ရာသီကုန် ရလဒ်နဲ့ပတ်သက်လို့ ကျွန်တော်တို့ သိပ်ပြီး ကျေနပ်တာတော့ မဟုတ်ပါဘူး။ အချိန်နည်းနည်းကြာသွားလို့ နေသာထိုင်သာရှိသွားရင် ရလဒ်ကိုသုံးသပ်ပြီး ဂုဏ်ယူမိချင်လည်း မိလိမ့်မယ်။ အခုကတော့ တော်တော် ခံစားနေရပါတယ်။
ရာသီတစ်လျှောက်လုံးရှိခဲ့တဲ့ ကျွန်တော်တို့အဆင့်နဲ့ဆိုရင် ဒုတိယနေရာဟာ ကျေနပ်စရာ မဟုတ်ပါဘူး။ ရာသီမစခင် အနေအထားမျိုးနဲ့က ဒုတိယနေရာရတာဟာ အောင်မြင်မှု ဖြစ်ပေမယ့် ထိပ်ဆုံးရောက်နေမှတော့ ချန်ပီယံ ဖြစ်ချင်တာပေါ့။ ဒီအတွက် စိတ်ပျက်တာက ကောင်းမွန်တဲ့ လက္ခဏာဖြစ်တယ်။
မာတင် အိုဒီဂတ် (အာဆင်နယ် ကွင်းလယ်လူ)
မေ ၂၁၊ ၂၀၂၃
M-Media
ပြီးခဲ့တဲ့နှစ် လီဗာပူးလ်အသင်းကို ပွတ်ကာသီကာ ကျော်ဖြတ်ပြီး ပရီးမီးယားလိဂ်ချန်ပီယံဖြစ်ခဲ့တဲ့ မန်စီးတီးအသင်းမှာ အဆုံးအဖြတ်ပေးနိုင်မယ့် တိုက်စစ်သမားကောင်းကောင်း မရှိခဲ့ပါဘူး။ ကွင်းလယ်လူ ဒီဘရိုင်း အသင်းရဲ့ ဂိုးအများဆုံးသွင်းသူ ဖြစ်ခဲ့တာက မန်စီးတီးအသင်းရဲ့ တိုက်စစ်အားနည်းမှုကို ပြသနေပါတယ်။
ဒီနှစ်မှာတော့ ဂွါဒီယိုလာဟာ ဒီကွက်လပ်ကို ဟာလန်းနဲ့ အကောင်းဆုံး ဖြည့်ဆည်းနိုင်ခဲ့ပါတယ်။ ဟာလန်းဟာ သူ့ရဲ့ ပထမဆုံးရာသီမှာပဲ ပရီးမီးယားလိဂ်သမိုင်းရဲ့ စံချိန်တင်ဂိုးသွင်းဘုရင်ဖြစ်ခဲ့ပြီး ပရီးမီးလားလိဂ်ဖလားကိုလည်း ကိုင်မြှောက်နိုင်တော့မှာ ဖြစ်ပါတယ်။
ဖလားစိန်ခေါ်မယ့်အသင်းတွေဟာ ရာသီအစောပိုင်းကာလမှာ ရလဒ်တွေကောင်းထားဖို့ လိုအပ်ပါတယ်။ အထူးသဖြင့် ဖလားလုမယ့်ပြိုင်ဘက်တွေ၊ မြို့ခံပြိုင်ဘက်တွေနဲ့ တွေ့တဲ့အချိန်မျိုးမှာပါ။ ရာသီအစ အောက်တိုဘာလ အိမ်ကွင်း မန်ယူနဲ့ ဒါဘီပွဲမှာ မန်စီးတီးဟာ ၆ ဂိုး ၃ ဂိုးနဲ့ အနိုင်ယူနိုင်ခဲ့ပါတယ်။ ဒီပွဲဟာ အခုနှစ် မန်စီးတီးရဲ့ အကောင်းဆုံးပွဲတွေထဲက တစ်ပွဲလည်း ဖြစ်ပါတယ်။
