မေ ၁၊ ၂၀၂၁
M-Media
-မြန်မာစစ်တပ်ရဲ့ ညှင်းပမ်းနှိပ်စက်မှုကနေ ဖြစ်ပေါ်လာတဲ့ ဒုက္ခသည်ပြဿနာဟာ အာဆီယံနိုင်ငံတွေအတွက် ၀န်ထုပ်၀န်ပိုး ဖြစ်လာတာကြောင့် ဒါကို အာဆီယံအဖွဲ့က ထိထိရောက်ရောက် ဖြေရှင်းသင့်တယ်လို့ မလေးရှားသတင်းဌာန The Straits Times ရဲ့ ဆောင်းပါးတစ်ပုဒ်မှာ ရေးသားထားပါတယ်။
စစ်တပ်ရဲ့ ဖိနှိပ်သတ်ဖြတ်မှုကြောင့် ထွက်ပြေးလာရတဲ့ ဒုက္ခသည်တွေ အထူးသဖြင့် ရိုဟင်ဂျာတွေနဲ့ပတ်သက်ပြီး အာဆီယံနိုင်ငံတွေက ကိုင်တွယ်ဆောက်ရွက်ရ ခက်တာကို ဒီဆောင်းပါးမှာ ဖော်ပြထားသလို ဒုက္ခသည်တွေကို မြန်မာနိုင်ငံကို ပြန်ပို့ဖို့နဲ့ မြန်မာစစ်တပ်က နောက်ထပ် ဒီလိုမလုပ်အောင် ဆောင်ရွက်ဖို့ ဆောင်းပါးမှာ တိုက်တွန်းထားပါတယ်။
ရိုင်ဟင်ဂျာတွေဟာ မြန်မာနိုင်ငံသားတွေဖြစ်ပြီး နေရပ်ပြန်ရမယ့် လူတွေဖြစ်တာကြောင့် မလေးရှားက သူတို့ကို ဥပဒေကြောင်းအရ ဒုက္ခသည်အဖြစ် သတ်မှတ်လို့မရပါဘူး။ မွေးရပ်နိုင်ငံ ရှိတဲ့အတွက် မွေးရပ်ကိုပြန်ကာ မြန်မာနိုင်ငံသားဖြစ်ရေးသာ ဆောင်ရွက်ရမှာ ဖြစ်ပါတယ်။
မလေးရှားမှာ ရိုဟင်ဂျာတွေနဲ့ မြန်မာနိုင်ငံက ဒုက္ခသည်တွေကို လက်ခံထားရတာဟာ နိုင်ငံရေး၊ စီးပွားရေးနဲ့ လူမှုရေးနယ်ပယ်တွေမှာ ထိခိုက်မှုတွေ ဖြစ်နေတယ်လို့ ဆောင်းပါးမှာ ဖော်ပြထားပြီး ဧပြီ ၂၀ ရက် ကဒါပြည်နယ် ထိန်းသိမ်းရေးစခန်းကနေ ရိုဟင်ဂျာ ၅၂၇ ဦး ထွက်ပြေးလွတ်မြောက်သွားတဲ့ အဖြစ်အပျက်ကို ထောက်ပြထားပါတယ်။
ထိန်းသိမ်းရေးစခန်းကနေ ထွက်ပြေးပြီး အ၀ေးပြေးလမ်းကို ဖြတ်ပြေးတာကြောင့် ကလေးငယ်နဲ့ အမျိုးသမီးတွေ အပါအ၀င် ရိုဟင်ဂျာ ၆ ဦး ကားတိုက်သေဆုံးခဲ့ပါတယ်။
မလေးရှားက လက်နက်ကိုင်တပ်ဖွဲ့တွေ၊ အစိုးရတာ၀န်ရှိသူတွေ ပူးပေါင်းကာ ထွက်ပြေးသွားတဲ့ ရိုဟင်ဂျာတွေကို လိုက်လံရှာဖွေနေသလို မလေးရှားလူ့အဖွဲ့အစည်းအတွင်းမှာလည်း ရိုဟင်ဂျာဒုက္ခသည်ပြဿနာနဲ့ပတ်သက်ပြီး ထိထိရောက်ရောက်ဖြေရှင်းဖို့ ပိုမို တိုက်တွန်း ဆော်သြလာကြပါတယ်။
