News @ M-Media

Tag: malaysia

  • KL မွတ်စလင်ခေါင်းဆောင်များ ထိပ်သီးအစည်းအဝေးမှာ မဟာသီဘာပြောလဲ

    KL မွတ်စလင်ခေါင်းဆောင်များ ထိပ်သီးအစည်းအဝေးမှာ မဟာသီဘာပြောလဲ

    ဒီဇင်ဘာ ၁၉၊ ၂၀၁၉
    M-Media

    -မလေးရှားက ဦးဆောင်ကျင်းပတဲ့ မွတ်စလင်ခေါင်းဆောင်များ ထိပ်သီးအစည်းအဝေး ( Kuala Lumpur Summit 2019) ဟာ ဘယ်နိုင်ငံကိုမှ ခွဲခြားဖို့၊ သီးသန့်ဖယ်ထုတ်ဖို့မဟုတ်ဘဲ မွတ်စလင်ကမ္ဘာက လက်ခံနိုင်မယ့်၊ အလုပ်ဖြစ်မယ့် အဆိုပြုချက်တွေ၊ အဖြေတွေကို ရှာဖွေဖို့ဖြစ်တယ်လို့ မလေးရှားဝန်ကြီးချုပ် မဟာသီယာ မိုဟာမက်က ပြောကြားလိုက်ပါတယ်။

    အဲဒီထိပ်သီးအစည်းအဝေးဟာ ရှိပြီးသား OIC အဖွဲ့ကို စင်ပြိုင်လုပ်တယ်လို့ ဆော်ဒီအာရေဗျက စွပ်စွဲထားပြီး တက်ရောက်ခြင်းလည်း မရှိပါဘူး။ OIC အဖွဲ့ဝင်နိုင်ငံ ၅၇ နိုင်ငံကို မလေးရှားက ဖိတ်ကြားရာမှာ နိုင်ငံ ၂၀ လောက်သာ တက်ရောက်ပါတယ်။

    မလေးရှားဝန်ကြီးချုပ်က ထိပ်သီးအစည်းအဝေးရဲ့ ရည်ရွယ်ချက်ဟာ ဘာသာရေးဆွေးနွေးဖို့မဟုတ်ဘဲ ‘ဒုက္ခသုက္ခရောက်နေတဲ့’ မွတ်စလင်ကမ္ဘာက ပြဿနာတွေကို ဆွေးနွေးအဖြေရှာဖို့ဖြစ်တယ်လို့ အဖွင့်မိန့်ခွန်းမှာ ပြောကြားခဲ့ပါတယ်။

    “ဘယ်နေရာကိုကြည့်လိုက်ကြည့်လိုက် မွတ်စလင်နိုင်ငံတွေ ဖျက်ဆီးခံနေရတယ်။ နိုင်ငံသားတွေ ထွက်ပြေးနေရတယ်။ မွတ်စလင်မဟုတ်တဲ့နိုင်ငံတွေမှာ ဒုက္ခသည်တွေအဖြစ် သွားရောက်ခိုလှုံနေရတယ်။ လူထောင်သောင်းချီသေဆုံးပြီး၊ ခိုလှုံခွင့်တွေလည်း ငြင်းပယ်ခံနေရတယ်။ တစ်ဖက်ကိုကြည့်လိုက်ရင်လည်း မွတ်စလင်တွေဟာ အကြမ်းဖက်ဖို့၊ အပြစ်မဲ့သူတွေ၊ အမျိုးသားတွေ၊ အမျိုးသမီးတွေ၊ ကလေးငယ်တွေ၊ နေထိုင်မကောင်းသူတွေကို သတ်ဖြတ်ဖို့ လုပ်နေကြတယ်”

    အခု ထိပ်သီးအစည်းအဝေးဟာ ဒီကိစ္စတွေကိုဖြေရှင်နိုင်ရေး အစပျိုးတာဖြစ်တယ်လို့လည်း မဟာသီက ထည့်သွင်းပြောဆိုခဲ့ပါတယ်။