၂၀၂၃ အစပိုင်းမှာ မန်စီးတီးရဲ့ခြေစွမ်းဟာ အလွန်ဆိုးရွားခဲ့ပါတယ်။ နှစ်အစ အိမ်ကွင်းမှာ အဲဗာတန်ကို ၁ ဂိုးစီ သရေကျပြီး၊ နောက်တစ်ပွဲမှာ မန်ယူကို ၂ ဂိုး ၁ ဂိုးနဲ့ ရှုံးနိမ့်ခဲ့ပါတယ်။ တတိယပွဲဖြစ်တဲ့ စပါးနဲ့ ပွဲမှာလည်း မန်စီးတီးဟာ ပထမပိုင်းမှာ ၂ ဂိုးပြတ်နဲ့ ရှုံးနိမ့်နေတာပါ။ ဒုတိယပိုင်းမှာတော့ အလ်ဗာရက်ဇ်၊ ဟာလန်း၊ မာရက်ဇ်တို့ရဲ့ အစွမ်းပြမှုနဲ့ ၄ ဂိုးပြန်သွင်းကာ အနိုင်ရခဲ့ပါတယ်။ အဲဒီပွဲနောက်ပိုင်း မန်စီးတီးဟာ အများဆုံးရနိုင်တဲ့ အမှတ်တွေထဲက ၅ မှတ်သာ ဆုံးရှုံးခဲ့ပါတယ်။
ပြီးခဲ့တဲ့ ၂ နှစ်မှာ အကောင်းဆုံးခြေစွမ်းပြခဲ့တဲ့ ကန်ဆယ်လိုဟာ ဟာလန်ကို အသားပေးတဲ့ ဂွါဒီယိုလာရဲ့ နည်းစနစ်အပြောင်းအလဲမှာ အံမ၀င်တော့ပါဘူး။ သူ့နေရာကို နသန်အေကီ ၀င်လာတဲ့အခါ ကန်ဆယ်လိုဟာ အသင်းရဲ့စည်းလုံးမှုကို ထိခိုက်စေတဲ့ ကစားသမားတစ်ယောက် ဖြစ်လာခဲ့ပါတယ်။ ဒါကို ရိပ်မိလာတဲ့ ဂွါဒီယိုလာဟာ ဇန်န၀ါရီနှောင်းပိုင်းမှာ ကန်ဆယ်လိုကို ဘိုင်ယန်မြူးနစ်ဆီ အငှားနဲ့ပိုခဲ့ပါတယ်။ သူ့နေရာကို အေကီနဲ့ အေကန်ဂျီတို့က အကောင်းဆုံး အစားထိုးနိုင်ခဲ့ပြီး အသင်းကလည်း ကွင်းတွင်းကွင်းပြင် ပိုမိုစည်းလုံးလာခဲ့ပါတယ်။
မန်စီးတီးအပါအ၀င် ပရီးမီးယားလိဂ် ထိပ်တန်းအသင်းတစ်ချို့ဟာ ဘဏ္ဍာရေးစည်းမျဥ်း ချိုးဖောက်တယ်ဆိုတဲ့ သတင်းတွေ ဖေဖော်၀ါရီ ၆ ရက်နေ့မှာ ထွက်လာပါတယ်။ မန်စီးတီးဟာ ပရီးမီးလားလိဂ် ချန်ပီယံဘွဲ့ကို စွန့်လွှတ်ရတာ၊ တန်းဆင်းရတာတွေအထိ ဖြစ်နိုင်တယ်လို့ ပြောလာကြပါတယ်။ ဂွါဒီယိုလာက ဒီပြဿနာကို အသင်းအတွက် တွန်းအားအဖြစ် အသုံးချနိုင်ခဲ့ပါတယ်။ ဒီသတင်းနောက်ပိုင်း မန်စီးတီးဟာ ပြိုင်ပွဲပေါင်းစုံ ၂၃ ပွဲဆက်တိုက် ရှုံးပွဲမရှိ ကစားနိုင်ခဲ့ပြီး၊ ပရီးမီးယားလိဂ်မှာရနိုင်တဲ့ ၄၂ မှတ်မှာ အမှတ် ၄၀ အထိ ရယူနိုင်ခဲ့ပါတယ်။
