Tag: malaysia

ဖေဖော်ဝါရီ ၂၉၊ ၂၀၂၀
M-Media

-ပြည်ထဲရေးဝန်ကြီးဟောင်း မုဟ်ယစ်ဒင် ယာစင်ကို နိုင်ငံရဲ့ ဝန်ကြီးချုပ်သစ်အဖြစ် ခန့်အပ်လိုက်တယ်လို့ မလေးရှားနန်းတော်က ဒီကနေ့မှာ ထုတ်ပြန်ကြေငြာလိုက်ပါတယ်။

လွှတ်တော်အမတ်အများစုရဲ့ ထောက်ခံမှုကို ရရှိခဲ့တဲ့ မုဟ်ယစ်ဒင်ကို ဖက်ဒရယ်ဖွဲ့စည်းပုံအခြေခံဥပဒေ ပုဒ်မ ၄၀(၂)(က)၊ ၄၃(၂)(က)တွေအရ ဝန်ကြီးချုပ်အဖြစ် ခန့်အပ်လိုက်တာဖြစ်တယ်လို့ နန်းတော်ရဲ့ ပြောရေးဆိုခွင့်ရှိသူ အဟ်မဒ် ဖာဒီလ် ရှမ်ရှူဒင်က ပြောပါတယ်။ ဝန်ကြီးချုပ်သစ်ဟာ မနက်ဖြန်မနက် ၁၀ နာရီခွဲ နန်းတော်မှာ ကျမ်းကျိန်မှာဖြစ်ပါတယ်။

“တိုင်းပြည်နဲ့ ပြည်သူလူထုအကျိုးအတွက် ဝန်ကြီးချုပ်သစ်ခန့်အပ်မှုကို နှောင့်နှေးနေလို့မရဘူးလို့ ဘုရင်ကြီးက ပြောပါတယ်။ ဒါဟာ အားလုံးအတွက် အကောင်းဆုံး ဆုံးဖြတ်ချက်တစ်ခုဖြစ်ကာ လတ်တလောဖြစ်နေတဲ့ နိုင်ငံရေးမတည်ငြိမ်မှုတွေကို အဆုံးသတ်သွားစေလိမ့်မယ်လို့လည်း ဘုရင်ကြီးက ယုံကြည်နေပါတယ်”

ပြီးခဲ့တဲ့ တနင်္လာနေ့က ဝန်ကြီးချုပ်မဟာသီယာ မိုဟာမက် ရာထူးကနေနှုတ်ထွက်ခဲ့ပြီးတဲ့နောက်ပိုင်း မလေးရှားနိုင်ငံရေးမှာ မတည်ငြိမ်မှုတွေ ဖြစ်လာတာပါ။ အာဏာရညွန့်ပေါင်းအဖွဲ့ PH ကနေ တစ်ချို့နိုင်ငံရေးပါတီတွေ နှုတ်ထွက်သွားပြီးတဲ့နောက် အစိုးရပြိုလဲခဲ့ပြီး ဘုရင်က မဟာသီကိုပဲ ယာယီဝန်ကြီးချုပ် ပြန်ခန့်ခဲ့ပါတယ်။

“ဘုရင်ကြီးရဲ့ ခွင့်ပြုချက်နဲ့အတူ နိုင်ငံရဲ့ ၈ ဦးမြောက်ဝန်ကြီးချုပ် ဖြစ်လာတဲ့အတွက် ဘုရားသခင်ကို ကျေးဇူးတင်မိပါတယ်။ ကျွန်တော်တာ့်ကို ထောက်ခံအားပေးကြသူတိုင်းကိုလည်း ကျေးဇူးတင်ပါတယ်။ ဒီကနေ့ထွက်ပေါ်လာတဲ့ ဆုံးဖြတ်ချက်ကို မလေးရှားနိုင်ငံသားအားလုံး လက်ခံမယ်လို့ ကျွန်တော် မျှော်လင့်ပါတယ်။ ကျွန်တော်တို့အာလုံးရဲ့အနာဂတ် တောက်ပဖို့အတွက် ဆုတောင်းပေးကြပါ။ ကျေးဇူးတင်ပါတယ်” လို့ မုဟ်ယစ်ဒင်က ကြေငြာချက်ထွက်လာပြီးနောက်ပိုင်း ပြောကြားခဲ့ပါတယ်။