    “ကျွန်တော်တို့ ဘယ်သူ့ကိုမှ ခွဲခြားတာ၊ ပစ်ပယ်တာ မရှိပါဘူး။ သေးသေးလေးကနေ စတင်တာဖြစ်တယ်။ ဒီကထွက်လာမယ့် အတွေးအမြင်တွေ၊ အဆိုပြုချက်တွေ၊ အဖြေတွေဟာ လက်ခံနိုင်စရာဖြစ်မယ်၊ အလုပ်ဖြစ်မယ်ဆိုရင် ပိုပြီး ကြီးမားထိရောက်တဲ့ လုပ်ငန်းတွေ လုပ်ဆောင်ဖို့ မျှော်လင့်ထားပါတယ်”

    မဟာသီဟာ ထိပ်သီးအစည်းအဝေးရဲ့ ဥက္ကဌအဖြစ် တာဝန်ယူထားပါတယ်။ အစည်းအဝေးမှာ ကမ္ဘာတစ်ဝှမ်း ပြန့်နှံ့နေတဲ့ အစ္စလာမ်ကြောက်ရောဂါကို ဖြေရှင်းရေး၊ မွတ်စလင်ကမ္ဘာက ချို့ယွင်းချက်တွေကို ပြုပြင်ရေး၊ မွတ်စလင်တွေရဲ့ အသက်ရှင်နေထိုင်မှုအခြေအနေ တိုးတက်ကောင်းမွန်ရေး ဆွေး‌နွေးသွားမယ်လို့ ထုတ်ပြန်ထားပါတယ်။

    မွတ်စလင်နိုင်ငံတွေမှာ ဂိုဏ်းကနပဋိပက္ခတွေ၊ ပြည်တွင်းစစ်တွေဖြစ်နေတာ၊ ခိုင်မာတောင့်တင်းတဲ့ အစိုးရမရှိတာနဲ့ အခြား ပြဿနာတွေကို မဟာသီက ထောက်ပြခဲ့ပြီး ဒါတွေကိုဖြေရှင်းရေး ခိုင်မာတဲ့ ဆောင်ရွက်မှုမျိုးကိုလည်း မတွေ့ရဘူးလို့ ထည့်သွင်းပြောဆိုခဲ့ပါတယ်။

    “ဒုတိယကမ္ဘာစစ်ကြောင့် ပျက်ဆီးသွားတဲ့ နိုင်ငံတစ်ချို့ဟာ အလျင်အမြန် ပြန်လည်ထူထောင်နိုင်ရုံသာမက၊ ခိုင်မာတဲ့ ဖွံ့ဖြိုးတိုးတက်မှုတွေ ရရှိတာကို ကျွန်တော်တို့ မြင်တွေ့ခဲ့ရတယ်။ ဒါပေမယ့် မွတ်စလင်နိုင်ငံ တစ်ချို့ကတော့ ဖွံ့ဖြိုးဖို့၊ သာယာ၀ပြောဖို့မပြောနဲ့ ‌ကောင်းမွန်တဲ့အုပ်ချုပ်ရေးမျိုး ရှိလာအောင်တောင် မလုပ်နိုင်ပါဘူး”

    ဒါတွေကို နားလည်အောင်ကြိုးစားခြင်းဟာ မွတ်စလင်ကမ္ဘာကို နိမ့်ပါးစေတဲ့ ပြဿနာတွေကို ကျော်ဖြတ် ဖြေရှင်းနိုင်ရေး လမ်းကြောင်းတစ်ခုပေါ်လာအောင် မျက်စိဖွင့်ပေးလိမ့်မယ်လို့လည်း မလေးရှားဝန်ကြီးချုပ်က ထည့်သွင်းပြောဆိုခဲ့ပါတယ်။

    ၃ ရက်တာကြာမြင့်မယ့် Kuala Lumpur Summit 2019 ထိပ်သီးအစည်းအဝေးကို အီရန်သမ္မတ ဟာဆန်ရူဟာနီ၊ တူရကီသမ္မတ အာဒိုဂန်တို့ အပါအဝင် မွတ်စလင်ကမ္ဘာက ခေါင်းဆောင်တစ်ချို့ တက်ရောက်ခဲ့ကြပါတယ်။

