Tag: north korea

မေ ၁၂၊ ၂၀၂၂

M-Media 

-ကိုဗစ်ကပ်ရောဂါကူးစက်မှု ဖြစ်ပွားနေတာကြောင့် တစ်နိုင်ငံလုံးကို လော့ဒေါင်းချလိုက်တယ်လို့ မြောက်ကိုရီးယား နိုင်ငံပိုင်သတင်းဌာနက ထုတ်ပြန်ပါတယ်။ 

ဒါဟာ တစ်ကမ္ဘာလုံး ကိုဗစ်ကူးစက်ပြီး ၂ နှစ်ကျော်ကြာမှ ပထမဆုံး တရား၀င်ထုတ်ပြန်မှု ဖြစ်ပါတယ်။  မြို့တော်ပြုံယမ်းမှာ လွန်ခဲ့တဲ့ ၄ ရက်ကစတင်ကာ အိုမီခရွန် ကူးစက်နေတာလို့ဆိုပြီး အရေအတွက်ကို မထုတ်ပြန်ပါဘူး။ 

ခေါင်းဆောင်ကင်ဂျုံအွန်ဟာ အရေးပေါ်အခြေအနေကြေငြာကာ လော့ဒေါင်းချဖို့၊ လုပ်ငန်းတွေမှာ ကိုဗစ်ကန့်သတ်မှုတွေ လုပ်ဆောင်ဖို့ အမိန့်ပေးခဲ့တယ်လို့လည်း နိုင်ငံပိုင်သတင်းဌာနက ထည့်သွင်းကြေငြာခဲ့ပါတယ်။

လူဦးရေ ၂၅ သန်းရှိတဲ့ မြောက်ကိုရီးယားမှာ အရင်ကတည်းက ကိုဗစ်ကူးစက်တာတွေ ရှိနိုင်တယ်လို့ ပညာရှင်တွေက သုံးသပ်ပါတယ်။ 

နိုင်ငံတကာအသိုင်းအ၀ိုင်းက AstraZeneca နဲ့ Sinovac တို့လို ကိုဗစ်ကာကွယ်ဆေး သန်းနဲ့ချီ ထောက်ပံ့ဖို့ ပြီးခဲ့တဲ့နှစ်မှာ စီစဥ်ခဲ့ပေမယ့် မြောက်ကိုရီးယားခေါင်းဆောင် ကင်ဂျုံအွန်က လက်မခံပါဘူး။ 

ကင်ဂျုံအွန်ဟာ ကိုဗစ်စဖြစ်တဲ့ ၂၀၂၀ ဇန်န၀ါရီလကတည်းက နိုင်ငံနယ်စပ်တွေကို ပိတ်ပစ်ခဲ့တာဖြစ်ပါတယ်။ 

Ref: BBC

ဖေဖော်၀ါရီ ၆၊ ၂၀၂၂
M-Media

-ကမ္ဘာတစ်၀ှမ်း ဆိုက်ဘာတိုက်ခိုက်မှုကနေ ရရှိတဲ့ အကျိုးအမြတ်နဲ့ မြောက်ကိုရီးယားဟာ နျူနဲ့ ဒုံးကျည်စီမံကိန်းကို လည်ပတ်နေတယ်လို့ ကုလသမဂ္ဂရဲ့ အစီရင်ခံစာတစ်ခုမှာ ဖော်ပြထားပါတယ်။

မြောက်ကိုရီးယားအပေါ် စီးပွားရေးပိတ်ဆို့မှု စောင့်ကြည့်အဖွဲ့ရဲ့ အဲဒီအစီရင်ခံစာကို ကုလလုံခြုံရေးကောင်စီ မြောက်ကိုရီးယား စီးပွားရေးပိတ်ဆို့မှု ကော်မတီကို မနေ့က တင်သွင်းခဲ့တာပါ။

တိုက်ချင်းပစ်ဒုံးကျည်တွေ၊ နျူလက်နက်စမ်းသပ်မှုတွေကို မတွေ့ရတော့ပေမယ့် ဆိုက်ဘာနည်းလမ်းတွေ၊ တစ်ခြားနိုင်ငံတွေနဲ့ ပူးတွဲသုတေသနတွေကနေတစ်ဆင့် မြောက်ကိုရီးယားက ဒီစီမံကိန်းတွေကို ဆက်လက်လုပ်ဆောင်နေတယ်လို့ အစီရင်ခံစာက ဆိုပါတယ်။