နိုင်ငံရေးပါတီတွေအနေနဲ့ ဝန်ကြီးချုပ်လောင်း အမည်စာရင်း တင်သွင်းဖို့ ဘုရင်က တောင်းဆိုခဲ့ပြီး လွှတ်တော်အမတ်တွေရဲ့ ထောက်ခံမှုနဲ့ ဝန်ကြီးချုပ်သစ်ကို ရွေးချယ်ခဲ့တာဖြစ်ပါတယ်။ ညွန့်ပေါင်းအဖွဲ့ PH ကတော့ မဟာသီယာ မိုဟာမက်ကိုပဲ ဝန်ကြီးချုပ်လောင်းအဖြစ် အမည်စာရင်း တင်သွင်းခဲ့ပါတယ်။

မုဟ်ယစ်ဒင်ရဲ့ Bersatu ပါတီဟာ အရင်က PH မှာ ပါဝင်ခဲ့ပေမယ့် ပြီးခဲ့တဲ့တစ်ပတ်မှာ နှုတ်ထွက်ခဲ့ပြီး ဝန်ကြီးချုပ်ဟောင်း နာဂျစ်ရာဇတ်ရဲ့ BN ညွန့်ပေါင်းအဖွဲ့၊ PAS ပါတီတို့နဲ့ပေါင်းကာ အစိုးရသစ်ကို ဖွဲ့စည်းမှာ ဖြစ်ပါတယ်။ မဟာသီဦးဆောင်တဲ့ PH ဟာ ၂၀၁၈ ခုနှစ် ရွေးကောက်ပွဲတုန်းက နာဂျစ်ရဲ့ BN အစိုးရကို ဖြုတ်ချနိုင်ခဲ့တာပါ။

Ref: CNA

ဇန်နဝါရီ ၁၀၊ ၂၀၂၀
M-Media

-မလေးရှားနိုင်ငံမှာ ‌ရာသီတုပ်ကွေးရောဂါ ဖြစ်ပွားမှု မြင့်တက်လာတာကြောင့် တစ်ချို့ဒေသတွေမှာ စာသင်ကျောင်းတွေ ပိတ်ထားရတာ၊ ဆေးရုံတွေမှာ လူပြည့်တာတွေ ဖြစ်လာတယ်လို့ သိရပါတယ်။

ဇန်နဝါရီဝါရီ ၁၀ ရက်နေ့ မနက်ပိုင်းအထိ ပီနန်နဲ့ ဆီလန်ဂေါပြည်နယ်တွေမှာ ရာသီတုပ်ကွေးဖြစ်ပွားမှု အရေအတွက်ဟာ အနည်းဆုံး ၅၃ ဦး ရှိလာခဲ့ပြီး တစ်ချို့ဆေးရုံတွေက လူနာတွေကို အိမ်ပြန်အနားယူဖို့ ပြန်လွှတ်တာတွေလည်း ရှိလာပါတယ်။

မြို့တော် ကွာလာလမ်ပူဆင်ခြေဖုန်းက ဆိုက်ဘာဂျာယာ‌နဲ့ ကလန်းမြို့နယ်တွေမှာလည်း ရာသီတုပ်ကွေး ဖြစ်ပွားမှု ရှိနေပြီး အနည်းဆုံး ၂ ဦး ဆေးရုံတင်ထားရပါတယ်။

“လူနာတွေက ကောင်းကောင်းအနားယူဖို့ လိုအပ်ပါတယ်။ ပြန်ကောင်းသွားမှာပါ။ လူတိုင်းကို ဆေးရုံတင်ထားလိုက်ရင် အခြားသူတွေလည်း ကူးစက်နိုင်ပါတယ်” လို့ ကျန်းမာရေးဝန်ကြီးဌာန ဒုတိယဝန်ကြီး လီဘွန်ချီက ပြောကြားခဲ့ပါတယ်။

ပြည်သူ့ကျန်းမာရေးစင်တာတွေမှာ တုပ်ကွေးဆေးဝါးတွေ အပြည့်အ၀ရှိနေပြီး၊ ပုဂ္ဂလိကဆေးရုံတွေ အနေနဲ့လည်း ဆေးဝါးတွေ ဖြည့်တင်းထားဖို့ ဝန်ကြီးက ထည့်သွင်းပြောဆိုခဲ့ပါတယ်။