    Ref: The Star

  • ခေတ်သစ်ဗလီများအတွက် နိုင်ငံတကာအဆင့် အထူးသတ်မှတ်ချက်များကို ပြဌာန်းတော့မည်

    ခေတ်သစ်ဗလီများအတွက် နိုင်ငံတကာအဆင့် အထူးသတ်မှတ်ချက်များကို ပြဌာန်းတော့မည်

    နိုဝင်ဘာ ၂၈၊ ၂၀၁၉
    M-Media

    ဗြိတိန်မှ ဗလီဝတ်ကျောင်းတော်တစ်လုံး

    -အနာဂတ်မှာ ပေါ်ပေါက်လာမယ့် ဗလီဝတ်ကျောင်းတော်တွေအနေနဲ့ လူတွေရဲ့ ပြောင်းလဲလာတဲ့ လူနေမှုစနစ်၊ တည်ဆောက်မယ့်ဒေသရဲ့ မြေပြင်အနေအထားကို ထည့်သွင်းစဉ်းစားဖို့လိုတယ်လို့ ဆော်ဒီတော်ဝင်မင်းသား ဆူလ်တန် ဆလ်မန် အဘ်ဒူလ်အဇစ် အလ် ဆာအွဒ်က ပြောကြားလိုက်ပါတယ်။

    မလေးရှားနိုင်ငံမှာ အခုတစ်ပတ်အတွင်း ဗလီဝတ်ကျောင်းတော် ဗိသုကာဆိုင်ရာ နိုင်ငံတကာ ညီလာခံတစ်ခု ကျင်းပခဲ့ပြီး အနာဂတ် ဗလီဝတ်ကျောင်းတော်တွေရဲ့ ဗိသုကာပညာရပ်နဲ့ လိုအပ်ချက်တွေကို ပတ်သက်လို့ ဆွေးနွေးခဲ့ကြပါတယ်။

    မင်းသား အဘ်ဒူလ်အဇစ်က အစ္စလာမ်သာသနာနဲ့ မွတ်စလင်လူ့အဖွဲ့အစည်းမှာ ဗလီဝတ်ကျောင်းတော်တွေရဲ့ အရေ‌းကြီးမှုကို ရှင်းလင်းတင်ပြခဲ့ပြီး ဗလီဝတ်ကျောင်းတော် တည်ဆောက်ရေး ဒီဇိုင်ဆွဲရေး၊ ထိန်းသိမ်းရေး ဝန်ဆောင်မှုပေးရေး အထူးသတ်မှတ်ချက်(special code) တွေကို နောက်နှစ်မှာ အဆင်သင့်ဖြစ်လာမယ်လို့ ထည့်သွင်းပြောဆိုခဲ့ပါတယ်။

    “ခေတ်သစ်အဆောက်အဦးတွေအနေနဲ့ စွမ်းအင်၊ အရင်းအမြစ်တွေကို အကောင်းဆုံး အသုံးချဖို့ လိုအပ်ပါတယ်။ ဒါမှသာ ဗလီတွေဟာ အကုန်အကျသက်သာပြီး ပိုမိုထိရောက်တဲ့ ဝန်ဆောင်မှုမျိုး ပေးအပ်နိုင်မှာ ဖြစ်ပါတယ်”

    ဗလီ၀တ်ကျောင်းတော် ဆောက်လုပ်ရာမှာ သဘာ၀ပတ်ဝန်းကျင် ထိန်းသိမ်းရေး၊ ဆိုရှယ်မီဒီယာတွေကို ကောင်းကောင်းအသုံးချတတ်တဲ့ လူငယ်တွေရဲ့ လူနေမှုပုံစံတွေကို အလေးထားရေး လိုအပ်ပြီး သန့်ရှင်းသပ်ရပ်ကာ၊ လူတိုင်း အဆင်ပြေပြေ အသုံးပြုနိုင်ရေး ထည့်သွင်းစဉ်းစားဖို့ လိုအပ်တယ်လို့လည်း မင်းသားက ထည့်သွင်းပြောကြားခဲ့ပါတယ်။

