Tag: malaysia

မြန်မာအပါအဝင် ၀မ်းတစ်ထွာ အတွက် ခက်ခဲစွာ ရပ်တည်နေရသည့် မလေးရှားမှ ဒုက္ခသည်များ

နိုဝင်ဘာ ၂၄၊ ၂၀၁၄
M-Media

– သူတို့မှာ တရားဝင်အလုပ်လုပ်ခွင့်မရ။ ကလေးများကိုလည်း ကျောင်းထား၍မရ။ ခေါင်းပုံဖြတ်မှု၊ ဖိနှိပ်မှုအန္တရာယ်သာမက ကြိမ်ဒဏ်ရိုက်ခံရမည့် အရေးနှင့်လည်း ၎င်းတို့က ရင်ဆိုင်နေရသည်။ ထိုသူများမှာ အခြားသူများမဟုတ် အမိမြေမှ ထွက်ပြေးခဲ့ရကာ မလေးရှားသို့ လာရောက်ကြသည့် ၁၅၀၀၀၀ သော ခိုလှုံခွင့်တောင်းသူများနှင့် ဒုက္ခသည်များပင် ဖြစ်လေ၏။ ကမ္ဘာ့ အချို့တဲ့ဆုံး ထိုသူများအား ကာကွယ်ရန် မလေးရှား အာဏာပိုင်များနှင့် ကုလမှ တာဝန်ရှိသူများက လုံလောက်စွာ ဆောင်ရွက်ပေးကြခြင်း ရှိ၊ မရှိကို အလ်-ဂျာဇီးရာ၏ 101 East အစီအစဉ် လေ့လာစုံစမ်းကာ ဖော်ပြထားသည့် ရုပ်သံအစီအစဉ်ကို တင်ဆက်ပေးလိုက်ပါတယ်။

ခီချီဆို၏ မွေးကင်းစကလေးငယ်မှာ ဆိုးရွားသော ကျန်းမာရေးကြောင့် အထူးကြပ်မတ် ကုသမှုကို ခံနေရ၏။ သူမမှာ မီးဖွားမှုမှရရှိသည့် နာကျင်မှုကိုလည်း လောလောလတ်လတ်ပင် ခံစားနေရသည်။ သို့သော်လည်း မြန်မာနိုင်ငံမှ ဒုက္ခသည်တစ်ယောက်ဖြစ်သည့် သူမအတွက် ထိုထက် ဆိုးရွားသည့် ကိစ္စများ ဖြစ်ပျက်ပေတော့မည်။

သမီးငယ်ကို မွေးဖွားပြီး နောက်တစ်နေ့တွင် သူမ ကလေးမီးဖွားရာ ကွာလာလမ်ပူဆေးရုံသို့ လူဝင်မှုကြီးကြပ်ရေးမှ တာဝန်ရှိသူများ ရောက်လာကြသည်။ သူမအနေဖြင့် ကလေးငယ်အား နောက်ဆုံးအကြိမ်အဖြစ် ကြည့်ရှုနိုင်မည်ဟု သူတို့က ပြော၏။ ထို့နောက်မှာတော့ ပူဆွေးဝမ်းနည်းနေသော သူမအား ရဲများက ခေါ်ဆောင်သွားကာ တရားမ၀င် ၀င်ရောက်လာသူများကို ထားသည့် ထိန်းသိမ်းရေးစခန် အတွင်းသို့ ထည့်ထားလိုက်လေသည်။ ထိုထိန်းသိမ်းရေးစခန်းတွင် နေထိုင်နေရသည်မှာ တစ်လခန့်ရှိပြီဖြစ်သည့် သူမအနေဖြင့် သမီးငယ်လေး သေးသလား ရှင်သလားဆိုသည်ကို မသိခဲ့။