ဇန်န၀ါရီလအတွင်း မြောက်ကိုရီးယားက ဒုံးကျည်စမ်းသပ်မှု ၉ ကြိမ်လုပ်ဆောင်ခဲ့ပြီး ဒါဟာ သမိုင်းတစ်လျှောက် တစ်လအတွင်း အများဆုံးစမ်းသပ်မှု ဖြစ်ပါတယ်။ ဒီစီမံကိန်းကို ဆိုက်ဘာတိုက်ခိုက်မှုကနေ ရရှိတဲ့အကျိုးအမြတ်နဲ့ လုပ်ဆောင်နေတာလို့ လုံခြုံရေးကောင်စီကို တင်သွင်းတဲ့ အစီရင်ခံစာမှာ ဖော်ပြထားပါတယ်။

၂၀၂၀ ခုနှစ်ကနေ ၂၀၂၁ ခုနှစ် နှစ်လယ်ပိုင်းအထိ မြောက်အမေရိက၊ ဥရောပနဲ့ အာရှမှာရှိတဲ့ ဒစ်ဂျစ်တယ်ငွေကြေးအိတ်ချိန်း အနည်းဆုံး ၃ ခုကို ဆိုက်ဘာတိုက်ခိုက်မှု လုပ်ဆောင်ရာကနေ မြောက်ကိုရီယား ကန်ဒေါ်လာ သန်း ၅၀ ကျော် ရရှိခဲ့တယ်လို့ အစီရင်ခံစာမှာ ဖော်ပြထားပါတယ်။

ဆိုက်ဘာလုံခြုံရေး စောင့်ကြည့်အဖွဲ့ Chainalysis ရဲ့ ပြီးခဲ့တဲ့လက ထုတ်ပြန်တဲ့ အစီရင်ခံစာမှာ ၂၀၂၁ ခုနှစ်အတွင်း ဒစ်ဂျစ်တယ်ငွေကြေးပလက်ဖောင်း ၇ ခုကို တိုက်ခိုက်ခဲ့ပြီး စုစုပေါင်းတန်ဖိုးက ဒေါ်လာသန်း ၄၀၀ ကျော် ရှိတယ်လို့ ဖော်ပြထားပါတယ်။

၂၀၁၉ခုနှစ် ဆိုက်ဘာတိုက်ခိုက်မှုကနေ မြောက်ကိုရီယားဟာ ဒေါ်လာ ၂ ဘီလီယံလောက် ရရှိခဲ့ပါတယ်။

Ref: Reuters

အောက်တိုဘာ ၁၂၊ ၂၀၂၁

M-Media

-အမေရိကန် ရန်လိုတဲ့မူ၀ါဒတွေကို တွန်းလှန်နိုင်ဖို့အတွက် ‘ဘာမထီစစ်တပ်’ ကို တည်ဆောက်သွားမယ်လို့ မြောက်ကိုရီးယားခေါင်းဆောင် ကင်ဂျုံအွန်က ပြောကြားလိုက်ပါတယ်။

ဒီကနေ့ မြို့တော်ပြုံယမ်းမှာလုပ်တဲ့ Self-Defence 2021 လက်နက်ပြပွဲကို ကင်ဂျုံအွန်ကိုယ်တိုင် တက်ရောက် မိန့်ခွန်းပြောကြားခဲ့တာပါ။ ဒီပြပွဲမှာ အကြီးစား ဒုံးကျည်အများအပြား၊ တင့်ကားနဲ့ အခြားလက်နက်တွေကို မြောက်ကိုရီးယားက ထုတ်ပြခဲ့ပါတယ်။

ကင်ဂျုံအွန်က ဒီလက်နက်တွေဟာ တိုင်းပြည်ရဲ့ အချုပ်အခြာအာဏာကို ကာကွယ်ဖို့ဖြစ်ပြီး တစ်ခြားနိုင်ငံကိုသွားရောက်တိုက်ခိုက်ဖို့ မဟုတ်ဘူးလို့ ပြောပါတယ်။ တောင်နဲ့ မြောက်ကိုရီယားကြားမှာ အမေရိကန်က သွေးထိုးလှုံ့ဆော်ပေးနေပြီး ရန်လိုတဲ့ နိုင်ငံအဖြစ် မိမိတို့က အမေရိကန်ကို သတ်မှတ်ထားတယ်လို့လည်း ဆိုပါတယ်။

