Tag: malaysia

ဧပြီ ၂၀၊ ၂၀၂၀
M-Media

-မလေးရှားနိုင်ငံမှာ Covid-19 ကူးစက်သူအရေအတွက်ဟာ ဒီကနေ့မှာ ၃၆ ဦးသာ ရှိတော့ပြီး ရွေ့လျားသွားလာမှု ကန့်သတ်မိန် ထုတ်ပြန်ခဲ့တဲ့ မတ်လ အလယ်ပိုင်းကစလို့ တစ်ရက်တာ အနိမ့်ဆုံး ကူးစက်မှုလည်း ဖြစ်ပါတယ်။

ကျန်းမာရေးဝန်ကြီးဌာန ညွှန်ကြားရေးမှူးချုပ် နူရ် ဟီရှမ် အဘ်ဒူလာက လာမယ့်တစ်ပတ်အတွင်း ကူးစက်မှုဟာ ၁၀ ယောက်အောက်သာ ရှိမယ်လို့ မျှော်လင့်ကြောင်း ဒီကနေ့ သတင်းစာရှင်းလင်းပွဲမှာ ပြောကြားခဲ့ပါတယ်။

“ဒီစစ်ပွဲကို ကျွန်တော်တို့ မနိုင်သေးပါဘူး။ ကူးစက်မှုနှုန်း ကျဆင်းသွားပေမယ့် ဒီအောင်မြင်မှုကိုကြည့်ပြီး ပေါ့ပေါ့ဆဆ မတွေးကြဖို့ မလေးရှားပြည်သူတွေကို မေတ္တာရပ်ခံပါတယ်။ ကျွန်တော်တို့ တိုက်ပွဲကို ဆက်တိုက်ရမှာဖြစ်ပြီး မပြီးဆုံးသေးပါဘူး။ ဒါ့ကြောင့် ရွေ့လျားသွားလာမှုအမိန့်ကို ဆက်လက်လိုက်နာခြင်းအားဖြင့် ကူးစက်မှု မတိုးအောင် ကူညီပေးကြပါ”

ဒီကနေ့မှာ သေဆုံးမှုလည်း မရှိတော့ပဲ တစ်လကျော်အတွင်း ပထမဆုံးအကြိမ် ဖြစ်ပါတယ်။

မလေးရှားမှာ စုစုပေါင်း ကူးစက်သူ ၅၄၂၅ ဦး ရှီပြီး ပြန်လည်ကောင်းမွန်သူကတော့ ဒီကနေ့အထိ ၃၂၉၅ ဦး ရှိနေပါတယ်။ သေဆုံးသူကတော့ ၈၉ ဦး ရှိနေပါတယ်။

Ref: CNA

ဧပြီ ၁၈၊ ၂၀၂၀
M-Media

-မလေးရှားနိုင်ငံမှာ မနေ့က Covid-19 ကူးစက်သူအရေအတွက် ၅၄ ဦးရှိပြီး ကူးစက်မှု ၂ လနီးပါးကာလအတွင်းအတွင်း တစ်နေ့တာကူးစက်မှု အနည်းဆုံး ပမာဏလည်း ဖြစ်ပါတယ်။

စုစုပေါင်း ကူးစက်သူအရေအတွက်ဟာ ၅၃၀၅ ဦး ဖြစ်လာပါတယ်။ မနေ့က သေဆုံးမှု ၂ ခု ရှိခဲ့ပြီး စုစုပေါင်း သေဆုံးသူ ၈၈ ဦးရှိကာ ၁.၆၆ ရာခိုင်နှုန်း ဖြစ်ပါတယ်။ ပြန်လည်ကောင်းမွန်သူအရေအတွက် ၃၀၀၀ နီးပါး ရှိနေပါတယ်။

နိုင်ငံအရှေ့ပိုင်းက ဆာဘားပြည်နယ်က ဆေးရုံ ၃ ခုမှာ ကျန်းမာရေးဝန်ထမ်း ၃၀ လောက် ဗိုင်းရပ်စ်ကူးစက်နေတာကို ထပ်တွေ့ခဲ့ရပါတယ်။

ကျန်းမာရေးဝန်ကြီးဌာန ညွှန်ကြားရေးမှူး ဒေါက်တာ နူရ် ဟီရှမ် အဘ်ဒူလာက ကူးစက်မှု သိသိသာသာ ကျဆင်းသွားပေမယ့် ပြည်သူလူထုအနေနဲ့ သတိမလွတ်ကြဖို့ ဒီကနေ့ သတင်းစာရှင်းလင်းပွဲမှာ တိုက်တွန်းခဲ့ပါတယ်။