ခီချီဆိုမှာ အိုးအိမ်စွန့်ခွာ ထွက်ပြေးကာ မလေးရှားသို့ရောက်လာကြသည့် ဒုက္ခသည်များနှင့် ခိုလှုံခွင့်တောင်းခံသူ ၁၅၀၀၀၀ ထဲမှ တစ်ဦးဖြစ်လေသည်။ ကွန်းခိုရာနေရာတစ်ခု တွေ့ရှိရမည့်အစား ၎င်းတို့အားလုံးအတွက် ကြိုလင့်နေသည့်အရာကတော့ ဒုက္ခသုက္ခနှင့် ခေါင်းပုံဖြတ် အမြတ်ထုတ်မှုပင် ဖြစ်လေ၏။ အာဏာပိုင်များ၏ လက်ဝယ်တွင်ပါ ထိုကိစ္စများက ဖြစ်ပျက်နေသည်။

ဒုက္ခသည်များ စိမ့်ဝင်ပြန်နှံ့မှုကို တားဆီးခြင်းနှင့် ပတ်သက်၍ အစိုးရ၏ ဆက်လက်ဆောင်ရွက်နေပြီးကုသသမဂ္ဂ ဒုက္ခသည်များအေဂျင်စီက ထိုကိစ္စအတွက် ဘာမှမလုပ်ဟု ဒုက္ခသည်များက ပြောကြားခဲ့သည်။

မလေးရှားမှာ ကုလ၏ ဒုက္ခသည်များဆိုင်ရာ သဘောတူညီချက်ကို လက်မှတ်မထိုးထားသည့် နိုင်ငံဖြစ်သည်။ ထို့ကြောင့် မလေးရှားသို့ ၀င်ရောက်လာသူ ဒုက္ခသည်များမှာ UNHCR တွင် စာရင်းပေးသွင်းကြရပြီး ခိုလှုံခွင့်တောင်ခံသည့် လက်မှတ်ကို ရယူကြရသည်။ ထို့နောက်တွင်တော့ အခြားတိုင်းပြည်တစ်ခုသို့ သွားရောက်ရမည့် စာရင်းတွင် အချိန်ကြာမြင့်စွာ စောင့်ဆိုင်းရလေတော့သည်။

ထိုသို့စောင့်ဆိုင်းရာတွင် တစ်ခါတစ်ရံ ၁၀ စုနှစ်တစ်ခုအထိ ကြာမြင့်သည်။ ဒုက္ခသည်များမှာ ရဲများဖမ်းဆီးမည်ကို ကြောက်ရွံ့မှုဖြင့် နေထိုင်နေရသည်။ ဒုက္ခသုက္ခများသော ထိန်းသိမ်းရေးစခန်းများသို့ ခေါ်ဆောင်မသွားရေးအတွက် အလှဲအလှယ်အဖြစ် ရဲများက ပိုက်ဆံတောင်းကြသည်ဟု ၎င်းတို့က ပြောကြသည်။

ဒုက္ခသည်များမှာ အလုပ်လုပ်ခွင့်မရှိသလို ၎င်းတို့၏ ကလေးများအား ကျောင်းထားခွင့်လည်းမရှိ။ ၎င်းတို့မှာ လူ့အဖွဲ့အစည်း၏ လောင်းရိပ်များအောက်တွင် ရုန်းကန် လှုပ်ရှားနေရခြင်းကြောင့် ဤသည်က ဒုက္ခသည်အများစုအတွက် ထိလွယ်ရှလွယ်သည့် ရပ်တည်မှုမျိုးလည်း ဖြစ်လေတော့သည်။

ref_Al Jazeera

November 24, 2014
မလေး လူ့အဖွဲ့အစည်း တိုးတက်အောင် လုပ်ဆောင်ခဲ့သည့် တရုတ်လူမျိုးတဦး အောက်မေ့ဖွယ် အခမ်းအနားကျင်းပ

နိုဝင်ဘာ ၈ ၊ ၂၀၁၄
M-Media

– မလေးရှား လူ့အဖွဲ့အစည်းအတွင်း လူမှုရေးနှင့် ပညာရေးကဏ္ဍ တိုးတက်ရေးအတွက် စွမ်းစွမ်းတမံ ဆောင်ရွက်ပေးခဲ့သည့် တရုတ်လူမျိုး Tan Kah Kee ၏ ၁၄၀ နှစ်မြောက် အောက်မေ့ဖွယ်အခမ်းအနားကို မလေးရှားနိုင်ငံ ကွာလာလမ်ပူမြို့တွင် ပြီးခဲ့သည့် တနင်္လာနေ့က ပြုလုပ်ခဲ့သည်ဟု သိရသည်။