ဇယားထိပ်မှာ တောက်လျှောက်ဦးဆောင်လာတဲ့ အာဆင်နယ်ကို ဖေဖော်၀ါရီလ အ၀ေးကွင်းမှာ အနိုင်ယူနိုင်ခဲ့တာကလည်း ချန်ပီယံလမ်းကြောင်းပေါ် ပိုမိုခိုင်မြဲစေမယ့် ဖြစ်ရပ်တစ်ခု ဖြစ်ပါတယ်။ ၃ ဂိုး ၁ ဂိုးနဲ့ အနိုင်ရတဲ့ အဲဒီပွဲဟာ အာဆင်နယ်အသင်းကို စိတ်ပိုင်းဆိုင်ရာ ထိခိုက်စေခဲ့ပါတယ်။ ဧပြီလ အိမ်ကွင်းပွဲမှာတော့ မန်စီးတီးဟာ ၄ ဂိုး ၁ ဂိုးနဲ့ ထပ်မံအနိုင်ယူကာ အာဆင်နယ်ကို အလဲထိုးနိုင်ခဲ့ပါတယ်။
ဧပြီလ ၁ ရက်နေ့ လီဗာပူးလ်နဲ့ပွဲဟာ မန်စီးတီးရဲ့ ချန်ပီယံပြေးလမ်းကြောင်းမှာ အရေးပါတဲ့ ပွဲတစ်ပွဲပါ။ ဒီပွဲမှာ အားထားရတဲ့ တိုက်စစ်မှူးဟာလန်း ဒဏ်ရာကြောင့် မပါ၀င်နိုင်ခဲ့ပါဘူး။ အာဆင်နယ်ကို အမှီလိုက်နိုင်ရေး ဒီပွဲက အရေးကြီးနေပြီး ပထမပိုင်းမှာ မန်စီးတီးက ၁ ဂိုး ဂိုးမရှိနဲ့ ရှုံးနိမ့်ခဲ့ပါတယ်။ ဒုတိယပိုင်းမှာ မန်စီးတီးဟာ ချန်ပီယံ ခြေစွမ်းပြခဲ့ပြီး အယ်လ်ဗာရက်ဇ်၊ ဒီဘရိုင်း၊ ဂွမ်ဒိုဂန်နဲ့ ဂရင်းလစ်ရှ်တို့က ဂိုးတွေသွင်းကာ ၄ ဂိုး ၁ ဂိုးနဲ့ အနိုင်ရခဲ့ပါတယ်။
အာဆင်နယ်ရဲ့ အမှားတွေကို အခွင့်အရေးယူနိုင်ခဲ့တာကလည်း မန်စီးတီးရဲ့ ဖလားလမ်းကြောင်းကို ပိုမို ခိုင်မြဲစေခဲ့ပါတယ်။ ဧပြီလအတွင်း အာဆင်နယ်ဟာ လီဗာပူးလ်နဲ့ ၀က်စ်ဟမ်းတို့ကို ဦးဆောင်ဂိုးတွေ သွင်းယူပြီးမှ သရေကျခဲ့ပြီး၊ ဆောက်သက်တမ်နဲ့ပွဲမှာလည်း နောက်ဆုံး မိနစ်ချေပဂိုးကြောင့် သရေတစ်မှတ် ရခဲ့ပါတယ်။ အာဆင်နယ်က အမှတ်တွေဆုံးရှုံးနေချိန် မန်စီးတီးဟာ လက်စတာ၊ ဖူလ်ဟမ်နဲ့ ၀က်စ်ဟမ်းတို့ကို အနိုင်ကစားကာ အမှတ်ပြည့် ရယူနိုင်ခဲ့ပါတယ်။
မေလ ၁၄ ရက်နေ့က ကစားခဲ့တဲ့ အဲဗာတန်နဲ့ အ၀ေးကွင်းပွဲဟာ မန်စီးတီးတို့ ဖလားရဖို့ ၇၅ ရာခိုင်နှုန်း သေချာစေခဲ့ပါတယ်။ ပထမ မိနစ် ၃၀ အတွင်း ရုန်းကန်ခဲ့ရတဲ့ မန်စီးတီးဟာ နောက်ပိုင်းမှာ ၃ ဂိုးသွင်းကာ အနိုင်ယူနိုင်ခဲ့ပါတယ်။ တစ်ဖက်မှာ အာဆင်နယ်အသင်းက ဘရိုက်တန်ကို ရှုံးနိမ့်ခဲ့တာကြောင့် လက်ကျန် ၃ ပွဲမှာ တစ်ပွဲနိုင်တာနဲ့ ချန်ပီယံဖြစ်နိုင်မယ့် အခွင့်အရေးကို ရရှိခဲ့ပါတယ်။