    ဗိသုကာလက်ရာဆိုင်ရာ အကောင်းဆုံး ဗလီဝတ်ကျောင်းတော်ဆု (AFAMA) ချီးမြှင့်ရေးကော်မတီ အတွင်းရေးမှူး ပရော်ဖက်ဆာ မာရှာရီ အဘ်ဒူလာ အလ်-နအင်းက လာမယ့်နှစ်မှာ ပေါ်ထွက်မယ့် ‘ဗလီ၀တ်ကျောင်းတော် တည်ဆောက်ရေး အထူးသတ်မှတ်ချက်’ ဟာ ဘာသာစုံ၊ လူမျိုးစုံရှိတဲ့ လူ့အဖွဲ့အစည်းအတွင်း ဗလီဝတ်ကျောင်းတော် တည်ဆောက်ရာမှာ အထောက်အကူဖြစ်စေလိမ့်မယ်လို့ ပြောကြားခဲ့ပါတယ်။

    “ဥပမာအားဖြင့် ဒီသတ်မှတ်ချက်မှာ အာဇန်နဲ့ အေကာမတ် နိဗ္ဗာန်ဆော်မှုအတွင်း လော်စပီကာအသံ ကျယ်လွန်းမှုကိစ္စကို ဖြရှင်းရေး၊ သောကြာနေ့ စုပေါင်းဝတ်ပြုမှုမှာ လာရောက်ကြတဲ့လူတွေနဲ့ ရှေ့ဆောင်အီမာမ်တို့အကြား ဆက်သွယ်ပြောဆိုမှုကိစ္စကို ဖြေရှင်းရေး ညွှန်ကြားမှုတွေ ပါဝင်လာမှာပါ”

    ဗလီဝတ်ကျောင်းတော်တွေနဲ့ပတ်သက်ပြီး ရှိနေတဲ့ ဝါဒဖြန့်မှုတွေကို ဖြေရှင်းရေးလည်း လိုအပ်ပြီး ဗလီဆိုတာ ငြိမ်းချမ်းရေး သွန်သင်ရာနေရာ၊ လူတွေအချင်းချင်း ဆက်သွယ်ရာနေရာ ဖြစ်တယ်လို့လည်း အလ်-နအင်းက ထည့်သွင်း ပြောဆိုခဲ့ပါတယ်။

    ဗလီဝတ်ကျောင်းတော် ဗိသုကာဆိုင်ရာ နိုင်ငံတကာညီလာခံကို နိုဝင်ဘာ ၂၅ ရက်နေ့ကနေ ၂၇ ရက်နေ့အထိ ကျင်းပပြုလုပ်ခဲ့တာ ဖြစ်ပါတယ်။

    Ref: The Straits Times

  • နိုင်ငံအတွင်း အကြီးဆုံး အွန်လိုင်း တရုတ်လူလိမ်ဂိုဏ်းတစ်ခုကို မလေးရှားဖမ်းဆီး

    နိုင်ငံအတွင်း အကြီးဆုံး အွန်လိုင်း တရုတ်လူလိမ်ဂိုဏ်းတစ်ခုကို မလေးရှားဖမ်းဆီး

    နိုဝင်ဘာ ၂၁၊ ၂၀၁၉
    M-Media

    -တရုတ်နိုင်ငံသားတွေ လုပ်ဆောင်ပြီး နိုင်ငံအတွင်းက အကြီးဆုံး အွန်လိုင်း လူလိမ်ဂိုဏ်းတစ်ခုကို မလေးရှားနိုင်ငံက နိုဝင်ဘာ ၂၀ ရက်နေ့မှာ ဝင်ရောက်စီနင်းခဲ့ပြီး လူ ၇၀၀ လောက်ကို ဖမ်းဆီးခဲ့ပါတယ်။

