Tag: Myanmar Military

ဧပြီ ၂၈၊ ၂၀၂၂

M-Media 

-မြန်မာစစ်တပ်က တပ်ဖွဲ့၀င် ၃ ဦးကို စစ်ဖက်ဆိုင်ရာ လေ့ကျင်သင်ကြားပေးမှုတွေ လုပ်ဆောင်သွားမယ်လို့ ဂျပန်ကာကွယ်ရေး၀န်ကြီးက ထုတ်ဖော်ပြောကြားလိုက်ပါတယ်။

နိုင်ငံတကာအသိုင်းအ၀ိုင်းက ဒါဟာ စစ်တပ်ရဲ့ ရက်စက်ကြမ်းကြုတ်မှုတွေမှာ ဂျပန်နိုင်ငံကပါ ကြံရာပါ ဖြစ်သွားနိုင်တယ်လို့ သတိပေးလိုက်ပါတယ်။ 

စစ်တပ်က ဗိုလ်လောင်းနှစ်ဦးနဲ့ အရာရှိတစ်ဦးကို ဂျပန်ကာကွယ်ရေးတက္ကသိုလ်နဲ့ လေကြောင်းကာကွယ်ရေး သင်တန်းကျောင်းတွေမှာ လေ့ကျင်သင်ကြားပေးမှာ ဖြစ်ပါတယ်။ 

ဒါဟာ ၂၀၂၁ ခုနှစ် စစ်တပ် အာဏာသိမ်းပြီးနောက်ပိုင်း ဂျပန်နိုင်ငံက စစ်ကောင်စီတပ်ဖွဲ့၀င်တွေကို ဒုတိအကြိမ်မြောက် လေ့ကျင့်သင်ကြားပေးမှု ဖြစ်ပါတယ်။ 

တိုင်းရင်းသားဒေသတွေနဲ့ ရိုဟင်ဂျာတွေအပေါ် ကျူးလွန်မှုကြောင့် မြန်မာစစ်တပ်ဟာ အရင်ကတည်းက နာမည်ပျက် ရှိနေတာဖြစ်ပြီး၊ အခုတစ်ကြိမ် အာဏာသိမ်းပြီးနောက်ပိုင်းမှာ နိုင်ငံတကာအသိုင်းအ၀ိုင်းက မြန်မာစစ်တပ်နဲ့ ပူးပေါင်းဆောင်ရွက်မှုတွေကို ရပ်ဆိုင်းခဲ့ကြပါတယ်။ 

လူ့အခွင့်အရေးစောင့်ကြည့်ရေးအဖွဲ့ HRW က ဂျပန်ဟာ မြန်မာနိုင်ငံရဲ့ အနာဂတ်ကို ကူညီပေးချင်တယ်ဆိုရင် မြန်မာစစ်တပ်နဲ့ ပူးပေါင်းဆောင်ရွက်မှုကို ရပ်ဆိုင်းရမှာဖြစ်ပြီး စစ်ခေါင်းဆောင်တွေနဲ့ သူတို့ပိုင်ဆိုင်တဲ့ လုပ်ငန်းတွေကို ပိတ်ဆို့အရေးယူမှုတွေ လုပ်ဆောင်ရမယ်လို့ တိုက်တွန်းခဲ့ပါတယ်။ 

ဒီလိုမဟုတ်ဘဲ မြန်မာစစ်တပ်ကို ဆက်လက် ပံ့ပိုးကူညီပေးနေမယ်ဆိုရင် စစ်တပ်ရဲ့ ရက်စက်ကြမ်းကြုတ်မှုတွေမှာ တိုက်ရိုက်၊ ဒါမှမဟုတ် သွယ်၀ိုက်ပြီး ကြံရာပါဖြစ်လိမ့်မယ်လို့လည်း သတိပေးခဲ့ပါတယ်။ 

Ref: HRW 

ဧပြီ ၂၂၊ ၂၀၂၂

M-Media 

-စစ်အာဏာရှင်ဟောင်းနဲ့ ဆက်နွယ်တဲ့ တာ၀န်ရှိသူတွေ၊ ခရိုနီတွေကို အာဏာသိမ်းစစ်ကောင်စီက လတ်တလော ဖမ်းဆီးမှုဟာ အာဏာရှင်ဟောင်းနဲ့ အာဏာရှင်အသစ်အကြား ခွာပြဲမှုကို ပြနေတယ်လို့ ကျွမ်းကျင်သူတွေက သုံးသပ်ပါတယ်။