မနေ့က အာဆင်နယ်ဟာ နော်တင်ဟမ်ဖောရက်စ်ကို ရှုံးနိမ့်ခဲ့တာကြောင့် မန်စီးတီးအသင်းဟာ ၃ နှစ်ဆက် ပရီးမီးယားလိဂ်ချန်ပီယံ ဖြစ်လာခဲ့ပါတယ်။
Ref: Goal
မေ ၁၃၊ ၂၀၂၃
M-Media
-ဘောလုံးအားကစား ဂျာနယ်လစ်အသင်း (FWA) က ရွေးချယ်ချီးမြှင့်တဲ့ တစ်နှစ်တာအကောင်းဆုံး ဘောလုံးသမားဆုကို မန်စီးတီးတိုက်စစ်မှူး အာလင် ဟာလန်းက ရရှိသွားပါတယ်။
မဲပေးမှု စုစုပေါင်းရဲ့ ၈၂ ရာခိုင်နှုန်းကို ဟာလန်းက ရရှိကာ အာဆင်နယ်တိုက်စစ်မှူး ဘူကာယို ဆာကာ၊ ကွင်းလယ်လူ အိုဒီဂတ်တို့ကို ကျော်ဖြတ်နိုင်ခဲ့တာ ဖြစ်ပါတယ်။
၈၂ ရာခိုင်နှုန်းဟာ FWA ဆုသမိုင်းမှာ အမြင့်ဆုံးရရှိတဲ့ စံချိန်လည်း ဖြစ်ပါတယ်။
“အင်္ဂလိပ်ဘောလုံးလောကမှာ ပထမတစ်နှစ်ထဲနဲ့ FWA ဆုကို ရရှိတဲ့အတွက် ဂုဏ်ယူမိပါတယ်။ အကောင်းဆုံးဖြစ်အောင်လို့ နေ့စဥ်နေ့တိုင်း ကျွန်တော်ကြိုးစားတယ်။ ဒီလိုအသိအမှတ်ပြုခံရတာဟာ ကျွန်တော့်အတွက် အဓိပ္ပါယ်အများကြီး ရှိပါတယ်”
“မန်စီးတီးမှာ ကုန်ဆုံးရတဲ့ အချိန်တိုင်းကို ကျွန်တော်ပျော်တယ်။ အသင်းဖော်တွေဟာ မယုံနိုင်လောက်အောင် ကောင်းတယ်။ သူတို့ဖန်တီးပေးလို့ ကျွန်တော် ဂိုးတွေရတာပါ။ သူတို့မရှိဘဲနဲ့ ကျွန်တော် ဒီဆုကို မရနိုင်ပါဘူး။ အသင်းဖော်တွေကို ကျေးဇူးတင်ကြောင်း ပြောပါရစေ”
ဟာလန်းဟာ မန်စီးတီးအသင်းအတွက် ပြိုင်ပွဲပေါင်းစုံ ၅၁ ဂိုး သွင်းယူထားပြီး ပရီးမီးယားလိဂ်မှာ သွင်းဂိုး ၃၅ ဂိုးနဲ့ တစ်ရာသီအတွင်း ဂိုးအများဆုံးသွင်းသူအဖြစ် စံချိန်သစ် တင်ထားနိုင်ပါတယ်။
Ref : ESPN
မေ ၉၊ ၂၀၂၃
M-Media
-ဆော်ဒီကလပ် အလ် ဟီလာလ်အသင်းနဲ့ မက်ဆီတို့အကြား အပြောင်းအရွှေ့အတွက် သဘောတူညီမှု ရသွားပြီလို့ ပြင်သစ်နဲ့ ဆော်ဒီမီဒီယာတွေက ဒီကနေ့မှာ ဖော်ပြပါတယ်။
အလ်ဟီလာလ်အသင်းဟာ ဆော်ဒီလိဂ်မှာ ရော်နယ်ဒိုကစားနေတဲ့ အလ်နဆာရ်အသင်းနဲ့ ပြိုင်ဘက်ဖြစ်ပါတယ်။