တောင်ကိုရီးယားရဲ့ စစ်အင်အားတိုးမြှင့်မှုတွေကို ကင်ဂျုံအွန်က မိန့်ခွန်းမှာ ထည့်သွင်းပြောဆိုခဲ့ပြီး အမေရိကန်နဲ့ တောင်ကိုရီးယားတို့ဟာ ကိုရီးယားကျွန်းဆွယ် ငြိမ်းချမ်းရေးကို ခြိမ်းခြောက်နေတယ်လို့လည်း ဆိုပါတယ်။

မြောက်ကိုရီးယားက အခုလို လက်နက်ပြပွဲလုပ်တာဟာ မကြုံစဖူးကိစ္စဖြစ်ပြီး၊ လက်နက်အင်အားကို ထုတ်ပြလိုက်တာ ဖြစ်တယ်လို့ ကျွမ်းကျင်သူတွေက သုံသပ်ပါတယ်။

Ref: BBC

စက်တင်ဘာ ၁၃၊ ၂၀၂၁
M-Media

-မဟာဗျူဟာမြောက် တာဝေးပစ် ခရုဇ်ဒုံးကျည်အသစ်ကို ပြီးခဲ့တဲ့ သီတင်းပတ်အဆုံးပိုင်းမှာ စမ်းသပ်ခဲ့တယ်လို့ မြောက်ကိုရီးယားက ကြေငြာလိုက်ပါတယ်။

လွန်ခဲ့တဲ့ ၂ နှစ်ကတည်းက ဖန်တီးလာတဲ့ ဒီဒုံးကျည်တွေဟာ မိုင် ၉၃၀ အကွာအဝေးမှာရှိတဲ့ ပစ်မှတ်တွေကို အောင်မြင်စွာ ထိမှန်ခဲ့တယ်လို့ မြောက်ကိုရီးယားနိုင်ငံပိုင်သတင်းဌာနက ထုတ်ပြန်ပါတယ်။

တိုင်းပြည်ရဲ့စစ်အင်အား အားကောင်းလာအောင် လုပ်ဆောင်ရေးဆိုတဲ့ ခေါင်းဆောင် ကင်ဂျုံအွန်ရဲ့ တိုက်တွန်းဆော်ဩမှုနဲ့အညီ ဖန်တီးထုတ်လုပ်တဲ့ ဒီဒုံးကျည်သစ်ဟာ အလွန်အရေးပါတဲ့ မဟာဗျူဟာမြောက် လက်နက်ဖြစ်တယ်လို့လည်း ဆိုပါတယ်။

မြောက်ကိုရီးယားဟာ နောက်ဆုံးဒုံးကျည်စမ်းသပ်မှုကို အခုနှစ် မတ်လမှာ လုပ်ဆောင်ခဲ့တာဖြစ်ပြီး တာတိုပစ်ဒုံးကျည်တွေ ဖြစ်ပါတယ်။ ထရမ့်အစိုးရလက်ထက်က ကိုရီးယားကျွန်းဆွယ် နျူကင်းစင်ရေး ကင်ဂျုံအွန်နဲ့ ထိပ်သီးဆွေးနွေးပွဲတွေ လုပ်ဆောင်ခဲ့ပေမယ့် ထိရောက်တဲ့ရလဒ် ထွက်မလာပါဘူး။

ခရုဇ်ဒုံးကျည်တစ်ခုကို ဗျူဟာမြောက်လက်နက်အဖြစ် ပြောဆိုတာဟာ နျူထိပ်ဖူးတပ်နိုင်တဲ့ ဒုံးကျည်အမျိုးအစားလို့ သွယ်၀ိုက်ပြောကြားတာဖြစ်ကြောင်း ကျွမ်းကျင်သူတွေက သုံးသပ်ပါတယ်။

တောင်ကိုရီးယား စစ်ဦးစီးအရာရှိချုပ်က အခုကိစ္စကို အမေရိကန်ထောက်လှမ်းရေးဌာနနဲ့ ပူးပေါင်းကာ သုံးသပ်နေတယ်လို့ဆိုပြီး အသေးစိတ်အချက်အလက်တွေကို မပြောခဲ့ပါဘူး။

Ref: Aljazeera