မေ ၃၊ ၂၀၂၃
M-Media
-AI ရဲ့ ခေါင်းကိုင်ဖခင်လို့ သတ်မှတ်ခံထားရတဲ့ ဂျီယိုဖရေး ဟင်တန်က သူတီထွင်ခဲ့တဲ့ နည်းပညာဟာ လူသားတွေအတွက် အလွန်အန္တရာယ်ရှိနေပြီလို့ ပြောကြားလိုက်ပါတယ်။
ဟင်တန်ဟာ အသက် ၇၅ နှစ်အရွယ်ရှိပြီး မနေ့က Google က နေနှုတ်ထွက်ခဲ့ပါတယ်။ AI ကို ဖန်တီးပေးခဲ့မှုအတွက် နောက်တရနေတယ်လို့လည်း သူက ဆိုပါတယ်။
“အခုအချိန်မှာ AI ဟာ လူသားတွေလောက် အသိဉာဏ် မရှိသေးပါဘူး။ ဒါပေမယ့် သိပ်မကြာခင်မှာ လူသားအသိဉာဏ်ကို ကျော်ဖြတ်သွားမယ်လို့ ကျွန်တော်ပြောနိုင်ပါတယ်”
လူသားဦးနှောက်လို အလုပ်လုပ်တဲ့ Neural Networks နည်းပညာ၊ အလိုအလျောက် သင်ယူလေ့လာတဲ့ Deep Learning နည်းပညာတို့ကို ဟင်တန်က စတင် လေ့လာဖော်ထုတ်ခဲ့ပြီး အဲဒီကနေတစ်ဆင့် AI နည်းပညာ ထွန်းကားလာတာပါ။
လက်ရှိ AI လောကမှာ နာမည်အကြီးဆုံးက Chat GPT ဖြစ်ပါတယ်။ ဒီလို ဆော့ဖ်၀ဲတွေဟာ လူသားဦးနှောက်က သိုမှီးတဲ့ အသိပညာတွေထက်ကို နောက်ပိုင်းမှာ ကျော်လွန်သိုမှီးလာနိုင်မယ်လို့ ဟင်တန်က ပြောပါတယ်။
လူသားတစ်ယောက် သိရှိထားတဲ့ အသိပညာဟာ နောက်တစ်ယောက်ကို လက်ဆင့်ကမ်းဖို့ မလွယ်ပေမယ့် AI နည်းပညာတစ်ခုက ရရှိထားတဲ့ အချက်အလက်ဟာ နောက်ထပ် AI စနစ် ၁၀၀၀၀ လောက်ကို မဆိုင်းမတွ ကော်ပီလုပ်နိုင်ပါတယ်။
ရုရှားသမ္မတ ပူတင်လို လူဆိုးတွေက AI နည်းပညာကို အဖျက်ဖက်မှာ သုံးစွဲလာမှာကို စိုးရိမ်တယ်လို့လည်း ဟင်တန်က ဆိုပါတယ်။
AI ဖန်တီးမှုကို လက်ရှိအဆင့်မှာတင် ရပ်တန်ဖို့အတွက် ကမ္ဘာထိပ်တန်း ပညာရှင်တွေ၊ စီးပွားရေး လုပ်ငန်းရှင်တွေက မတ်လမှာ စုပေါင်းလက်မှတ်ရေးထိုးပြီး အစိုးရတွေကို တောင်းဆိုခဲ့ပါတယ်။
ဟင်တန်က AI ရဲ့ ကောင်းကျိုးဟာ အန္တရာယ်ထက် ပိုများတဲ့အတွက် ဖန်တီးမှုကို မရပ်တန့်သင့်ဘူးလို့ သုံးသပ်ပါတယ်။
အမေရိကန်က AI ဖန်တီးမှုကို ရပ်တန့်ရင်တောင် တရုတ်လိုနိုင်ငံမျိုးက ဆက်လက်လုပ်ဆောင်နေမှာဖြစ်တဲ့အတွက် AI လုံး၀ရပ်တန့်ရေး မဖြစ်နိုင်ဘူးလို့ သူက ဆိုပါတယ်။
ဒီလိုဖန်တီးရာမှာ တာ၀န်ယူမှု၊ တာ၀န်ခံမှုရှိဖို့ ကမ္ဘာတစ်၀ှမ်းက အာဏာပိုင်တွေကို ဟင်တန်က တိုက်တွန်းခဲ့ပါတယ်။
Ref: BBC