မက်ဆီလက်မှတ်ထိုးမယ့် လုပ်ခလစာတန်ဖိုးဟာ ပေါင် ၅၂၂ သန်း ရှိမယ်လို့ ပြင်သစ်မီဒီယာတွေမှာ ဖော်ပြပါတယ်။ AFP သတင်းဌာနကလည်း အပြောင်းအရွှေ့အတွက် သဘောတူညီချက် ရရှိသွားပြီလို့ ဖော်ပြပါတယ်။
ပီအက်စ်ဂျီအသင်းကတော့ AFP ရဲ့ မေးမြန်းမှုမှာ ဒီကိစ္စအတွက် မှတ်ချက်မပေးခဲ့ဘဲ မက်ဆီရဲ့ စာချုပ်ဟာ ဇွန်လ ၃၀ ရက်နေ့အထိ သက်တမ်းရှိတယ်လို့ တုန့်ပြန်ပြောကြားခဲ့ပါတယ်။
မက်ဆီရဲ့ ဇနီး အန်တိုနီလာက ဆော်ဒီကို မလိုက်ချင်ဘဲ ကလေး ၃ ယောက်နဲ့အတူ ဥရောပမှာပဲ နေချင်တယ်လို့ ဆိုပါတယ်။
Ref : Daily Mail
မေ ၅၊ ၂၀၂၃
M-Media
-မနေ့က အူဒီးနီးစ်အသင်းနဲ့ တစ်ဂိုးစီ သရေကျသွားတဲ့ နာပိုလီအသင်းဟာ စောစောစီးစီးပဲ စီးရီးအေချန်ပီယံ ဖြစ်လာပါတယ်။
၅ ပွဲကစားဖို့ ကျန်နေသေးပေမယ့် ဒုတိယနေရာက လာဇီယိုအသင်းကို နာပိုလီက ၁၆ မှတ်အထိဖြတ်ကာ ဗိုလ်စွဲခဲ့တာပါ။
အသင်းသမိုင်းတစ်လျှောက် စီးရီးအေမှာ တတိယအကြိမ်မြောက် ဗိုလ်စွဲခဲ့တာဖြစ်ပါတယ်။ ဒီတစ်ကြိမ် စကူဒက်တိုဖလားရဖို့ နာပိုလီအသင်းဟာ ၃၃ နှစ်လောက် စောင့်လိုက်ရပါတယ်။
တကယ်တော့ နာပိုလီပရိတ်သတ်တွေဟာ ပြီးခဲ့တဲ့တစ်ပတ်ကတည်းက အောင်ပွဲခံဖို့ ပြင်ဆင်ခဲ့ကြတာပါ။ အနိုင်ရရင် ဖလားရမှာဖြစ်ပေမယ့် သရေကျခဲ့တာကြောင့် အူဒီးနီးစ်နဲ့ အ၀ေးကွင်းပွဲအထိ စောင့်ခဲ့ရပါတယ်။
ပွဲအပြီးမှာတော့ ပရိတ်သတ်တွေဟာ အူဒီးနီးစ်ကွင်းထဲအထိ ၀င်ရောက်အောင်ပွဲခံခဲ့ကြပါတယ်။
အသင်းအခြေစိုက်ရာ နေပယ်မြို့မှာလည်း ပရိတ်သတ်တွေဟာ ပုံစံမျိုးစုံနဲ့ တစ်ညလုံး အောင်ပွဲခံခဲ့ကြပါတယ်။
အနိမ့်အမြင့် အတက်အကျ
အီတလီဘောလုံးလောကမှာ နာပိုလီအသင်းရဲ့ ရွှေရောင်နေ့ရက်တွေဟာ အာဂျင်တီးနားဂန္တ၀င် မာရာဒိုနာရောက်လာတဲ့ ၁၉၈၄ ခုနှစ် ဇူလိုင်လမှာ စတင်ပါတယ်။
