောက်ခဲ့သူတွေ၊ သူတို့နဲ့ ဆက်နွယ်ပတ်သက်နေသူတွေဖြစ်ပါတယ်။

ဝန်ကြီးချုပ် မုဟ်ယစ်ဒင် ယာစင်က လက်ရှိ အစိုးရရဲ့ ဦးစားပေးလုပ်ငန်းဟာ နောက်ထပ်ပြန့်နှံ့မှုမဖြစ်အောင် တားဆီးဖို့ ဖြစ်တာကြောင့် မတ်လ ၁၈ ရက်နေ့ကနေ ၃၁ ရက်နေ့အထိ ​လှုပ်ရှားသွားမှု ကန့်သတ်မိန့် ထုတ်ပြန်လိုက်တာဖြစ်တယ်လို့ ရုပ်သံမိန့်ခွန်းမှာ ပြောကြားခဲ့ပါတယ်။

အခုလို တိုင်းပြည်ကို တံခါးပိတ်လိုက်တာကြောင့် ဘာသာရေး၊ လူမှုရေးအခမ်းအနားတွေ လုပ်ဆောင်လို့ရမှာမဟုတ်တော့သလို ကျောင်းတွေ၊ အလုပ်တွေ၊ ရုံးတွေ၊ အများပြည်သူနဲ့ သက်ဆိုင်တဲ့နေရာတွေ၊ ဘာသာရေးအဆောက်အဦးတွေ အားလုံးလည်း ပိတ်ထားရမှာ ဖြစ်ပါတယ်။ မလေးရှားနိုင်ငံသားတွေကို ပြည်ပထွက်ခွင့် ပြုမှာမဟုတ်သလို၊ နိုင်ငံခြားသားတွေကိုလည်း တိုင်းပြည်အတွင်း ပေးဝင်မှာမဟုတ်ပါဘူး။ မရှိမဖြစ်လိုအပ်တဲ့ ဌာနတွေကလွဲလို့ အစိုးရဌာနတွေအားလုံးကိုလည်း ပိတ်ထားမှာဖြစ်ပါတယ်။

COVID-19 ဗိုင်းရပ်စ် ကူးစက်မှု ရုတ်တရက် မြင့်တက်လာတာကြောင့် မလေးရှားပြည်သူတွေဟာ အခြေခံစားသောက်ကုန်တွေ အလုအယက် ဝယ်ယူလာကြပြီး စူပါမားကတ်တွေမှာ ပစ္စည်းပြတ်လပ်တာတွေလည်း ဖြစ်ပေါ်နေပါတယ်။

Ref: Malay Mail

မတ် ၁၆၊ ၂၀၂၀
M-Media

-မလေးရှားနိုင်ငံမှာ တနင်္ဂနွေနေ့တစ်နေ့တည်း လူပေါင်း ၁၉၀ လောက် COVID-19 ဗိုင်းရပ်စ် ကူးစက်ခဲ့ပြီး စုစုပေါင်း ကူးစက်သူအရေအတွက်ဟာ ၄၂၈ ဦးအထိ ရှိလာပြီဖြစ်ပါတယ်။

ကူးစက်သူတွေဟာ အခုလအစောပိုင်းက မြို့တော်ကွာလာလမ်ပူဆင်ခြေဖုံး ဆရီပက်တလင်းမြို့မှာ ပြုလုပ်ခဲ့ပြီး ကမ္ဘာတစ်ဝှမ်းက လူပေါင်း ၁၆၀၀၀ ကျော်လောက် တက်ရောက်ခဲ့တဲ့ အစ္စလာမ်ဘာသာရေးအခမ်းအနားကို သွားရောက်ခဲ့ကြသူတွေ ဖြစ်ပါတယ်။ ဒီအခမ်းအနားကနေ ကူးစက်သူအရေအတွက်ဟာ ၂၄၃ ဦး ရှိလာပြီး ၉ ဦးကတော့ စိုးရိမ်ရတဲ့ အနေအထားမှာ ရှိတယ်လို့ မလေးရှား ကျန်းမာရေးဝန်ကြီး ဒေါက်တာ အဒမ်ဘာဘာက ပြောကြားခဲ့ပါတယ်။

မလေးရှားဟာ အရှေ့တောင်အာရှနိုင်ငံတွေထဲမှာ COVID-19 ဗိုင်းရပ်စ် အဆိုးဝါးဆုံး ကူးစက်ပြန့်နှံ့တဲ့နိုင်ငံလည်း ဖြစ်လာပါတယ်။ ကူးစက်သူ ၄၂၈ ဦးမှာ ၄၂ ဦးက ဗိုင်းရပ်စ်ပျောက်ကင်းကာ ဆေးရုံကနေ ဆင်းသွားပြီဖြစ်ပါတယ်။

ဖေဖော်ဝါရီ ၂၇ ရက်နေ့ကနေ မတ်လ ၁ ရက်နေ့အထိပြုလုပ်တဲ့ အဲဒီဘာသာရေးအခမ်းအနားမှာ မလေးရှားနိုင်ငံသား ၁၄၅၀၀ နဲ့၊ နိုင်ငံခြားသား ၁၅၀၀ လောက် တက်ရောက်ခဲ့ကြပါတယ်။ ဘရူးနိုင်းနိုင်ငံမှာ ရောဂါကူးစက်သူ ၅၀ ရှိပြီး ၄၅ ဦးက ဒီဘာသာရေးအခမ်းအနားကို တက်ရောက်မှုနဲ့ ဆက်နွယ်နေတာ ဖြစ်ပါတယ်။ စင်ကာပူနိုင်ငံမှာလည်း ဒီဘာသာရေးအခမ်းအနားကို တက်ရောက်သူတစ်ချို့ ရောဂါကူးစက်နေပါတယ်။

နိုင်ငံအတွင်း COVID-19 ဗိုင်းရပ်စ်​ ပြန့်နှံ့မှုနဲ့ပတ်သက်ပြီး ဒီကနေ့မှာ မလေးရှာအစိုးရ အစည်းအဝေးတစ်ရပ် ကျင်းပဖို့ ရှိနေပါတယ်။ ဝန်ကြီးချုပ် မုဟ်ယစ်ဒင် ယာစင်က တိုင်းပြည်ဟာ ဒုတိယဗိုင်းရပ်စ်လှိုင်းလုံးနဲ့ ကြုံတွေ့နေပြီး စီးပွားရေးတိုးတက်မှုအပေါ် ထိလိုက်လာနိုင်တယ်လို့ သတိပေးခဲ့ပါတယ်။

ကူးစက်ပြန့်နှံ့မှုကို ထိန်းနိုင်ဖို့အတွက် နိုင်ငံတကာ အစည်းအဝေးတွေ၊ အာကစားပြိုင်ပွဲတွေ၊ လူမှုရေးနဲ့ ဘာသာရေးအခမ်းအနားတွေအားလုံးကိုလည်း မလေးရှားအစိုးရက ရပ်ဆိုင်းထားလိုက်ပါတယ်။

Ref: CNA