Tan Kah Kee သိပ္ပံဆုဖောင်ဒေးရှင်းက ကြီးမှူးကျင်းပခဲ့သည့် အဆိုပါအခမ်းအနားကို ကေအလ်နှင့် ဆီလန်ဂေါ တရုတ်ခန်းမတွင် ပြုလုပ်ခဲ့ပြီး ကွာလာလမ်ပူ အုပ်ချုပ်ရေးအဖွဲ့ဝင်များ၊ တာဝန်ရှိသူများနှင့် မလေးရှားနိုင်ငံဆိုင်ရာ တရုတ်သံအမတ်ကြီး Huang Huikang လည်း တက်ရောက်ခဲ့သည်။

Huang က ယခုနှစ်မှာ တရုတ်-မလေးရှား သံတမန် ဆက်ဆံရေး နှစ် ၄၀ မြောက်ဖြစ်ပြီး နှစ်နိုင်ငံစလုံးက သူရဲကောင်းများ၏ စွန့်လွှတ်စွန့်စားမှုနှင့် ကူညီမှုများကို မမေ့သင့်ကြောင်း၊ Tan Kah Kee မှာ မလေးရှား၏ လူမှုရေး ဖွံဖြိုးတိုးတက်မှုအတွက် ၎င်း၏ ဘ၀ကို မြှုပ်နှံခဲ့ပြီး တရုတ်-မလေးရှား နှစ်နိုင်ငံ ဆက်ဆံရေး တိုးတက်စေရန်အတွက် ဆောင်ရွက်ပေးခဲ့ကြောင်း ပြောကြားခဲ့သည်။

Tan မှာ ပညာရေးဘက်တွင်လည်း ငွေကြေးအမြောက်အများ ရင်းနှီးမြှုပ်နှံခဲ့သူဖြစ်ပြီး၊ Tan Kah Kee သိပ္ပံဆုဖောင်ဒေးရှင်း၏ နာယကလည်းဖြစ်ကာ ၎င်း၏ ဦးဆောင်မှု နောက်ပိုင်းတွင် မျိုးဆက်သစ်များက ဆက်လက်လုပ်ဆောင်ခဲ့ကြသည်။

ဖက်စစ်တော်လှန်ရေးကာလအတွင်း Tan မှာ မလေးရှားနိုင်ငံမှ ထောင်ပေါင်းများစွာသော တရုတ်လူမျိုးများအား စုဆောင်းခဲ့ပြီး အသက်ကယ်တပ်ဖွဲ့တစ်ခု ထူထောင်ခဲ့ကာ ဖက်စစ်ဂျပန်များလက်အောက် ပိတ်မိနေသော ရှေ့တန်းစစ်မျက်နှာသို့ စစ်ဘက်ဆိုင်ရာ အရေးပါသော ပစ္စည်းများကို ပေးပို့ခဲ့သည်။

တရုတ်သံမအမတ်ကြီးကမူ Tan မှာ မလေးရှားရှိ တရုတ်လူမျိုးများအတွက် ဂုဏ်သိက္ခာဖြစ်ပြီး၊ ၎င်း၏ စိတ်ဓာတ်မျိုးကို ဆက်လက် လက်ဆင့်ကမ်းသင့်ကြောင်း ထည့်သွင်းပြောကြားခဲ့သည်။ ထို့နောက် တရုတ်သံရုံးကိုယ်စား Tan Kah Kee သိပ္ပံဖောင်ဒေးရှင်းဆုသို့ မလေးရှားရင်းဂစ် ၂၀၀၀၀ ပေးအပ်လှူဒါန်းခဲ့သည်။