မာရာဒိုနာ အသင်းခေါင်းဆောင်အဖြစ် ဦးဆောင်တဲ့ နာပိုလီအသင်းဟာ ၁၉၈၇ ဘောလုံးရာသီမှာ စီးရီးအေဖလားကို ပထမဆုံးအကြိမ် ရရှိခဲ့ပါတယ်။ အီတလီတောင်ပိုင်းအခြေစိုက် အသင်းတွေထဲမှာ ပထမဆုံး စီးရီးအေချန်ပီယံဘွဲ့ ဆွတ်ခူးနိုင်ခဲ့တာ ဖြစ်ပါတယ်။
နောက်ထပ် ၃ နှစ်အကြာ ၁၉၉၀ မှာ နာပိုလီအသင်း ဒုတိယအကြိမ် စကူဒက်တိုဖလားကို ရရှိခဲ့ပါတယ်။ ဒါပေမယ့် ဒီအောင်မြင်မှုကို ရေရှည်ထိန်းမထားနိုင်ပါဘူး။
ဘဏ္ဍာရေးအခက်အခဲတွေနဲ့ နောက်ပိုင်းမှာ ရင်ဆိုင်ခဲ့ရပြီး ဒေ၀ါလီခံခဲ့ရကာ အီတလီ ပရော်ဖက်ရှင်နယ် ဘောလုံးလောကမှာ အနိမ့်ဆုံးအဆင့်ဖြစ်တဲ့ စီးရီးစီအထိ ရောက်ရှိသွားပါတယ်။
တစ်ကျော့ပြန်အောင်မြင်မှုအတွက် အလှည့်အပြောင်းဟာ ရုပ်ရှင်ထုတ်လုပ်သူ Aurelio de Laurentiis အသင်းကို ၀ယ်ယူလိုက်တဲ့ ၂၀၀၄ ခုနှစ်မှာ စတင်ခဲ့ပါတယ်။
အသင်းဟာ တစ်ဖြည်းဖြည်း အခြေအနေ ပြန်ကောင်းလာပေမယ့် ၁၉၉၀ ပြည့်နှစ်တွေက အောင်မြင်မှုမျိုးကတော့ ၀ေးကွာနေဆဲပါ။ ၂၀၀၇ ခုနှစ်မှာ စီးရီးအေကို ပြန်ရောက်လာခဲ့ပြီးတဲ့နောက် ရေရှည်မှာ အောင်မြင်မှုရဖို့အတွက် အသေအချာ ပြင်ဆင်လာခဲ့ပါတယ်။
စီးရီးအေ အလယ်အလတ်အသင်း ဘ၀ကနေ ၂၀၁၅-၁၆ ဘောလုံးရာသီမှာ ဒုတိယချိတ်ကာ ချန်ပီယံဘွဲ့ကို စိန်ခေါ်နိုင်တဲ့အသင်းအဖြစ် သတ်မှတ်ခြင်း ခံလာရပါတယ်။
အီတလီမှာ စီးပွားရေးအရ မြောက်ပိုင်းဒေသတွေက ချမ်းသာပြီး၊ တောင်ပိုင်းဒေသတွေက ဆင်းရဲပါတယ်။ ဘောလုံးလောကမှာလည်း စီးရီးအေကို ဂျူဗင်တပ်နဲ့ အေစီ၊ အင်တာတို့လို ဘဏ္ဍာရေးအင်အားတောင့်တဲ့ မြောက်ပိုင်းအသင်းတွေကသာ စိုးမိုးထားပါတယ်။
နာပိုလီအခြေစိုက်ရာ နေပယ်မြို့ဟာ အီတလီတောင်ပိုင်းကဖြစ်ပြီး နာပိုလီပရိတ်သတ် တော်တော်များများတောင် မွေးရပ်ကိုစွန့်ခွာပြီး မြောက်ပိုင်းဒေသတွေမှာ အလုပ်သွားလုပ်ရတာဖြစ်ပါတယ်။
နာပိုလီရဲ့ အခုအောင်မြင်မှုဟာ ဘောလုံးလောကမှာသာမကဘဲ၊ လူမှုဘ၀မှာပါ မြောက်ပိုင်းသားတွေကို လက်စားချေလိုက်တာ ဖြစ်ပါတော့တယ်။
Ref: BBC