တုပ်ကွေးဖြစ်တဲ့ကလေးတွေကို ကျောင်းမပို့ဘဲ၊ ဆေးခန်းကို သွားရောက်ပြသကြဖို့ ပညာရေးဝန်ကြီးဌာနက မိဘတွေကို တိုက်တွန်းထားပြီး၊ ဒုတိယမြို့တော်ဖြစ်တဲ့ ပီနန်ကျန်းမာရေးဌာနက တုပ်ကွေးထိန်းချုပ်နိုင်ရေး အစီအမံတွေကို ဆောင်ရွက်ဖို့ စီစဉ်နေပါတယ်။

ကွာလာလမ်ပူတစ်၀ိုက်က တစ်ချို့ ပုဂ္ဂလိက ဆေးရုံတွေမှာ တုပ်ကွေးလူနာတွေများလာတာကြောင့် ကုတင် မလုံလောက်မှုပြဿနာတွေလည်း တွေ့ကြုံနေရပါတယ်။

Ref: The Strait Times

ဒီဇင်ဘာ ၂၁၊ ၂၀၁၉
M-Media

-နိုင်ငံရဲ့ ပထမဆုံး လက်နက်ခဲယမ်းစက်ရုံကို တည်ဆောက်ဖွင့်လှစ်ဖို့အတွက် မလေးရှားဟာ တူရကီကုမ္ပဏီတစ်ခုနဲ့ လက်မှတ်ရေးထိုးလိုက်ပါတယ်။

ဒီစီမံကိန်းကို တူရကီ ကုမ္ပဏီ Tisas Trabzon Silah၊ မလေးရှားရဲတပ်ဖွဲ့ပိုင် KOP Mantap လုပ်ငန်း၊ မလေးရှားအခြေစိုက် နည်းပညာကုမ္ပဏီ IDC တို့ ပူးပေါင်း အကောင်အထည်ဖော်မှာ ဖြစ်ပါတယ်။ လက်မှတ်ထိုးပွဲအခမ်းအနားကို တူရကီသမ္မတ အာဒိုဂန်နဲ့ မလေးရှားဝန်ကြီးချုပ် မဟာသီယာ မိုဟာမက်တို့ တက်ရောက်ခဲ့ပါတယ်။

မလေးရှားရဲ့ ပထမဆုံး လက်နက်စက်ရုံအတွက် တူရကီကုမ္ပဏီက နည်းပညာတွေ ပံ့ပိုးပေးမှာ ဖြစ်ပါတယ်။ ‌KOP Mantap က စက်ရုံဟာ နိုင်ငံရဲ့ လက်နက်ကိုင်တပ်ဖွဲ့ကို လက်နက်ထောက်ပံ့နိုင်ရေး၊ နိုင်ငံရပ်ခြားအပေါ် မှီခိုရမှု လျော့ချရေးကို ရည်ရွယ်ပြီး အရှေ့တောင်အာရှနိုင်ငံတွေကို ရောင်းချဖို့လည်း ရှိတယ်လို့ ထုတ်ပြန်ခဲ့ပါတယ်။

“KOP Mantap ဟာ လက်ရှိ ရှိပြီးသား နည်းပညာတွေကို အခြေခံပြီး သုတေသနတွေ လုပ်ဆောင်သွားမှာဖြစ်သလို၊ စက်ရုံလည်ပတ်မယ့်သူတွေကိုလည်း လေ့ကျင့်သင်ကြားမှုတွေ ပေးသွားမှာ ဖြစ်ပါတယ်”

Tisas ဟာ ၁၉၉၃ ခုနှစ်က တည်ထောင်ခဲ့တဲ့ ကုမ္ပဏီဖြစ်ပြီး ပစ္စတိုတွေ၊ ရိုင်ဖယ်တွေနဲ့ လက်နက်ခဲယမ်းတွေ ထုတ်လုပ်ကာ ကမ္ဘာတစ်ဝှမ်းကို ရောင်းချနေတာပါတယ်။

Ref: Nikkei Asian