    မြို့တော် ကွာလာလမ်ပူမြို့တောင်ဘက် ဆိုက်ဘာဂျာယာမြို့နယ်က ၆ ထပ်တိုက်တစ်လုံးမှာ မနေ့ မနက်ပိုင်းက စီးနင်းဖမ်းဆီးမှု ပြုလုပ်ခဲ့တာပါ။ အဆောက်အဦးထဲက လူတစ်ချို့ဟာ ရဲတပ်ဖွဲ့ဝင်တွေနဲ့ လ၀ကဝန်ထမ်းတွေကို တိုက်ခိုက်ခဲ့သလို ‌တစ်ချို့ကတော့ ထွက်ပြေးလွတ်မြောက်သွားကြပါတယ်။

    စီးနင်းမှုအတွင်း ဖုန်းအလုံး ၈၀၀၀ ကျော်၊ ကွန်ပျူတာအလုံးရေ ၁၀၀၀ နီးပါးလောက် သိမ်းဆည်းရမိခဲ့တယ်လို့ တာဝန်ရှိသူတွေက သတင်းထုတ်ပြန်ပါတယ်။ ဒီအဖွဲ့ဟာ တရုတ်နိုင်ငံက အွန်လိုင်းအသုံးပြုသူတွေကို ပစ်မှတ်ထားပြီး အရင်းအနှီးနည်းနည်းထည့်ကာ အကျိုးအမြတ်များများရမယ်လို့ လိမ်လည်လှည့်ဖျားနေတာပါ။

    ဖမ်းဆီးရမိသူတွေထဲမှာ အမျိုးသား ၆၀၃ ဦး အမျိုးသမီး ၇၇ ဦး ပါဝင်ပြီး အလည်အပတ်ဗီဇာနဲ့ မနိုင်ငံအတွင်း ဝင်ရောက်လာကာ အလုပ်လုပ်ခွင့်မရှိဘူးလို့ မလေးရှား လ၀ကအကြီးအကဲ ခိုင်ရူလ် ဇာမီ ဒါအွဒ်က ပြောကြားခဲ့ပါတယ်။

    လူ ၁၀၀ ကနေ ၁၂၀ လောက်ဟာ အဆောက်အဦးထဲကနေ ထွက်ပြေးလွတ်မြောက်သွားကြပြီး အာဏာပိုင်တွေက လိုက်လံရှာဖွေနေပါတယ်။ မလေးရှားအာဏာပိုင်တွေဟာ ဒီအဆောက်အဦးကို ၁ လတာ စောင့်ကြည့်ပြီးတဲ့နောက် စီးနင်းခဲ့တာ ဖြစ်ပါတယ်။

    ဒီလူလိမ်ဂိုဏ်းဟာ အဆောက်အဦးကို တစ်လ ရင်းဂစ် ၃၆၀၀၀၀ ပေးကာ ပြီးခဲ့တဲ့ ၆ လကစတင်ပြီး မလေးရှားမှာ လုပ်ကိုင်လာတာဖြစ်ပါတယ်။ ဖမ်းဆီးခံရသူတွေဟာ လ၀က ဥပဒေချိုးဖောက်မှုတွေနဲ့ တရားစွဲခံရဖို့ ရှိနေပါတယ်။ ဖမ်းဆီးမှုအတွက် တရုတ်သံရုံးကို အကြောင်းကြားခဲ့တယ်လို့လည်း မလေးရှားအာဏာပိုင်တွေက ပြောကြားခဲ့ပါတယ်။

    Ref: CNA

  • ဗလီဝတ်ကျောင်းတော် ဗိသုကာဆိုင်ရာ နိုင်ငံတကာညီလာခံတစ်ခု မလေးရှားတွင် ကျင်းပမည်

    ဗလီဝတ်ကျောင်းတော် ဗိသုကာဆိုင်ရာ နိုင်ငံတကာညီလာခံတစ်ခု မလေးရှားတွင် ကျင်းပမည်

    နိုဝင်ဘာ ၂၀၊ ၂၀၁၉
    M-Media

    -ဗလီဝတ်ကျောင်းတော် ဗိသုကာဆိုင်ရာ နိုင်ငံတကာညီလာခံတစ်ခုကို မလေးရှားနိုင်ငံ ကွာလာလမ်ပူမြို့မှာ နိုဝင်ဘာနှောင်းပိုင်းကျရင် ကျင်းပဖို့ရှိနေပြီး ဗိသုကာလက်ရာ အပြောင်မြောက်ဆုံး ဗလီကိုလည်း ရွေးချယ်သွားမှာဖြစ်ပါတယ်။