ref_ ဆင်ဟွာ

November 8, 2014
အီဘိုလာ သံသယရှိသူတစ်ဦး မလေးရှားတွင်တွေ့ရှိ

အောက်တိုဘာ ၁၅ ၊ ၂၀၁၄
M-Media

– နိုင်ငံအရှေ့ပိုင်း ဆာရာဝပ်ပြည်နယ်တွင် အသက် ၂၄ နှစ်အရွယ် ဇင်ဘာဘွေ ကျောင်းသားတစ်ဦးအား အီဘိုလာဗိုင်းရပ်စ် ကူးစက်နေသည်ဟူသော သံသယဖြင့် စောင့်ကြည့်နေသည်ဟု မလေးထုတ် အင်္ဂလိပ်သတင်းစာ New Straits Times တွင် အောက်တိုဘာ ၁၄ ရက်နေ့က ဖော်ပြခဲ့သည်။

အဆိုပါကျောင်းသားမှာ ပြီးခဲ့သည့် စနေနေ့က စတင်ဖျားနာခဲ့ခြင်းဖြစ်ပြီး ဆာရာဝပ် အထွေထွေဆေးရုံကြီးတွင် သီးသန့်ခွဲထားကာ စောင့်ကြည့်မှုများ ပြုလုပ်နေသည်။

ဆာရာဝပ် ပြည်သူ့ကျန်းမာရေး ဒုတိယ၀န်ကြီး ဂျာရစ် ဆူစီလ်ကမူ အဆိုပါကျောင်းသားတွင် အဖျားကြီးခြင်းမှလွဲ၍ အခြားသော အီဘိုလာနှင့်သက်ဆိုင်သည့် လက္ခဏာများကို မတွေ့ရဟု ပြောကြားခဲ့သည်။

“ဒါဟာ အီဘိုလာဟုတ်မဟုတ် သေသေချာချာကို သိမှာပါ။ စမ်းသပ်မှုရလဒ်တွေကို တစ်ပတ်အတွင်း သိရပါလိမ့်မယ်” ဟု ဆူစီလ်က ပြောကြားခဲ့သည်။

အဆိုပါကျောင်းသားမှာ ယခုနှစ်အတွင်း မလေးရှားမှ အခြားတိုင်းပြည်များသို့ သွားရောက်ခြင်း မရှိသော်လည်း နိုက်ဂျီးရီးယားမှ မကြာသေးမီက ပြန်လာခဲ့သည့် နိုက်ဂျီးရီးယား ကျောင်းသားများနှင့် ဆက်သွယ်မှုရှိခဲ့သည်ဟု အဆိုပါ သတင်းစာတွင် ဖော်ပြထားသည်။

October 15, 2014
အစ္စလာမ့် တန်ဖိုးကို ထိခိုက်စေသည့် ဘီယာပွဲတော်ကို ပိတ်ပင်ရန် မလေးမွတ်စလင် အဖွဲ့အစည်းများ တောင်းဆို

အောက်တိုဘာ ၉ ၊ ၂၀၁၄
M-Media

– အစ္စလာမ်၏ အမှတ်သညာကို ထိန်းသိမ်းရန်ရည်ရွယ်၍ မလေးရှား မွတ်စလင်အဖွဲ့များက ဘီယာပွဲတော်ကျင်းပရန် စီစဉ်ထားမှုကို ပိတ်ပင်ရန် တောင်းဆိုလိုက်ပြီး ထိုပွဲတော်က မွတ်စလင်များ၏ ဘာသာရေးဆိုင်ရာ ယုံကြည်မှုကို ထိခိုက်စေသည်ဟု ပြောကြားလိုက်သည်။

Oktberfest ဟုအမည်ပေးထားသည့် အဆိုပါ ဘီယာပွဲတော်ကို မလေးရှား၏ အချမ်းသာဆုံးနှင့် လူနေအထူထပ်ဆုံး ဆီလန်ဂေါပြည်နယ်တွင် ယခုလနှောင်းပိုင်း၌ ကျင်းပပြုလုပ်ရန် စီစဉ်ထားသည်။