မလေးရှားဟာ မတ်လ အလယ်ပိုင်းကတည်းက တိုင်းပြည်ကို တံခါးပိတ်ကာ​ ဧပြီလ ၂၈ ရက်နေ့အထိ ရွေ့လျားသွားလာမှုကန့်သတ်မိန့် ထုတ်ပြန်ထားပါတယ်။

ဒေါက်တာ နူရ်ဟီရှမ်က ဒီကန့်သတ်မိန့်ကို ထပ်တိုးမလား၊ ရပ်ဆိုင်းရမလားဆိုတဲ့ကိစ္စဟာ သိပ္ပံဆိုင်ရာ သုံးသပ်ချက်နဲ့ လက်တွေ့အချက်အလက်တွေပေါ်မှာ မူတည်နေပြီး ကူးစက်မှုအန္တရာယ်ကို လျော့ချနိုင်ဖို့အတွက် တစ်ချို့ကန့်သတ်မှုတွေကို ဆက်လက်ဆောင်ရွက်ရနိုင်တယ်လို့ ထည့်သွင်းပြောဆိုခဲ့ပါတယ်။

Ref: The Star

ဧပြီ ၁၇၊ ၂၀၂၀
M-Media

-နိုင်ငံခြားသား အလုပ်သမားတွေကြားထဲမှာ Covid-19 အကြီးအကျယ် ကူးစက်ပြန့်နှံ့မှု လက်ရှိအချိန်အထိ မရှိသေးပေမယ့်​ ဆက်လက်စောင့် ကြည့်နေတယ်လို့ မလေးရှားက ပြောကြားလိုက်ပါတယ်။

စင်ကာပူနိုင်ငံက နိုင်ငံခြားသားအလုပ်သမားတွေရဲ့ အဆောင်မှာ ပြီးခဲ့တဲ့ရက်ပိုင်းအတွင်း လူရာနဲ့ချီ ကူးစက်နေတာကို တွေ့ရပြီးတဲ့နောက် နိုင်ခြားသားအလုပ်သမား အများအပြားရှိရာ မလေးရှားမှာလည်း ဒီလို ကူးစက်မှုတွေ ရှိလာနိုင်တယ်ဆိုတဲ့ စိုးရိမ်မှုတွေ မြင့်တက်လာတာပါ။

မနေ့က သတင်းစာရှင်းလင်းပွဲမှာ မလေးရှားကျန်းမာရေးဝန်ကြီးဌာန ညွှန်ကြားရေးမှူး ဒေါက်တာ နူရ်ဟီရှမ် အဘ်ဒူလာက နိုင်ငံခြားသား အလုပ်သမားတွေ နေထိုင်တဲ့ ဒေသတွေကို ဆက်လက် စောင့်ကြည့်သွားမယ်လို့ ပြောကြားခဲ့ပါတယ်။

“ခရိုင် ကျန်းမာရေးတာဝန်ရှိသူတွေကနေတစ်ဆင့် စောင့်ကြည့်နေတယ်။ လက်ရှိအချိန်အထိ အက​ြီးအကျယ် ကူးစက်တာမျိုး မတွေ့ရသေးပါဘူး။ ကျွန်တော်တို့ ဆက်လက်စောင့်ကြည့်သွားမှာပါ”

တစ်ချို့ နိုင်ငံခြားသားတွေဟာ ဆေးစစ်ဖို့ မလာကြဘူးဆိုတာ မိမိတို့ သိရှိထားပြီး ဒီအတွက် UNHCR အပါအဝင် NGO အဖွဲ့တွေနဲ့ ဆက်သွယ်ဆောင်ရွက်နေတယ်လို့လည်း ညွှန်ကြားရေးမှူးက ထည့်သွင်း ပြောဆိုခဲ့ပါတယ်။

ဧပြီလ ၁၆ ရက်နေ့အထိ မလေးရှားနိုင်ငံမှာ Covid-19 ကူးစက်သူ ၅၁၈၂ ဦး ရှိနေပြီး အရှေ့တောင်အာရှနိုင်ငံတွေမှာ ပိုးတွေ့သူ အမြင့်ဆုံးပါ။ သေဆုံးသူကတော့ ၁.၆ ရာခိုင်နှုန်းရှိပြီး ပြန်ကောင်းသူက ၅၃.၄ ရာခိုင်နှုန်း ရှိပါတယ်။

ဒေါက်တာ နူရ် ဟီရှမ်က လူပေါင်း ၉ သောင်းကျော်ကို စစ်​ဆေးနိုင်ခဲ့ပြီး ပိုးတွေ့သူအရေအတွက်က ၅.၄ ရာခိုင်နှုန်းသာ ရှိတယ်လို့ ဆိုပါတယ်။

Ref: CNA