    ညီလာခံကို ဆော်ဒီအာရေဗျ၊ မလေးရှားနဲ့ အခြား နိုင်ငံတကာအဖွဲ့အစည်းတွေ ပူးပေါင်းကျင်းတာဖြစ်ပြီး ညီလာခံခေါင်းစဉ်ကို ‘Future Mosque Architecture’ (ဗလီဝတ်ကျောင်းတော်၏ အနာဂတ်ဗိသုကာလက်ရာ) လို့ အမည်ပေးထားပါတယ်။

    ညီလာခံဟာ နိုဝင်ဘာ ၂၅ ရက်နေ့ကနေ ၂၇ ရက်နေ့အထိ ကြာမြင့်မှာဖြစ်ပြီး ထင်ရှားတဲ့ပုဂ္ဂိုလ် ၉ ဦးက မိန့်ခွန်းပြောကာ၊ ကမ္ဘာတစ်ဝှမ်း ထိပ်တန်း သုတေသနပညာရှင် ၄၅ ဦးက စာတမ်းတွေ ဖတ်ကြားမှာ ဖြစ်ပါတယ်။

    ဗိသုလက်ရာဆိုင်ရာ ဆုတံဆိပ် Abdullatif Al-Fozan Award အတွက် တင်သွင်းလာတဲ့ ဗလီဝတ်ကျောင်းတော်တွေကို ညီလာခံမှာ ရွေးချယ်အမှတ်ပေးမှာဖြစ်ပြီး ဆုရတဲ့ ဗလီကိုတော့ ၂၀၂၀ ခုနှစ် မတ်လ ဆော်ဒီအာရေဗျနိုင်ငံ ရီယာ့ဒ်မြို့မှာ အခမ်းအနားနဲ့ ဆုချီးမြှင့်မှာ ဖြစ်ပါတယ်။

    Abdullatif Al-Fozan Award ဆု ရွေးချယ်ရေးအဖွဲ့ကို ဆော်ဒီမင်းသားတစ်ပါးဖြစ်တဲ့ ဆူလ်တန် ဘင် ဆလ်မန်က ဦးဆောင်တာဖြစ်ပါတယ်။ မလေးရှားမှာ အခုလအတွင်းပြုလုပ်မယ့် ဗလီဝတ်ကျောင်းတော် ဗိသုကာဆိုင်ရာ နိုင်ငံတကာညီလာခံဟာ ဒုတိယအကြိမ်ဖြစ်ပါတယ်။

    Ref: Arab News

  • ပါလက်စတိုင်းကိစ္စ မဖြေရှင်းနိုင်လျှင် အကြမ်းဖက်မှု ပိုမြင်ရမည်ဟု မဟာသီ သတိပေး

    ပါလက်စတိုင်းကိစ္စ မဖြေရှင်းနိုင်လျှင် အကြမ်းဖက်မှု ပိုမြင်ရမည်ဟု မဟာသီ သတိပေး

    နိုဝင်ဘာ ၁၂၊ ၂၀၁၉
    M-Media

    -ပါလက်စတိုင်းပြဿနာကို မဖြေရှင်းနိုင်ဘူးဆိုရင် အကြမ်းဖက်မှုတွေ ပိုမိုများပြားလာလိမ့်မယ်လို့ မလေးရှားဝန်ကြီးချုပ် မဟာသီယာ မိုဟာမက်က ပြောကြားလိုကပါတယ်။

    မဟာသီဟာ ပါလက်စတိုင်းလွတ်မြောက်ရေးအတွက် မားမားမတ်မတ်ရပ်တည်သူဖြစ်ပြီး အစ္စရေးကို ဝေဖန်မှုတွေကြောင့် ဂျူးဆန့်ကျင်ရေးသမားလို့ သမုတ်ခံရသူဖြစ်ပါတယ်။