“ဆိုးရွားတဲ့အကြောင်းအရင်းနဲ့ မကျေနပ်ရတဲ့အချက်ကတော့ ဘီယာပွဲတော်ကို အစ္စလာမ်ဘာသာဝင်တွေ ဟဂ်ျကျင့်စဉ်နဲ့ ကုရ်ဘာနီစွန့်လှူမှုကို ပြုလုပ်တဲ့ ဇွလ်ဟစ်ဂျဟ်လမှ ကျင်းပပြုလုပ်လို့ ဖြစ်ပါတယ်။ ဒီပွဲတော်နဲ့ ပတ်သက်လို့ ကျွန်တော်တို့မှာ ဘာပြဿနာမှမရှိပါဘူး။ ဒါပေမယ့် မွတ်စလင်လူများစုရဲ့ ယဉ်ကျေးမှုနဲ့ သိမ်မွေ့နူးညံ့မှုကိုတော့ သတိပြု ကျင်းပဖို့ လိုပါလိမ့်မယ်” ဟု ဆီလန်ဂေါမြို့နယ် Ikatan Kebajikan dan Dakwah အဖွဲ့မှ ဥက္ကဌ ရိုစ့်ဒီ လွန်၏ ပြောကြားမှုကို Malay Mail သတင်းစာက အောက်တိုဘာ ၈ ရက်နေ့တွင် ဖော်ပြခဲ့သည်။

အဆိုပါ ဘီယာပွဲတော်ကျင်းပမည့် ကြော်ငြာဆိုင်းဘုတ်များကိုလည်း မလေးမွတ်စလင် အဖွဲ့အစည်းများမှ ကန့်ကွက်ခဲ့ပြီး အာဏာရပါတီ UMNO မှ နူဟ် အိုမာရ်ကမူ ထိုဆိုင်းဘုတ်များကို ဖယ်ရှားရန် ဆီလန်ဂေါ အုပ်ချုပ်ရေးမှူး မန်တာရီ ဘာဆာရန် အဇ်မင် ကို တိုက်တွန်းခဲ့သည်။

မလေးရှားရှိ ဥပဒေရေးရာ ကျွမ်းကျင်သူများကလည်း အဆိုပါ ဘီယာပွဲတော်မှာ နိုင်ငံ၏ ဖွဲ့စည်းပုံနှင့် ဆန့်ကျင်နေသည်ဟု သတိပေးခဲ့ပြီး၊ အခြေခံဥပဒေတွင် အရက်ပွဲတော်များအား လူမြင်ကွင်းတွင် ကျင်းပခွင့်မပေးထားဟု ပြောကြားခဲ့သည်။

“လွတ်လပ်စွာ စုရုံးခွင့် ၂၀၁၂ အက်ဥပဒေအရ လူမြင်ကွင်းမှာ ဒါမျိုးတွေလုပ်မယ်ဆိုရင် ပွဲကျင်းပမယ့်သူဟာ ကျင်းပခွင့် ပါမစ် ယူရပါမယ်။ ဒါပေမယ့် ဒီ(အရက်ပွဲတော်လို) ကိစ္စမျိုးဆိုရင်တော့ ပါမစ်ထုတ်ပေးမှာ မဟုတ်ပါဘူး။ ဒါဟာ အခြေခံဥပဒေကို ချိုးဖောက်နေလို့ပါ” ဟု Kebangsaan Malaysia တက္ကသိုလ်မှ ဥပဒေရေးရာ ပါမောက္ခ ဒါတင် နူရ် အဇီယဟ် မိုဟာမက် အောင်ဝလ်က ပြောကြားခဲ့သည်။

အဆိုပါဘီယာပွဲတော်နှင့် ပတ်သက်၍ အခြားသော မွတ်စလင်အဖွဲ့အစည်းများဖြစ်သည့် Isma၊ PAS တို့ကလည်း ဝေဖန်ခဲ့ကြသည်။ သို့သော်လည်း အစ္စလာမ်ဘာသာဝင် မဟုတ်သူများ၏ အခွင့်အရေးကို နားလည်သည်ဟုလည်း ၎င်းတို့က ဆိုသည်။