ဦးသန်းရွှေအဖွဲ့နဲ့ပေါင်းပြီး ကြီးပွားချမ်းသားလာတဲ့ ခရိုနီ ဇေကမ္ဘာဦးခင်ရွှေကို ဖမ်းဆီးတာ၊ အာဏာသိမ်းပြီး ကိုယ်တိုင်ခန့်ထားတဲ့ ရန်ကုန်တိုင်း ကုန်သွယ်ရေး၀န်ကြီး ဦးအောင်သန်းဦးနဲ့ ရန်ကုန်မြို့တော်၀န် ဦးဘိုဌေးတို့ကို ဖမ်းဆီးတာတွေဟာ အာဏာရှင်ဟောင်း အစွယ်အပွားတွေကို ရှင်းလင်းတာမျိုး ဖြစ်နိုင်တယ်လို့ ယူဆမှုတွေ ရှိနေပါတယ်။ 

ဦးအောင်သန်းဦးဟာ လက်ရှိ လ၀က၀န်ကြီးအဖြစ် တာ၀န်ယူထားတဲ့ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီ ဒုဥက္ကဌ ဦးခင်ရီရဲ့ တပည့်အရင်းဖြစ်ပါတယ်။

ဦးခင်ရွှေနဲ့ သားဖြစ်သူ ဇေသီဟတို့ကို စစ်ကောင်စီက မတ်လ ၂၁ ရက်နေ့မှာ ဖမ်းဆီးကာ အင်းစိန်ထောင်ထဲ ထည့်ထားပါတယ်။ ၂၀၁၈ ခုနှစ်က ရန်ကုန်မြို့ ဗဟန်းမြို့နယ် စစ်တပ်ပိုင်မြေမှာလုပ်တဲ့ ဆောက်လုပ်ရေးလုပ်ငန်းတစ်ခုနဲ့ ဆက်နွယ်ပြီး ဖမ်းဆီးခံခဲ့ရတာပါ။ 

စစ်တပ်ကို မြေငှားခက ဒေါ်လာ သန်း ၂၀ မပေးတာ၊ သမိုင်း၀င် အဆောက်အဦး ဖျက်ဆီးတာတွေအတွက် ဖမ်းဆီးတာလို့ ပေါက်ကြားလာတဲ့ ရဲတပ်ဖွဲ့စာရွက်စာတမ်းတွေကို ကိုးကားပြီး ပြည်တွင်းမီဒီယာတွေက ဖော်ပြပါတယ်။ 

ဦးခင်ရွှေဟာ စစ်အာဏာရှင်ဟောင်း ဦးသန်းရွှေ ဓားထက်နေတဲ့ ၁၉၉၀ ပြည့်နှစ်မှာ ဆောက်လုပ်ရေးလုပ်ငန်းစု ထူထောင်ပြီး အာဏာရှင်အုပ်စုနဲ့ပေါင်းကာ ကြီးပွားလာသူ ဖြစ်ပါတယ်။ 

အာဏာသိမ်းစစ်ကောင်စီက သူ့ကိုဖမ်းဆီးမှုဟာ စီးပွားရေးကိစ္စ တစ်ခုတည်းကြောင့်မဟုတ်ဘဲ ဦးသန်းရွှေနေရာကို ဆက်ခံမယ့်သူအဖြစ် တစ်ချိန်က ရေပန်းစားခဲ့တဲ့ ဦးရွှေမန်းနဲ့ နီးစပ်မှုကြောင့်လည်း ပါ၀င်တယ်လို့ စီးပွားရေးအသိုင်းအ၀ိုင်းနဲ့ ကျွမ်းကျင်သူတွေက သုံးသပ်ပါတယ်။ ဦးခင်ရွှေရဲ့သမီးဟာ ဦးရွှေမန်းသားနဲ့ လက်ထပ်ထားတာပါ။ 