    မလေးရှား အစ္စလာမ့်နားလည်မှုရေးရာအင်စတီကျု (Ikim) က ဒီကနေ့ပြုလုပ်တဲ့ အခမ်းအနားတစ်ခုမှာ မဟာသီက ပါလက်စတိုင်းတွေကိုဖိနှိပ်ပြီး သူတို့ရဲ့နယ်မြေတွေကို ကျူးကျော်နေတဲ့ အစ္စရေးကို ထောက်ခံကူညီပေးနေတဲ့ အနောက်နိုင်ငံတွေကို ဝေဖန်ခဲ့ပါတယ်။

    “နိုင်ငံတစ်ခုက အခြားနိုင်ငံတစ်ခုထဲဝင် တရားမဝင်အိမ်ယာတွေဆောက်ပြီး အဲဒီအိမ်ယာတွေထဲအိမ်ရှင်တွေ ပေးမဝင်တဲ့ အဖြစ်အပျက်မျိုး သမိုင်းမှာ မရှိခဲ့ဖူးပါဘူး။ ဒါပေမယ့် အစ္စရေးက ဒါမျိုးလုပ်ဆောင်နေပြီး ကမ္ဘာကြီးကလည်း ဘာမှမလုပ်ဘဲ ထိုင်ကြည့်နေပါတယ်”

    ပါလက်စတိုင်းတွေရဲ့လုပ်ရပ်ကို ရှုတ်ချမှုတွေရှိပေမယ့် အစ္စရေးရဲ့ စစ်ရာဇဝတ်မှုတွေကိုတော့ ကမ္ဘာ့နိုင်ငံတွေက ခွင့်ပြုထားတယ်လို့လည်း မဟာသီက ထည့်သွင်းပြောဆိုခဲ့ပါတယ်။

    Ikim က“Demystifying Islamophobia: Towards a Deeper Understanding of Islam”(အစ္စလာမ်ကြောက်ရောဂါကို နားလည်ရေး – အစ္စလာမ်သာသနာကို နက်နက်ရှိုင်းရှိုင်တူးဆွကြည့်ခြင်း) ခေါင်းစဉ်နဲ့လုပ်တဲ့ အဲဒီအခမ်းအနားမှာ နိုင်ငံတကာက အစ္စလာမ်ဘာသာရေးခေါင်းဆောင်တွေ၊ နိုင်ငံရေးခေါင်းဆောင်တွေက တက်ရောက်မိန့်ခွန်းပြောကြားခဲ့ပါတယ်။

    ပါလက်စတိုင်းတွေဟာ ဆုံးရှုံးမှုတွေများပြားကာ မျှော်လင့်ချက်မဲ့နေတာကြောင့် အကြမ်းဖက်မှုတွေ ပိုမိုမြင်လာရနိုင်တယ်လို့လည်း မဟာသီက သတိပေးခဲ့ပါတယ်။

    “ပါလက်စတိုင်းတွေ တရားမျှတမှုရမယ်ဆိုရင် အကြမ်းဖက်တာတွေလည်း လျော့သွားမှာပါ။ ကမ္ဘာကြီးရဲ့ စာနာနားလည်မှုကိုရမှ သူတို့အတွက် ပိုကောင်းမှာပါ။ အမေရိကန်နဲ့ ဥရောပသားတော်တော်များများက အစ္စလာမ်နဲ့ မွတ်စလင်တွေအပေါ် စာနာကြတယ်။ ဒါပေမယ့် ကျွန်တော်တို့က အကြမ်းဖက်မှုတွေကို လုပ်နေတယ်ဆိုရင် သူတို့ကို အစ္စရေးဖက်တွန်းပို့သလို ဖြစ်သွားမယ်”

    ဘာသာစုံလူမျိုးစုံရှိတဲ့ တိုင်းပြည်တစ်ခု တည်ငြိမ်ဖို့ဆိုရင် ဘာသာရေးဆိုင်ရာ ဆွေးနွေးမှုတွေကို ဓမ္မဓိဌာန်ကျကျ ဆောင်ရွက်ဖို့လိုတယ်လို့လည်း မဟာသီက ထည့်သွင်းပြောကြားခဲ့ပါတယ်။

    Ref: The Star