အာဆီယံသဘောတူညီချက်အရ တစ်နိုင်ငံရဲ့ ပြည်တွင်းရေးကို နောက်တစ်နိုင်ငံက ၀င်ရောက်စွက်ဖက်ခွင့် မရှိပေမယ့် နိုင်ငံတစ်နိုင်ငံက လုပ်ဆောင်နေတဲ့ မူ၀ါဒတွေဟာ တစ်ခြားတစ်နိုင်ငံကို ဒုက္ခရောက်စေတယ်ဆိုရင် ဒါဟာ ၀င်ရောက်စွက်ဖက်တယ်လို့ မှတ်ယူလို့ရကြောင်း သုံးသပ်ထားပါတယ်။
မြန်မာစစ်တပ်ဟာ အိမ်နီးချင်းနိုင်ငံတွေ ၀န်ထုပ်၀န်ပိုးဖြစ်မှာ သိိိလျက်နဲ့ ရိုဟင်ဂျာတွေကို ဌာနေကနေ မောင်းထုတ်တာဖြစ်ပြီး၊ ဒီကိစ္စအတွက် မြန်မာနိုင်ငံကသာ အပြည့်အ၀ တာ၀န်ယူရမယ်လို့လည်း ဆောင်းပါးက ဆိုပါတယ်။
ဧပြီလ ၂၀ ရက်နေ့ အဖြစ်အပျက်ဟာ ရိုဟင်ဂျာတွေနဲ့ပတ်သက်ပြီး မလေးရှားအစိုးရရဲ့ လုပ်ထုံးလုပ်နည်းအမှားကြောင့် ဖြစ်တာမဟုတ်ဘဲ မြန်မာစစ်တပ်က ဖန်တီးတဲ့ ပြဿနာကြောင့်ဖြစ်ကြောင်း၊ မြန်မာစစ်တပ်ဟာ ဒေသတွင်း မတည်မငြိမ်ဖြစ်စေမယ့်၊ မလေးရှားနိုင်ငံရဲ့ တည်ငြိမ်မှုကို ထိခိုက်စေမယ့် လုပ်ဆောင်ချက်တွေ လုပ်ဆောင်နေကြောင်း ဆောင်းပါးမှာ ပြစ်တင်ထားပါတယ်။
ရိုဟင်ဂျာတွေရဲ့ အသက်ရှင်ရပ်တည်မှု ပိုမိုကောင်းမွန်အောင် မလေးရှားက ခေတ္တသာ ဆောင်ရွက်ပေးထားနိုပြီး၊ အခြားနိုင်ငံတစ်ခုက မူ၀ါဒတွေကြောင့် ဖြစ်ပေါ်လာတဲ့ ဒီပြဿနာကို အပြီးသတ်အဖြေထုတ်ပေးလို့ မရဘူးလို့လည်း ဆိုပါတယ်။
ရိုဟင်ဂျာပြဿနာကို မြန်မာစစ်တပ်က ဖန်တီးတာဖြစ်ပြီး ဒါကို အရေးယူဆောင်ရွက်မှု မလုပ်နိုင်တာကြောင့် စစ်တပ်ဟာ ဒီကိစ္စကို ဆက်လက်လုပ်ဆောင်နေတယ်လို့ ဆောင်းပါးမှာ ထည့်သွင်းရေးသားထားပါတယ်။
တစ်ခြားနိုင်ငံရဲ့ ပြည်တွင်းရေးကို ၀င်မစွက်ရဆိုတဲ့ အာဆီယံရဲ့မူကြောင့် မြန်မာနိုင်ငံက ရိုဟင်ဂျာတွေ လူမျိုးတုန်းသတ်ဖြတ်ခံရမှု ပြဿနာကို မဖြေရှင်းနိုင်တာ အတော်ကြာပြီဖြစ်ကြောင်း၊ မြန်မာနိုင်ငံက ဖန်တီးတဲ့ ဒီပြဿနာဟာ မလေးရှားလို နိုင်ငံမျိုးကို တစ်နှစ်ထက်တစ်နှစ် ပိုမို ထိခိုက်စေတာကြောင့် ဒီကိစ္စကို အာဆီယံက ဆက်လက် ခွင့်မပြုသင့်တော့ဘူးလို့ ဆောင်းပါးကို အဆုံးသတ်ထားပါတယ်။
Ref: The Strait Times