ဦးရွှေမန်းဟာ ၂၀၁၀ မှာ အာဏာရတဲ့ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီရဲ့ ခေါင်းဆောင်ဖြစ်ခဲ့ပေမယ့် ၂၀၁၅ ခုနှစ်မှာ ဖြုတ်ချခံလိုက်ရပါတယ်။ ဒေါ်အောင်ဆန်းစုကြည်နဲ့ နီးစပ်တဲ့အတွက် ဒီလို ဖြုတ်ချခံလိုက်ရတာလို့ သတင်းထွက်ခဲ့ပြီး အဲဒီနောက်ပိုင်း ကြံ့ခိုင်ရေးပါတီနဲ့ စစ်တပ်ခေါင်းဆောင်ပိုင်းက သူ့ကို အတွင်းစည်းကနေ ဖယ်ထုတ်လိုက်ပါတယ်။ 

ဦးခင်ရွှေဟာ တရုတ်ကုမ္ပဏီတစ်ခုနဲ့ စီးပွားရေးလုပ်နိုင်ဖို့အတွက် ဦးရွှေမန်းထံ ချဥ်းကပ်ခဲ့ပြီး ဒါကို အာဏာသိမ်းခေါင်းဆောင် ဗိုလ်ချုပ်မှူးကြီးမင်းအောင်လှိုင်က ဒေါသထွက်ခဲ့တယ်လို့ သတင်းတွေ ထွက်ခဲ့ပါတယ်။

ဦးခင်ညွန့်လက်ထွက် ခရိုနီဖြစ်တာ၊ တရုတ်လူမျိုးဖြစ်နေတာ၊ ကော့မှူးမဲဆန္ဒနယ်မှာ ဒေါ်အောင်ဆန်းစုကြည့်ကို မဲထည့်ဖို့ တိုက်တွန်းတာ စတဲ့ကိစ္စတွေကြောင့် မင်းအောင်လှိုင်နဲ့ သူ့အပေါင်းအပါတွေက ဦးခင်ရွှေကို မျက်စိစပါးမွှေး စူးနေတယ်လို့လည်း နီးစပ်သူတွေက ပြောပါတယ်။ 

လက်ရှိ စစ်အာဏာရှင်ဟာ ဦးရွှေမန်းကို စက္ကူကျားလို့သာ သဘောထားပြီး၊ အနာဂတ် နိုင်ငံရေးကစားပွဲတွေမှာ ထည့်သုံးဖို့မရှိဘူးလို့ စစ်ကောင်စီနဲ့ နီးစပ်သူတွေက ဆိုပါတယ်။ 

ပြည်တွင်းက နိုင်ငံရေးကျွမ်းကျင်သူတစ်ဦးက ဦးခင်ရွှေကို ဖမ်းဆီးလိုက်မှုဟာ စစ်တပ်နဲ့ ခရိုနီတွေအကြား ကျွန်းကိုင်းမှီ ကိုင်းကျွန်းမှီအခြေအနေကို ပျက်ယွင်းသွားစေမှာ မဟုတ်ပေမယ့် ငါတို့ကို ဘယ်သူမှ ထိလို့ရမှာမဟုတ်ဘူးဆိုတဲ့စိတ်မျိုး မထားဖို့ အာဏာရှင်ဟောင်းနဲ့ ဆက်နွယ်တဲ့ ခရိုနီတွေကို သတိပေးလိုက်တာဖြစ်တယ်လို့ သုံးသပ်ပါတယ်။ 

လက်ရှိ မြန်မာနိုင်ငံက ခရိုနီတွေဟာ ဒီအခြေအနေကို သတိထားနေပြီး တစ်ချို့ဆို ပြည်ပကို ရှောင်တိမ်းနေကြပါတယ်။ 

မြန်မာနိုင်ငံက တရုတ်စီးပွားရေးလုပ်ငန်းရှင်တစ်ဦးက တရုတ်သမ္မတ ရှီကျင့်ဖျင်ဟာ သမ္မတဟောင်း ကျန်ဇီမင်းရဲ့ အစွယ်အပွားတွေကို တစ်ဖြည်းဖြည်း ရှင်းလင်းတဲ့ လမ်းစဥ်အတိုင်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က လိုက်လုပ်နေတယ်လို့ သုံးသပ်ပါတယ်။

Ref: Nikkei Asia