“အစ္စလာမ်ဘာသာဝင်မဟုတ်တဲ့သူတွေ ယမကာသောက်သုံးခွင့်ကို ငြင်းပယ်တာ မဟုတ်ပါဘူး။ ဒါပေမယ့် အစ္စလာမ်ဘာသာဝင်အများစုရှိတဲ့ နိုင်ငံမျိုးမှာ ဒီအခွင့်အရေးကို ကိုယ်တိုင်ရယူတာမျိုးပဲဖြစ်သင့်ပြီး၊ ဒီလိုပုံစံမျိုးနဲ့ အထိမ်းအမှတ်ပွဲတော်တွေလုပ်တာ အရက်သောက်သုံးဖို့ လှုံ့ဆော်တာမျိုးတွေတော့ မဖြစ်သင့်ပါဘူး” ဟု လွှတ်တော်အမတ်တစ်ဦးဖြစ်သည့် နတ်စရူဒင်က ပြောကြားခဲ့သည်။

ref_ OnIslam

October 9, 2014
မလေးရှားနိုင်ငံ ကွာလာလမ်ပူတွင် ပေါက်ကွဲမှု တစ်ခုဖြစ်ပွား ၁ ဦးသေဆုံး ၊ ၁၄ ဦး ဒဏ်ရာရ

အောက်တိုဘာ ၉ ၊ ၂၀၁၄
M-Media

– မလေးရှားနိုင်ငံ ကွာလာလမ်ပူမြို့ ဘူကစ်ဘင်တန်းတွင် ယနေ့နံနက်အစောပိုင်းက ပေါက်ကွဲမှုတစ်ခု ဖြစ်ပွားခဲ့ပြီး လူ ၁ ဦးသေဆုံးခဲ့သည်ဟု သိရသည်။

Sun Complex အဆောက်အဦးအရှေ့၌ ယနေ့နံနက် ၄ နာရီ ၂၅ မိနစ်တွင် ဖြစ်ပွားခဲ့ခြင်းဖြစ်ပြီး လူ ၁၄ ဦး ဒဏ်ရာရရှိခဲ့ကာ ကွာလာလမ်ပူ ဆေးရုံကြီးနှင့် Tung Shin ဆေးရုံများသို့ ပို့ဆောင်ကုသလျက်ရှိနေသည်။

အုပ်စုတစ်စုမှာ တိုယိုတာ Vellfire သို့တက်နေစဉ် ပေါက်ကွဲစေတတ်သည့် ပစ္စည်းများမှာ အဆိုပါ အဆောက်အဦး၏ ဒုတိယထပ်မှ ပြုတ်ကျလာခြင်းဖြစ်ပြီး ပေါက်ကွဲ မှုကြောင့် တိုယိုတာ Camry၊ Mazda နှင့် BMW ကားသုံးစီး ပျက်ဆီးခဲ့ရသည်ဟု မြို့နယ် CID ဒုတိယ အကြီးအကဲ ခိုင်ရီက ပြောကြားခဲ့သည်။

“သေဆုံးဒဏ်ရာရသူတွေဟာ pub တစ်ခုက ဖောက်သည်တွေနဲ့၊ အဲဒီအနားက ဟိုတယ်တွေမှာ တည်းနေတဲ့သူတွေဖြစ်ပါတယ်” ဟု ၎င်းကဆိုသည်။

ထို့ပြင် ထိုကဲ့သို့ တိုက်ခိုက်မှုမှာ လူမိုက်ဂိုဏ်းများ အကြား တိုက်ခိုက်မှုဖြစ်မည်ဟု ယူဆရပြီး ရဲတပ်ဖွဲ့အနေဖြင့် ထောင့်ပေါင်းစုံမှ စုံစမ်းစစ်ဆေးမှုများကို ပြုလုပ်နေကြောင်း ထပ်လောင်းပြောကြားခဲ့သည်။

ref_ The Star

October 9, 2014